?Kongregesen i Wok Folem Wanem Plan?

LONG fas leta we aposol Pol i raetem long ol Kristin long Korin, hem i tokbaot wan nambawan fasin blong God, i se: “God i no wan God blong ol samting we i olbaot, be hem i God blong pis.” Nao Pol i tokbaot ol miting blong kongregesen, i se: “Olgeta samting oli mas hapen long fasin we i stret mo i folem plan.”—1 Kor. 14:33, 40.

² Kongregesen blong Korin i stap seseraot. Taswe long stat blong leta blong Pol, hem i talem long ol brata mo sista se oli mas “gat wan tingting nomo,” mo se oli ‘mas joen gud long wan maen, mo fasin blong olgeta blong tingting i mas sem mak.’ (1 Kor. 1:10, 11) Nao Pol i givim advaes blong stretem sam samting we oli mekem se kongregesen i no moa joen gud. Hem i talem se kongregesen i olsem bodi blong man, we olgeta haf blong hem oli mas joen gud mo wok wanples. Olgeta evriwan long Kristin kongregesen oli mas givgivhan long olgeta mo laeklaekem olgeta, nomata wanem wok we oli gat long kongregesen. (1 Kor. 12:12-26) Sipos olgeta long kongregesen oli wantem wok gud wanples, oli mas wok folem plan.

³ ?Kristin kongregesen i mas wok folem wanem plan? ?Hu i mekem plan ya? ?Wanem ol wok insaed long kongregesen? ?Hu i mekem ol wok ya? Yumi save faenem ansa blong ol kwestin ya long Baebol.—1 Kor. 4:6.

WOK FOLEM PLAN WE GOD I PUTUMAP

⁴ Kristin kongregesen i stat long lafet blong Pentekos long yia 33. ?Kongregesen ya i wok olsem wanem? God nao i putumap rul o plan blong kongregesen ya. Hemia i min se kongregesen i tiokratik (tok ya i kamaot long tufala Grik tok ya the·osʹ we i min se ‘God,’ mo kraʹtos we i min se ‘rul’). Tufala tok ya i stap long ol olfala hanraet blong 1 Pita 5:10, 11. Samting we i hapen long Jerusalem klosap 2,000 yia bifo, i soemaot klia se God nomo i stanemap kongregesen blong ol tabu Kristin. (Wok 2:1-47) Kongregesen ya i olsem haos we God i wokem, o famle blong hem. (1 Kor. 3:9; Efes. 2:19) Tede, Kristin kongregesen i folem sem plan olsem ol kongregesen bifo.

⁵ Taem Kristin kongregesen i stat, 120 man nomo i stap long hem. Tabu spirit i kamdaon long olgeta, olsem profet tok blong Joel 2:28, 29 i talem. (Wok 2:16-18) Long sem dei, 3,000 man oli baptaes long wota mo oli joen long kongregesen blong ol tabu man ya. Oli bilif long ol tok blong Kraes, mo “oli gohed blong folemgud ol tijing blong ol aposol.” Ale, “evri dei, Jehova i stap tekem ol man we hem i sevem olgeta, oli kam joen wetem olgeta.”—Wok 2:41, 42, 47.

⁶ Kongregesen blong Jerusalem i kam bigwan gogo, hae pris blong ol man Jiu i tok agensem ol disaepol blong Jisas, se Jerusalem i fulap long tijing blong olgeta. Sam pris blong ol man Jiu, olgeta tu oli kam disaepol blong Kraes mo oli joen long niufala kongregesen ya.—Wok 5:27, 28; 6:7.

⁷ Jisas i talem se: “Bambae . . . yufala i witnes blong mi long Jerusalem, mo long olgeta ples long Judia mo Sameria, gogo yufala i kasem olgeta ples long wol.” (Wok 1:8) Tok ya i kamtru afta we ol man oli kilim Steven i ded. Oli mekem nogud long ol disaepol long Jerusalem, nao ol disaepol ya oli go wanwan long ol defren ples long Judia mo Sameria. Be long evri ples we oli go long hem, oli talemaot gud nius mo oli pulum plante man i kam disaepol, wetem sam man Sameria tu. (Wok 8:1-13) Biaen bakegen, ol disaepol oli talemaot gud nius long ol man blong ol narafala laen we oli no sakomsaes, ale, plante long olgeta tu oli kam disaepol. (Wok 10:1-48) Bigfala wok ya blong prij i pulum plante man oli kam disaepol, nao plante niufala kongregesen oli stanap long ol defren ples afsaed long Jerusalem.—Wok 11:19-21; 14:21-23.

⁸ ?Oli mekem olsem wanem blong ol niufala kongregesen ya oli folem plan we God i stanemap? Tabu spirit i lidim wok blong putumap sam man we oli stap aninit long Kraes, blong oli lukaot long ol sipsip blong God. Taem Pol mo Banabas tufala i mekem fas misinari trip blong tufala, tufala i putumap sam elda long ol kongregesen. (Wok 14:23) Luk i tokbaot miting we Pol i mekem wetem ol elda long kongregesen blong Efesas. Pol i talem long olgeta se: “Yufala i mas lukaot gud long yufala mo long olgeta sipsip we tabu spirit i putumap yufala blong yufala i ovasia long olgeta. Yufala i mas lukaot long kongregesen blong God, olsem we man i lukaot long ol sipsip. Olgeta ya, hem i pemaot olgeta long blad blong stret Pikinini blong hem.” (Wok 20:17, 28) Ol man ya oli naf blong mekem wok blong elda insaed long kongregesen, from we oli kasem ol mak we Baebol i talem. (1 Tim. 3:1-7) Pol i givim raet long Taetas we i wok wetem hem, blong i putumap ol elda long ol kongregesen long Krit.—Taet. 1:5.

