Stadi 19
Yusum Skul Blong Kamgud Moa Long Wok Blong Prij
1. ?Taem yumi mekemrere ol tok blong yumi, wanem tingting yumi mas gat long saed blong skul ya?
1 Wan long ol bigfala tingting long saed blong Tiokratik Skul, hem i blong givhan long yumi blong karem frut long wok blong prij. Tingbaot samting ya taem yu stap mekemrere ol tok blong yu. Yu no mas intres nomo blong kasem save, be yu mas intres tu blong save olsem wanem blong yusum ol save we yu lanem long wok blong prij mo tij.
2. ?Olsem wanem fasin blong lanem tok i save givim gudfala wetnes?
2 Sam man oli stap lanem ol tok blong olgeta fored blong ol fren, ol man we oli stap kolosap long olgeta, ol skul tija blong olgeta, no ol memba blong famle we oli no bilif mo sam narafala man we bambae oli lesin. Samting ya i mekem sam gudfala frut i kamaot from. Faswan samting studen bambae i luksave tingting blong ol narafala man mo hem i save jenisim ol tok blong hem blong mekem i kamgud moa. Mo tu, samting ya i save wekemap tingting blong narafala man blong oli intres long Baebol taem hem i makem ol gudfala save we hem i talemaot. Hem i olsem wan rod blong askem man blong i kam long miting blong Tiokratik Skul. Plante man oli kam long Haos Kingdom long fasin ya. Wan Wetnes long Japan i mekem wan spesel visit long wan memba blong narafala skul, nao hem i talemaot long fored blong woman ya tok we hem i mekemrere finis blong givim long Tiokratik Skul. Stampa blong tok blong hem, se “Ol Man Blong God Oli Mas Kamaot Long ‘Babilon.’ ” Woman ya i soemaot intres mo hem i agri blong stadi Baebol.
3. ?Wanem samting bambae i pusum yumi blong yusum ol samting we yumi lanem long skul, long wok blong prij?
3 Tingbaot wok blong prij. Long Tiokratik Skul yu harem plante gudfala save, mo yu save yusum plante long ol save ya long wok blong prij. Long program blong Tiokratik Skul yumi stap tokbaot ol samting olsem, risen from wanem man i save bilif long Baebol, ol ansa blong ol kwestin long saed blong bilif, ol profet tok long Baebol we oli stap kamtru, mining blong sam vas long Baebol, mo olsem wanem man i save mekem ol rul blong Baebol oli wok long laef blong hem long evri dei. Traem holem ol jans blong yusum save ya long wok blong prij. I no nid blong yu wet blong man i askem wan kwestin from. Sipos i stret taem blong mekem, yu save tokbaot. Samting ya bambae i mekem se yu holem save ya long tingting blong yu mo bambae yu save yusumgud long plante defren fasin long wok blong prij.
4. ?Olsem wanem skul bambae i givhan long yumi blong kamgud moa long fasin blong yusum Baebol?
4 Fasin blong yusum Baebol hem i stampa blong wok blong yumi. Be i hadwok long sam pablisa blong faenem ol stret buk long Baebol kwiktaem. ?Yu yu olsem? Sipos yes, Tiokratik Skul bambae i save givhan long yu blong gohed strong moa. ?Olsem wanem? Yusum Baebol blong yu taem ol man oli givim tok long Tiokratik Skul. Taem man we i givim tok i ridim wan vas long Baebol, oltaem faenem vas ya long prapa Baebol blong yu. Taem yu stap lukaotem ol vas oltaem bakegen, bambae yu savegud ol vas ya mo lanem weples yu save faenem olgeta. Yu mas lanem fasin ya, mo bambae yu mekem olsem i no long wok blong prij nomo, be taem yu stap kam long Tiokratik Skul evri wik. Mo tu, yu save kasem ol gudfala samting long stadi we ol man blong givim tok oli mekem. Oli jusum ol impoten vas long Baebol blong yusum long tok blong olgeta. Taem yu stap lesin long man we i givim tok i gud blong putum mak aninit long impoten haf blong ol vas we yu ting se bambae yu wantem yusum long wok blong prij. Maet yu yu wantem raetemdaon olgeta tu, wetem tok we i stret long hem, insaed long skin blong Baebol blong yu. Long rod ya bambae i isi blong yusum ol samting we yu lanem long skul long wok blong prij.
5, 6. ?Olsem wanem fasin blong yusum ol trufala samting we oli stap kamaot long wok blong prij i save givhan long yumi?
5 Sipos yu jusumgud ples no plan taem yu mekemrere tok blong yu, bambae samting ya i givhan long yu blong luksave ol blesing blong skul long wok blong prij. Yusum ol fasin blong toktok we oltaem yu stap harem long wok blong prij sipos i stret blong mekem olsem. Samtaem maet yu save faenemaot se tok blong yu i laenap wetem toktok long ol haos wanwan no toktok we man i holem jans blong prij i mekem. Samtaem maet i moa stret blong mekem olsem man i toktok taem hem i mekem visit. No maet tok ya i stanap long poen we i save kamaot long taem blong Baebol stadi. Oltaem yu mas traehad blong mekem fasin blong tok blong yu i laenap wetem ol samting we oli tru. Samtaem yu save mekem tok blong yu i laef moa sipos yu mekem plan se man blong haos i no save agri wetem tok blong yu. Nao yu save soemaot olsem wanem blong winim samting ya. Ol tok we oli laenap wetem ol samting we oli stap kamaot long wok blong prij i no se oli mas karem gudfala frut kwiktaem, no gat. Hem i givhan tu blong soemaot olsem wanem blong toktok wetem ol man we oli no intres.
