Stadi 16
Storeyan We i Leftemap Tingting Blong Man
1, 2. ?Wanem samting i mas makem storeyan blong yumi?
1 Long evridei toktok blong yumi, yumi gat jans blong givim ona long God. Man blong raetem Ol Sam, i raetem se: “Bambae mifala i stap presem yu olwe nomo. Bambae mifala i stap talem tangkyu long yu oltaem, gogo i no save finis.” ?Yu ting se hemia i wan gudfala fasin long olgeta man blong wosip long God? Yes, samting ya i soemaot wan strong tingting long man blong hem i yusum maot blong hem long fasin we i laenap wetem wil blong Jeova.—Sam 44:8.
2 Strong tingting olsem i impoten, from rabis fasin we man i bon wetem i save mekem se man i wantem talem sam samting we i blong daonem ol narafala man bitim we i blong leftemap tingting blong olgeta. (Jem. 3:8-12) Taswe i gud we, yumi mas tingbaot tok ya long Baebol we i leftemap tingting blong yumi blong talem “ol gudfala tok, we i save mekem ol man we oli slak oli kam strong moa. Tok olsem i save givhan moa long ol man we oli harem.”—Efes. 4:29.
3, 4. ?Storeyan i minim fasin blong toktok nomo, no olsem wanem mo weples yumi save lanem?
3 Yes, yumi mas tingbaot tu se fasin blong storeyan i joen long fasin blong lesin tu, from we fasin blong storeyan i blong serem ol tingting. Talem sam samting we i save leftemap tingting blong ol man, mo tu givim jans long ol narafala man blong oli toktok. Wokem fasin ya blong gat gudhan blong askem ol kwestin we oli stret, blong mekem man i talemaot tingting blong hem. Nao yu mas lesingud long wanem hem i stap talem, be i nogud blong yusum taem ya we hem i stap toktok blong tingbaot narafala samting blong talem. Taem yu soemaot intres long tingting blong ol narafala man, samting ya bambae i leftemap tingting blong olgeta.
4 I gat plante jans blong storeyan blong leftemap tingting blong narafala man. Eksampel, taem yu stap long haos wetem famle; taem yu stap wetem ol fren we yu wok wetem olgeta no ol fren blong yu long skul. Mo taem yu stap kampani wetem ol narafala man blong bilif. Plante long ol tok we yumi stap mekem long Tiokratik Skul oli givim jans long yumi blong yumi kamgud moa long fasin blong storeyan.
5-7. Talem sam samting we man i save mekem blong kamgud moa long fasin blong storeyan long famle, antap moa long taem blong kakae.
5 Long haos. Storeyan long haos i save givhan bigwan blong mekem famle i hapi, taswe i stret blong traehad blong kamgud moa long fasin ya. Hasban mo waef tufala i haremgud taem tufala i stap soemaot trufala intres long ol tok blong tufala. Mo ol pikinini oli laekem taem ol papa mama oli stap lesin long ol toktok blong olgeta mo taem oli soemaot se oli rili tingbaot olgeta. Be sipos yu katem toktok blong olgeta no yu stap ridim wan magasin taem man i stap toktok long yu, no sam narafala fasin we i soemaot se yu no intres, i no longtaem bambae fasin blong storeyan long famle i godaon. I no gat man we i laekem blong toktok long wan man we i no intres long samting we hem i stap talem.
6 Taem blong ol kakae oli gudfala jans blong famle storeyan we i leftemap tingting. Long wan long ol taem ya blong kakae long evri dei famle i save tokbaot vas blong dei we i stap long buk ya Ridimgud Ol Vas Blong Baebol Evri Dei. Long sam narafala taem blong kakae, oli save ridim ol poen we oli jes kamaot long Wajtaoa no Wekap!, samting ya i save mekem storeyan i laef mo oli save kasem ol gudfala samting from. Be yu neva mas bitim mak long plan blong storeyan long taem blong kakae we i mekem se i no gat jans blong storeyan long ol narafala samting mo oli save haremgud long kakae.
7 Long prapa fasin blong wanwan memba blong famle, olgeta oli save mekem se storeyan long taem blong kakae i leftemap tingting. Hemia i no taem blong toktok smol; samting olsem i save mekem se bel i no save wokgud long kakae. Maet long dei ya wan i harem wan nyus, no wan fani store. Maet hem i gat wan gudfala ekspiryens long wok blong prij. Maet hem i ridim wan samting long nyuspepa no i harem long radyo. Ating i gud blong holem samting ya long tingting blong hem blong talemaot long famle long taem blong kakae. I no longtaem bambae yufala i stap tingbaot ol taem ya blong kakae olsem taem blong toktok tugeta, be i no taem blong kakae kwik mo ronwe.