⁹ Taem Kristin kongregesen i kam bigwan moa long wol, ol aposol mo ol elda long Jerusalem oli lukaot long olgeta kongregesen evriwan. Oli wok olsem hed kampani blong Kristin kongregesen.

¹⁰ Aposol Pol i raetem leta long kongregesen blong Efesas, mo i talem se Kristin kongregesen i mas wok folem rod we tabu spirit i soemaot. Olsem nao, ol Kristin oli obei long Hed blong kongregesen Jisas Kraes, nao kongregesen i joen gud. Pol i talem long ol Kristin long Efesas se tingting blong olgeta i mas stap daon, mo ‘oli mas traehad blong holemtaet fasin ya we oli wan nomo long spirit, we pis i mekem se oli joen gud’ insaed long kongregesen. (Efes. 4:1-6) Nao Pol i yusum ol tok blong Ol Sam 68:18, blong soemaot se Jehova i putumap plan ya we sam man oli mekem ol defdefren wok long kongregesen. Ol man ya oli mas kasem ol mak we Baebol i talem. Sam long olgeta oli aposol, sam oli profet, sam oli man blong talemaot gud nius, sam oli lukaot long ol sipsip blong God, mo sam oli tija. Ol man ya oli olsem presen we Jehova i givim blong mekem kongregesen i strong, nao God i save harem gud long hem.—Efes. 4:7-16.

TEDE OL KONGREGESEN OLI FOLEM SEM ROD

¹¹ Tede, ol kongregesen blong ol Witnes blong Jehova oli folem sem rod. Olgeta kongregesen oli joen olsem wan bigfala oganaesesen long fulwol, mo ol Kristin we tabu spirit i makemaot olgeta oli spesel haf blong bigfala oganaesesen ya. (Sek. 8:23) Jisas Kraes nao i mekem i hapen olsem. Hem i holem promes we hem i mekem long ol disaepol we tabu spirit i makemaot olgeta, se bambae hem i stap wetem olgeta “oltaem, gogo kasem lashaf blong sistem blong wol.” Ol niuwan we oli joen long ol kongregesen oli bilif long gud nius we i kamaot long God, oli givim laef blong olgeta i go fulwan long Jehova, mo oli baptaes blong kam ol disaepol blong Jisas. (Mat. 28:19, 20; Mak 1:14; Wok 2:41) Oli luksave se “gudfala man blong lukaot long sipsip,” Jisas Kraes, hem i Hed blong ful oganaesesen, hemia ol Kristin we tabu spirit i makemaot olgeta mo “ol narafala sipsip.” (Jon 10:14, 16; Efes. 1:22, 23) Olgeta ya oli “wan grup nomo” we i joen gud from we olgeta evriwan oli luksave Kraes olsem Hed blong olgeta, mo oli obei long grup we Kraes i putumap blong lidim oganaesesen blong God, hemia “gudfala slef we i waes.” I gud yumi gohed blong trastem grup ya, mo yumi putum tingting blong yumi i stap strong long ol samting we hem i talem.—Mat. 24:45.

WOK BLONG OL ASOSIESEN WE OGANAESESEN I YUSUM

¹² Oganaesesen i yusum sam asosiesen blong i save givimaot save blong God long stret taem blong hem, mo blong finisim wok blong talemaot gud nius blong Kingdom bifo we en i kam. Oganaesesen i rejistarem ol asosiesen ya folem loa blong ol defdefren kantri. Ol asosiesen ya oli mekem i isi moa blong talemaot gud nius long olgeta ples long wol.

PLAN WE OL BRANJ OFIS OLI FOLEM

¹³ Taem oli openem wan niufala branj ofis, oli putumap wan Branj Komiti we i gat tri elda long hem, o maet i gat bitim tri. Olgeta oli lukaot long wok blong Kingdom long kantri we branj ofis i stap long hem, mo maet long sam narafala kantri tu we branj ofis i lukaot long olgeta. Wan long ol elda ya, hem i kodineta blong Branj Komiti.

¹⁴ Branj ofis i seraotem ples we hem i lukaot long hem long ol eria. Sam bigfala eria oli gat plante kongregesen, mo sam smol eria oli gat sam kongregesen nomo. Hemia i dipen long ples we ol kongregesen oli stap long hem, mo lanwis we ol man oli toktok long hem. Mo tu, i dipen long namba blong ol kongregesen long ples we branj ofis i lukaot long hem. Long ol eria wanwan, i gat wan eria elda we i visitim ol kongregesen. Branj ofis i talem long ol eria elda olsem wanem oli mas mekem wok blong olgeta.

¹⁵ Ol kongregesen oli agri long ol plan we oganaesesen i mekem blong givhan long olgeta, mo oli folem ol plan ya. Oli glad blong wok wetem ol elda we oganaesesen i putumap olgeta blong lukaot long wok long branj ofis, ol eria, mo ol kongregesen. Oli lukluk i go long gudfala slef we i waes blong i givim ol gudfala save we i olsem kakae long stret taem blong hem. Slef ya i obei gud long Kraes we i Hed blong hem, i folem gud ol rul blong Baebol, mo i letem tabu spirit i lidim hem. Taem yumi evriwan i wok gud wanples, gudfala frut i kamaot, olsem i bin kamaot long Kristin kongregesen bifo. ‘Nao bilif blong ol kongregesen i stap kam strong moa, mo evri dei namba blong olgeta i stap kam antap moa.’—Wok 16:5.