Íssksinimaʼtstohkssini 8

Iihtsipáítapiiyoʼpa Otsitsííhtaani Aakóʼtssataʼpiiwa Otsitáakaniststsissi

1, 2. Iihtsipáítapiiyoʼpa tsá niitáakohtooma ááhkitssikáaattsstooʼsi ókohkoyssini?

NÍNAIKSI ki makáʼpatoʼsiiksi áwaʼpimmiiksi Iihtsipáítapiiyoʼpa otokákihtsimaanoaawayi áakáíikohtsisamoksistotoyiiyaawa matápii ki otsitapíímoaawaiksi, oʼtsítsskanistsoyaawa issksikíípippoisstoyiimistsi niitánistáóksistotoahpiaawa. Iihtsipáítapiiyoʼpa saakióóhkohtaikiwa aʼyáókohkoyoʼki. Áakiitáísskaisskskaʼtakioʼpa issksikíípippoisstoyiimistsi, akááyaakohtooma otáakánistohtsikamotsiipiahsi matápii makáʼpiiwa ki ókohkoyssini.

² Otáíʼtstsissi aʼpímmohsini ámohka Eden, Iihtsipáítapiiyoʼpa iitómatapsaanistooma otánistsitsííhtaahsi otáakánistaakohtooʼsi ámohka okákihtsimaani, ááhkohtsitsissitapiiʼsi ááhkohtáánatsistotsiiʼsi ksááhkoyi, matápii áakiitsitayáópiiyaawa. (Genesis 3:15) Máátsiistapisamowa, Jesus áótoomohtooma ááhkáíʼpowatomoahsi Iihtsipáítapiiyoʼpa, áótoomipoʼtsima ááhkohtáíssksinimaʼtstohkssi Iihtsipáítapiiyoʼpa otokákihtsimaani. Áaniiwa niʼtsitáísstakaanaʼpiiwa matápii ááhkáítapikaayisssapssaawa.​—Daniel 2:44; Matthew 6:9, 10; 12:21.

3. Jesus tsá niitsínihkatooma ámohka okákihtsimaani, áakokakihtsimatooma ksááhkoyi, ki máakanistsínihkatooma?

³ Jesus niitsínihkatooma Iihtsipáítapiiyoʼpa otokákihtsimaani “Okákihtsimaani iitstsííwa sspóóhtsi” tská iihtoʼtáókakihtsimatooʼpa sspóóhtsi. (Matthew 4:17) Mattánistsinihkatooma “Iihtsipáítapiiyoʼpa Otokákihtsimaani,” tská Iihtsipáítapiiyoʼpa omátapaʼtstooma. (Luke 17:20) Ísskoohtsika Iihtsipáítapiiyoʼpa iitápohtooma otsiksímsstaanistsi ámoksska nínaiksi ááhkitssinaiʼsaawa ámostsska ikááyissitsinikssiistsi, áakitssksiniiʼpa takáá áakitsinssiwa ki otáakanisttsihpi ámohka okákihtsimaani.

Ksááhkoyi Otomáánohkínniinaawa

4, 5. Iihtsipáítapiiyoʼpa tsá niitáíʼstamattstohkima otssápiʼtsiʼsi Jesus ááhkanistaʼpsssi Ohkínníínaawa?

⁴ Jesus otáíʼtamaaksístoʼkiómahksikiipippoisstoyiimistsi, iitssísapoʼkaatoomaistsi niitánistsitsínikatahpi ámostsska ikááyissitsinikssiistsi otáakohkínniinawaʼsatooʼsi Iihtsipáítapiiyoʼpa Otokákihtsimaani. Ánnahkaoʼka Iihtsipáítapiiyoʼpa isspíísaoʼtoyiiwa ááhkohkínniinawaʼsatooʼsi ámohka okákihtsimaani, áakitstsiiwa sspóóhtsi ki áakohtoʼtáókakihtsimatayaawa matápii. Ki otáíʼnisi, Iihtsipáítapiiyoʼpa iitsitápssksípaitapiiyattsiiwa Jesus sspóóhtsi, ááhkiitanistaʼpsssi isskonátaʼpssiwa naatoyítapiwa máátáakonawaiʼniwa. Ííksstonnátakaitapii ínoyiiyaawa otáíʼssksípaitapiisi.​—Acts 4:10; 9:1-9; Romans 1:1-4; 1 Corinthians 15:3-8.

