LAEF STORI
Mifala i Lanem Blong Neva Talem No Long Jehova
AFTA long wan bigfala hariken, i gat plante sofmad mo bigfala ston long reva. Mifala i wantem krosem reva ya, be i no moa gat brij. Mi mo hasban blong mi, Harvey, wetem transleta blong mitufala blong lanwis Amis, mifala i no save wanem blong mekem, mo mifala i fraet. Ol brata oli stap wajem mifala narasaed reva, mo oli wari. Nao mitrifala i stat blong gokros. Fastaem, mifala i draevem smol ka blong mifala i go antap long bak blong wan bigfala trak, mo lego i stap olsem, ale bigfala trak ya i draev sloslo i go long reva ya we i ron strong. I luk olsem se bae mifala i neva kasem narasaed, be mifala i prea strong long Jehova, ale mifala i naf blong krosem. Samting ya i hapen long 1971. Mitufala i bin stap long iskos blong Taewan, hemia plante taosen kilometa longwe long ples blong mitufala. Hemia stori blong mitufala.
LANEM BLONG LAVEM JEHOVA
Harvey i fasbon long tri brata. Famle blong hem i kasem trutok long Midland Junction, Wes Ostrelia, long ol yia afta long 1930. Taem hem i stap gruap, hem i lavem Jehova tumas nao i baptaes taem i gat 14 yia. I no longtaem biaen, hem i lanem blong akseptem oltaem ol tiokratik wok we i kasem. Wan taem, taem hem i yangfala, hem i no wantem ridim Wajtaoa long miting, from we i ting se hem i no naf yet. Be brata we i toktok wetem hem, i se: “!Long oganaesesen blong Jehova, taem wan man i askem yu blong mekem wan samting, hemia i from we hem i save se yu yu naf!”—2 Kor. 3:5.
Mi mi kasem trutok long Inglan, olsem mama mo bigfala sista blong mi tu. Papa blong mi i jes akseptem trutok plante yia afta, be long stat, hem i agens. Hem i no wantem se mi baptaes, be mi gohed nomo, mi baptaes taem mi gat klosap ten yia. Mak blong mi hemia blong kam paenia mo misinari. Be Papa i no letem mi paenia, hem i se mi mas wet kasem mi gat 21 yia. Be mi no wantem wet kasem taem ya. Taswe taem mi gat 16 yia, mi askem blong go stap long Ostrelia wetem bigfala sista blong mi we i stap longwe, mo papa i letem mi. Ale taem mi gat 18 yia, mi stat blong paenia.
Long dei we mitufala i mared, long 1951
Mi mitim Harvey long Ostrelia. Mitufala tugeta i wantem kam misinari. Ale mitufala i mared long 1951. Afta we mitufala i paenia blong tu yia, mitufala i kasem wok blong go visitim ol kongregesen long wan eria we i kavremap bigfala haf blong Wes Ostrelia. Taswe plante taem mitufala i mas draev i gotru long sam ples we oli drae mo oli stap longlongwe.
DRIM BLONG MITUFALA I KAMTRU
Gilead graduesen long Yankee Stadium long 1955
Long 1954, mitufala i kasem invetesen blong joen long namba 25 klas blong Gilead. !Klosap nao drim blong mitufala i kamtru! Mitufala i kasem Niu Yok long sip, mo mitufala i statem kos ya blong stadi dip long Baebol. Long skul ya, mifala i mas lanem lanwis Spanis, be hemia i had long Harvey from we hem i no save talemgud leta ya r long Spanis.
