Stadi 17
Fasin Blong Raetem Ol Leta
1, 2. ?Ol leta oli save mekem wanem gudfala wok?
1 Bifo, long Kristin kongregesen, ol man oli yusum ol leta long plante defren rod. Oli yusum ol leta olsem wan rod blong toktok wetem ol kongregesen. (Fil. 1:1) Oli yusum blong leftemap tingting blong ol man we oli stap mekem ol spesel responsabiliti. (2 Tim. 1:1, 2, 6) Ol leta oli stap givhan long ol man we oli jes kam man blong bilif no olgeta we oli stap fesem ol hadtaem. (1 Tes. 1:1-7; 3:1-7) Mo ol Kristin bifo oli stap yusum ol leta blong toktok long ol man we oli frengud wetem olgeta from we oli bin joen wetem olgeta long wok blong Masta.—3 Jon 1, 14.
2 Ol minista blong God tede tu oli gat plante risen blong raetem ol leta, mo ol leta ya oli save mekem plante gudfala samting. Maet samtaem oli mas raetem ol bisnes leta. Maet oli save raetem leta long ol haeman blong tokbaot wok blong Kingdom. Samtaem ol leta, oli olsem rod ya nomo blong yusum blong talemaot “gud nyus” long ol ren haos we man i no gat raet blong go long olgeta, mo tu long ol man we oli stap longwe. Maet yu wantem raetem wan leta blong soem lav blong yu long sam pablisa long kongregesen blong yu we oli go long narafala ples, no ol famle blong yu we oli stap longwe. Mo tu, samtaem yu sanem wan leta blong talem tangkyu no soemaot sore long wan man taem hem i harem nogud from wan trabol we hem i kasem.
3. ?Ol leta blong yumi oli mas soem wanem, blong oli stret long minista wok blong yumi?
3 Ol leta blong yumi oli mas stret long minista wok we God i givim long yumi. Ol tok long leta oli mas kaen, stret mo soemaot se yumi stap tingbaot ol man we bambae oli ridim. Oli mas givim tingting we i stret mo leftemap tingting blong narafala man, be oli no mas daonem tingting mo soemaot tingting blong komplen, we i brekemdaon bilif mo i mekem tingting blong man we i ridim i foldaon. Tok blong God i talem se, “Fasin ya . . . blong laekem ol man, hem i stap mekem man i go antap.” (1 Kor. 8:1) Tingbaot tu olsem wanem long lukluk blong leta blong yu mo bambae i mekem wanem long man we i ridim. Blong mekem i luk naes, i gud blong tingbaot ol spes long saedsaed mo long botom blong pepa we yu raetem leta long hem. Ol doti oli mekem se leta i no luk gud. Mo tu, yu mas tingbaot fasin blong raetemgud ol tok mo joenemgud ol tok blong mekem wan fultoktok. Be, sipos yu no gat gudhan long ol samting ya, yu no mas letem samting ya i daonem yu blong no raetem leta long ol fren. Oltaem, fasin kaen, intres long narafala mo fasin glad blong raetem leta oli mekem se man i no tingbaot ol mastik long fasin blong joenemgud ol tok blong mekem fultoktok. Be yumi save kamgud moa long fasin blong raetemgud tok sipos yumi yusum wan diksonari, mo yumi save kamgud moa long fasin blong joenemgud fultoktok sipos yumi luk olsem wanem ol narafala man oli yusum ol tok ya mo oli joenem olgeta. Naoia we yumi save ol poen ya finis, yumi save jekemap ol defren kaen leta we maet samtaem yumi save yusum long fasin we i joen wetem minista wok blong yumi.