8-10. ?From wanem fasin blong storeyan blong papa mo pikinini i impoten, mo olsem wanem ol papa mama oli save leftemap tingting blong ol pikinini?
8 Long saed blong ol papa mama, i impoten tu blong oli toktok wetem ol pikinini wanwan, we ol narafala memba blong famle oli no save harem. Ol gudfala frut oli kamaot taem ol papa mama oli mekem long fasin we i kwaet, nating se oli toktok wetem olgeta long haos no long rod taem oli stap wokbaot tugeta. Ol storeyan olsem oli jans blong talemaot fastaem ol jenis long bodi we bambae yangfala i luk taem hem i stap gruap. Long ol storeyan olsem tu ol papa mama oli luksave samting we i stap long hat blong yangfala ya, wanem samting yangfala ya i rili wantem mekem mo kasem olsem ol mak long laef blong hem, mo hemia jans blong papa mama blong trenem ol pikinini blong olgeta long ol samting ya long fasin we i gud.
9 Sipos, long wan taem blong storeyan olsem, pikinini blong yu i talemaot ol trabol we hem i joen long hem, fasin blong faerap long hem kwiktaem bambae i finisim storeyan blong yutufala long taem ya. Mo, maet hem i no moa save talemaot ol samting ya bakegen from we hem i tingbaot samting we yu bin mekem long hem bifo. Oltaem i gud blong lesin mo askem ol kwestin we oli soemaot se yu yu kasem save long ol trabol blong hem. Nao long fasin we i kaen be i strong tu yu save givhan blong stretem fasin blong hem we i no laenap wetem ol rul blong Baebol.
10 Nating se fasin blong storeyan i impoten blong mekem famle laef i hapi, samting ya i no min se oltaem man i mas toktok. Samtaem i gud blong gat jans blong tingtinggud yu wan, mo tingting long ol samting ya long ples we i kwaet. Taswe samtaem ol memba blong famle oli laekem ol kwaet taem.
11, 12. ?Wanem ol jans we yumi gat blong prij antap long wok ya blong go prij long ol haos wanwan?
11 Holem ol jans blong prij. ?Olsem wanem minista wok blong wan man i save jenis sipos hem i gat gudhan blong storeyan long prapa fasin blong hem? ?Samtaem yu stap tingbaot from wanem i luk olsem we sam Wetnes oli stap gat ol gudfala ekspiryens oltaem? ?Yu no ting se from we oli wantem storeyan wetem man? Proveb blong Baebol i talem se: “Maot blong wan man we i waes, hem i stap givimaot save.”—Prov. 15:7.
12 Antap bakegen long wok blong prij, i gat plante rod blong storeyan wetem ol man mo tokbaot Jeova long olgeta. Eksampel, ol Kristin waef we oli stap nomo long haos, oli save toktok long ol man we oli stap raonabaot long olgeta no ol man blong salem ol samting we oli stap kam long haos. Ol pikinini maet oli save gat jans blong tokbaot ol samting long saed blong Baebol wetem ol fren blong olgeta long skul taem oli stap wokbaot i go long skul no taem oli stap spel. Mo olgeta we oli stap goaot long wok oli save toktok wetem ol man long ples blong wok blong olgeta, maet long taem blong kakae long dina. Nating se yu stap wokbaot long ples we ol man oli stap spel long hem, no yu stap stanap folem laen blong ol man long wan stoa no yu stap wet long wan bas, yu save toktok wetem ol narafala man long storeyan we i leftemap tingting. Long sam kantri we oli putum tabu long wok blong prij, ol pablisa oli gohed blong mekem minista wok ya taem oli holem jans blong storeyan wetem ol man. Rod ya blong prij hem i karem frut olsem we yumi luk bigfala namba blong ol man blong God i stap gru long ol ples ya.
13-16. ?Wanem ol rod we yu save yusum blong statem storeyan blong mekem rod blong prij?