⁵ Jesus “íítsitópiiwa Iihtsipáítapiiyoʼpa niitóóhtsi oʼtsísi.” (Hebrews 10:12) Ánnimayi iitsitáyoohkimatooma otsitáakohkínniinaawaʼsatooʼsi Iihtsipáítapiiyoʼpa Otokákihtsimaani, Iihtsipáítapiiyoʼpa áakitáakopiiwayi ááhkitohkínniinaawaʼsi ámohka sspóóhtsi Okákihtsimaani. Akáánistaʼsiwa ámohka ikááyissitsinikssini iitssínaiiʼpi Psalm 110:1, Iihtsipáítapiiyoʼpa iitánistsiiwa: “Ikíppoʼtópiit niitóóhtsi noʼtsísi nitáakkippotóómitsistaahtsipoʼtoayaawa kaahtomáániksi kohkátsistsi.”

6. Jesus tsá niitáíʼstamattstohkima otsíítsitooʼsi ááhkitohkínniinaawaʼssi Iihtsipáítapiiyoʼpa Otokákihtsimaani?

⁶ Jesus otáíʼtaʼpaisssi ksááhkoyi, áíʼstamattstohkiwa otsíítsitooʼsi ááhkohkínniinaawaʼssi. Ímakanistsskáóʼksistotoahpi, máátonawáyiistapaatsiiwa Iihtsipáítapiiyoʼpa, ámohka iihtáíʼstamattstohkiwa Makáʼpatoʼsiwa otssáyssi. Makáʼpatoʼsiwa áániiwa máátsitstsiiʼpa matápii ááhkomaanistáítapsstakaanaʼpsssi Iihtsipáítapiiyoʼpa áakiitáíiyikohkoyiwa. Jesus, íkamoʼtsínaawa, ‘ííhtsistoʼkamma Adam,’ áíʼstamattstohkiwa Iihtsipáítapiiyoʼpa máátsípahtsaʼpssiwa otáʼpistotoahsi íkamoʼtsitapiiksi.​—1 Corinthians 15:22, 45; Matthew 4:1-11.

7, 8. Tsá anistápiiwa íístotsima sokáʼpiistsi Jesus otáíʼtaʼpaisssi annó ksááhkoyi, ki tsá niitánistohtáíʼstamattstohkiwa?

⁷ Kítaoʼmáíkakitstsiiʼpa matápi áókakihtsimaawa ááhkiitsitooʼsi otánistohtsíístapssokaʼpissi Jesus otáíʼnakitawaatowaʼpoʼtakssi annó ksááhkoyi? Ííhtsskonátaʼpssiwa Iihtsipáítapiiyoʼpa otáátoyóttakssini, Jesus íísokinaapiwa áísttsíístomiiksi, máátsikamoʼtaʼpssiiksi, iyáápstsiiksi, máátáyoohtsimiiksi, ki máátáíʼpoyiiksi. Stamáttohkottssksipaitapiiyattsiiwa íʼniiksi! Iihtáíʼstamattstohkiwa otsííkiihpi, otáakanisttsihpi áóʼmatápokákihtsimatahsi matápii annó kanáóʼtakssksaahkoyi.​—Matthew 15:30, 31; Luke 7:11-16.