Long taem blong kos, ol tija oli talemaot se olgeta we oli wantem kasem wan asaenmen long Japan, oli save putum nem blong olgeta, blong oli save joen long wan kos blong lanem lanwis Japanis. Mitufala i jusum se i moagud oganaesesen blong Jehova nomo i jusum asaenmen blong mitufala. I no longtaem afta, Albert Schroeder we i wan Gilead tija, i harem se mitufala i no putum nem blong mitufala. Ale hem i talem long mitufala se: “Yutufala i tingting gud moa long saed ya.” Taem mitufala i stap slo yet, Brata Schroeder i talem se: “Mi mo ol narafala tija i putum nem blong yutufala finis. Yutufala i traem luk sipos tang blong yutufala i save toktok lanwis Japanis.” Biaen Harvey i faenemaot se hem i save toktok gud moa long lanwis ya.
Mitufala i kamtru long Japan long 1955, long taem ya, i gat 500 pablisa nomo long ful kantri. Harvey i bin gat 26 yia, mo mi 24. Asaenmen blong mitufala hemia taon blong Kobe, mo mitufala i prij fo yia long ples ya. Biaen, mitufala i glad tumas blong kasem invetesen blong visitim ol kongregesen bakegen, ale mitufala i go wok long taon blong Nagoya. Mitufala i lavem evri samting long asaenmen blong mitufala, hemia ol brata, ol kakae, mo ol ples. Be i no longtaem afta, mitufala i gat janis blong talem yes bakegen long Jehova.
WAN NIU ASAENMEN WETEM SAM NIU JALENS
Mi mo Harvey, wetem sam nara misinari long Kobe, Japan, long 1957
Afta we mitufala i visitim ol kongregesen ya blong tri yia, branj blong Japan i askem sipos mitufala i glad blong go long Taewan, blong wok long medel blong wan traeb we oli kolem se, ol Amis. Samfala long ples ya oli kam man blong apostasi, mo Taewan i nidim wan brata we i toktok gud lanwis Japanis, blong i go stretem situesen ya.a Mitufala i lavem tumas wok blong mitufala long Japan, taswe hemia i wan had desisen. Be Harvey i lanem finis blong neva talem no long wan asaenmen, ale mitufala i agri blong go.
Mitufala i kamtru longwe long Novemba 1962. Long taem ya, i gat 2,271 pablisa long Taewan, mo bighaf blong olgeta oli ol man Amis. Be fastaem, mitufala i mas lanem Jaenis. Mitufala i gat wan teks buk nomo mo wan tija we i no toktok Inglis, be nating, mitufala i naf blong lanem lanwis ya.
I no longtaem afta we mitufala i kamtru long Taewan, Harvey i kasem wok ya blong lukaot long branj. Branj ya i smol, taswe Harvey i gat taem blong lukaot long ol responsabiliti blong hem long ofis, mo long semtaem, i save prij wetem ol Amis brata blong tri wik long evri manis. Mo tu, sam samtaem hem i save mekem wok blong distrik ovasia, mo i givim tok long ol asembli. Sipos Harvey i wantem, hem i save givim ol tok ya long lanwis Japanis nomo, mo ol Amis brata oli naf blong kasemsave. Be gavman i letem ol man oli mekem ol miting blong jos long lanwis Jaenis nomo. Taswe Harvey i mas givim ol tok long Jaenis, nating se hem i no savegud lanwis ya yet, mo wan brata i transletem tok ya, blong ol Amis brata oli kasemsave.
Long taem ya, Taewan i stap aninit long rul blong ol ami, taswe ol brata oli mas askem pemit fastaem blong oli save gat ol asembli. I no isi blong kasem wan pemit, mo plante taem, polis i slo blong givim pemit ya. Long wik blong asembli, sipos polis i no givim pemit yet, Harvey i go sidaon long polis stesen go kasem we oli givim. Ol polis oli sem taem wan man blong narafala kantri i go wet long stesen blong olgeta, from samting ya oli kwik blong givim pemit.
