Yumi Harem Nogud Tumas Taem Wan Famle No Fren i Ded

Nicolle i wan smol gel we bodi blong hem i strong. Be wan naet, hem i harem nogud from we hed blong hem i soa. Ale papa mo mama blong hem, tufala i karem hem i go long hospital. Long nekis naet, taem Nicolle i slip yet long hospital, hem i kasem hatatak. Taem ol dokta oli jekem Nicolle bakegen, oli faenemaot se hem i kasem wan sik we i no kasem plante man. Sik ya i kasem waetleva blong hem, tufala kidni blong hem, mo hat blong hem. Foti eit aoa i no pas yet, be Nicolle i ded. Hem i gat tri yia nomo.

WAN samting we i mekem ol man oli harem nogud tumas, hemia taem wan we oli laekem hem tumas i ded. Samtaem man i save harem se sore blong hem i bigwan tumas, olsem se bambae hem i no save harem gud bakegen samtaem. Isabelle we i mama blong smol gel ya, i talem se: “Mi mi sore we mi sore long Nicolle. Mi tingbaot fasin blong hem blong putum tufala han blong hem i goraon long mi, kaen fasin blong hem mo smel blong hem. Mi tingbaot se evri dei hem i givim wan flaoa long mi. Mi mi stap tingbaot hem oltaem.”

?Olsem wanem? ?Yu tu yu harem nogud from wan we yu yu laekem hem tumas i ded? Maet hem i wan pikinini blong yu, man no woman blong yu, brata no sista blong yu, papa no mama blong yu, no maet wan gudfala fren blong yu. Long taem olsem, ?wanem i save givhan long yu blong yu no harem nogud bitim mak?