Iihtsipáítapiiyoʼpa Máakáakohtooma Ááhkanistáókakihtsimatahsi Otsitapíímiksi?

1. Iihtsipáítapiiyoʼpa máakokákihtsimatsiiwaiksi íkaitapiiksi Israel?

Iihtsipáítapiiyoʼpa iihtáakohtooma iihtóʼtsitapiiksi Abraham ókoʼsiksi ki iitohkótsiiwaiksi okákihtsimaanistsi. Ámoksska iihtóʼtsitapiiksi Abraham niitsínihkatsiiwaiksi “Israel”, áíʼtaikamoʼtáátsi­moyih­kaa­yaawa ki áótoiʼtsikatoomiaawa Iihtsipáítapiiyoʼpa otsiʼpówahsini. (Psalm 147:19, 20) Kanáómiaʼnistsitapiiksi áakohkottohtohkoyikííyaawa otsííkiihpiaawa Israel.​—Okstóót Genesis 22:18.

Iihtsipáítapiiyoʼpa ohsííhkatsiiwa ámoksska Israelites ááhkanistápssaawa otátohkáʼtoh­taa­niksi. Niitánistsítsinikatahpiaawa iihtáíʼstamáttstohkioʼpa matápii otáakanistohtáóhkoyikissaawa Iihtsipáítapiiyoʼpa otokákihtsimaanistsi áakitaanistáíʼtsimiaawa. (Deuteronomy 4:6) Káátohkottáánioʼpa ámoksska Israelites otsspómmoahsaawa stsíkiksi ááhkssksinoahsaawa niʼtsitáíkamoʼtsitapiwa Iihtsipáítapiiyoʼpa.​—Okstóót Isaiah 43:10, 12.

2. Máakáakohtooʼpa niitanistáókakihtsimat­ah­piaawa Iitáíkamoʼtomaiʼtakiiksi Jesus Christ?

Iʼnáksisamaʼpáísiiwa, Israel iitáʼtstoomiaawa otanistáíksoʼkowammahsaawa Iihtsipáítapiiyoʼpa, Jehovah iitsstáánomatapiksoʼkowammiiwaiksi ámoksska áwaatsimoyihkaiksi Iitáómaiʼtakiiksi Jesus Christ. (Matthew 21:43; 23:37, 38) Israelites áʼtstoomiaawa otanistáíksoʼkowammahsaawa Iihtsipáítapiiyoʼpa, ánnohk iitsstáánitsipoʼtoayaawa iitáíkamoʼtomaiʼtakiiksi Jesus niitsínihkatayaawa Jehovah otátohkáʼtohtaaniksi.​—Okstóót Acts 15:14, 17.

Jesus iitáaksipoʼtoyiiwaiksi áómaiʼtakiiksi ááhkáwaatowaʼpoʼtakssaawa ki ááhkáíssksinimaʼtsaahsaawa kanáómiaʼnistsitapiiksi ááhkáómaiʼtakssaawa. (Matthew 10:7, 11; 24:14; 28:19, 20) Ámohka naatowáʼpoʼtakssini áíʼtamáaksiksistaʼpiiwa tská Iihtsipáítapiiyoʼpa áíʼtamáaksssikáaattsstooma otánistaʼpaisissi ánnohk. Áísttsitsaanistaiisiwa Jehovah otánistohkanipiaahsi sstónnatakáítapiiksi kanáómiaʼnistsitapiiksi ááhkáíkamoʼtaatsimoyihkaahsaawa. (Revelation 7:9, 10) Iitáíkamoʼtomaiʼtakiiksi Jesus iihtáyáaksipoʼtoayaawa ááhkáísspommootsiiyssaawa ki ááhkáwaahkomimmotsiiyssaawa. Kanáóʼtakssksaahkoyi ámoksska iihtáíʼtomanistssksinimaʼtsaayaawa Naatóyssínaakssini áakitohkanóoyaawa.​—Okstóót Hebrews 10:24, 25.

