Stadi 15
Kasem Hat Blong Ol Man We Oli Stap Lesin Long Yu
1-4. ?From wanem hat hem i wan impoten samting long yumi ol minista blong God?
1 Aposol Pol i no stop blong prea long Jeova, from ol man we hem i bin talemaot gud nyus long olgeta, blong mekem se ‘hat blong olgeta i save open.’ (Efes. 1:16-18, NW) Makemgud se hem i no stap tokbaot tingting, hem i stap tokbaot hat, we bambae i open. ?Hem i minim wanem? Blong gat gudhan olsem ol man blong givim tok mo ol tija, yumi mas luksave samting ya.
2 Speret blong Jeova i soemaot long Pol sem samting ya we ol narafala man blong God ya we i Bigfala Man blong jekem ol hat, oli stap talem. (Prov. 21:2) Eksampel, olfala King Deved i givim gudfala advaes ya long pikinini blong hem we bambae i kam king, se: “Pikinini boe blong mi, yu mas save God blong papa blong yu mo mekem wok blong hem wetem ful hat blong yu mo long glad fasin; from we Jeova i stap lukluk hat blong ol man, mo hem i luksave evri samting we tingting blong man i wantem mekem. Sipos yu stap lukaotem hem, hem bambae i letem yu yu faenem hem. Be sipos yu livim hem, bambae hem i livim yu blong olwe.” (1 Kron. 28:9) Trufala wosip we i kamaot long hat i mekem Man we i Wokem yumi i haremgud.
3 Jisas Kraes Bigfala Deved, i givim waes advaes we i sem mak taem hem i talem se: “Yu mas laekem [Jeova, NW] we i God blong yu long olgeta tingting blong yu, mo long olgeta laef blong yu, mo long olgeta maen blong yu, mo long olgeta paoa blong yu.” (Mak 12:28-30) Blong mekem God i glad long yumi, samting we i stap insaed long hat blong man hem i impoten tumas. Taem yumi luksave samting ya, ol tok blong Proveb 4:23 i gat bifala paoa long yumi, i se: “Samting we yu mas lukaot moa long hem i bitim ol narafala samting, se hat blong yu. Blokem ol samting we oli save kam spolem hat blong yu, from we hat hem i stampa blong laef.”
4 Olgeta we oli stap talemaot mo tijim gud nyus blong Kingdom blong God long ol man oli mas tingbaot fasin ya blong kasem mo mekem hat blong ol man we oli stap lesin i wok. Ol Kristin papa mama oli mas tingbaot samting ya taem oli tijim ol pikinini, mo ol minista blong God we oli stap mekem Baebol stadi wetem ol man we bambae oli lesin long gud nyus oli mas tingbaot tu. Ol brata we oli stap givim tok long fored oli mas tingtinggud long samting ya. Long olgeta samting olsem yumi mas traehad blong putum gudfala mesej blong trutok insaed long tingting blong ol narafala man. Be yumi mas traehad blong go moa. Yumi wantem kasem hat blong olgeta. Yumi wantem pulum ol narafala man blong oli ‘givim hat blong olgeta long bigfala Papa blong yumi long heven.’—Prov. 23:26.
5, 6. ?From wanem yumi mas traehad moa bitim we yumi stap givimaot save nomo long tingting blong ol narafala man?
5 Hat i defren long tingting. Wan tija blong gud nyus we i gat gudhan i save givimaot save long tingting blong ol man we oli stap lesin. Biaen studen no man we i lesin i save talem bakegen mo eksplenem tijing ya hem wan. Hem i kasem save long hem mo save ya i stap long tingting blong hem. Be kwestin i stap se: ?Bambae hem i mekem wanem wetem save ya? ?Hem i intres nomo blong kasem save, no save ya bambae i pusum hem blong mekem i wok?
6 Hemia nao samting we hat i save mekem, from we insaed long Baebol hat i joen wetem tingting we i pusum man blong mekem sam samting. Trufala man blong wosip i save talem olsem man blong raetem Baebol i talem, i se: “Mi mi stap holem ol tok blong yu long [hat, NW] blong mi, blong bambae mi no save mekem sin agens long yu.” (Sam 119:11) Wan man i save tekem gudfala save long saed blong plan blong God long tingting blong hem, hem i save kasem save long plante gudfala rul blong Baebol, be maet hem i no kasem long hat yet, blong hem i mekem ol rul ya mo save ya i wok long laef blong hem. Plante man oli stap harem ol gudfala trutok long Tok blong God, be blong mekem i wok long laef blong olgeta no blong talemaot long ol narafala man—hat i no pusum olgeta blong mekem wok ya blong sevem man.
7, 8. Soemaot olsem wanem tingting mo hat tufala i defren.
7 I nidim tingting blong tekem mo wok long save we hem i kasem. Tingting i stampa blong waes, hem i stampa ples we i stap wok blong mekem man i kasem save. Tingting i hivimap save mo long fasin blong skelem save ya, tingting ya i kasem sam poen. Mo Baebol i soemaot se tingting ya, long fasin we i nambawan, hem i joen stret long hat. Hat i gat wan impoten wok blong mekem, from we ol filing mo strong tingting blong mekem sam samting oli kamaot long hem. Ol man oli save luksave hat we i lidim ful laef blong man. Bambae oli faenemaot trufala samting we i stap long hat blong man ya. Be Jeova oltaem i save samting “we i stap haed insaed long hat.”—1 Pita 3:3, 4, NW.
