Ol Kwestin We Plante Taem Ol Man Oli Askem Long Ol Witnes Blong Jeova

?Sipos God i gat lav, from wanem hem i letem rabis fasin i stap?

I TRU se God i letem rabis fasin i stap, mo plante man oli jus blong folem ol fasin we oli nogud long laef blong olgeta. Yes, ol man oli faet, oli sakem bom we i kilim ol pikinini i ded, oli spolem ol samting we God i wokem long wol, mo from fol blong olgeta nao plante man oli sot long kakae. Milian man oli smok sigaret mo oli kasem kansa blong waet leva, oli slip olbaot mo kasem ol rabis sik long saed blong seks, oli dring alkol mo strong dring mo oli kasem sik blong leva (cirrhosis), mo oli mekem plante narafala samting bakegen we biaen i karem trabol i kam long olgeta. Ol man ya oli no rili wantem we rabis fasin i stop from we oli laekem ol fasin ya. Be oli no wantem kasem panis no trabol from ol rabis fasin. Taem oli kasem trabol from rabis fasin we oli mekem, oli krae se “?From wanem mi nao mi mas kasem trabol olsem?” Oli talem se trabol ya i fol blong God, olsem Proveb 19:3 i talem: “Sam man oli stap spolem laef blong olgeta long ol rabis fasin blong olgeta, mo biaen, oli talem se Hae God nomo i stap spolem olgeta.” Be sipos God i talem se oli mas stop blong mekem ol rabis fasin, bambae oli kros mo bambae oli talem se God i no letem oli fri blong mekem samting we oli wantem.

Bigfala risen from wanem Jeova i letem rabis fasin i stap hemia from we hem i mas ansabak long tok we Setan i sakem agensem hem. Devel Setan i talem se i no gat wan man we God i wokem, we bambae i wosipim God sipos hem i kasem traem. (Job 1:6-12; 2:1-10) Jeova i letem Setan i stap blong i pruvum tok ya we hem i sakem agens long God. (Eksodas 9:16) Tede, Setan i stamba blong plante trabol long wol, hem i traem pulum ol man blong oli agensem God from we hem i wantem pruvum se tok blong hem i tru. (Revelesen 12:12) Be i no evri man we oli folem Setan. Job i bin holemstrong long God. Jisas tu i holemstrong long God. Mo plante trufala Kristin tede tu oli stap holemstrong long God.—Job 27:5; 31:6; Matiu 4:1-11; 1 Pita 1:6, 7.

Mi mi wantem bilif se wol ya bambae i kam wan paradaes we man bambae i save laef olwe long hem, ?be olsem wanem mi save sua se samting ya bambae i rili kamtru?

Baebol i soem se yumi save bilif se wol bambae i kam wan paradaes. Hemia wan samting we i had blong bilif long hem from we yumi ol man, yumi luk trabol nomo blong plante handred yia. Be Jeova i wokem wol mo hem i talem se hem i wantem we wol ya i fulap long ol man mo woman we oli stretgud olgeta we bambae oli save lukaotgud long ol tri mo flaoa mo anamol, mo oli no save spolem wol ya be oli mekem we hem i stap naes olwe. (Lukluk pej 12 mo 17.) Paradaes ya we God i promes blong mekem, i no wan drim. Laef long wol tede i nogud tumas, i no save gohed olsem. I no longtaem, Paradaes bambae i tekem ples blong hem.

?Mi save talem wanem long man we i jikim mi mo oli talem se Baebol hem i buk blong ol kastom stori nomo mo i no laenap nating wetem saens?

Sipos wan man i bilif long ol promes ya, hemia i no min se hem i no gat hed. “Bilif i kamaot afta we man i harem nius.” Taem man i stadi Baebol, hem i luk se waes we i stap long Tok blong God i klia nomo, nao bilif blong hem i stat blong gru.—Rom 10:17, NW; Hibrus 11:1.

Ol samting we ol man blong digim graon oli faenem i pruvum se ol stori we Baebol i talem oli tru. Ol samting we ol saentis oli faenem we oli tru, oli laenap wetem Baebol. Hemia sam save we i stap finis long Baebol bifo we ol man blong wol ya oli faenemaot ol save ya: Baebol i soemaot se taem God i wokem ol defdefren samting long wol ya hem i wokem samfala samting fastaem, mo ol narawan biaen. Baebol i talem se wol i raon mo se i no gat wan samting we i holem wol ya. Mo Baebol i tokbaot ol pijin we oli save stret taem blong go long narafala ples blong ronwe long koltaem.—Jenesis, japta 1; Aesea 40:22, NW; Job 26:7; Jeremaea 8:7.