13 Blong yusum ol defren rod blong givim wan wetnes, maet yumi nidim wan gudfala tok nomo blong “statem,” mo biaen storeyan bambae i save gohed. Jisas i givim eksampel long saed ya. Long wan aftenun taem hem i sidaon long wan wel long Sameria blong i spel hem i askem wora blong dring long wan woman we i kam blong tekem wora long wel ya. Samting ya i pulum tingting blong woman ya, from we ol man Jyu oli no stap toktok olsem wetem ol man Sameria. Woman ya i askem wan kwestin. Jisas i ansa mo hem i talem se hem i gat wora we i save givim laef we i no save finis, samting ya i pulum tingting blong woman ya moa. Ale samting ya i mekem se jans i open long hem blong prij long woman ya. Makem se hem i no statem long fasin we hem nomo i toktok. Hem i yusum storeyan long fasin we i kaengud blong mekemrere rod blong storeyan.—Jon 4:5-42.
14 Yu yu save statem storeyan blong leftemap tingting olsem tu. Taem yu stap wet long wan bas maet yu save pulum tingting blong man long wan haf blong nyuspepa no magasin we i tokbaot sam trabol olsem fasin blong sakem doti long win mo wora no faet, mo yu save askem se: “?From wanem yu ting se ol rabis fasin ya oli stap kam moa nogud long ol yia we oli pas i no longtaem? ?Yu ting se bambae wol ya i save kam wan gudfala ples blong laef long hem?” Hem i gud tu blong stat tokbaot ol trabol we oli stap kamaot long ples blong yu, mo yu save askem se: “?Yu ting se wanem samting i save stretem ol trabol ya?” Fasin ya i save pulum wan storeyan i go long trufala samting we i save stretem trabol—hemia Kingdom blong God. Yu mas yusum fasin luksave. I no nid blong fosem ol man blong toktok sipos oli no ansa long yu. Be bambae yu faenemaot se i gat sam man we oli glad blong lesin, olsem woman Sameria ya long wel i mekem.
15 Narafala rod blong givim ol jans blong storeyan long Tok blong God, i blong putum ol buk no magasin we oli tokbaot Baebol long ples we man i save luk. Sipos yu mekem olsem long haos blong yu, samtaem ol man we oli kam long haos oli save tokbaot, nao i openem rod long yu blong givim wan nambawan wetnes. Sipos yu go long wan pablik skul, wan buk no wan magasin we yu putum long desk blong yu i save pulum man blong askem se, “?Wanem ya?” Nao yu save gat jans blong talem long hem, mo prij long hem. No sipos yu ridim ol magasin we oli tokbaot Baebol taem yu stap spel blong kakae no taem yu stap pas long ol trak, samting ya i save openem rod long yu blong tokbaot Kingdom blong God long ol man we oli intres.
16 Fasin blong storeyan wetem ol fren blong yu i save pulum yu blong tokbaot ol trutok blong Baebol. Ol storeyan olsem oli stanap long ol samting we ol man oli stap mekem—ples we oli stap go long hem, samting we oli harem no oli luk—no ol samting we oli plan blong mekem. Nao sipos yu gat jans blong toktok, tokbaot ol samting we yu stap mekem. Afta we yu go long wan seket asembli, yu save talem weples yu go mo stampa blong pablik tok long wan fren long ples blong wok no wan man we i laef kolosap long yu; maet hem i save askem ol kwestin long samting ya. Tokbaot ol samting we yu ridim long Wajtaoa no Wekap! long ol narafala man olsem we olgeta oli stap tokbaot ol samting we oli mekem. Sipos yu kasem wan rod we i mekem man i tok, bambae oli askem plante moa samting long yu. Nao yu save gat jans blong toktok moa wetem man. Ol storeyan olsem we oli blong pulum tingting blong man i go long ol plan blong God oli rili leftemap tingting.
17-20. ?Wanem sam gudfala samting blong leftemap tingting we yu save storeyan long olgeta taem yu stap wetem ol narafala Wetnes?
17 Taem yu stap wetem ol narafala man blong bilif. Taem yu stap wokbaot wetem ol brata sista long saed blong speret, i stret nomo we storeyan i mas gud moa, storeyan we i stret long ol minista blong gud nyus. Storeyan ya i no blong kilim taem nomo, no gat, be hem i blong leftemap tingting.
