Usẹ Hia Gha Rherhe Sẹ Ufomwẹ!
Vbe ẹghẹ eso vbe ẹdagbọn ruẹn, ọghakẹ wẹ nọ nẹ, ‘Vbọzẹ ne usẹ na bun sẹ nian?’ Vbuwe avbe ukpo arriaisẹn nọkhin, uniẹn emwa nagbọn hia wa susẹ nọkhua vbobọ okuo, ogue, oguoro, uyinmwẹ izigan, ai buohiẹn ata, emianmwẹ, kevbe uwu. Ukpo iyisẹn nibun nọ gberra keghi re ne usẹ ghi na he bunsẹ ke ẹghẹ gha dee. Enena hia gha sẹ ufomwẹ ra?
Ewanniẹn nọ fuẹkorre ọre ẹn, ọgha rherhe fo banban! Ẹmwẹ ọghe Osanobua, e Baibol, tae: “A gha ho emwa dan bẹkun . . . Sokpan [emwa] ọmẹhẹ ọ re ọ ra yan otọe nii iran ghi vbe gha ye ọfumwegbe zọmọ vbe uwu ẹre.” Vbe ọ ra kpẹ sẹ hẹ? “Ọmwata ọ re ọ ra yan otọe nii ọ ghi vbe yin ẹnrẹn rhinrin ẹdẹ.”—Psalm 37:10, 11, 29.
Iyeke vbe Osanobua a ra rhie izevbudu kevbe usẹ hin odẹ rre, agbọn na ghi do khin e paradais. Ẹghẹ nii emwa ghi sẹtin do gha rrọọ vbe etẹbitẹ vbe uwu egberranmwẹ nọgbae kevbe oghọghọ. Ẹmwẹ ọghe Osanobua tae yotọ: “[Osanobua] gha khiẹn ameve hia hin aro iran rre. Uwu i ghi ra gha rrọọ ọvbehe, ra akhiẹ ra obalọ.”—Arhie Maan 21:4.
Vbuwe agbọn ọgbọn nii, uhiẹn agha huẹn avbe orinmwi kpaegbe gha die arrọọ do ghae vbe nene avbe ọfumwegbe: “Emwa hia, ọ re ọmwa esi nọ ra ọmwadan, a gha huẹn iran kpaegbe vbe orinmwi.” (Iwinna 24:15) Ọni ọ siẹe ne Jesu Kristi na sẹtin tama ọmwadan nii nọ fiekhọe werriẹ muẹtin yan irẹn wẹ: “U gha gun mwẹ gha rre Paradais.”—Luk 23:43.
Vbọzẹ Ne Usẹ Na Suẹn?
Ugbẹn vbe Osanobua mwamwaẹn nẹ ne emwa nagbọn gha mwẹ evbọma ọghe ọyunnuan vbe odaro, vbọzẹ ne irẹn na kueyọ ne usẹ suẹn? Vbọzẹ ne ọ na fonbọ ẹre ke ẹghẹ nọkpẹre gha dee?
Vbe Osanobua yi Adam kevbe Ivi, Ọ yi iran zẹvbe emwa ni gbae vbe egbe kevbe ekhọe. Ọ viọ iran ye uwu ogba paradais ọ na rhie iwinna ne ọ sọkẹn ne iran gha ru. E Baibol tae wẹ: “Osanobua keghi ghe emwi hia ne irẹn yi, ẹko sẹ ọre ọyẹnmwẹ ẹsẹse.” (Gẹnesis 1:31) Akpawẹ iran họẹnmwẹ ne Osanobua, iran gha te biẹlẹ emọ ni gbae, kevbe agbọn na gha te khin e paradais, ehe ne emwa gha yin etẹbitẹ vbuwe ọfumwegbe kevbe ọyẹnmwẹ.
