Íssksinimaʼtstohkssini 4
Iihtsipáítapiiyoʼpa Iihtáyiinapsskookiwa Otsitsííhtaanistsi
1, 2. Tsá níítssksiniiʼpa Iihtsipáítapiiyoʼpa otáákohkottoyiʼtoahsi noohkáísopowahtsiʼsiiksi?
IIHTSIPÁÍTAPIIYOʼPA iikáákomimmapiiyipitsiwa áwaiʼstamáttsiiwa otsitsííhtaanistsi íkamoʼtaʼpssiiksi áʼpaissammiiksi Áʼpistotookiwa. Oyíʼtsima matápii otssopówahtsiʼsoaawayi, áakohkottóyiʼtsima ámohka iiyíkoyi sopówahtsiʼssini: Máakáísskaakanistsiʼtsima ááhkitaistsiiʼsi áípahkohkoyiiksi?
2 Naatóyssínaakssini iitssínaiʼpa: “Ikkámaʼpáíssammainiki [Iihtsipáítapiiyoʼpa], ááksskáakanistsiʼtsima kitááhkohkoonoahsi.” “Íítstsiiʼpa Iihtsipáítapiiyoʼpa sspóóhtsi Áíʼtsksipoʼtsima isimiáʼpiistsi.” “Ísstohkanáísspipoyiwa Áókakihtsimaawa Jehovah máátáakssapaatooma otáaksikiihpi ááksstsínaoʼtóómiitapiʼtsksipoʼtsima isimiáʼpiistsi otáʼpoʼtomookiiksi ánniksska akááyissitsinikiiksi.”—1 Chronicles 28:9; Daniel 2:28; Amos 3:7.
Tsimá Áakiitohkooniiʼpa Ááhkánistohkottoyiʼtsiʼsi Sopówahtsiʼsiistsi?
3. Tsimá áakiitohkooniiʼpa otsitáakohkottoyiʼtsiʼpi ámohka sopówahtsiʼssini, Iihtsipáítapiiyoʼpa máakáísskaakanistsiʼtsima ááhkitaistsiiʼsi áípahkohkoyiiksi?
3 Iihtsipáítapiiyoʼpa iitóyiʼtsima kanáómiaʼnistssopówahtsiʼsiistsi Otsíʼpowahsini, Naatóyssínaakssini, iitóyiʼtsima ámohka sopówahtsiʼssini: Máakáísskaakanistsiʼtsima ááhkitaistsiiʼsi áípahkohkoyiiksi ki otáakanistáíssokopissaawa? “Naatóyssínaakssini ííhtoʼtstsiiwa Iihtsipáítapiiyoʼpa ííkitápssokaʼpiiyaawa ááhkohtáíssksinimáʼtstohkiooʼsi, ki ááhkohtáísiimohkiooʼsi, ki ááhkohtáíkamoʼtohtooʼsi kitsipáítapiiyssinnoona ki kitsiksímsstaaninnoona, amá nínaawa áánistaiʼtoahsi Iihtsipáítapiiyoʼpa áakssksinima otáítapoohpi, áaksstámssopokohkotawa ááhkssksiniʼsi ááhkanistáísokaʼpoʼtakssi.”—2 Timothy 3:16, 17.
4, 5. Tsá niʼtóóhkiitsiiwa Naatóyssínaakssini?
4 Naatóyssínaakssini niʼtsitáyoohkíítsiiwa sináákssini. Ííhtsikamoʼtsitsinikiwa niitánistomatápitstsiiʼpi matápii ki miistápsskoohtsika otsítssaomataistsiiʼpi matápii. Áakánoohkáttohkottohtsissitapiioʼpa ánnohk, iihtáíkaayissitsinikattsspa ánnohk ksistsikóyi ki íssoohtsika.
5 Máátsitstsiiʼpa sináákssini niitánistsíkamoʼtsitsinikatooʼpi isskóóhtsika otánistaʼpiihpi. Náámonnatohsiiyaawa sáákiitáístsiistsi sinááksiistsi matápii otssínaiiʼpoaawayi ísskoohtsika. Nóóhksstonnátakaoyaawa sopókssinaiiʼpi ki aanáóʼkssínaiiʼpi Naatóyssínaakssiistsi: ááhkamáʼpanistsoyaawa 6,000 ámostsska Hebrew Naatóyssínaakssiistsi (niitákaoyaawa 39 sinááksiistsi ámostsska niitsínihkatooʼpi “Old Testament”) ki ááhkamáʼpanistsoyaawa 13,000 ámostsska Greek Naatóyssínaakssiistsi (niitákaoyaawa 27 sinááksiistsi ámostsska niitsínihkatooʼpi “New Testament”).
6. Máakssksiniiʼpa ánnohk ksistsikóyi ánnistsi Naatóyssínaakssiistsi otsíʼtomanistsissaawa otáíʼsttsitsáóhtoʼtstsissaawa Iihtsipáítapiiyoʼpa?
