Haf 2
Wan Wol We i No Moa Gat Trabol
1, 2. ?Plante man oli gat wanem defren tingting?
BE LONG ful wol, plante milyan man oli gat defren tingting. Oli luk wan nambawan fyuja blong ol man. Oli talem se long graon ya nomo, i no longtaem bambae i no moa gat rabis fasin mo trabol. Oli bilif se kolosap nao ol nogud samting oli finis mo wan nyufala wol bambae i stanap. !Oli talem tu se faondesen blong nyufala wol ya i stat naoia!
2 Ol man ya oli bilif se long nyufala wol ya bambae i no moa gat faet, raf fasin, fasin blong brekem loa, kruked fasin mo fasin pua. Hemia wan wol we bambae i no gat sik, fasin we man i harem nogud, i no gat man we i krae mo ded tu. Long taem ya bambae ol man oli kam stret olgeta mo oli laef foreva wetem glad long wan paradaes long wol. !Yes, ol dedman tu bambae oli laef bakegen mo oli gat jans blong laef foreva!
3, 4. ?From wanem ol man ya oli bilif long tingting ya?
3 ?Tingting ya i wan drim nomo, wan samting we man i wantem nomo se i kamtru? No gat. Hem i stanap long wan bilif we faondesen blong hem i strong se Paradaes ya i mas kamtru. (Hibrus 11:1) ?From wanem ol man ya oli sua olsemia? From we promes ya i kam long Hemia we i gat olgeta paoa mo i mekem heven mo wol.
4 Long saed blong ol promes blong God, Baebol i talem se: “Long olgeta gudfala tok we Jeova, God blong yufala i talem long yufala, i no gat wan tok we i mestem. Olgeta oli kamtru finis long yufala. I no gat wan tok nating long olgeta we i mestem.” “God i no olsem wan man blong i gyaman . . . ?Hem i talem, mo olsem wanem bambae i no save mekem? ?Hem i talem, olsem wanem i no save mekem i kamtru?” “Jeova blong ol ami i promes se: ‘Yes, olsem we mi mi plan finis, nao samting ya i mas hapen; mo olsem we mi mi talem finis, samting ya bambae i mas kamtru.’ ”—Josua 23:14; Namba 23:19; Aesea 14:24.
5. ?Wanem ol kwestin ya we yumi mas ansa long olgeta?
5 ?Be sipos God i gat plan blong mekem wan paradaes long wol we i no gat trabol long hem, from wanem hem i letem ol nogud samting oli kamaot fastaem? ?From wanem hem i wet long sikis taosen yia kam kasem naoia, blong stretem samting we i rong? ?Olsem wanem, olgeta handred yia ya blong trabol oli soemaot we God i no rili kea long yumi, mo we hem i no stap?