‘Mi Wantem Mekem Wok Blong God Bifo Mi Ded’

STORI BLONG MAMIE FREE

LONG 1990, faet i kamaot bitwin ol manples long Laeberia. Faet ya i kam strong moa mekem se Mamie, wan smol gel we i gat 12 yia, wetem famle blong hem, we oli blong laen blong ol man Kran, oli haed i stap long haos blong olgeta long Monrovia, bigfala taon blong Laeberia. Mamie i stori se: “Wantaem nomo mifala i harem wan samting i bosta long haos klosap long mifala. Wan bom i foldaon long haos ya nao bigfala faea i stat. Faea ya i kam kasem haos blong mifala tu.” Ale, nating se ol man oli stap faet olbaot long rod, Mamie i ronwe wetem mama blong hem mo angkel blong hem, we i smol brata blong mama blong hem.

Mamie i tingtingbak i se: “Wantaem nomo wan samting i kilim mi.”

“Nao mama blong mi i singaot se: ‘?Wanem i mekem yu?’”

Mi ansa se: “!Wan samting i kilim mi! Ating wan bolet ya.”

Mamie i foldaon, bodi blong hem i soa mo hem i prea se: “Plis, God, yu harem mi. Mi ting se bambae mi ded, be mi wantem mekem wok blong yu bifo mi ded.” Hem i talem tok ya finis nao ae blong hem i dak.

Ol man we oli stap raonabaot long hem oli ting se hem i ded finis, ale oli talem se bambae oli berem hem long wan ples klosap long solwota. Be mama blong hem i no wantem. Hem i wantem karem Mamie i go long hospital. Oli kasem hospital, be sore tumas, hospital i no moa gat samting blong tritim man from we i gat fulap man, woman, mo pikinini we olgeta tu oli kam from we oli kasem kil. Nating se i olsem, oli stap long hospital, nao long naet, angkel blong Mamie we hem tu i bin kasem kil, i ded. Mamie i laef i stap, be hem i no save wokbaot, tufala leg blong hem i ded, stat daon i kam kasem antap.

Blad i stap ron olbaot insaed long bodi blong hem mo i harem i soa bigwan. Fo manis biaen, ol dokta oli tekem eksre blong traem faenem se bolet i stap wea. Oli luk se bolet i fas stret bitwin long hat mo waetleva blong hem. Oli talem se bambae i hadwok blong karemaot bolet ya from we hem i stap long wan ples we i no isi blong katem. Ale, mama blong hem i tekem hem i go luk wan kleva. Mamie i tingtingbak i se: “[Kleva ya] i katem mi long wan resa, ale i talem se bambae hem i putum maot blong hem i go long ples we hem i katem mo bambae i pulum bolet ya i kamaot. [Kleva ya] i tekemaot wan bolet long maot blong hem nao i talem se, ‘Saye, mi tekemaot bolet ya finis.’ Mifala i pem hem mo mifala i go.”

Be kleva ya i giaman. Taem dokta i mekem eksre long Mamie bakegen, oli luk se bolet i stap yet. Ale Mamie mo mama blong hem, tufala i go luk kleva ya bakegen. Kleva ya i talem se long naen manis bambae oli tekem eksre bakegen nao bambae oli luk se bolet ya i lus olgeta. Mamie i gobak long haos wetem mama blong hem mo tufala i wet. Mamie i tekem plante defdefren kaen meresin blong kilim soa blong hem. Ale naen manis i pas mo tufala i go mekem wan eksre bakegen. Bolet i stap yet. Taem tufala i gobak luk kleva, kleva ya i ronwe.

Naoia i mekem 18 manis we bolet ya i stap long bodi blong Mamie. Wan famle blong hem i karem hem i go long wan narafala kleva we hem i wan woman. Woman ya i no givhan nating, hem i talem nomo se long dei olsem bambae Mamie i ded, no sipos i no Mamie, be mama blong hem nao bambae i ded. Long taem ya, Mamie i gat 13 yia finis. Mamie i talem se: “Mi krae we mi krae. Be long dei ya we kleva i makemaot, i no gat wan long mitufala we i ded.”

Wan angkel blong Mamie i tekem hem i go luk wan lida blong jos we hem i gat paoa blong luk vison. Lida ya i talem se i no wan bolet we i mekem haf bodi blong Mamie i ded, be wan man i spolem hem. Hem i promes long Mamie se sipos hem i folemgud wanem we hem i talem, bambae hem i save wokbaotgud afta long wan wik nomo. Mamie i talem se: “Mi swim plante long solwota folem sam spesel fasin [we lida ya i talem], mi lego kakae, mo mi rolem mi long graon evri naet stret long medel naet, mi mekem olsem blong plante aoa. Be ol traehad ya oli blong nating nomo, mo mi stap sem mak.”