6 Taem yu yu mekem man blong haos, yu save kasem ol gudfala samting long saed blong wok blong prij tu. Yusum ol jans ya blong traem save tingting blong ol man blong haos, mo save from wanem oli stap stanemap ol kwestin olsem. Taem yu mekem olsem man ya blong haos, mo taem yu luk olsem wanem studen i toktok long taem olsem, samting ya bambae i givhan long yu blong karem frut long wok blong prij.
7. ?Blong yumi save gohed oltaem blong kamgud moa evri wik, wanem poen yumi save lukaot blong kamgud moa long hem?
7 Taem wan advaes i kamaot long Theocratic Ministry School Guidebook, traem skelem wetem tingting blong kamgud moa long minista wok blong yu, long ol haos wanwan no long sam narafala samting. ?Yu ting se i gud blong mekem se hemia nao bigfala poen long minista wok blong yu we yu mas kamgud moa long hem long wik ya? Eksampel, sipos tok blong yu long Tiokratik Skul i nidim wan stampa tok, traem tingbaot sipos tok blong yu long wok blong prij i rili gat wan stampa tok. ?Yu yu mekem i klia blong ol man blong haos oli save tingbaot afta we yu toktok long olgeta? Sipos no, long wik ya wok long hem. Mo tu bambae yu save harem ol tok we oli stanap long fasin blong rid mo talem mining blong ol vas long Baebol. Taem yu lesin long tok ya tingbaot olsem wanem yu stap yusum ol vas blong Baebol. ?Yu yu no stap eksplenem ol vas ya taem yu ridim long ol man blong haos? ?Olsem wanem yu joenem ol vas ya wetem stampa tok blong yu? ?Olsem wanem yu yusum wetem man blong haos? Fasin blong tingtinggud olsem i save givhan blong kamgud moa long fasin blong rid mo eksplenem ol vas long Baebol. ?Tok ya hem i long saed blong fasin blong yusum ol pijatok? ?Olsem wanem yu save kamgud moa long fasin blong yusum ol pijatok? No maet hem i long saed blong fasin blong tijim man long Baebol stadi. Skelem prapa fasin blong yu blong luk olsem wanem yu save yusum haf ya long saed blong Baebol stadi mo yusum long wik ya. Long rod ya, bambae yu yusum samting we yu lanem long Tiokratik Skul blong givhan long minista wok blong yu.
8. ?Taem yumi prij, olsem wanem yumi save trenem yumi wanwan?
8 Skelem ol tok blong yu. Oltaem long skul ya yu harem advaes mo yu luk ol blesing we oli kamaot from. Maet elda we i lukaot long skul i no stap wetem yu long doa taem yu prij, be oltaem i gud blong trenem yu wan. Taem yu toktok finis long wan man blong haos mo yu stap wokbaot i go long narafala haos, askem yu wan se: ?Mi mi mas mekem wanem blong kamgud moa long saed ya? ?Naoia we mi save wanem mi bin mekem, sipos mi kambak bakegen long man ya, olsem wanem mi save jenisim tok blong mi? Tingting olsem, maet bambae i givhan long yu long dei ya, from we maet yu save faenem wan man long narafala haos we i gat sem fasin nomo olsem hem. Sipos oltaem yu skelem ol tok blong yu taem yu prij, bambae yu stap gohed gud moa oltaem. Tru ya, sipos yu prij wetem narafala pablisa maet yu save askem tingting blong hem.
9, 10. ?Wanem samting yumi save mekem long haos blong i givhan long yumi blong mekem ol samting we yumi lanem long skul ya i wok?
9 Wan gudfala rod blong kamgud moa long ol tok blong yu, hem i blong lan wetem ol narafala man mo biaen yufala i save skelemgud toktok blong yufala. Yu save mekem olsem wetem ol famle blong yu no wetem ol narafala insaed long kongregesen. Askem olgeta blong oli mekem man blong haos, oli save toktok olsem ol man we yufala i stap faenem oltaem long wok blong prij. Sipos oli sakem ol tok blong blokem yu, traem ansa bak sipos yu save olsem wanem blong mekem. Sipos no, yu save stop mo askem tingting blong olgeta we oli stap. Nao yu save gohed, yusum sam tingting we oli givim. Taem yu finis, evriwan i save skelem blong luk sipos samting we yufala i mekem hem i naf. Fasin blong lan olsem long haos i save givhan long yu blong kamgud moa long tok blong yu, mo oli givhan long yu tu blong jenisim sam mastik bifo yu go long wok blong prij. Olgeta oli save givhan long yu tu blong yusum ol rul we yu lanem long Tiokratik Skul long minista wok blong yu. Tingbaot, aposol Pol i talem long ol man we oli bigman finis long saed blong speret se, “oli stap traehad longtaem finis, nao oli kam we oli naf blong jusumaot wanem fasin i gud mo wanem fasin i nogud.” (Hib. 5:14) Wan rod blong mekem fasin luksave i kamgud moa taem yu stap lan.
10 Tiokratik Skul i wan long ol samting we Jeova i stap givim blong trenem yumi. Taem yumi stap traehad blong lanem mo mekem ol samting we yumi lanem oli wok long laef blong yumi bambae yumi save talem olsem profet ya we i talem se: “Hae Masta Jeova hem wan i givim tang long mi, olsem tang blong ol man we hem i tijim, blong mi save talem wan tok blong ansa long man we i slak. Hem i girap long evri moning. Hem i wekemap sora blong mi blong harem ol samting olsem ol man we hem i stap tijim olgeta.”—Aes. 50:4.