LESEN 26
?From Wanem i Gat Trabol Mo Man i Safa?
Taem wan man i kasem trabol, plante taem hem i askem kwestin ya se: “?From wanem?” !Yumi glad we Baebol i ansa long kwestin ya!
1. ?Olsem wanem Setan i statem trabol long wol ya?
Devel Setan i rebel agensem God. Hem i wantem rulum ol narafala taswe hem i pulum Adam mo Iv, blong joenem hem. Setan i mekem olsem taem hem i giaman long Iv. (Jenesis 3:1-5) Hem i pulum Iv blong ting se Jehova i no wantem givim gudfala samting long hem. Nao hem i mekem olsem se ol man oli save glad moa sipos oli no obei long God. Hem i talem long Iv se hem i no save ded, hemia faswan giaman tok. Taswe Baebol i singaot Setan se “man blong giaman mo hem i papa blong ol giaman toktok.”—Jon 8:44.
2. ?Adam mo Iv i jusum blong mekem wanem?
Jehova i givim plante samting long Adam mo Iv. Hem i talem se tufala i save kakae long evri tri we i stap long garen, be wan nomo tufala i no save kakae long hem. (Jenesis 2:15-17) Be tufala i gohed nomo blong kakae frut blong tri ya. Iv “i tekem frut blong tri ya mo i kakae.” Biaen, Adam “tu i kakae.” (Jenesis 3:6) Tufala tugeta i no obei long God. Long taem ya, i nomol nomo blong Adam mo Iv i obei from we tufala i stret gud olgeta. Be taem tufala i jusum blong no obei, tufala i mekem sin mo soem se tufala i no wantem stap aninit long rul blong God. Desisen ya i mekem tufala i safa bigwan.—Jenesis 3:16-19.
3. ?Olsem wanem desisen blong Adam mo Iv i afektem yumi?
Taem Adam mo Iv i mekem sin tufala i no moa stret gud olgeta, mo tufala i pasem sin long olgeta pikinini blong tufala. Baebol i tokbaot Adam, i se: “Wan man nomo i mekem se sin i kam long wol, mo ded i kamaot from sin. Mo ded i kasem olgeta man.”—Rom 5:12.
Yumi safa from ol defren risen. Samtaem yumi safa from ol nogud desisen blong yumi. Samtaem from ol nogud desisen blong narafala. Samtaem from we yumi stap long rong ples mo long rong taem.—Ridim Prija 9:11.
DIGIM MOA
Faenemaot from wanem i no fol blong God we i gat trabol mo man i safa, mo faenemaot ol filing blong Hem.
4. ?Hu i mekem se ol man oli stap safa?
Plante man oli bilif se God i kontrolem ful wol. ?I tru olsem? Plei VIDEO.
Ridim Jemes 1:13 mo 1 Jon 5:19, mo tokbaot kwestin ya:
?God nao i mekem se ol man oli safa mo i gat ol trabol?
5. ?Wanem i hapen taem Setan i stat blong rul?
Ridim Jenesis 3:1-6, mo tokbaot ol kwestin ya:
?Wanem giaman tok we Setan i talem?—Luk vas 4 mo 5.
?Setan i talem wanem blong givim tingting se God i stap blokem ol man blong kasem ol gudfala samting?
?Setan i talem wanem blong soem se ol man oli no nidim rul blong Jehova blong oli hapi?
Ridim Prija 8:9, mo tokbaot kwestin ya:
?Wanem i hapen taem Jehova i no moa rulum wol?
Adam mo Iv oli stret gud olgeta mo oli laef long Paradaes. Be oli lesin long Setan mo oli rebel agensem Jehova
Afta we tufala i rebel, wol ya i fulap long ol sinman, plante man oli safa mo oli ded
Jehova bambae i finisim sin, ded mo fasin safa. Nao bambae ol man oli kam stret gud olgeta mo laef long paradaes olsem bifo
6. Jehova i tingbaot yumi taem yumi safa
God i kea long yumi taem yumi safa. Makem samting we King Deved mo aposol Pita i raetem. Ridim Ol Sam 31:7 mo 1 Pita 5:7, mo tokbaot kwestin ya:
?Yu harem olsem wanem taem yu save se Jehova i kea mo i luk yumi taem yumi safa?
7. God bambae i mekem se ol man oli no moa safa
Ridim Aesea 65:17 mo Revelesen 21:3, 4, mo tokbaot kwestin ya:
?Wanem filing blong yu, taem yu save se God bambae i finisim ol trabol?
?Yu yu save?
Faswan giaman tok we Setan i talem, hem i mekem agensem Jehova. Hemia i spolem nem blong Jehova, se hem i wan rula we i nogat stret fasin mo lav. Be i no longtaem bambae Jehova i finisim ol trabol we i mekem ol man oli safa. Long taem ya bambae hem i mekem nem blong hem i tabu bakegen. I min se bambae hem i pruvum se rul blong hem i beswan. I impoten tumas we nem blong God i kam tabu bakegen long ful yunives.—Matiu 6:9, 10.
SAM MAN OLI SE: “Yumi stap safa from hemia plan blong God.”
?Bambae yu talem wanem?
SAMARI
Devel Setan mo tufala faswan man oli responsibol long ol nogud samting we i hapen long wol ya. Jehova i rili kea long yumi taem yumi safa mo bambae i no longtaem hem i finisim ol samting we i mekem yumi safa.
Tingtingbak
?Wanem giaman tok we Setan i talem long Iv?
?Olsem wanem fasin blong Adam mo Iv blong rebel i afektem yumi evriwan?
?Olsem wanem yumi save se Jehova i tingbaot yumi taem yumi safa?
FAENEMAOT
Lanem mining blong tok ya sin long Baebol.
Faenemaot moa long topik we Setan i talem long garen blong Iden.
Jekem ol gudfala ansa long wan impoten topik.
Luk olsem wanem wan man i lanem lesen long ol trabol raonabaot long hem.