3. Tsá niitánistomatapáaksipoʼtoayaawa Jehovah Otátohkáʼtohtaaniksi?

Ísskoohtsika otomatápoksaahsi 1870 ámoksska iihtáíssksinimaʼtsaiksi Naatóyssínaakssini iitsitohkóónimiaawa áʼtstooʼpistsi Naatóyssínaakssini ikámoʼtssksinimáʼt­stohks­siistsi. Issksinímiaawa Jesus otohtohkánipiaahsi áwaatsimoyihkaiksi Iitáómaiʼtakiiksi Jesus Christ ááhkáwaatowaʼpoʼtakssaawa, káátomatapáʼtstoomiaawa ááhkohtáíssksinimaʼtstohkssaawa Iihtsipáítapiiyoʼpa Otokákihtsimaani kanáóʼtakssksaahkoyi. Otánistoksaahsi 1931 iitánistsinihkátohsiyaawa Jehovah Otátohkáʼtohtaaniksi.​—Okstóót Acts 1:8; 2:1, 4; 5:42.

4. Tsá niitáaksipoʼ­to­ayaawa Jehovah Otátohkáʼtoh­taa­niksi?

Matóómikiipíppoisstoyiimistsi, ámoksska áwaatsimoyihkaiksi Iitáómaiʼtakiiksi Jesus kanáómiaʼnistssksaahkoistsi iihtóʼtokakihtsimatayaawa ámoksska ómahkitapiiksi ki ámoksska áísapiʼtsimiaawa Jesus Otáókakihtsimatahsaawa. (Acts 16:4, 5) Niʼtóyi ánnohk ksiistsikóyi, kanáóʼtakssksaahkoyi Jehovah Otátohkáʼtohtaaniksi iihtóʼtokakihtsimatayaawa ómahkitapiiksi. Áókakihtsimaiksi áókakihtsimatsiiyaawa Jehovah Otátohkáʼtohtaaniksi kanáómiaʼnistssksaahkoistsi áakitáóhtookisatoomiaawa iʼpówahsiistsi, áakitáísinaimiaawa ki áwaaniitskahtooʼsaawa oʼtsítskanistsoistsi 800 Naatóyssínaakssini-sináákiaʼtsiistsi áókakísskskaʼtsiiʼpistsi. Ámoksska Áókakihtsimaiksi áóhkotsiiyaawa ki iihtáwaahkomimmiiyaawa Naatóyssínaakssini issksinimáʼtstohkssiistsi oʼtsítskanistsoistsi 120,000 iitáwaatsimoyihkaoʼpistsi kanáóʼtakssksaahkoyi. Ámostsska iitáwaatsimoyihkaoʼpistsi iitsípoʼtoayaawa ómahkitapiiksi ááhkáótoiʼtsikatahsaawa Iihtsipáítapiiyoʼpa otsitapíímiksi.​—Okstóót 1 Peter 5:2, 3.

Jehovah Otátohkáʼtohtaaniksi iihtohkánipiaayaawa ááhkitohtáíssksinimaʼtstohkssaawa iʼtáámitsinikssiistsi ki ááhkáíssksinimaʼtsaahsaawa matápii ááhkáómaiʼtakssaawa. Niʼtóyi íssksksimaiksi, nitáakitáwaatowaʼpoʼtakihpinnaana nitsitáóksisawaaatannaani matápii ookóówanoaawayi. (Acts 20:20) Nitohtáíssksinimaʼtsaannaani Naatóyssínaakssini ámoksska áwaakomiʼtsimiksi ikámoʼtaʼpiiwa. Jehovah Otátohkáʼtohtaaniksi máátsiksisstoyítohkanipoʼtoayaawa. Nitohkanáíksoʼkowammotsiiyihpinnaani ki nínninnaana áákomimmapiiyipitsiwa. Nitanistáóʼtootsiiyihpinnaani anní nitáóhpapiimotsiiyihpinnaani ki nitáípoʼtáótoiʼtsikattsiiyihpinnaani. (2 Thessalonians 1:3) Jehovah otsitapíímiksi iihtohkánipiaayaawa ááhkáíksoʼkowammahsaawa Iihtsipáítapiiyoʼpa ki ááhkáísspommoahsaawa stsíkiksi, káátohkotáánioʼpa isstohkanáíʼtaamipaitapiiyaawa kanáóʼtakssksaahkoyi.​—Okstóót Psalm 33:12; Acts 20:35.