Ol profet tok blong Baebol we oli kamtru oltaem oli pruvum se Baebol i kamaot long God. Daniel i talemaot hu ol gavman we bambae oli holem bigfala paoa long wol, longtaem bifo we ol samting ya oli hapen. Mo hem i talem tu, wetaem Mesaea bambae i kam mo ol man bambae oli kilim hem i ded. (Daniel, japta 2, 8; 9:24-27) Tede, i gat sam narafala profet tok bakegen we oli stap kamtru, we oli soemaot klia se yumi stap finis long “ol las dei.” (2 Timoti 3:1-5, NW; Matiu, japta 24) Ol man oli no naf blong talemaot samting we bambae i kamtru long fiuja. (Aesea 41:23) Sipos yu wantem moa pruf long saed blong Baebol se hem i rili kamaot long God, yu save ridim ol buk olsem The Bible—God’s Word or Man’s? mo Is There a Creator Who Cares About You? we ol Witnes blong Jeova oli wokem. (Ol buk ya oli stap long Franis mo Inglis.)

?Olsem wanem mi save faenem ansa long ol kwestin long saed blong Baebol?

Yu mas stadi long Baebol mo tingting dip long hem, mo yu mas askem tabu spirit blong God tu blong i lidim yu. (Ol Proveb 15:28; Luk 11:9-13) Baebol i talem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.” (Jemes 1:5) Mo tu, i gat sam buk we oli save halpem yumi blong kasem save long ol tok blong Baebol. I gud blong ridim ol buk ya. Plante taem i gud tu blong askem narafala blong halpem yumi blong kasem save ya, olsem man Itiopia ya we i askem Filip blong halpem hem. (Ol Wok 8:26-35) Ol Witnes blong Jeova oli stadi Baebol wetem ol man we oli wantem save moa. Oli save mekem stadi ya wetem yu long hom blong yu nomo we yu no pem wan samting. Yu no mas fraet blong askem sipos yu wantem oli stadi Baebol wetem yu.

?From wanem plante man oli no laekem ol Witnes blong Jeova mo oli talem long mi se mi no mas stadi wetem olgeta?

Taem Jisas i stap prij, plante man oli agensem hem, mo Jisas i talem se bambae ol man oli agensem ol disaepol blong hem tu. Taem ol man oli laekem ol tijing blong Jisas, ol lida blong jos oli tok agensem ol man ya se: “?Olsem wanem? ?Hem i giaman long yufala tu? ?Yufala i luk wan lida blong yumi we i bilif long hem finis? ?No wan Farisi?” (Jon 7:46-48; 15:20) Plante man we oli talem se yu no mas stadi wetem ol Witnes, oli talem olsem from we oli no save ol Witnes no oli harem sam giaman stori long saed blong ol Witnes. I gud yu gohed nomo blong stadi wetem ol Witnes blong Jeova, ale yu wan bambae yu skelem sipos stadi ya i rili givim moa save blong Baebol long yu no nogat.—Matiu 7:17-20.

?From wanem ol Witnes oli go long haos blong man we oli gat skul finis?

Ol Witnes oli folem eksampol blong Jisas. Hem i prij long ol man Jiu. Ol man Jiu ya oli gat skul blong olgeta finis, be i gat plante samting we oli mekem we i no laenap wetem Tok blong God. (Matiu 15:1-9) Long evri kantri i gat ol skul, maet samfala oli Kristin skul mo samfala oli no Kristin. I impoten tumas we ol man oli mas folem ol bilif we oli stap long Tok blong God, mo ol Witnes oli traem bes blong olgeta blong halpem ol man ya blong mekem olsem, hemia wan rod blong soem lav long ol man raonabaot long olgeta.

?Ol Witnes oli bilif se skul blong olgeta nomo i tru wan?

Ating evri man we oli bilif strong long skul blong olgeta, oli bilif tu se skul ya nao i tru wan. Sipos no, ating bambae man ya i no save bilif strong long skul blong hem, ?i tru? Ol Kristin oli folem advaes ya we Baebol i givim se: “Yufala i mas traem olgeta samting fastaem, nao yufala i save holemstrong ol samting we oli gud.” (1 Tesalonaeka 5:21) Wanwan man i mas meksua se ol bilif blong hem oli stanap long Baebol, from we i gat wan bilif nomo we i tru. Efesas 4:5 i soemaot samting ya, taem hem i talem se “yumi gat wan Masta nomo, mo yumi gat wan tok nomo we yumi bilif long hem, mo i gat wan baptaes nomo.” Jisas i no agri wetem tingting blong plante man tede we oli talem se evri skul i gud from we oli olsem plante rod we oli lidim man i go long God. Jisas i no talem se i gat plante rod, hem i se: “Get ya we i smol nomo, mo rod we i strong, hemia i blong go kasem laef. Mo smol man nomo oli faenem.” Ol Witnes blong Jeova oli bilif se oli faenem rod ya we i go long laef. Sipos oli no bilif olsem, bambae oli traem faenem narafala skul blong joen long hem.—Matiu 7:14.

?Ol Witnes oli bilif se God bambae i sevem olgeta nomo?