FASWAN TAEM WE MI KLAEM WAN BIGFALA HIL
Long Taewan, mifala i krosem reva we i no dip tumas, blong go prij
Taem mifala i spenem wik wetem ol brata, plante taem mifala i wokbaot wan aoa o moa. Mifala i klaem ol bigfala hil mo krosem ol reva. Mi rimemba faswan taem we mi klaem wan bigfala hil. Mifala i hariap blong dring ti long moning, biaen mifala i jam long bas long 5:30, mo go long wan vilej we i stap longwe, nao mifala i krosem wan bigfala reva, mo mifala i traehad blong klaem wan bigfala hil. Hil ya i stip we i stip, nao ae blong mi i stap long sem level long leg blong brata we i stap fored long mi.
Long moning ya, Harvey i prij wetem sam lokol brata, mo mi stap prij mi wan long wan smol vilej we i gat ol man we oli toktok Japanis. Taem klosap wan klok, mi harem se mi slak we mi slak from we mi hanggri tumas. Taem mi go mitim Harvey, i no moa gat brata i stap wetem hem. Ale Harvey i givim sam magasin long wan man, blong pem tri eg blong faol we i no tan. Harvey i soem olsem wanem blong kakae eg ya olsem nomo, ale i brekem wan smol hol long tufala en blong eg ya, i putum maot blong hem long wan hol mo i pulum insaed blong eg i go long maot blong hem. Mi no laekem tumas blong kakae eg ya olsem nomo, be mi traem wan. ?Be hu bae i kakae namba 3 eg? Mi nao mi kakae, from we Harvey i no save karem mi i godaon long bigfala hil ya sipos ae blong mi i dak from hanggri.
WAN PLES BLONG SWIM WE I NARAKAEN
Long wan seket asembli, mi fesem wan samting we i defren. Mitufala i stap long hom blong wan brata, jes narasaed long Haos Kingdom. Ol Amis oli tinghae long fasin blong swim, taswe waef blong eria elda i rerem wota blong swim blong mitufala. Harvey i bisi tumas, ale hem i askem mi blong go swim fastaem. Blong swim, i gat wan baket blong kolwota, wan baket blong hot wota, mo wan emti besin. Be mi mi sapraes tumas blong luk se sista ya i putum ol samting ya aotsaed long yad, mo ol brata we oli stap givhan blong rerem asembli long Haos Kingdom, oli save luk mi klia nomo. Ale mi askem sipos hem i save givim wan bigfala plastik kaliko. !Be hem i girap, i givim wan plastik kaliko we man i save luk tru long hem! Mi stap tingting blong go swim long sado biaen long haos, be i gat sam gus long ples ya, oli stap pusum hed blong olgeta i gotru long fenis, mo oli rere nomo blong kakae eniman we i go klosap long olgeta. Ale mi tingting se: ‘Ol brata ya oli bisi tumas, bae oli no luk mi. Mo sipos mi no swim, bae oli no glad long mi. !Bae mi swim nomo!’ Mo mi mekem olsemia nao.
Mitufala i werem kastom klos blong ol Amis
BUK BLONG OL AMIS
Harvey i kasemsave se ol Amis brata oli faenem i had blong gohed gud, from we plante oli no save rid mo oli no gat buk long lanwis blong olgeta. I no longtaem i pas, ol man oli stat blong raetem ol toktok long lanwis Amis, taswe i luk olsem se i gud blong tijim ol brata blong oli save rid long prapa lanwis blong olgeta. Hemia wan bigfala wok, be biaen, ol brata oli naf blong stadi olgeta wan. Long en blong ol yia 1960, i jes gat ol buk long lanwis Amis, mo long 1968, oli stat blong wokem Wajtaoa long lanwis ya.
Be gavman i blokem ol buk we oli no stap long lanwis Jaenis. So blong no gat problem, Wajtaoa long lanwis Amis i kamaot long ol defdefren fom, ale ol brata oli seremaot. Eksampol, mifala i stap yusum Wajtaoa we i gat tufala lanwis ya Mandarin-Amis, long hem. Sipos wan man i wantem save se mifala i stap mekem wanem, bae hem i luk se mifala i stap tijim ol man blong oli save lanwis Jaenis. Stat long taem ya, oganaesesen blong Jehova i wokem plante buk long lanwis Amis, blong halpem ol gudfala brata ya blong lanem trutok.—Wok 10:34, 35.
