Aro Nọ Ghaan Ẹre Jehova Ya Ghee “Isẹ” Ne U Gbe Ye Erhunmwu

ARO nọ ghaan ẹre Jehova ya ghee ugamwẹ ne ima rhie nẹẹn. Ọ “danmwehọ” ẹmwẹ ne ima rhirhi tae ya rhie urhomwẹ nẹẹn. (Mal 3:16) Vbe igiemwi, gia guan kaẹn “isẹ” na gbe ye erhunmwu. Ẹi re avbiẹ inugba ma nibun he gbe “isẹ” ye erhunmwu. De aro ne Jehova ya ghee ẹmwẹ ne kuẹi na? Aro nọ ghaan nọ. Ne ima mieke na rẹn evbọzẹe ne Jehova na ya aro nọ ghaan ghee ẹre, gi ima ziro yan emwi na ye “isẹ” kha kevbe odẹ eso ne a ya loo ẹre vbe Baibol.

“EMWA NII HIA GHI KHA WẸẸ, ‘ISẸ!’”

Evba ye “isẹ” kha ọre “gi ẹre gha yerriọ.” Evba yae kha ighẹ ẹmwẹ e Hibru na ke zedu ẹmwẹ na ladian ọre “na gha re ọmwa nọ gia mu ẹtin yan kevbe ọmwa na gba ẹko ọre.” Ke ẹghẹ gha dee ẹre a ke loo ẹmwẹ na vbe erhẹn ẹzọ ra vbe a ghaa buohiẹn. Ọmwa gha ghi vẹn ihẹn nẹ, ọ ghi kha wẹẹ, “isẹ,” nọ ya rhiẹre ma wẹẹ, ẹmwata ẹre irẹn ta kevbe wẹẹ, irẹn mu egbe ne irẹn ya uhunmwu irẹn mu emwi ke emwi nọ rhirhi kẹrikian. (Nọm 5:22) Ọmwa gha ghi gbe “isẹ” nẹ sirra ẹvboho, te ọ gha ghi mu ẹmwẹ nọ tae sẹ.—Neh 5:13.

Odẹ ọkpa kpataki ne a ya loo “isẹ” vbe Baibol rre ebe Diuteronomi uhunmwu ẹnrẹn 27. Ivbi Izrẹl ghi sẹ Otọ Na Ru Eyan Rẹn nẹ, iran hia keghi si egbe koko vbuwe ẹkpo Oke Ebal kevbe Oke Gerizim. Evba nii ẹre a na tie Uhi Osanobua ma iran, evba nii ẹre iran na vbe si agbada vbe unu tae wẹẹ, iran gha lele Uhi nii. Vbe iran ya ru ọna hẹ? A ghi tie nene uhi ma iran nẹ kevbe evbọ gha kẹrikian deghẹ iran na rraa re, iran hia keghi gbe “Isẹ” yọ. (Diut 27:15-26) U miẹn vbe urhu iran gha laa hẹ vbe ẹdẹrriọ, rhunmwuda emwa arriaisẹn nibun ẹre ọ koko gbe “isẹ” nii: ikpia, ikhuo kevbe ibiẹka! (Jọs 8:30-35) Ivbi Izrẹl i khian mianmian eyan ne iran ru vbe ẹdẹrriọ. Iran wa gele mu eyan nii sẹ rhunmwuda, e Baibol khare wẹẹ: “Ivbi Izrẹl keghi wa gha ga e Nọyaẹnmwa vbe ukpo hia ne Jọsua yae vbe agbọn, kevbe iyeke vbọ wu nẹ, vbe avbe ọkaolotu ni rẹn emwi hia ne Nọyaẹnmwa ru ne Izrẹl he ye rrọọ.”—Jọs 24:31.

Jesu vbe gbe “isẹ” ya suigiẹ yọ wẹẹ, ẹmwata ẹre irẹn ta, sokpan, odẹ ne Jesu ya loo ẹmwẹ na lughaẹn. Jesu ma loo ẹre vbe ufomwẹ ẹmwẹ ne ọmwa tae, te Jesu yae gha mu ẹmwẹ so, nọ ya rhiẹre ma wẹẹ, ẹmwata ne uhunmwu ẹmwẹ ẹre irẹn khian ta. (Sokpan vbe Baibol Edo, a keghi zedu ẹmwẹ na vbenian: “ẹmwata ọre I tama uwa.”) Ọ mwẹ ẹghẹ eso ne Jesu ya loo ẹmwẹ na yan egbe yan egbe. (Mat 5:18; Jọn 1:51) Odẹ vbenian ẹre ọ ya gi emwa nọ gu guan rẹn wẹẹ, ẹmwata ne ai muan ẹre irẹn ta. Emwi nọ ye Jesu gha si agbada vbe unu guan vbenian ọre wẹẹ, Osanobua tobọre ẹre ọ rhie asẹ nẹẹn, nọ ya eyan hia ọghe Osanobua mwẹ amusẹ.—2 Kọr 1:20; Arhie 3:14.