Biaen, i gat sam moa klinik we oli stat mekem wok blong tritim man, nao Mamie i gat janis blong oli karemaot bolet ya. Hem i bin safa tu yia from soa we bolet ya i mekem long hem. Hem i tingtingbak i se: “Afta we ol dokta oli katem mi, soa blong mi klosap i finis fulwan, mo i no moa had long mi blong pulum win. Nating se haf bodi blong mi daon i ded, naoia mi save stanap sipos mi holem wan woka (wan aean we i gat fo leg blong hem we man i holem blong wokbaot).”

Mamie i Mitim Ol Witnes Blong Jeova

Sam wik afta we ol dokta oli katem Mamie, mama blong hem i mitim tu Witnes blong Jeova. Mama ya i save se gel blong hem i laekem ridim Baebol, taswe hem i singaot tufala Witnes ya i kam long haos blong hem. Wantaem nomo Mamie i agri blong stadi Baebol wetem tufala. Be afta we sam manis i pas, Mamie i mas gobak long hospital, ale ol Witnes oli no moa faenem hem.

Nating se i olsem, Mamie i wantem tumas yet blong kasem save long Baebol. Taswe taem lida blong wan jos i talem se hem i wantem halpem Mamie, Mamie i agri. Wan dei, hem i stap long Sande skul, mo wan boe we i stap long klas i askem tija se, “?I tru se Jisas i sem mak long God?”

Tija i talem se: “Yes. Tufala i sem mak. Be Jisas i no sem mak we i sem mak long God.”

Mamie i tingting se: “?From wanem hem i talem se ‘i no sem mak we i sem mak’? Tok ya i no laenap. I gat wan samting i no stret long ples ya.” Ale, Mamie i no moa go long jos ya from we hem i harem se hem i no stap kasem trutok blong Baebol.

Long 1996, faet i kamaot bakegen long Monrovia. Mamie i lusum tu narafala memba blong famle blong hem bakegen, mo ol man oli laetem faea long haos blong hem bakegen. Be sam manis biaen, tufala Witnes i stap prij long ol haos wanwan nao tufala i faenem Mamie. Ale Mamie i stat stadi Baebol bakegen. Long faswan taem we hem i kam long miting, hem i sapraes blong luk se evriwan oli klinim Haos Kingdom, ol elda blong kongregesen tu oli givhan. Long sem yia ya nomo, Mamie i glad blong go long Distrik asembli ya “Ol Man Blong Talemaot Pis Blong God.” Hemia fastaem we hem i kam long wan bigfala miting blong ol Witnes blong Jeova.

Mamie i talem se: “Samting ya i tajem hat blong mi. Ol Witnes oli rili laeklaekem olgeta, nomata oli blong wanem laen. Mo ol samting i rongud from we evriwan i mekem wok blong olgeta.”

Hem i Mekem Wok Blong God Olsem We Hem i Bin Wantem Mekem

Long 1998 faet i kamaot bakegen, nao Mamie wetem mama blong hem, tufala i ronwe i go long Ivori Kos, wan kantri klosap long Laeberia. Tufala i go stap long wan kamp blong ol refuji we oli kolem Pis Taon. I gat samwe 6,000 narafala man Laeberia long kamp ya. Mamie i gohed blong stadi Baebol wetem ol Witnes mo bilif blong hem i gru kwik. Nao, hem i wantem talemaot bilif blong hem long ol narafala. Ale ol Kristin brata sista oli halpem hem, oli stap pusum hem long wiljea i go long wok blong prij. Long rod ya, Mamie i gat janis blong prij long plante narafala refuji long kamp ya.

Nating se hem i no save wokbaot, hem i kam long ol miting long Haos Kingdom we i stap 6 kilometa longwe. Ale long Mei 14, 2000 hem i go long wan spesel dei asembli we i stap 190 kilometa longwe, mo i tekem baptaes blong givim laef blong hem long God. (Matiu 28:​19, 20) Wota i ron long ae blong plante Kristin brata sista, taem oli luk we samfala oli karem Mamie i godaon long krik blong tekem baptaes. Taem hem i kamaot long wota, hem i glad we i glad bigwan.

Naoia Mamie i stap long wan refuji kamp long Gana. Mak blong hem i blong kam wan fultaem paenia, hemia wok blong talemaot gud nius fultaem. Mama blong hem tu i stat stadi Baebol wetem ol Witnes blong Jeova mo i stap joen long wok blong prij. Tufala tugeta i stap wet blong luk promes ya blong Baebol i kamtru we i talem se “olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.”​—Aesea 35:​5-7.

[Tok blong pija long pej 22]

Bolet ya we oli karemaot long bodi blong Mamie

[Tok blong pija long pej 23]

Taem we Mamie i tekem baptaes

[Tok blong pija long pej 23]

Mamie i mekem Baebol stadi long mama blong hem, Emma