ISSKSINIMÁʼTSTOHKSSINI 10
Tsá Kitáakanistohkottóniiʼpa Ikámoʼtáátsimoyihkaani?
1. Kítaiʼtstsiiʼpa niʼtókskaawa ikámoʼtáátsimoyihkaani?
“Áísskskámmisaawa áísayiipitsiikáyissitsinikiiksi.”—MATTHEW 7:15.
Jesus issksínimaʼtsiiwaiksi otáíssksinimaʼtsaiksi otsítstsissi niʼtókskaawa áátsimoyihkaani, ikámoʼtáátsimoyihkaani. Niʼtománistsiiwa anní mohsokóyi áakitsitápohsokowaʼsiwa omanistáípaitapiiyssini. Jesus áániiwa: “Naamónnatsitapii áakohkoonimiaawa” ámohka mohsokóyi. (Matthew 7:14) Iihtsipáítapiiyoʼpa áísapiʼtsima áátsimoyihkaani iihtóʼtstsiiwa Otsiʼpówahsini, ikámoʼtaʼpiiwa. Ohkanáíkamoʼtáátsimoyihkaiksi áíʼtomanistáómaiʼtakiyaawa.—Okstóót John 4:23, 24; 14:6; Ephesians 4:4, 5.
Issáʼtsit áísaiksisttoohsini Iihtsipáítapiiyoʼpa Kítaʼyáísapiʼtsima Kanáómiaʼnistáátsimoyihkaanistsi?
2. Jesus tsá niitánistohtsíʼpoyiwa iitáísayiipitsomaiʼtakiiksi Jesus Christ?
“Áyiinapánssiyaawa otssksínoahsaawa Iihtsipáítapiiyoʼpa, noohkiʼtóóhkainakowa iihtáíponiksoʼkowammiiyaawa otánistaʼpaissaawa.”—TITUS 1:16.
Jesus iihtsíʼsskaaniinapsskakiwa áísayiipitsiikáyissitsinikiiksi otáaksipótsimatooʼsaawa otánistáómaiʼtakssaawa Iitáómaiʼtakiiksi Jesus Christ. Iikánistsináámmiaawa anní otáíkamoʼtáátsimoyihkaahsaawa. Otsitáwaatsimoyihkaahpiaawa áwaaniiyaawa otsitáómaiʼtakssaawa Jesus Christ. Kitáakánoohkohkottónoayaawa otánistápitapiihpiaawa. Tsá kitáakanistohkottónoayaawa? Áíkamoʼtáátsimoyihkaiksi áísopoyaʼpitomaiʼtakiyaawa Jesus Christ ki áakanistónoayaawa otánistápitapiihpiaawa ki otánistaʼpaisspiaawa.—Okstóót Matthew 7:13-23.
3. Tsá kitáakanistónoayaawa áíkamoʼtáátsimoyihkaiksi?
Issáʼtsitaawa ámoistsi niisitóístsi otáakanistónoahpiaawa:
Áíkamoʼtáátsimoyihkaiksi áísapiʼtsimiaawa Naatóyssínaakssini otánistápissi Iihtsipáítapiiyoʼpa Otsiʼpówahsini. Áíiyikaʼkimaayaawa ááhkaanistáíʼtsiʼsaawa iitssínaiiʼpistsi okákiiʼpowahsiistsi. Ikámoʼtáátsimoyihkaani máátsitotoisaʼpiiwa sáyiipitsáátsimoyihkaani, sáyiipitsáátsimoyihkaani iihtóʼtomaiʼtakiyaawa matápiiksimsstaanistsi. (Matthew 15:7-9) Áíkamoʼtáátsimoyihkaiksi aanistáíʼtsimiaawa otáíssksinimáʼtstohkihpiaawa.—Okstóót John 17:17; 2 Timothy 3:16, 17.