8 Samtaem hat i save agensem tingting, hem i save givim strong tingting mo filing no i mekem se man i wantem mekem samting we i bitim mak blong gudfala tingting. I no naf we man i luksave nomo wanem i stret long ae blong God, long hat blong man ya hem i mas wantem folem rod ya. Fasin ya blong hat we i stap jusum ol samting we hem i mas folem mo i jusum wan rod blong folem i soemaot from wanem Baebol i tokbaot hat blong man se ‘i mekem ol plan’ mo ‘jusum [putum tingting blong hem i strong long] ol rod blong hem.’ (Prov. 19:21; 16:9) Sipos i no gat wan samting i blokem man, bambae ol man oli stap folem samting we i stret long hat blong olgeta. Samting ya i tru moa taem oli tingbaot ol fasin mo ol samting long saed blong speret.—Mat. 5:28.
9, 10. ?Wanem samting bambae i givhan long yumi blong kasem hat blong wan studen?
9 Kasem ol hat. ?Olsem wanem wan Kristin tija i save kasem hat blong ol man? Wan rod i blong leftemap tingting blong ol man we oli stap lan blong oli tingting dip long ol samting we oli stap lanem. Tingbaot fasin blong Meri, hemia mama we i bonem Jisas long wol, hem “i stap holemgud ol tok ya long hat blong hem.” (Luk 2:51, NW) Baebol i no talem se “long tingting blong hem,” i tru we hem i olsem tu. Be ol tok ya oli stap long hat blong hem, stampa blong filing mo strong tingting we i pusum man, nao mekem se biaen Meri i save kam wan trufala Kristin. Blong givhan long ol studen tede blong kasem trutok long hat blong olgeta, tekem inaf taem blong tokbaot ol impoten poen long fasin we i stret long hem. Yu no mas traem blong kavremap plante haf blong buk wetem hem long wan taem.
10 Ol kwestin oli save givhan blong faenemaot sipos ol trutok blong Baebol we yu stap stadi wetem studen long hem oli rili stap long hat blong ol studen. Afta we yu tokbaot ol nyufala trutok maet yu wantem askem se, “?Naoia wanem tingting blong yu long samting ya? ?Yu bilif se i olsem?” Yu mas tren blong mekem olsem taem yu givim tok long Tiokratik Skul. Sipos yumi faenemaot samting we i stap long hat blong wan man long rod ya nomo yumi save givhan long hem blong hem i kamgud moa long wok blong Jeova.
11. ?Olsem wanem yumi save soemaotgud long wan studen se i impoten long hem blong hem i frengud wetem Jeova?
11 Blong mekem se ol studen we yu stap tijim olgeta oli kasem Tok blong God long hat blong olgeta, yu mas givhan long olgeta blong oli tingting long saed blong fasin fren wetem Jeova. Gudfala taem blong lanem fasin ya hemia taem yu mekem ol tok long Tiokratik Skul. Leftemap tingting blong ol man we yu stap tijim olgeta blong oli trastem Jeova wetem ful hat blong olgeta, from we oli laekem hem mo from we hem i laekem yumi. Wetem ol gudfala kwestin yu save pulum tingting blong olgeta blong oli luksave se wanem oli stap lanem long Baebol i kamaot long Jeova gudfala Man we i Wokem yumi, hem “i kaen tumas, mo hem i gat sore long man.” (Jem. 5:11) Evri wik, sipos yu mekem wan Baebol stadi, tokbaot lav mo waes fasin blong Jeova long ol gudfala trutok we yutufala i stap stadi tugeta long hem. Leftemap tingting blong ol studen blong luk olsem wanem samting ya i stret long olgeta mo bambae oli mekem wanem long ol dei we oli kam biaen. Oltaem talem bakegen ol rul blong Baebol long olgeta blong oli savegud. Halpem olgeta blong oltaem oli save gat fasin blong faenemaot wil blong Papa long heven bifo we oli mekem disisin long eni samting. Sloslou bambae yu givhan long olgeta blong luksave se laef mo evri samting we yumi gat oli blong God, from we “hem nomo i stap mekem yumi evriwan i laef, mo hem i stap givim olgeta samting long yumi evriwan.” Mo wosip blong hem, wok blong hem, oli mas stap long faswan ples long hat mo tingting blong yumi.—Wok 17:25.
12-14. ?Ol studen oli nidim blong lanem wanem long saed blong strong tingting we i pusum man, mo olsem wanem man i save skelem ol tingting blong hem?
