SAM NIUS BLONG WOL

Solwota blong Meksiko

Long Eprel 2010, wan aksiden i kamaot long wan bigfala masin we i stap pamem oel. Klosap tri manis, plante plante oel mo gas oli ronaot i go long solwota. Tu mo haf manis afta, sam man blong mekem stadi oli faenemaot se sam long ol oel mo gas ya oli lus. Oli ting se sam smosmol bebet oli kakae ol samting ya. Be sam man blong hae save oli gat tu tingting long saed ya. Oli ting se bighaf blong ol oel ya oli draon long botom blong solwota.

Rasia

Wan niuspepa (Rossiiskaya Gazeta) i tokbaot wan ripot we i talem se, 59 pesen blong ol man Rasia we oli gat 18 kasem 35 yia, oli ting se “sipos man i wantem wingud long laef blong hem, samtaem hem i mas mekem samting we hem i save se i no stret.”

Peru

Sam long ol olfala bun blong kon we ol man oli faenem (olsem hemia we i stap long pija), oli soemaot se ol man long not blong Peru oli stap mekem popkon mo kon flaoa blong klosap 3,000 yia finis.

Itali

Katolik bisop ya Lucio Soravito De Franceschi, we hem i blong Adria-Rovigo, i talem se taem yumi tijim ol man, yumi no tijim olgeta long jos nomo, be yumi mas “storian stret wetem ol man wanwan” long ples we oli stap long hem. Hem i talem se: “Blong lukaotgud long ol sipsip blong God, yumi mas finis long fasin ya blong kilim bel long jos, mo yumi mas go noknok long doa blong haos blong ol man.”

Saot Afrika

Praes blong ol hon blong raenoseros we oli yusum olsem meresin, i kam antap bigwan kasem 65,000 U.S. dola (i olsem 5,794,750 vatu) long wan kilo. Long 2011, long Saot Afrika nomo, ripot i soemaot se ol man we oli stap stilim ol anamol, oli kilim 448 raenoseros. Long Yurop, ol grup blong man oli go stil long ol Musium mo ol ples blong salem ol sas samting, from we oli stap lukaotem ol hon blong raenoseros. Ol man oli wari long ol raenoseros we oli stap long ol ples blong ol anamol long Yurop.