⁸ Jesus otsstonnátssokaʼpissi otsíístotsiʼpi otáíʼtaʼpaisssi ksááhkoyi áíssksinimaʼtsaawa John stámiitániiwa: “Ííksstonnátakaoyi Jesus otsíístotsiʼpi, ikkámohkanáísinaiʼsaawa, ksááhkoyi ááhkamaʼpssawohkottohkanayinnima ámostsska sináákssiistsi.”​—John 21:25.a

9. Íkamoʼtsitapiiksi máakáítapohkanipiotsiiyiyaawa Jesus?

⁹ Jesus áístotsima ikímmapiiyipitsissini ki ikímmotsiiyssini, ííksstonnátawaakomimmiiwa matápii. Ísspommoyiiwa ikímmataʼpssiiksi ki áóksistotoaiksi, nóóhkssawáísikahksistotoyiiwa aakóótsaʼpssiiksi tsááhtaoʼ sspípoyiiksi. Ííksimatsiʼtsimiaawa íkamoʼtsítapiiksi Jesus otámmahsaawa, iihtámmiiwaiksi otáwaakomimmahsaiksi, otááʼnssi: “Poohsapóók, ánniksska áíksisstoyiʼtáíyikaʼpoʼtakiiksi ki áíiyikiʼtakiiksi, ki kitáakohkotohpoaawa kitáakohtssokimmohsspoaawayi. Maʼtsík nitáísspinniʼpi ki iihtsíístapokakík niistówa, nitsíkkinaaʼpitapi ki nimáátáísspihkaʼsspi, ki kitáakohtssokimmohsspoaawa. Nitáísspinniʼpi íkkinaaʼpiiwa ki máátssokówa.” (Matthew 11:28-30) Matápiiksi áíniiyimmiiksi Iihtsipáítapiiyoʼpa áítapohkanipiotsiiyiyaawa Jesus ki áítapikááyissaapiyaawa ki otsítsikiʼtsimiaawa otokákihtsimaani.​—John 12:19.

Ohpókokákihtsimaamiiksi

10, 11. Takáá áakáísspommoyiiwa Jesus aʼyáókakihtsimatooʼsi ksááhkoyi?

¹⁰ Matápiókakihtsimaanistsi iitáístsiiʼpa áísspommihtaiksi otánistáókakihtsimahpiaawa, niʼtóyi Iihtsipáítapiiyoʼpa sspóóhtsi Otokákihtsimaani nohkáttsitstsiiʼpa áísspommihtaiksi. Stsíkiiksi áakáísspommoyiiyaawa Jesus ááhkáókakihtsimatooʼsaawa annó ksááhkoyi, Jesus ííksisttowatsiiwa otóʼtssátakkaamiksi otáakohkínniinaawaʼsatahsaawa matápiiksi.​—John 14:2, 3; Revelation 5:10; 20:6.

¹¹ Áakiitápssksipaitapiiyattsaayaawa sspóóhtsi ááhkitáóhpokaʼpaissiimahsaawa Jesus, ámoksska náámanistsimmiksi matápii. Ámoksska iihtsápanistsimmiaawa áakáókakihtsimatoomiaawa Iihtsipáítapiiyoʼpa Otokákihtsimaani áakohtomáánistawaatowaʼpistotoayaawa matápii. (2 Corinthians 4:14; Revelation 14:1-3) Jehovah akáísamomatapáakohtooma otáakánistaakohtooʼsi ámohka okákihtsimaani, áakohtáátowaʼpistotoahpiaawa matápii.

Ááwattokákihtsimaani Áakssikaʼpiiwa

12, 13. Iihtsipáítapiiyoʼpa Otokákihtsimaani tsá niitánistsiksiststssiwa otáaksikííhpi?