4. Talem prapa rod blong raetem wan bisnes leta.
4 Ol bisnes leta. Taem yu raetem wan bisnes leta, i gud blong putum nem, adres blong yu mo det antap long leta. Hemia i stat blong leta mo yu raetem antap long raetsaed blong pepa. (Long ol leta we oli go long Watch Tower Sosaeti, nem blong kongregesen i mas stap tu long stat, sipos leta ya i tokbaot ol bisnes blong kongregesen.) “Adres insaed” i stap long lefsaed be daon moa long adres we i statem leta. Long ples ya yu raetem nem mo adres blong kampani no man we yu raet long hem. Stret aninit long hem, raetem tok blong talem halo. Sipos yu raet long wan kampani no long ol man we oli no Wetnes blong Jeova, i stret blong raetem tok blong halo olsemia, “Dia Ser,” “Halo Yufala,” “Dia Masta——.” Taem yu raet long Sosaeti mo ol narafala man we oli Wetnes blong Jeova, oltaem i gud blong yusum ol tok halo olsem “Dia ol brata” no “Dia brata—.” Afta, finisim leta long tok olsem “Gudfala fren blong yu” no “Trufala fren blong yu.” Taem yu raet long olgeta insaed long ogenaesesen blong Jeova i stret blong yusum ol tok ya, “Brata blong yu” no “Man blong wok wetem yu” blong finisim leta blong yu. Tok ya i stap kolosap long medel blong pej mo putum wan koma long en blong hem. Stret aninit long hem, raetem nem blong yu. Taem man i raetem leta long nem blong wan kongregesen no wan seket i go long Sosaeti, man ya i save raetem nem blong wok blong hem tu, olsem “Presiden Elda” no “Seket elda,” aninit long nem blong hem.
5, 6. ?Wanem samting yu mas raetem fastaem long leta ya, mo oltaem wanem samting i save mekem se man i glad long hem?
5 Long stat blong leta blong yu, talem risen from wanem yu raetem leta ya. Olsemia nao man we i kasem leta bambae kwiktaem nomo hem i luksave from wanem yu raetem leta ya. Sipos yu raet blong ansa long wan leta we yu bin kasem bifo finis, i gud blong tokbaot mo talemaot bisnes we leta ya i tokbaot. Mo sipos yu mas ansa long leta blong wan bigfala kampani we i gat plante dipatmen insaed, i gud tu blong raetem ol refrens blong leta we yu bin kasem long kampani ya, sipos i gat ol refrens. Mo long saed long bodi blong leta ya, bambae yu faenem se i gud moa blong raetem nyufala haf long evri defren samting no tingting we yu wantem tokbaot. Samting ya i givhan blong mekem se ol defren poen long leta blong yu oli kamaot klia mo samtaem fasin ya i mekem se kampani i ansa kwik. Sipos leta ya i haf bisnes leta mo yu raetem i go long wan fren, i gud blong tokbaot ol samting long bisnes fastaem.
6 Oltaem i gud blong raetem ol toktok long leta i sot, be tu samting we yu wantem talem i mas klia mo i fulwan. Leta blong yu bambae i gud moa sipos yu tekemaot ol tok we yu no nidim, no ol tingting we yu stap talem bakegen. Sipos yu tekemaot sam tok we i no laenap wetem samting we yu wantem talem long leta blong yu bambae leta blong yu i klia. Mo tu, oltaem i stret blong talem tangkyu long narafala man from wok blong hem. Long wan bisnes leta we i tokbaot sam bisnes we oli strong, oltaem man i laekem moa taem yu yusum ol tok olsem, “tangkyu tumas from we yu stap givhan (no sipos yu save givhan) long mi long bisnes ya.”
7-9. ?Wanem samting yu save talem long wan leta blong prij?
7 Blong givim wan wetnes. Fasin blong raetem leta tu i givhan bigwan long wok blong talemaot mesej blong Kingdom. Long sam ples i gat ol bigfala ren haos no ol hotel we yumi no save prij long olgeta, be yumi save raetem leta long ol man we oli stap insaed long ol haos ya. Mo tu, yumi no stap faenem sam man long haos blong olgeta oltaem taem yumi prij long ol haos wanwan, be ol man ya oli stap kasem leta blong olgeta. Mo, maet fasin blong raetem leta long ol man ya i rod ya nomo blong wan pablisa we i sik i stap long haos, blong hem i talemaot mesej blong Kingdom long ol narafala man.