Osanobua rhie ye uwu Adam kevbe Ivi ẹsọhẹ ọyunnuan ọghe evbiyọmwaru ne a biọmwa biẹ. Iran ma gha yevbe agikpa araba nọ kuonsusu. Ọrheyerriọ, oghọghọ gha a gu iran rhinrin ọghi vbe hẹnhengbe yan ulomwẹ evbiyọmwaru ọghiran vbe odẹ nọgbae—na họẹmwẹ ne avbe uhi ọghe Osanobua. Osanobua khare: “Mẹ ọrọre [“Jehova,” New World Translation ] ne Osanobua uwa ọmwa ne ọ ho ne ọ ma uwa emwi ne umamwẹ uwa, ne ọ vbe gha su uwa lele odẹ ne uwa gha la.” (Aizaia 48:17) A loo ekhọe evbiyọmwaru keghi si ọlọghọmwa, ugbẹnvbe emwa nagbọn ma gha re na yi nọ ru nagban vbene ọ ma na hẹnhengbe yan Osanobua. E Baibol tae wẹ: “Orhunmwu ọkpa ne ọ mwẹ asẹ yan [“iziro egbẹre,” New World Translation ] i rrọọ; orhunmwuọkpa ne ọ khaevbisẹ yan ẹdagbọn rẹn i rrọọ.”—Jerimaia 10:23.
Evbọdọmwa nọ, evbibiẹmwa nokaro gha a roro wẹ iran sẹtin rhie egbe hin Ọdakha Osanobua rre te ọ ye vbe dunna. Sokpan ugbẹnvbe iran ghi he ọdakha ọghe Osanobua, ọ ma ghi gbaroghe iran ọvbehe vbuwe ugbamwẹ. Rhunmwudọni iran ghi na suẹn gha rriororo atemiẹn iran khin ọmaẹn do wulo vbe okiekie. Rhunmwuda ivbi iran ọre ima hia khin, ukhu ne ima re na ghare amagba kevbe uwu—Rom 5:12.
Ne Imuaẹnmwẹ Nọsẹre—Ghanọ Nọmwẹ Ọdakha?
Vbọzẹ ne Osanobua ma na gbele Adam kevbe Ivi nọ yi emwa ọvbehe? Rhunmwuda ọdakha ọghe Osanobua yan uhun otagbọn, ọni ọre asẹ nọmwẹ nọ ya khaevbisẹ, na ghare ne a sievẹn ọnrẹn, na gbẹre odan. Inọta nọ rrọọ ọre, Ghanọ nọmwẹ ọdakha kevbe de ọdakha ọni nọ khẹke? Vbene a tae de, Emwa nagbọn gha sẹtin kha yan egbiran ẹse adeghẹ iran ma ghare ne Osanobua kha yan ra? Ne ọ na rhie ẹghẹ nọ taẹn ne iran ya danmwẹ ayan egbọmwa sẹ ehe nọ sẹe, Osanobua ghi do yi ẹre ama etẹbitẹ adeghẹ ọ dunna ne iran vbe ototọ ọdakha ọghiran ra ọghirẹn. Ẹghẹ ne a rhie yọ gha a re tan vbe otọ ẹsẹse ne emwa nagbọn ya danmwẹ ọdakha ọghe azẹ nọ rhirhi a khin, ọghe irọnmwa, ọghe ọmwẹigho, kevbe emwamwa ugamwẹ nọ lahin adia ọghe Osanobua rre.
Vbe a ghi lae miẹn? Avbe ukpo arriaisẹn inu nọkhin ọghe okha emwa nagbọn tae ma ima wẹ usẹ na gha rrọọ omuyan omuyan. Vbuwe orre nọ gberra, uniẹn emwa nagbọn miẹn vbegbe nene usẹ sẹlẹkẹ nọ sẹre. Ẹbo emwa nibun ọre a dẹre izigha vbe Okuo Ọgba Agbọn II. Ọ gberra ẹbo emwa 100 ne a gbelua vbe okuo. Uyinmwẹ izigan kevbe igbinoguo wa kpọ kua. A loo ukhunmwu rhiaegbua keghi khiẹn emianmwẹ nọ vẹwae. Te emianmwẹ ẹgẹn ghi muan sayọ. Ẹbo igbigbe ọghe emwa ọre ohanmwẹ vbe emianmwẹ gbelua ukpukpo. Arrọọ ọghe ẹgbẹe kevbe avbe uyinmwẹ nọ winhin khiẹn nọ dibu vbe ehehia. Arriọba ọghe emwa nagbọn nọ mwẹ avbe ewanniẹn ọnrẹn ẹi rrọọ ne avbe ọlọghọmwa na. Ọkpa i rrọ vbuwe iran nọ sẹtin wabọre rua, ọmaẹn, emianmwẹ, kevbe uwu.