Iitáíkamoʼtomaiʼtakiiksi Jesus áíniʼyiʼtsimiaawa Iihtsipáítapiiyoʼpa otsínihkaʼsimi, Jehovah. Jesus iihtáíniʼyiʼtsima Iihtsipáítapiiyoʼpa otsínihkaʼsimi otohtáyissitapiiyssi. Áísspommoyiiwa matápii ááhkssksinoahsaawa Iihtsipáítapiiyoʼpa ki áíssksínimaʼtsiiwaiksi ááhkohtáwaatsimoyihkaahsaawa Iihtsipáítapiiyoʼpa otsínihkaʼsimi ááhkaatowáʼpistotsiʼsi. (Matthew 6:9) Kitsitayáópiihpi, tsá áátsimoyihkaani iihtáyissitapiiwa Iihtsipáítapiiyoʼpa otsínihkaʼsimi?—Okstóót John 17:26; Romans 10:13, 14.
Iitáíkamoʼtomaiʼtakiiksi Jesus iihtáyiinapsskakiyaawa Iihtsipáítapiiyoʼpa Otokákihtsimaani. Iihtsipáítapiiyoʼpa issksksímiiwáyi Jesus ááhkohtáíʼtaamitsinikssi Okákihtsimaani. Matápii áakohkottsiʼtsitáísstakatoomiaawa Iihtsipáítapiiyoʼpa Otokákihtsimaani. Jesus máátáónawaissikohtsiʼpoyiwa otsítsaakipáítapiiyssi. (Luke 4:43; 8:1; 23:42, 43) Áániiwa otáíssksinimaʼtsaiksi otáakomanistohtáyiinapsskakssaawa. Ikkamítstsiiʼki iihtáíʼpoyiwa Iihtsipáítapiiyoʼpa Otokákihtsimaani, tsá áátsimoyihkaani áítsinssiwa?—Okstóót Matthew 24:14.
Jesus otáíssksinimaʼtsaiksi máátáítsinssiyaawa otánistokaʼpissi ksááhkoyi. Kitáakanistónoayaawa otssawáítsinssaawa matápiokákihtsimaanistsi tsááhtaoʼ matápiiksi áípiyistotakiiksi. (John 17:16; 18:36) Máátattáyiimatoomiaawa ohtáwaakánohsspiaawa ki otánistáókaʼpihkaʼsspiaawa matápii.—Okstóót James 4:4.
Iitáíkamoʼtomaiʼtakiiksi Jesus iiksstónnatáwaakomimmotsiiyiyaawa. Iihtóʼtssksinimaʼtsaayaawa Iihtsipáítapiiyoʼpa Otsiʼpówahsini káátáíniʼyimmiiyaawa kanáómiaʼnitsitapiiksi. Sáyiipitsáátsimoyihkaanistsi áísapiʼtsimiaawa awahkáóótsiiyssiistsi, áíkamoʼtáátsimoyihkaiksi noohkssawáítsinssiyaawa. (Micah 4:1-3) Iitáíkamoʼtomaiʼtakiiksi Jesus máátáótoomipoʼtoohsiyaawa misskáísstaansspommoyiiyaawa ki áwaahkomimmiiyaawa stsíkiksi.—Okstóót John 13:34, 35; 1 John 4:20.
4. Kitáaksstaoʼohkottóniiʼpa ikámoʼtáátsimoyihkaani?
Tsá áátsimoyihkaani iihtóʼtssksinimáʼtstohkiyaawa Iihtsipáítapiiyoʼpa Otsiʼpówahsini, ááhkáíniʼyiʼtsiʼsaawa Iihtsipáítapiiyoʼpa otsínihkaʼsimi, ki ááhkohtáyiinapsskakssaawa Iihtsipáítapiiyoʼpa Otokákihtsimaani otsiʼtsitáísstakaanaʼpissi? Tsá áátsimoyihkaani áístotsimiaawa áákomimmotsiiyssini ki ááhkáíkaiʼtsiʼsaawa awahkáóótsiiyssini? Tsá kitánistsiksimsstaahpa?—Okstóót 1 John 3:10-12.