U Hoo Nu Ren Sayọ Vbekpae Baibol Ra?
Vbọzẹ ne a na Tie e Baibol?
E BAIBOL i ye vbe ebeikebe ọvbehe—ọ vuọn ne imamwaemwi ahoẹmwọmwa nọ ke obọ Osanobua rre. (1 Tẹsalonaika 2:13) Adeghẹ u rhie ẹre ye uyinmwẹ emwi ne Baibol ma emwa re, u gha wa miẹn ere ẹsẹsẹmwẹse. U gha muan ahoẹmwẹmwa ọwuẹ ghe Osanobua kevbe u gha sikẹ ọre, Enọ Rhie Rre “emwi ne ọ gbae, ne ọ maan, ne a ya we ọmwa hia.” (Jems 1:17) U ghi do rẹn vbene a gha ya na erhunmwu giẹ hẹ. Vbuwe ẹghẹ ọghe ọlọghọmwa, u gha sẹtin miẹn iyobọ ọghe Osanobua. Adeghẹ u gie arrọọ ruẹ guaẹro avbe ilele ne ọ rre uwu e Baibol, Osanobua gha rhie arrọọ etẹbitẹ nuẹn.—Rom 6:23.
E Baibol keghi vuọn ne avbe ẹmwata nọ rhie uwanmwẹ ladian. Enii ni miẹn ere irẹnmwi e Baibol keghi re na fannọ hin uyinmwẹ ebamiro rre ne ọ loo arrọọ ọghe ẹbo emwa inu nọkhin. Vbe igiemwi, na rẹn ẹmwata vbekpa evbọ sunu vbe iyeke ima gha wu, fannọ ima hin ohan rre wẹ emwa ni wulo gha sẹtin kuan ima ra ẹtẹn kevbe avbe ọse ni wu wa rre irrioya. (Ezikiẹl 18:4) Imamwaemwi ọghe Baibol nọ kaẹn arhiọkpaegbe fu ọmwa ekhọe rre ighẹ enii ne emwa ne iran hoẹmwẹ ọnrẹn wulo. (Jọn 11:25) Na rẹn ẹmwata vbekpa avbe odibosa dan gi ima rẹn avbe ẹbe nọ rrọọ vbe a gha gu orhiọn dan muobọ kevbe ọ ru iyobọ ne ima ne a ya rẹn otọre evbọzẹe ne ọlọghọmwa na kpọ kua vbe uhun otagbọn.
Avbe ilele ọghosa ni rre uwu e Baibol rhie ma ima vbene a gha ya gha yin hẹ vbe odẹ ne ọ gha rhie avbe ere ikpakpa rre. Vbe igiemwi, “ne a gha re ne ọ ru emwi uhẹn uhẹn” rhie egberranmwẹ nọma rre. (1 Timoti 3:2) Lekpa a “khuẹ egbe mwa huan” hin emwi ne ọ sẹtin ye egbe ra orhiọn khian ne ọ ma huan, ima ghi gbaẹn egbe ne emwi ne ọ si ikuaẹngbe ne egberranmwẹ ọghomwa. (2 Kọrinti 7:1) Ne a gha rhie ibude Osanobua ne a miẹn vbe uwu e Baibol vbe guaekpao amuegbe-ye ọghọ kevbe oghọghọ vbe orọnmwẹ—1 Kọrinti 6:18.
Adeghẹ uwẹ na rhie Ẹmwẹ Osanobua ye uyinmwẹ, u do gha re ọmwa nọ mwẹ oghọghọ ẹsẹse. Irẹnmwi ọghe Baibol ru iyobọ ne ima ya gha mwẹ ọfumwegbe ekhọe kevbe isọkẹn ọ vbe rhie ayayẹro ne ima. Ọ ru iyobọ ne ima ya họnrẹn egbe avbe akpa nọma ẹsẹse zẹvbe ẹnina, ahoẹmwọmwa, oghọghọ, ọfumwegbe, itohan, kevbe amuẹtinyan. (Galatia 5:22, 23; Ẹfisọs 4:24, 32) Egbe avbe akpa vberriọ ru iyobọ ne ima ne a gha re ọdọ ra amwẹ ọghe esi, erha ra iye, ọmọkpia ra ọmokhuo.
U he zẹdẹ roro vbekpa odaro ra? A rẹn otọe avbe emwẹ akhasẹ ọghe Baibol gi ima rẹn ehe ne ima ye vbe ẹghẹ kpataki vbe okha ọghe agbọn na. Ẹi re wẹ te avbe ẹmwẹ akhasẹ na gie ẹre vbene agbọn na ye hẹ ẹdẹnẹrẹ ọkpa sokpan iran vbe kọe ye ọmwa ekhọe wẹ Osanobua ghaa rherhe fie uhun otagbọn na werriẹ khin e paradais.—Arhie Maan 21:3, 4.