“EMWA NI HIA NA KHA WẸẸ, ‘ISẸ!’ IRAN NA RHO ENỌYAẸNMWA”

Ivbi Izrẹl vbe gha gbe “isẹ” vbe iran ghaa na erhunmwu kevbe iran ghaa rhie urhomwẹ gie Jehova. (Neh 8:6; Psm 41:13) Emwa hia gha gbe “isẹ” ye erhunmwu ne ọmwa naẹn, ọni rhiema wẹẹ iran miẹn erhunmwu nii yi. “Isẹ” ne iran gbe ye erhunmwu nii ghi vbe rhiẹre ma wẹẹ, iran hia mwẹ ọghae vbe ugamwẹ ọghe ẹdẹ ne ẹdẹrriọ kevbe wẹẹ, iran sọyẹnmwẹ ugamwẹ nii. Emwi vbenian ẹre ọ sunu vbe Devid mu ẹkpẹti ile gha rrie Jerusalẹm. Vbe iran ghi suẹn gha do ugie, e Devid keghi ya ekhọe hia na erhunmwu nọ yevbe ihuan gie Jehova. Erhunmwu na rre ebe 1 Krọnikol 16:8-36. Ẹmwẹ ne Devid tae vbe erhunmwu nii keghi mu emwa hia ni ghaa rre evba ekhọe. Iran hia na gbe “isẹ,” yọ, “iran na rho Enọyaẹnmwa.” Ne iran hia na koko gbe “isẹ,” keghi rhiẹre ma wẹẹ, iran sọyẹnmwẹ ugamwẹ ne iran rhie ne Jehova vbe ẹdẹrriọ.

Ivbiotu e Kristi vbe orre nokaro vbe gha gbe “isẹ” ya rho e Jehova. Eguọmwadia e Jehova ni gbẹn e Baibol wa vbe gha loo ẹmwẹ na vbe Baibol. (Rom 1:25; 16:27; 1 Pit 4:11) Ebe Arhie Maan vbe ya ima rẹn wẹẹ, avbe odibo vbe gha gbe “isẹ” ya rhie urhomwẹ ne Osanobua. (Arhie 19:1, 4) Ivbiotu E Kristi vbe orre nokaro vbe gha gbe “isẹ” ye erhunmwu ne iran naẹn vbe iko. (1 Kọr 14:16) Sokpan iran ma gheghe gha gbe “isẹ” ye erhunmwu.

EVBỌZẸE NE “ISẸ” NE U GBE YE ERHUNMWU NA MWẸ ESA NỌ YE

Zẹ vbene ima nanaẹn dee sin, ma bẹghe ẹre nẹ wẹẹ, “isẹ” na gbe ye erhunmwu, vbe a gha ghi naẹn fo nẹ, wa gele ru ekpataki. Ma gha na erhunmwu fo nẹ, ima na gbe “isẹ” yọ, te ima rhiẹre ma wẹẹ, ekhọe hia ẹre ima ya kue ye ẹmwẹ ne ima ta vbe erhunmwu nii. Ma gha vbe ye ekhọe hia gbe “isẹ” ye erhunmwu ne a naẹn vbe idagbo, ọ gha khọnrẹn wẹẹ ima ma tae ladian, ọ rhiema wẹẹ, ma kue ye ẹmwẹ na tae vbe erhunmwu nii. Gi ima guan kaẹn emwi ọvbehe nọ zẹe ne “isẹ” na gbe ye erhunmwu na ru ekpataki.

Ọ rhiẹre ma wẹẹ ima danmwehọ rhunmwuda odẹ ọkpa ne ima ya rhie ugamwẹ ne Jehova nọ. Emwi ne ima ta kevbe emwi ne ima ru vbe a ghaa na erhunmwu, deba ugamwẹ ne ima rhie ne Jehova. Nọnaghiyerriọ, ma ghaa hoo ne “isẹ” ne ima gbe ye erhunmwu gha mwẹ esa nọ ye, te ọ khẹke ne ima gbẹdọ gha danmwehọ vbe a ghaa na erhunmwu.

Ọ ya ima mwẹ akugbe. A ghaa na erhunmwu vbe iko, etẹn hia ni rre iko nii ẹre ọ danmwehọ erhunmwu nii. (Iwinna 1:14; 12:5) “Isẹ” ne ima gbe ye erhunmwu nii, keghi ya akugbe ne ima mwẹ wegbe sayọ. Deghẹ te ima ya ekhọe gbe “isẹ” ye erhunmwu vberriọ ra urhu nọ lae ẹre ima loo ro, “isẹ” ne ima koko gbe ye erhunmwu sẹtin ye Jehova họn erhunmwu ima.