12 Talem bakegen poen ya se long saed blong God i no samting we yumi stap mekem nomo i impoten, be tingting we i pusum yumi blong mekem hem i impoten tu. God i wantem se yumi mas glad blong mekem wil blong hem. Olsem wan papa we Proveb i tokbaot, i sem mak Papa blong yumi long heven i talem long yumi se: “Pikinini boe blong mi, yu mas lesingud long ol tok blong mi. Lesingud long ol toktok blong mi. Yu no letem olgeta oli ronwe long ae blong yu. Putum olgeta oli stap long medel blong hat blong yu. From we olgeta oli olsem laef long ol man we oli faenem olgeta mo oli mekem bodi blong man i haremgud.”—Prov. 4:20-22.
13 Nao ol man we yu stap tijim olgeta oli save tingbaot blong skelem se wanem tingting i pusum olgeta blong mekem sam samting mo askem olgeta wanwan se: ?From wanem mi mekem hemia no hemia longwe? ?Wanem i pusum mi blong jusum samting ya we mi mekem? ?Mi save tingting blong mi, be wanem i rili stap long hat blong mi? ?Mi mi stap lukaot rod blong mekem God i glad no mi mekem ol samting we mi nomo mi wantem? ?Mi stap tru long mi wan? ?No mi stap traem gyaman long mi wan wetem ol gyaman tingting?
14 Yu save givim woning tu long ol studen, long ol trabol mo ol gyaman trik we oli save spolem man we i no lukaotgud. Eksampel, maet long hat blong wan man, hem i wantem kasem sam samting, maet samting ya i stret nomo, be maet i blokem hem long ol miting no blokem hem long wok blong Jeova. From samting ya Proveb long Baebol i talem olsemia se: “Man we i trastem prapa hat blong hem, hem i krangke, be hemia we i stap wokbaot long waes fasin bambae hem i save ronwe.”—Prov. 28:26.
15-17. ?Olsem wanem eksampel blong Jisas mo fasin blong tokbaot ol prea i save mekem i gud long hat blong narafala man?
15 Laswan samting se i gud blong stap tokbaot gudfala eksampel we yumi gat long Masta Jisas long ol studen oltaem. Jisas i stap tru long Papa blong hem long heven. Hem i mekem olsem from ‘hem i laekem ol samting we i stret, be hem i no laekem ol samting we i nogud, hem i agens long olgeta. Nao from samting ya, God, we i God blong hem, hem i jusumaot hem finis, mo i mekem hem i glad moa, i winim we i mekem long ol narafala king.’ (Sam 45:7) ?Olsem wanem hem i holemtaet gudfala hat? Hem i stadi i no blong kasem save long God nomo, no gat, be hem i wantem mekem God i glad tu. Oltaem hem i stap tingbaot wil blong Papa blong hem. Oltaem Jisas i askem Papa blong hem long prea. Long ol prea blong hem, hem i stap askem God, blong i, ‘traem lukluk laef blong hem, blong faenemaot we hem i man olsem wanem, hem i traem skelem olgeta tingting blong hem wetem olgeta samting we hem i wantem.’ (Sam 26:2) Hem i no stanap long prapa tingting blong hem no ol samting we hem i wantem long hat blong hem. “Papa. . . . yu no mekem olsem we mi mi wantem, yu mekem olsem we yu nomo yu wantem.” Hemia prea we hem i mekem bifo hem i ded olsem wan sakrifaes.—Mak 14:36.
16 ?Yu ting se hemia wan gudfala eksampel blong talem long ol studen? Yu save givhan long olgeta tu blong oli save askem Jeova long prea blong hem i soem rod we oli save folem long laef blong olgeta—oli rili mas prea from waes fasin wetem fulhat blong oli folem rod we God i laekem. Ridim sam long ol prea we Jisas i mekem. Taem Jisas i kam long wol hem i mekem olsem pikinini taem hem i prea long Papa blong hem. Jisas i tijim ol man blong hem blong oli prea, hem i statem prea ya olsem se, “Papa blong mifala we yu stap long heven.” (Mat. 6:9) Taswe taem man i prea hem i mas prea olsem wan pikinini we i toktok long wan papa. Prea i bitim ol narafala samting, prea i soemaot sipos yumi fren wetem Jeova. ?Olsem wanem, yumi stap kam kolosap long hem, yumi trastem hem, yumi frengud wetem hem olsem wan pikinini boe no pikinini gel we i frengud wetem wan papa we hem i respektem mo i laekem papa blong hem wetem ful hat blong hem? ?No prea blong yumi i olsem we yumi stap toktok long ol man raonabaot we yumi no savegud olgeta? Traem kasem hat blong ol man we yu stap toktok mo stadi wetem olgeta, taem yu tokbaot prea wetem olgeta, askem wanem tingting blong olgeta long saed blong prea mo ol samting we oli stap talem long prea blong olgeta.—Prov. 15:8, 29.
17 Taem yumi tingbaot se hat blong ol man i impoten samting long God, yumi mas tingtinggud tu long hat blong ol man taem yumi tijim Tok blong God long olgeta. Nating se yu givim wan pablik tok no yu mekem wan tok long Tiokratik Skul no yu mekem wan Baebol stadi, i nogud blong kavremap tumas samting. Tektaem blong givhan long ol narafala man blong oli kam kolosap long Jeova mo blong mekem Tok blong Hem i stap long hat blong olgeta.