Ol Witnes oli no bilif se God bambae i sevem olgeta nomo. I gat plante milian man we oli laef long ol taosen yia bifo, mo olgeta ya oli no Witnes blong Jeova, be bambae God i mekem oli laef bakegen long ded mo olgeta tu bambae oli gat janis blong sef. Mo tede, i gat plante man we maet bambae oli tekem desisen yet blong folem rod blong trutok mo stret fasin, bifo we “bigfala trabol” i kam, nao olgeta ya tu bambae oli save sef. Mo tu, Jisas i talem se yumi no mas jajem yumi. Yumi man yumi save luk samting nomo we ae blong yumi i stap luk; be God i save luk hat blong man. Hem i luk trufala samting long saed blong man mo hem i save jajem man wetem sore. God i putum wok blong jajem man i stap long han blong Jisas, i no long han blong yumi.—Matiu 7:1-5; 24:21; 25:31.

?Taem wan man i kam long ol miting blong ol Witnes blong Jeova, hem i mas givim smol mane?

Aposol Pol i tokbaot fasin blong givim mane i se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9:7) Ol Witnes blong Jeova oli neva askem mane long ol man we oli kam long Haos Kingdom mo asembli blong olgeta. I gat sam bokis blong putum mane i stap long ples blong miting blong olgeta, mo sipos wan man i wantem mo i naf blong putum mane long bokis ya hemia jus blong hem nomo. Ol Witnes blong Jeova oli no traem faenem se hu i givim mane mo hamas mane we man i givim. Nogat. Samfala maet oli givim bigfala mane moa bitim narafala. Mo samfala maet oli no naf blong givim wan mane nating. Jisas i soem stret tingting we yumi mas gat long saed ya taem hem i tokbaot ol ples blong sakem mane long tempol long Jerusalem bifo, mo ol man we oli stap sakem mane long ples ya. Hem i soemaot se: Man we i naf blong givim mo we i givim wetem gudfala tingting, hemia nao samting we God i luk, be God i no luk hamas mane we man i sakem.—Luk 21:1-4.

?Sipos mi mi kam wan Witnes blong Jeova, bambae mi tu mi mas prij olsem olgeta?

Taem man i kasem save gud long saed blong Paradaes long wol we Kingdom we Kraes i rul long hem bambae i mekem, man ya bambae i wantem serem save ya wetem narafala. Bambae yu tu yu harem olsem. !Hemia nao gud nius!—Ol Wok 5:41, 42.

Taem yu mekem olsem, hemia wan rod blong soemaot se yu yu disaepol blong Jisas Kraes. Baebol i talem se Jisas hem i “tru witnes ya we i no save tanem tok blong hem.” Taem hem i stap long wol hem i prij se: “Taem blong God i kam King blong olgeta man long wol, i kam klosap finis,” mo hem i sanem ol disaepol blong hem tu blong oli mekem olsem. (Revelesen 3:14, NW; Matiu 4:17; 10:7) Biaen, Jisas i givim oda ya long ol man blong hem i se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas . . . tijim olgeta.” Mo hem i talem tu se, bifo we en i kam, “bambae ol man oli stap talemaot gud nius ya blong Kingdom Blong God. Bambae oli talemaot long olgeta ples long wol, blong oli witnes blong hem long fes blong olgeta man.”—Matiu 24:14, NW; 28:19, 20.

I gat plante rod blong talemaot gud nius. Taem yu storian wetem ol fren mo ol famle, plante taem i gat janis blong tokbaot gud nius ya long olgeta. Sam man oli raetem leta, samfala oli yusum telefon blong serem save blong Baebol wetem ol man. Samfala oli jusum wan buk we i tokbaot wan samting we oli ting se wan famle no fren, bambae i intres long hem nao oli sanem buk ya i go long olgeta. Be from we ol Witnes oli no wantem mestem wan man, oli go long olgeta haos wanwan blong serem gud nius ya wetem olgeta.

Baebol i singaot yumi evriwan blong folem tok ya se: “Tabu Spirit wetem Woman blong Smol Sipsip, tufala i talem se, ‘Yu kam.’ Mo olgeta evriwan we oli harem tok ya, oli mas talem olsem tu se, ‘Yu kam.’ Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.” (Revelesen 22:17) Taem yumi talemaot nius se wol bambae i kam wan Paradaes mo plante blesing bambae i kam, yumi mas mekem wetem gladhat, mo yumi mas wantem tumas, long hat blong yumi, blong serem gud nius ya wetem ol man.

Mifala i ting se maet bambae yu gat sam narafala kwestin long saed blong ol Witnes blong Jeova mo bilif blong olgeta. Maet i gat sam samting long saed blong olgeta we yu yu no agri long hem. Mifala i glad blong ansa long ol kwestin blong yu. I no gat naf ples long buk ya blong raetem evri kwestin mo evri ansa we ol man oli gat, taswe mifala i askem yu blong yu toktok wetem ol Witnes blong Jeova long ples blong yu mo askem kwestin blong yu long olgeta. Maet yu save mitim olgeta long ol miting we oli mekem long Haos Kingdom no taem oli kam pas long haos blong yu. No maet yu wantem raetem kwestin blong yu long wan leta mo sanem i kam long ol Witnes blong Jeova. Yu save yusum wan long ol adres ya we i stap daon.