Ne ihe ẹghẹ ne emwa nagbọn ye keghi yerriọ zẹẹ vbene Baibol tae yotọ khẹ ẹghẹ ọghomwa. Ẹmwẹ ọghe Osanobua keghi giee orre ọghomwa na zẹvbe “ẹdẹ okiekie” ọghe emwamwa na ye na wẹ “orueghe nọkhua gha rrọọ.” Vbene e Baibol tae zẹẹ, ‘te emwa dan kevbe ay’unukpa-egbe ghi rhia yọ nian.’—2 Timoti 3:1-5, 13.
Usẹ Sikẹ Ufomwẹ Ọnrẹn
Osẹ nọ rrọọ hia rhiema wẹ ima sikẹ ufomwẹ emwika nọ ruan ọmwa nagbọn vbuwe arhiegbe hin ototọ Osanobua rre. Ọ ghi vẹ na rẹn ẹsẹse nian wẹ ọdakha ọghe emwa nagbọn vbọ ghi gberra ọghe Osanobua ẹi sẹtin dunna. Ọdakha ọghe Osanobua ọkpa kẹkan ọre ọ sẹtin rhie ọfumwegbe, oghọghọ, egberranmwẹ nọgbae, kevbe arrọọ etẹbitẹ rre. Rhunmwudọni, ne Jehova na fonbọre ne izevbudu kevbe usẹ gha rrọọ gha rherhe sẹ ufomwẹ ọnrẹn. Osanobua gha rherhe guan ye ẹmwẹ emwa nagbọn vbe ọ gha na guọghọ avbe emwamwa na hia nẹi mwẹ isọkẹn.
Ẹmwẹ akhasẹ e Baibol tae wẹ: “Vbe ẹghẹ avbe nikhaevbisẹ na, Osanobua ẹrinmwi gha mu arriọba ne ẹ i ra fo vbotọ gbọ [vbe ẹrinmwi] . . . rẹn gha fuẹn avbe arriọba nii fẹẹrẹ [avbe enikhaevbisẹ na], rẹn ghi gha rrọ ẹdẹdẹmwẹdẹ.” (Daniel 2:44) Ne orhiema ọghe ọdakha otagbọn ọghe Jehova, asẹ ọghẹe nọ ya khaevbisẹ, lobọ Arriọba ẹrinmwi ọghẹe ọre adesẹ imamwaemwi ọghe Baibol. Vbọ ghi guan kaẹn emwi kpataki ọkpa vbekpae ama ọghe “ẹdẹ okiekie ẹdẹ,” Jesu tae wẹ: “A gha kporhu Iyẹn Ne ọ maan ọghe Arriọba na la otọ agbọn hia nẹ zẹ vbe osẹe ghe emwa hia, iyeke onii, ufomwẹ ghi do rre.”—Matiu 24:14.
Ugbẹnvbe ne ufomwẹ a rre, avba ra miẹn uhunmwu? E Baibol keghi zẹ ewanniẹn: “Emwa ẹmwata, emwa ni rẹn enegbe, gha yin otoẹ ima na. Sokpan, Osanobua gha sanmwẹ emwa dan hin otọe ni rre, ọ ghi vbọlọ avbe emworukhọ ladian vbọ.” (Itan 2:21, 22) Emwa imudiaẹse keghi re [enii] ne emwa ni ruẹ ahoo ọghe Jehova kevbe ni ru ẹe zẹẹ. Jesu Kristi khare wẹ: “Ọna ọrọre nene arrọọ ne ẹ i fo wẹ ne emwa ne agbọn rẹn ruẹn zẹ vbe Osanobua ọkpa ne ọ re ọghe ẹmwata kevbe ne iran rẹn Jesu Kristi, ọmwa ne uwẹ gie.” (Jọn 17:3) Ẹn, “Agbọn na, . . . te ehia rhie gberra khian, sokpan, ọmwa ne ọ ru vbene Evbavba [“Osanobua,” New World Translation ] ho ọ gha rrọọ ẹdẹdẹmwẹdẹ.”—1 Jọn 2:17.