Tsá Niitánistohtáóhkoyikioʼpa Naatóyssínaakssini Okákiiʼpowahsiistsi?

1. Máakáísstsinaoʼkakíss­ksinimaʼ­tsootsspa?

Áʼpistotookiwa oʼtsitskáókakís­skskaʼ­takiwa. Kínninnoona áákomimmapiiyipitsiwa, iihtáíkiiwa kiistónnoona. Máátsitsííhtakkiwa ááhkaawáttaʼpaissoʼsi, iihpáʼpistotookiwa ááhkáísstakatahsi. (Jeremiah 10:23) Pookáíksi áísstakatsiiyaawa ónnoaawayi ki oksísstoaawayi ááhkáókakissksinimaʼ­tsaah­saawa niʼtóyi kiistónnoona áísstakatawa Iihtsipáítapiiyoʼpa ááhkáókakis­sksinimaʼt­sookissi. (Isaiah 48:17, 18) Naatóyssínaakssini okákiiʼpowahsiistsi iihtáókakíssksinimaʼtsootsspa, Iihtsipáítapiiyoʼpa iihkókkiwa ámostsska.​—Okstóót 2 Timothy 3:16.

Jehovah otokákihtsimaanistsi ki otokákiiʼpowahsiistsi iihtáíssksinimaʼtsootsspa isstohkanáísokaʼpiiwa ipáítapiiyssini ki áakánistohkottoʼtsiiʼpi matsowáʼpomatskahtakssiistsi íssoohtsika ki omanistáípaitapiiyssini. Iihtsipáítapiiyoʼpa otáʼpistotookissi, áakoohkáíksimatsiʼtsiiʼpa ki áakoohkáíniiyiʼtsiiʼpa otanistáókakiaanikkissi.​—Okstóót Psalm 19:7, 11; Revelation 4:11.

2. Tsá anistápiiyaawa Naatóyssínaakssini okákiiʼpowahsiistsi?

Naatóyssínaakssini okákiiʼpowahsiistsi anistápiiyaawa ikámoʼtssksinimáʼtstohkssiistsi. Okákihtsimaanistsi iihtáóhkanaomiaʼnistóóhkiitsissitapiiyoʼpiaawa (Deuteronomy 22:8) Áaksstsinaoʼohtsíssitapioʼpa kitsiksímsstaaninnoona ááhkitotsistapiʼtsiʼsi ááhkanistohtsíssitapioʼsi okákiiʼpowahsiistsi. (Proverbs 2:10-12) Kááksskskaʼtsit, Naatóyssínaakssini iitssksinimáʼtstohkiiʼpa Iihtsipáítapiiyoʼpa otohkókkissi ipáítapiiyssini. Ámohka okákiiʼpowahsini iihtáókakiipiookiwa ááhkánistaʼpaissoʼsi aʼyááʼpoʼtakioʼki, áíʼtaahkiáapáópaooʼki, ki áʼpáwaawahkaoʼki. Máátáakohtáókaʼpissitapioʼpa kitsipáítapiiyssinnoona.​—Okstóót Acts 17:28.

3. Tsá anistápiiyaawa náátoʼkaistsi isstohkanáóʼtamaʼpiiwa okákiiʼpowahsiistsi?

Jesus iihtsíʼpoyiwa náátoʼkaistsi isstohkanáóʼtamaʼpiiwa okákiiʼpowahsiistsi. Matóómokakiiʼpówahsini iihtsíístapssksiniiʼpa ohtáʼpistotoahpiaawa matápii​—iihtáʼpistotootsspa ááhkáíssksinoahsi Iihtsipáítapiiyoʼpa, ááhkáwaakomimmahsi, ki ááhkáísstakaanaʼpoʼtoomoahsi. Ámohka matóómokakiiʼpówahsini áakáísskskaʼtsiiʼpa ikkamáakokákihtsimaoʼki. (Proverbs 3:6) Ámoksska áístotsimiksi ámohka okákiiʼpowahsini áakáíksoʼkowammiiyaawa Iihtsipáítapiiyoʼpa, áakohkoonimiaawa iitáʼpiʼtáámaʼpssini ki omanistáípaitapiiyssini.​—Okstóót Matthew 22:36-38.