Ọtẹn nokhuo na gbe uhunmwu koto zẹvbe nọ ya ya efoni danmwehọ erhunmwu ne a na vbe iko — “Isẹ” ne ima gbe ye erhunmwu keghi re odẹ ọkpa ne ima ya rhie urhomwẹ ne Jehova

Te ima ya re rhie urhomwẹ ne Jehova. E Jehova i rhie aro gberra emwi ke emwi ne ima ru ya rhie ugamwẹ nẹẹn. (Luk 21:2, 3) E Jehova rẹn emwi nọ rre ekhọe ima, ọ vbe bẹghe emwi ne ima rhirhi ru kevbe emwi nọ gu ima kpa ya ru ẹre. Deghẹ ima ma sẹtin yo iko, a na ghi miẹn wẹẹ, etẹlifoni ẹre ima ghi ya danmwehọ emwi na ru vbe iko, ma gha sẹtin gha mwẹ ilẹkẹtin wẹẹ, e Jehova i rhie aro gberra “isẹ” ne ima gbe ye erhunmwu ne a na vbe iko vberriọ rhunmwuda, te ima deba etẹn rhie urhomwẹ nẹẹn.

Ma sẹtin gha roro ẹre wẹẹ “isẹ” ne ima gbe ye erhunmwu i mwẹ esa nọ ye, sokpan, ọghe ne ẹmwata, ọ wa ru ekpataki. Ebe ọkpa nọ rhan otọ e Baibol keghi kha wẹẹ: “Isẹ ne eguọmwadia Osanobua gbe ye erhunmwu keghi re odẹ ne iran ya rhiẹre ma wẹẹ, iran mwẹ ilẹkẹtin yan rẹn, iran yayi wẹẹ ọ miẹn ugamwẹ iran yi, kevbe wẹẹ, iran mwẹ ayayẹro ne ẹi beghe.” Erhunmwu ne ima na ọre wẹẹ, ne “isẹ” hia ne ima gbe ye erhunmwu gha re ne Jehova miẹn yi.—Psm 19:14.

Ẹghẹ Hia Ẹre Ọ Khẹke Ne U Ya Gha Gbe “Isẹ” Ye Erhunmwu Ra?

“Isẹ” i re ẹmwẹ na ya rhọ ẹghẹrẹ. Sokpan, deghẹ ọmwa nọ na erhunmwu na ba ẹmwẹ ku ta, ọ ye khẹke ne ima gbe “isẹ” ye erhunmwu nii ra? Ma sẹtin ye gbe isẹ yọ. E Jehova tobọre rhie aro gberra re, vbe ima gha ba ẹmwẹ ku ta rhunmwuda, ọ rẹnrẹn wẹẹ, emwa ni ma gba ẹre ima khin. Nọnaghiyerriọ, ma gha rhie aro tua olika ẹmwẹ ọghe erhunmwu ne ọmwa na, ma sẹtin ye gbe isẹ ye erhunmwu nii, ọ gha khọnrẹn wẹẹ, ọmwa nọ naẹn ba ẹmwẹ ku ta.

Vbọrhirhighayehẹ, ọmwa ne ẹi re Osẹe Jehova gha na erhunmwu, ọ ma khẹke ne ima ya ekhọe gbe “isẹ” yọ, ọ ma vbe khẹke ne ima ya urhu nọ lae gbe “isẹ” yọ. Ma ghaa rre ehe ne ọmwa ne ẹi re Osẹe Jehova na na erhunmwu ghi vbo? Vbe igiemwi, a na wẹẹ ne ọmwa ne ẹi re Osẹe Jehova na erhunmwu vbe ugie ọghe iku isasegbe vbo? A sẹtin vbe miẹn wẹẹ ẹgbẹe nọ ghae egbe ye ugamwẹ ughughan ẹre ima ke rre. Uhunmwuta ẹgbẹe vberriọ, ne ẹi ga e Jehova na gha na erhunmwu vbe sirra ima, vbọ khẹke ne ima ru?

Ma gha vba egbe ima vbe ihe vberriọ, ọ ma khẹke ne ima gbe olighi, ma sẹtin hunwan. Ọ ma khẹke ne ima gbe “isẹ” ye erhunmwu vberriọ, ọ ma vbe khẹke ne ima da emwa ọvbehe obọ yi vbuwe ẹghẹ ne erhunmwu nii ya khian. Ma gha ru vberriọ, ọ ghi rhiema wẹẹ ima mwẹ ọghae vbe erhunmwu nii. Ma sẹtin gha ya ekhọe na erhunmwu vbe ẹghẹ vbenian, sokpan, ọ ma khẹke ne ima ya urhu nọ lae gbe “isẹ” ye erhunmwu ne ima naẹn, ne emwa ọvbehe ghẹ ya gha roro ẹre wẹẹ, erhunmwu ne iran na, ẹre ima gbe “isẹ” yi. Deghẹ te iran mudia gha na erhunmwu nii, obọ ima ẹre ọ ye deghẹ ima gha mudia ra ima i ru vberriọ. Ne a na mudia kevbe ne a na gbe uhunmwu kotọ i wa re ama ọghe ugamwẹ vbe ẹghẹ hia. Dọmwadẹ ima ẹre ọ gha ru azẹ ne egbe ẹre vbe ihe vberriọ. Ọ ma khẹke ne ọmwa rhọkpa gbe ikhaẹn ye azẹ ke azẹ ne ọmwa rhirhi ru vbe ihe vberriọ.

Ena hia na ta de sin rhiẹre ma wẹẹ, aro nọ ghaan ẹre Jehova ya ghee “isẹ” ne ima gbe ye erhunmwu.