¹² Íssksikíípippoisstoyiimistsi Iihtsipáítapiiyoʼpa akáómatapaakaahkioʼtsima otánistaʼpissi annó ksááhkoyi. Naatóyssínaakssini ííhtsikááyissitsinikiwa Iihtsipáítapiiyoʼpa Otokákihtsimaani iitssínaiiʼpa Christ otáakomatápokakihtsimahsi 1914 ki aakóʼtssataʼpissi otsitáakssáóppisskiʼsi Makáʼpatoʼsiwa otánistáókakihtsimatooʼsi annó ksááhkoyi, ámohka ííhtsitsinikatooʼpa íssksinimaʼtstohkssini 9 ámoyi sináákssini. Ámohka Okákihtsimaani akáíksiststssiwa “ááhkomóʼtsaahsaawa [Christ] okááhtomaaniksi.”​—Psalm 110:2.

¹³ Ámohka ikááyissitsinikssini íítohkooniʼpi Daniel 2:44 iitssínaiiʼpa: “Ánnikaaki ksistsikóístsi ámoksska ohkínníínaiksi [ánnohk áípaitapiiksi] Iihtsipáítapiiyoʼpa ííhtsitapiwa sspóóhtsi áakiitáakihtakiwa okákihtsimaani [sspóóhtsi] máátáakonawaanooksiksistotsiiʼpa, ki máátáakonawaitapsskohtooʼpa otokákihtsimaani matápii [matápiókakihtsimaani máátáakattonawaisskaakanistsiʼtsima ááhkattsistáíʼtstsissi]. [Iihtsipáítapiiyoʼpa Otokákihtsimaani] Áakaaníítohpattsskimaistsi ókakihtsimaanistsi ki áakiitssikáaattsstoomaistsi, ki [Otokákihtsimaani] áakiitomáánistsiʼtsitaistsiiwa.”​—Revised Standard Version.

14. Tsá áakanistohtsíístapssokaʼpiiwa áíʼsawattsitstsiiʼki matápiókakihtsimaani?

¹⁴ Ááʼnistápipoʼtsiiʼki okákihtsimaanistsi ámoksska máátáísstakatsiiksi Iihtsipáítapiiyoʼpa, Áʼpistotookiwa Otokákihtsimaani áakiitsiʼtáókakihtsimatooma kanáóʼtakssksaahkoyi. Otohtoʼtáókakihtsimatooʼsi ámohka Okákihtsimaani sspóóhtsi, matápii máátáakohkottoksistotsimiaawa. Okákihtsimaani ííhtomatapaʼpiiwa Iihtsipáítapiiyoʼpa sspóóhtsi ki áaksskiitápohtooʼpa. Tská Iihtsipáítapiiyoʼpa otáakohkanáókakihtsimatooʼsi ksááhkoyi, máátáakattsitstsiiʼpa matápii ááhkohtááttsiistotoahsi sáyiipitsáátsimoyihkaani tsááhtaoʼ matápii otááwattsiksimsstaanoaawaistsi ki matápiókakihtsimaiksi otááwattsiksimsstaanoaawaistsi. Máátáakattsskaakanistsiʼtsiiʼpiaawa ámostsska ááhkattsitáístsissaawa.​—Matthew 7:15-23; Revelation, íssksinimaʼtstohkssini 17 áakiitsitóʼtokstakioʼpa 19.

[Iitsistááhtssinaiiʼpi]

[Isínaawa íítohkooniiʼpa sináákssini 18]

Jesus otáíʼtaʼpaisssi annó ksááhkoyi áísokiniiwa áísttsíístomiiksi ki iitáíssksipáítapiiyattsiiwa iʼnííksi, iihtánisttsiwa ááhkiitohtaiʼstamattstohkssi otáaksikiihpi oʼtstsíssi máánssksaahkoyi

[Isínaawa íítohkooniiʼpa sináákssini 19]

Iihtsipáítapiiyoʼpa Otokákihtsimaani iitstsííwa sspóóhtsi áakohtssáóppisskima kanáómiaʼniststsiistsi matápiókakihtsimaanistsi tská máátáísstakatsiiyaawa Áʼpistotookiwa