Ámohka iihtsistóʼkawa okákiiʼpowahsini iihtsíístapssksiniiʼpa ááhkanistáíkkinaaʼpiksoʼkowammahsaawa stsíkiksi. (1 Corinthians 13:4-7) Ikkamáístotsiiʼki ámohka náátoʼkayi okákiiʼpowahsini áakáyiimatawa Iihtsipáítapiiyoʼpa otánistáíkimmahsi matápii.​—Okstóót Matthew 7:12; 22:39, 40.

4. Tsá niitánistohtáóhkoyikioʼpa Naatóyssínaakssini okákiiʼpowahsiistsi?

Naatóyssínaakssini okákiiʼpowahsiistsi iihtáíssksinimaʼ­tsaa­yaawa okóʼsiiksi ááhkáwaa­komim­motsiiys­saawa. (Colossians 3:12-14) Iihtsipáítapiiyoʼpa Otsiʼpówahsini iihtáíssksinimaʼ­tsaa­yaawa ohkíímiiksi ki iyóomiiksi ámohka máttokákiiʼpowahsini​—ááhkomanistáwaatowaʼpistoto­ah­saawa.​—Okstóót Genesis 2:24.

Áakitanistáíʼtsiiʼpiaawa Naatóyssínaakssini issksinimáʼtstohkssiistsi iihtáíiyikaʼkimaoʼpa ááhkáóhkoʼtsimaoʼsi ki ááhkáísokaʼpaissoʼsi. Naatóyssínaakssini okákiiʼpowahsiistsi iihtáíssksinimaʼ­tsaa­yaawa matápiiksi ááhkáíkamoʼtaʼpaissaawa ki ááhkáóhkowaʼpssaawa, áísstsimááhkaiksi iikáyááhsstsimaahkatsiiyaawa ámoksska. (Proverbs 10:4, 26; Hebrews 13:18) Iihtsipáítapiiyoʼpa Otsiʼpówahsini iitssksínimaʼtsootsspa ááhkáótoomipoʼtsiʼsi niitánistáíksoʼkowammahsi Iihtsipáítapiiyoʼpa ki iihtáóhpommaoʼpa ki kitsstákssininoonistsi ááhkáwaapatsipoʼtsiʼsaawa.​—Okstóót Matthew 6:24, 25, 33; 1 Timothy 6:8-10.

Iihtáísoksistomioʼpa áakitanistáíʼtsiiʼpiaawa Naatóyssínaakssini okákiiʼpowahsiistsi. (Proverbs 14:30; 22:24, 25) Máátáakohtáísttsiistomioʼpa ki máátáakohtáwaakanohsoʼpa áakitanistáíʼtsiiʼpa Iihtsipáítapiiyoʼpa otokákihtsimaani ááhkssawáwaattsiyoʼsi. (Proverbs 23:20) Jehovah áísskáakanistsiʼtookiwa ááhkáíʼnakssimioʼsi, káákssawáóʼtsitskssimioʼki. (Psalm 104:15; 1 Corinthians 6:10) Iihtsipáítapiiyoʼpa okákiiʼpowahsiistsi máttohtáísspommootsspa ááhkáíkamoʼtaʼpaissoʼsi ki ááhkáíkamoʼtsskskaʼtakioʼsi. (Psalm 119:97-100) Iitáíkamoʼtomaiʼtakiiksi Jesus iihtaanistáíʼtsimiaawa Iihtsipáítapiiyoʼpa otokákihtsimaanistsi otohtáísoksipáítapiiyssaawa ki otáíniʼyimmahsaawa ki otáíksoʼkowammahsaawa Jehovah.​—Okstóót Matthew 5:14-16.