8 Taem yu raetem wan leta blong tokbaot ol samting long saed blong Kingdom blong God, i gud blong talem nem blong yu fastaem. Mo maet yu wantem tu blong talem from wanem yu raetem leta be yu no go luk hem stret. Samting ya bambae i mekem se man we i kasem leta i luksave se yu yu rili wantem toktok long hem. Nao talemaot samting we yu wantem talem long hem sipos yu go luk hem stret. Hem i no hadwok blong mekem olsem sipos yu folem ol rul we yu lanem long Tiokratik Skul. Maet yu save yusum wan vas blong Baebol long Kingdom Wok Blong Yumi no yu save tokbaot haf blong wan nyufala Wajtaoa no Wekap! no buk ya Yu Save Laef Foreva Long Paradaes Long Wol. Maet yu save putum wan traket, magasin no buklet insaed long leta blong yu mo askem hem blong i ridim. Eksplenem from wanem samting ya i impoten. Maet yu save talem long hem blong jekem ol vas long prapa Baebol blong hem, olsem we yu stap mekem long wok blong prij long ol haos wanwan. Nao, blong mekem se intres we man ya maet i soem hem i gru moa, talem olsem wanem hem i save toktok wetem yu mo askem hem blong mekem olsem. Raetem nem mo adres blong yu i klia blong mekem se sipos hem i wantem talem tangkyu long yu no hem i wantem mekem sabskripsen long Wajtaoa no Wekap!, bambae hem i save ples blong raet i go long hem.
9 Oltaem yu mas raetem adres blong yu biaen long envelop. Jekem blong luk sipos yu pem inaf stam blong putum long leta, i tru moa sipos yu putum sam magasin no traket insaed long hem. Sipos yu no pem inaf stam blong sanem leta ya, maet oli save askem man blong haos blong i pem stam we i nidim, mo samting ya i save spolem yu long wok blong givim wan gudfala wetnes.
10, 11. ?From wanem i gud blong raetem leta long ol memba blong famle mo ol fren, mo yumi save tokbaot wanem long ol leta ya?
10 Leta long ol memba blong famle mo ol fren. Long evri dei yumi stap givim taem blong mekem mo tingbaot ol wok we yumi ting se oli impoten tumas. ?Be, yumi stap tekem taem blong raetem leta long ol famle we oli laekem yumi mo long ol fren we yumi savegud olgeta? Ol papa mama oli rili gat fasin tangkyu from ol leta we ol pikinini blong olgeta oli raetem, mo ol pikinini oli haremgud long ol leta we papa mama blong olgeta oli raetem. Fasin ya blong yusum leta blong “storeyan” i givhan bigwan blong holem ol memba blong famle oli stap kolosap long olgeta, nating se oli stap longlongwe long olgeta. Bambae ol fren mo ol famle blong yu oli save haremgud taem oli kasem sam pruf se yu stapgud, long wan leta we i gat nyus mo i soem se yu stap glad, we yu nomo yu raetem long pen no masin blong raet blong yu. Sipos yu no bilivim samting ya, traem tingbaot prapa ekspiryens blong yu. I no plante samting we yu glad blong kasem olsem wan gudfala leta. Oltaem i gat wan gudfala sapraes long hem. ?Ating yu yu haremgud se sam man i stap tingbaot yu, no? Si, tingbaot nambawan fasin ya blong ol Kristin we oli stap laeklaekem olgeta; mo wan rod blong soemaot fasin ya, hemia taem yufala i stap raet long yufala nating se yufala i stap longlongwe long yufala.
11 ?Be bambae yu yu raet blong tokbaot wanem? ?Yu yu laekem ol gudfala ekspiryens? Ol ekspiryens we yu yu laekem bambae ol narafala man oli glad long hem tu. Maet i wan ekspiryens blong yu long wok blong prij, no wan ekspiryens we yu harem long ol narafala. (Be i no waes blong tokbaot ol samting we yu no rili savegud sipos oli tru no no gat.) Samtaem maet yu wantem raet long man ya blong tokbaot ol ekspiryens blong yutufala bifo. Samting ya i pulum ol fren oli kam kolosap moa. Yu save raet tu blong tokbaot ol nyufala samting we yu lanem. Mo tokbaot ol samting we yu stap mekem naoia, no ol ples we yu stap go visitim. Oltaem ol fren oli intres long ol nyus olsem. ?Man we yu raet long hem, hem i sik? Sipos i olsem, talem sam tok blong leftemap tingting blong hem. Talemaot se yu stap tingbaot hem mo yu hop se bambae hem i kamgud bakegen kwiktaem. Maet yu save tokbaot sam gudfala samting tu we oli hapen long wan miting long kongregesen, samting we i save leftemap tingting mo we bambae i givhan long sikman blong hem i haremgud. Mo tu long saed blong raetem ol samting long leta, sipos i hadwok long yu blong tingbaot sam samting we oli jes hapen no yu fogetem samting we yu bin tingbaot, ating i gud blong raetemdaon ol samting long pis pepa taem yu tingbaot. Nao taem yu sidaon blong raet, samting we bambae yu talem long leta i rere finis.
