Vba Ya Rẹn Ọmwa Nọ Gele Ẹre Ovbi Otu E Kristi?​​—De Emwi Ne Baibol Tae?

Vbe ẹdẹnẹrẹ, emwa ni bun wa kha wẹẹ, Ivbi Otu e Kristi ẹre iran khin; sokpan uyinmwẹ iran keghi lughaẹn. Ọghe enegbe iran ọkpa ẹre iran eso rẹnrẹn, eso i ta ẹmwata, eso vbe ya obọ dan mu emwa ọvbehe. Eso ni rọnmwẹ ọdọ nẹ, ra ni rhie okhuo nẹ keghi fi owẹ ye oha. Avbe uyinmwẹ na keghi ya emwa eso nọ wẹẹ: ‘Vba khian ya rẹn ọmwa nọ gele ẹre Ovbi Otu e Kristi?’

Aro uyinmwẹ nọ khẹke ne Ovbi Otu e Kristi gha mwẹ

Ọmwa sẹtin wa kha wẹẹ, Ovbi Otu e Kristi ẹre irẹn khin. Sokpan ọni ọkpa ma sẹ. Vbe Baibol, Ovbi Otu e Kristi ọre orhuanegbe Jesu. (Iwinna 11:26) Jesu keghi kha wẹẹ: “Adeghẹ uwa na gha ya ẹmwẹ mwẹ ru emwi vbe ẹghẹ hia, erhuanegbe mwẹ ẹre uwa gele khin.” (Jọn 8:31) Vbene ẹmwata, orhunmwu ọkpa i rrọọ nọ fo na. Ọrheyerriọ, Ovbi Otu e Kristi keghi hia nọ gha ya imamwaemwi ọghe Jesu ru emwi vbe ẹghẹ hia. Gia ghee igiemwi eso.

Ivbi Otu e Kristi keghi rhie ahoẹmwọmwa ọghe ẹmwata ma

Emwi ne Jesu tae: “Uhi ọgbọn ne I khian gbe ne uwa nian ọre wẹẹ, wa gha hoẹmwẹ egbe; zẹvbe ne I hoẹmwẹ uwa, wa ghi vbe gha hoẹmwẹ egbe vberriọ. Adeghẹ uwa na hoẹmwẹ egbe, ẹre emwa hia khian na rẹn wẹẹ, erhuanegbe mwẹ ẹre uwa khin.”​—Jọn 13:34, 35.

Emwi ne Jesu ru: Te Jesu wa hoẹmwẹ emwa hia, ọ ma gha ya aro gbe emwa re ọre te iran fe ra ivbi ogue ẹre iran khin, ra rhunmwuda ẹvbo ne iran ke rre. E Jesu mu emwa ni khuọnmwi egbe rran, ọ rhie evbare ne emwa ne ọhanmwẹ gbe, ọ vbe ya arrọọ ọghẹe dẹ ima werriegbe.​—Matiu 14:14-21; 20:28.

Vbene Ivbi Otu e Kristi ya yin: Ivbi Otu e Kristi keghi rhie ahoẹmwọmwa ọghe ẹmwata ma, iran ze emwi obọ, iran i gbe ewanmwẹ ghee obọ ọkpa, iran vbe yabọ emwa ni ru iran khọọ. Iran ru iyobọ ne emwa ni gualọ iyobọ, iran wa vbe mu egbe ne iran ya sẹ emwi ni ru ekpataki ne iran rae, ne iran mieke na sẹtin ru iyobọ ne emwa ọvbehe.​—1 Jọn 3:16.

Ivbi Otu e Kristi keghi ta ẹmwata

Emwi ne Jesu tae: “Mẹ ọre . . . ẹmwata.”​—Jọn 14:6.

Emwi ne Jesu ru: Te Jesu wa gha ta ẹmwata vbe emwi hia nọ ru kevbe ẹmwẹ nọ tae. Ọ ma gha mu emwa rẹrẹ ra nọ gha ta ẹmwẹ nọ bibi ọmwa odẹ. Te emwa wa rẹn ọnrẹn ya ọmwa ẹmwata, te ọ ye gha ta ẹmwata, ọ gha khọn rẹn wẹẹ ẹko ma gha rhiẹnrhiẹn emwa eso yọ.​—Matiu 22:16; 26:63-67.

Vbene Ivbi Otu e Kristi ya yin: Ivbi Otu e Kristi i ta ohoghe. Iran hae igho uhunmwu, iran i rha, owinna na gba ẹko ẹre iran khin. (Rom 13:5-7; Ẹfisọs 4:28) Iran i ta ohoghe ya miẹn ọmwa igho, iran i ru omuru vbe iran gha gbẹn edanmwẹ, iran i vbe ta ohoghe ya ebe na ya rhie ọmwa vbe iwinna.​—Hibru 13:18.

Ivbi Otu e Kristi keghi ya obọ esi mu emwa

Emwi ne Jesu tae: “Wa bu mwẹ gha dee, wa hia ni miẹn ẹsọn kevbe ne egbe wọọ re rhunmwuda ihẹ nọkhua ne uwa mu, I gha ya egbe rọkhọ uwa. Wa rhie urọnghọn mwẹ, ne uwa ruẹ emwi vbe obọ mwẹ, rhunmwuda, ọmwa nọ fu kevbe nọ ya ekhọe hia mu egbe rriotọ ẹre I khin, wa gha ru vberriọ, egbe gha rọkhọ uwa. Rhunmwuda, te urọnghọn mwẹ ye rọkhọọ, te ihẹ mwẹ vbe ye hoghaa.”​—Matiu 11:28-30.

Emwi ne Jesu ru: Ọmwa nọ gia sikẹ kevbe nọ fu ẹre Jesu ghaa khin. Ọ ghaa si ibiẹka kẹ egbe, ọ fu emwa ne egbe wọọ re ẹko rre, ọ wa vbe gha rhie ọghọ ne emwa.​—Mak 10:13-15; Luk 9:11.

Vbene Ivbi Otu e Kristi ya yin: Ivbi Otu e Kristi keghi ya ọghọ gu emwa guan; iran i gu emwa guan vbene iran rhirhi miẹn, iran i ta ẹmwẹ ihẹn. (Ẹfisọs 4:29, 31, 32) Iran mwẹ amuroro da emwa, iran vbe gualọ ẹkpotọ ne iran gha ya ru iyobọ ne emwa ọvbehe.​—Galetia 6:10.

Ivbi Otu e Kristi i fi owẹ ye oha, iran i sẹ ọdafẹn ra amwẹ iran rae

Emwi ne Jesu tae: “Emwi ne Osanobua kukugbe nẹ, we ne ọmwa rhọkpa ghẹ wannọẹn.”​—Mak 10:9.

Emwi ne Jesu ru: Agharhemiẹn wẹẹ, Jesu ma ru orọnmwẹ, ọ keghi tama emwa ni ru orọnmwẹ ne iran ghẹ fi owẹ ye oha kevbe ne iran ghẹ sẹ egbe rae. (Matiu 19:9) Ọ vbe tama iran, ne iran gha gban egbe ne emwi nọ gha sẹtin sọrho ye orọnmwẹ ọghe iran.​—Matiu 5:28.

Vbene Ivbi Otu e Kristi ya yin: Ivbi Otu e Kristi keghi gban egbe ne emwi nọ gha sẹtin sọrho ye orọnmwẹ ọghe iran. (Hibru 13:4) Ivbi Otu e Kristi ni ru orọnmwẹ ne keghi hoẹmwẹ egbe, erriọ ẹre iran vbe ya rhie ọghọ ne egbe.​—Ẹfisọs 5:28, 33.