18 I gat ol gudfala jans blong storeyan blong leftemap tingting hemia bifo mo afta long ol miting long Haos Kingdom. Yu no mas gat fasin blong ronwe kwiktaem afta we ol miting oli finis. I gud blong storeyan wetem ol olfala, ol brata we oli gat plante ekspiryens, mo tu wetem olgeta we oli sem mo oli wantem stap olgeta nomo. I gat plante samting blong tokbaot. Tokbaot ol poen we oli rili pulum intres blong man, we oli stap long ol Wajtaoa we oli kamaot i no longtaem. Maet yu save tokbaot wan tok we bambae yu mekem long Tiokratik Skul. Maet ol narafala man oli gat ol gudfala tingting we yu save yusum long tok blong yu, no maet yu save talem sam tingting we i givhan long narafala man wetem tok blong hem. Yu save tokbaot ol ekspiryens long wok blong prij, no maet yu save tokbaot wan haf long miting we yu laekem tumas. Ol storeyan olsem oli leftemap tingting blong man.
19 Long ol bigfala asembli i gat ol jans blong toktok wetem ol brata mo ol sista we oli kam long ol defren ples. Plante Wetnes oli traehad blong storeyan long ol narafala man taem oli stap laenap blong kakae long ples blong kakae no taem oli stap go mo kam long ples blong asembli. Wan gudfala rod blong mekem olsem, i blong talem nem blong yu long brata no sista, mo yu save askem nem blong hem. Faenemaot olsem wanem hem i kam wan Wetnes. Oltaem samting ya i pulum gudfala storeyan we i leftemap tingting.
20 I gat narafala jans blong toktok we i leftemap tingting blong man taem yu stap wokbaot blong go prij. I nogud blong tokbaot ol storeyan we i no save givhan, be i gud blong tokbaot olsem wanem blong toktok wetem man blong haos long ples we yutufala i prij long hem, no ol kwestin we ol man long ples ya oli stap askem oltaem. I gud blong tokbaot olsem wanem blong winim ol tok we ol man oli sakem blong blokem tok blong yu. Hem i moa gud mo i stret blong tingbaot mo tokbaot ol samting long saed blong speret long ol taem olsem.—Fil. 4:8, 9.
21-24. ?Sipos storeyan blong wan grup hem i no moa leftemap tingting blong man, bambae yumi mekem wanem?
21 ?Sipos long wan taem yu stap long wan grup blong ol brata mo sista we storeyan blong olgeta i blong nating nomo no hem i no leftemap tingting, bambae yu mekem wanem? ?Yu save askem wan kwestin blong pulum storeyan i go long ol samting we oli gud? Talem wan samting we i gud mo askem ol kwestin long hem. Fasin blong storeyan olsem i moa gud taem olgeta we oli joen long hem oli stap tokbaot, ale evriwan oli save gat jans blong talem prapa tingting blong olgeta.
22 Taem storeyan i blong tokbaot ol narafala memba blong Kristin kongregesen, yu mas lukaotgud se hem i no blong daonem man no i agensem man, hemia fasin blong toktok we i defren olgeta long fasin blong toktok we i leftemap tingting. Sipos wan man i stat blong tokbaot ol mastik blong ol narafala man, ?bambae yu yu gat strong tingting blong pulum storeyan ya i gobak long gudfala rod? ?Bambae yu yu stap tru long ogenaesesen blong Jeova mo blokem ol memba blong hem? Maet wan man i save talem se i wan smol samting nomo. !Be hem i no smol tumas sipos man i tingbaot se taem yumi faenem mastik blong wan man blong God we i givim laef blong hem finis long Jeova, samting ya i save mekem fasin blong toktok smol agens long ol plan we God hem wan i stanemap i kamaot!—Jem. 5:9; 2 Kor. 10:5.
23 Samtaem yumi save storeyan long ol samting we oli no impoten tumas, olsem ol store blong mekem man i laf. Ol storeyan olsem oli save mekem tingting blong man i stap kwaet mo oli givhan long man tu. Be yu mas lukaotgud se ol tok ya oli no olsem ol tok we oli no stret long ol Kristin minista. Oltaem yumi mas tingbaot advaes blong Baebol se: “I no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman, mo fasin blong man we i wantem evri samting, bambae yufala i no tokbaot. Mo i no stret blong yufala i yusum ol rabis tok, mo ol krangke tok, mo ol tok plei we i nogud. I stret blong yufala i stap talem tangkyu long God.”—Efes. 5:3, 4.
24 Taswe, oltaem ol storeyan blong yumi ol minista blong Jeova, oli mas givim ona long Jeova. Sipos yumi mekem olsem, long semtaem ya yumi stap folem advaes we aposol Pol i givim, se: “Yumi mas tingbaot ol fasin we ol brata blong yumi oli wantem, nao yumi mas mekem i gud long olgeta, blong mekem olgeta oli strong moa long fasin blong bilif.”—Rom 15:2.