12, 13. ?Olsem wanem ol leta blong yumi oli save leftemap tingting blong narafala man long saed blong trutok?
12 Mo tu long saed blong ol samting we yu wantem raetem long leta, ?yu save tingbaot wan samting we i moagud bitim fasin blong leftemap tingting blong man long saed blong trutok? No gat. Maet wan man we yu bin stadi wetem hem bifo i go stap long narafala taon. Sipos yu raetem wan leta blong soem se yu stap tingbaot hem mo yu talem sam tok blong leftemap tingting blong hem, samting ya i save givhan long hem blong hem i holemtaet intres blong hem long trutok. Mo tu tingbaot, ol papa mama oli harem olsem wanem taem wan pikinini boe no gel blong olgeta we oli stap longwe oli raetem leta, mo oli talem se oli glad from we ol papa mama oli stap holemstrong long Jeova long plante yia finis mo we oli bin tijimgud ol pikinini blong oli laekem ol rod blong Jeova. ?Mo tu, olsem wanem long ol man we oli go long ol ples we i nidim moa man blong prij, no olgeta we oli mekem wok blong misinari no wok long Betel? !Bambae oli haremgud sipos oli kasem ol leta we oli leftemap tingting blong olgeta from we oli stap holemstrong long wok we oli mekem long Jeova! (Jajes 11:40) Mo bambae oli glad sipos long leta blong yu, yu tokbaot ol samting we oli stap hapen long kongregesen we bifo oli stap long hem.
13 Blong mekem leta blong yu i kamgud moa, i nogud blong stap tokbaot yu nomo. Blong soem intres long man we yu raet long hem askem kwestin blong faenemaot sipos hem i oraet. Askem olsem wanem long ol plan blong hem, mo wanem risal blong ol samting we hem i bin tokbaot long leta blong hem bifo, olsem wanem long ol fren we yutufala i savegud olgeta, mo olsem wanem ol man we hem i stadi wetem olgeta oli stap gohed. Fasin blong intres long narafala man olsem hem i leftemap tingting mo i givhan long hem blong tingbaot plante nyus blong talem long yu long nekis leta blong hem.
14, 15. ?Yu yu save mekem wanem blong mekem se lastok long leta blong yu i gat mining?
14 ?Taem yu finisim bodi blong leta blong yu, bambae yu talem wanem blong finisim leta blong yu? Ol man oli laekem ol lastok long leta we oli gat mining. Sipos yumi talem nomo se, “mi mas finisim leta ya nao from we i no moa gat spes blong raet,” tok ya i no givim gudfala tingting long man ya long saed blong yu. Traem tingbaot tok we i gat mining. Aposol Pol i yusum plante defren rod blong finisim ol leta blong hem. Eksampel: “Ol brata mo sista. Hemia prea blong mi, we Jisas Kraes, Masta blong yumi, hem bambae i stap givhan long yufala evriwan, long gladhat blong hem.” (Gal. 6:18; 2 Kor. 13:14) Aposol Jon i finisim wan long ol leta blong hem olsemia, se: “Bambae pis i stap wetem yu. Ol fren blong yu long ples ya oli talem halo long yu. Plis yu talem halo wanwan long ol fren blong mifala longwe.” (3 Jon 15) Talem lastok we i laenap wetem samting we yu talem long leta blong yu mo i stret long fasin fren we yu yu gat wetem man we yu raet long hem.
15 Fasin blong raetem leta i no hadwok sipos yu stap lukluk ol samting we oli stap hapen raonabaot long yu evri dei. I gat plante samting we oli stap kamtru olsem profet tok blong Baebol i talem. Olfala rabis fasin blong wol ya, wetem ol gyaman skul blong hem, oli stap lus kwiktaem. Be, wok blong Jeova i stap grugud from we hem i stap blesem. Ol brata blong yu oli haremgud taem oli harem olsem wanem ol tiokratik wok i stap gru long ples blong yu. Nating se yu yu hu, i gat ol narafala man we bambae oli glad blong kasem wan leta long yu we i talem ol gudfala, kaen tok we i kamaot long hat blong yu blong soem intres long olgeta. Mo fasin ya blong stap tingbaot ol narafala man hem i rili wan haf blong minista wok blong yumi, from we fasin blong laekem ol brata i no mas stop from we yumi stap longlongwe long yumi. Yes, fasin ya i save kam strong moa sipos yumi stap raetem leta.