WAN TAEM BLONG KLINIM
Long ol yia 1960 mo 1970, plante Amis brata oli no stap folem ol rul blong God. Olgeta oli no kasemsave fulwan long ol rul blong Baebol, taswe samfala oli stap wetem wan woman be oli no mared, oli stap drong, o oli yusum tabak mo betelnat. Harvey i visitim plante kongregesen, blong traem halpem ol brata blong oli kasemsave long tingting blong Jehova long ol samting ya. Long wan long ol trip ya, mifala i kasem ekspiriens we mi tokbaot long stat blong atikol ya.
Ol brata we oli gat tingting daon, oli glad blong jenisim fasin blong olgeta, be sore tumas, plante narafala oli no wantem. Samting ya i mekem se long wan period blong 20 yia, namba blong ol pablisa long Taewan i drop bigwan, i stap long bitim 2,450 i godaon kasem samwe 900. Hemia i daonem tingting bigwan. Be mifala i save se Jehova bambae i neva blesem wan oganaesesen we i no klin. (2 Kor. 7:1) Sam taem i pas, ale i no moa gat rabis fasin long kongregesen, mo wetem blesing blong Jehova, naoia Taewan i gat bitim 11,000 pablisa.
Stat long ol yia 1980 i go, mifala i luk se bilif blong ol Amis brata mo sista i kam strong moa, ale Harvey i save spenem moa taem wetem ol Jaenis brata sista. Hem i glad tumas blong halpem plante hasban blong ol sista, blong oli bilif long trutok. Mi rimemba, hem i bin talem se hem i hapi tumas taem wan long ol man ya i prea long Jehova blong faswan taem. Mi tu mi glad tumas se mi bin tijim plante we hat blong olgeta i stret, blong oli kam klosap long Jehova. Long branj ofis blong Taewan, mi bin glad tu blong wok wetem boe mo gel blong wan long olgeta we mi bin mekem stadi blong hem bifo.
MI LUSUM FREN BLONG MI
Be naoia, patna blong mi i no moa stap. Mi mo Harvey i mared klosap 59 yia, biaen gudfala hasban ya blong mi i ded long 1 Jenuware 2010, from kansa. !Hem i spenem klosap 60 yia long fultaem wok! Mi misim hem bigwan yet. !Be mi glad tumas se mi bin sapotem hem long taem ya we wok i stat long tufala kantri ya! Mitufala i lanem blong toktok tu lanwis blong Esia we i had tumas blong lanem, mo Harvey i mas lanem blong raet tu long tufala lanwis ya.
Sam yia biaen, Hed Kampani i mekem desisen se from we mi kam olfala, i moagud mi gobak long Ostrelia. Faswan tingting blong mi se: ‘Mi no wantem lego Taewan.’ Be Harvey i tijim mi finis blong neva talem no long oganaesesen blong Jehova, so bae mi go nomo. Biaen mi luk se i moa waes blong gobak.
Long Betel, mi glad tumas blong toktok Japanis mo Jaenis, blong givim tua long ol visita
Tede, long ol wik, mi wok long branj blong Ostrelesia, mo long ol wiken, mi prij wetem wan lokol kongregesen. Long Betel, mi glad blong toktok Japanis mo Jaenis taem mi givim tua long ol visita. Be yet, mi mi wet long promes ya se wan dei bae ol dedman oli laef bakegen, from we mi save se Harvey we i bin lanem blong neva talem no long Jehova, hem i stap sef long memori blong Hem.—Jon 5:28, 29.
a Naoia Jaenis i ofisol lanwis blong Taewan, be plante yia bifo, lanwis Japanis nao i ofisol lanwis blong olgeta. Taswe, ol man blong ol defdefren traeb long Taewan oli stil toktok lanwis Japanis.