Iyobọ ne a Ya Rẹn Otọ e Baibol
Ọghakẹ wẹ te hia ne u tie Baibol sokpan u miẹn wẹ ọlọghọ na rẹn otọre. Ughaghe wẹ ma rẹn eke ne u gha ghe vbuwe Baibol ne u ya gualọ avbe ewanniẹn ye inọta ruẹ. Adeghẹ erriọ nọ, ẹire uwẹ ọkpa. Ma hia fẹrẹrẹ gualọ iyobọ ne a ya rẹn otọtọ Ẹmwẹ ọghe Osanobua. Avbe Osẹe Jehova vbe odẹ otọe nọ re 235, kpemehe imamwaemwi e Baibol ọghe ọhẹ ne ẹbo emwa inu nọkhin. Iran gha vbe ghọghọ ne a ya ru iyobọ nuẹn.
Ọ gha ma ẹsẹsẹmwẹse ne a gha ruẹ Baibol ọkade ọkade, na ye imamwaemwi ẹyotọ suẹn. (Hibru 6:1) Zẹvbe ne u ya ruẹ khian, u gha sẹtin ẹsẹse ya gha rrie “evbare nọwegbe”—ọni ọre, ẹmwata nọ dinmwisẹ. (Hibru 5:14) E Baibol ọre ẹzi ẹmwẹ ọghe asẹ ne ọ sẹre. Avbe ebe nọ hẹnhẹn egbe yan-Baibol, egbe vbe ne ebe ẹmu ye De Emwi ne Osanobua Hoo Vbe Obọ Mwa?, gha ru iyobọ nuẹn ne u ya gualọe miẹn kevbe rẹn ototọ vbene Evbagbẹn Nọhuanrẹn ya guan yan uhunta ughughan.
Ọ gha yẹ ruẹ Ne U Ya Loo Ẹghẹ Izọla Izọla Ne U Ya Rẹn Otọ e Baibol Ra?
U sẹtin ru emwamwa iruẹmwi e Baibol ye ẹghẹ kevbe ehe ne ọ gha fu ruẹ egbe. Nibun ruẹ vbe owa ne iran ye. Uhiẹn eso ruẹ la uwaya. Ne emwamwa iruẹmwi i re ugha iruẹmwi ne emwa nibun ye, sokpan emwamwa egbọmwa na de ginna ọlẹga iwinna obọmwa, deba vbene irẹnmwi kevbe iruẹmwi ruẹ sẹe. Edanmwẹ rhọkpa i rrọ, kevbe wẹ ẹi khian ye ekhue muẹn. U gha miẹn ewanniẹn ye avbe inọta ọghe Baibol nu mwẹ, kevbe wẹ u ghi do ruẹ vbe ne a ya sikẹ Osanobua hẹ.
Uwẹ i khian zẹdẹ vbe ha osa ye egbe iruẹmwi e Baibol vberriọ. (Matiu 10:8) A keghi rhie ẹre ladian ọghe ọhẹ ne emwa ọghe ugamwẹ hia kevbe avbe emwa nẹi mwẹ ugamwẹ rhọkpa ne ọ ye sokpan ni ye ekhọekekhọe mwẹ ẹko rhiẹnrhiẹn mwẹ da ne iran muan irẹnmwi ọghe iran da Ẹmwẹ Osanobua.
De avbe emwa nọ gha sẹtin mwẹ oghae vbe iziro na? Ẹgbẹe ruẹ hia sẹtin gha rrevba. Ọse ke ọse ne u hoo ne u gie tie sẹtin vbe mwẹ oghae vbọ. Ra adeghẹ ọ yẹ ruẹ, iziro ni sẹtin gha re ne a gha gu uwẹ ọkpa zẹ.
Emwa nibun zẹ ukẹdẹ ọkpa kọ vbe dọmwadẹ izọla ne iran ya ruẹ Baibol. Adeghẹ u gha sẹtin loo ẹghẹ ne ọ sẹ ọni ra nọ ma sẹrriọ vbe dọmwadẹ izọla, avbe Ọsẹe gha rhie egbe iran ladian ya ru iyobọ nuẹn.
Itie Nu Do Ruẹ
Ma gie tie ruẹ ne u gu avbe Osẹe Jehova guan. Odẹ ọkpa ne u gha ya sẹtin ru ọna ọre ne u gbẹn ebe gie adirẹsi nọ rre ototọ vbe mwa. A gha ru emwamwa ne emwa eso ne iran do gu uwẹ gha ruẹ Baibol ọghe ọhẹ vbe owa ruẹ.
□ Rhie ọkpa gunmwẹ vbuwe ebe ẹmu De Emwi ne Osanobua Hoo Vbe Obọ Mwa?
□ Tae urhu ẹvbo nọkhin.
□ Lahọ gunmwẹ rẹn vbekpa e Baibol ọhẹ ne a gu ọmwa ruẹ vbe owa.
Vbe ẹi re te arhiẹre ma, Evbagbẹn Nọhuanrẹn na sunu yi ni rre mwa ke E Baibol Ẹdo ladian na aedu ẹre ladian. Ehe ne NW na lele ẹmwẹ ne a sunu yi, ọ rhiema wẹ evba zedu ẹre ladian vbe ọghe urhu-Ebo New World Translation of the Holy Scriptures nọn.