6 Naatóyssínaakssini ííhtoʼtstsiiwa Ísstohkanáísskonataʼpssiwa Iihtsipáítapiiyoʼpa, iikamotsíípohtoomaistsi ááhkitssayóóhkiitsiiʼsaawa iitssínaiiʼpi ámostsska sináákssiistsi. Kitáátoyssínaakssinnoonistsi ánnohk ksistsikóyi ááhkohkottaaniioʼpa saakiáíʼtomanistsiiyaawa otánistsísttsitsaisinaiʼsaawa naatóyssínaakssiistsi. Otáísttsitsaisinaiʼsaawa Greek Naatóyssínaakssiistsi máátsiistápisamowa niitsóyaawa kiipíppóísstoyiimistsi máttsitsitstsiiʼpa iitotóísapssinaiiʼpi ámostsska matóómssináákssiistsi. Íítstsiiʼpa ánnohk ksistsikóyi áakohkottsiniiʼpa sináákssiistsi iitotóísapssinaiiʼpi ámostsska matóómaatóyssinaakssiistsi, ámostsska máátsiitáʼpiistapisamoyaawa kiipíppóísstoyiimistsi ohkáttsitssínaiiʼpiaawa.
Iihtsipáítapiiyoʼpa Otomátskahtakssini
7. Tsá niitánistakáómatskahtooʼpa Naatóyssínaakssini?
7 Naatóyssínaakssini ísstohkanáísstokaaniitskahtooʼpa sináákssini. Sstonnátakaoyi iisínaiiʼpistsi oʼtsítskánistsoyaawa nioókskawa billion. Máátsitstsiiʼpa sináákssini áístoohkima niitánistakáísinaiiʼpi. Iisopókssínaiiʼpi tsááhtaoʼ aanáóʼkssinaiiʼpistsi Naatóyssínaakssiistsi niitsóyaawa 2,000 kanáómiaʼnistsiʼpowahsiistsi. Ánnohk áwaaniiyaawa matápii oʼtakssksááhkoyi íímatohkottohkanáókstoomiaawa Naatóyssínaakssini.
8-10. Máakssokaʼpiiwa ááhkoʼtssatssaʼtsiʼsi Naatóyssínaakssini?
8 Ikkámohtoʼtstsísi ámohka sináákssini Iihtsipáítapiiyoʼpa ki otsiʼtóóhkainakohsi otsíkamoʼtaʼpissi áaksstamáíiyikaʼkimaoʼpa ááhkoʼtssátssaʼtsiʼsi.a Naatóyssínaakssini ííhtsitsínikiwa ohtsipáítapiiyoʼpa, ohtánistaʼpaississi annó ksááhkoyi, ki otáakánistaʼpaississi íssoohtsika. Máátsitstsiiʼpa stsíki sináákssini ááhkánistohkottsitsinikssi ámostsska.
9 Áa, Iihtsipáítapiiyoʼpa iihtáyissitapiiwa Naatóyssínaakssini ááhkohtáyiinapsskoahsi matápii. Ííhtssinaima Naatóyssínaakssini niisíppitápiiksi ámoksska nínaiksi ííhkotayaawa náátoyóttakisi ááhkitssksiniʼsaawa otáakssínaiiʼpoaawayi. Ki ánnayi Iihtsipáítapiiyoʼpa iihtáísapiʼpowakkiwa Otsíʼpowahsini, Naatóyssínaakssini. Íssksksimawa Paul íísinaima: “Kítaiʼsapiʼtsiʼsoaayi Iihtsipáítapiiyoʼpa otsíʼpowahsini, kítohtoʼtsísstsiiwatooʼpoaawa niistónnaana, kimáátanistssapiʼtsiiʼpoaawa ótohtoʼtstsíssi nínaawa otsíʼpowahsini, nóóhksikámoʼtssapiʼtsiiʼpoaawa ótohtoʼtstsíssi Iihtsipáítapiiyoʼpa otsíʼpowahsini.”—1 Thessalonians 2:13.
10 Abraham Lincoln, náaikopotoohtsínaawa Aamsskáápoohtsi, niitsínihkatooma Naatóyssínakssini “ísstohkanáísokomatskahtakssini Iihtsipáítapiiyoʼpa ótohkotahpi nínaawa . . . Ikkámssayitáístsiisi máátáakssksiniiʼpa íkamoʼtaʼpiiwa tsááhtaoʼ ipahtsáʼpssini.” Ámohka ísstohkanáísokomatskahtakssini tsá niitánistsítsinikatooma otómatápitstsiiʼsi áípahkohkoyiiksi, ki Iihtsipáítapiiyoʼpa máakáísskaakanistsiʼtsima ááhkitstsiiʼsi áípahkohkoyiiksi, ki otáaksikííhtatooʼsi?
[Iitsistááhtssinaiiʼpi]
a Áakohkottakíssksiniiʼpa otsíkamoʼtaʼpissi Naatóyssínaakssini káákssaʼtsít ámohka sináákssini niitsínihkatooʼpa The Bible—God’s Word or Man’s?, iitssínaiiʼpa 1989 ámoksska iisínaimiksi niitsínihkatayaawa Watchtower Bible and Tract Society of New York, Inc.
[Isínaawa íítohkooniiʼpa sináákssini 10]
Naatóyssínaakssini, ííhtoʼtstsiiwa Iihtsipáítapiiyoʼpa, iihtáyiinapsskoyiiwa matápii