Íssksinimaʼtstohkssini 7

Iihtsíístapikiaʼpiiwa Áʼpimmohsini?

1-3. Áakiitáísskaisskskaʼtsiiʼpa otánistápiihpi Jehovah kitáóʼmaniiwa?

ÁÁKOHKIIʼPA Iihtsipáítapiiyoʼpa ikkámitsitooʼsi ááhkáókakihtsimahsi, tsá iihtsíístapikiaʼpiiwa matápii ááhkááwattaokakihtsimatohssaawa, ááhkssawáísstakatahsaawa Iihtsipáítaipiiyoʼpa? Matápiiksi kítaʼyáóʼtsitskssokokakihtsimaayaawa Iihtsipáítapiiyoʼpa? Ikkámohtoʼtokakihtsimaoʼki nínaawa niitánistáóksistotoahsi nínaawa, otokákihtsimaani máátsikakssokaʼpiiwa.

² Kitotóómínninnoona ki kitotóómiksísstonnoona otáíʼpáóotsimatooʼsaawa Iihtsipáítapiiyoʼpa otokákihtsimaani, iitsítstsiiwa áʼsokaʼpiiwa. Íítohtsíístapomatapokohkoyiyaawa ki niʼtóyi otsíístapokóʼsoaawayi. Ááwattsípahtsiipiohsiyaawa máátohkootoiʼmohkiyaawa. Iihtsipáítapiiyoʼpa Otsíʼpowahsini iitssínaiiʼpa: “Ááwattsitsipoʼtoohsiyaawa ááhkssawáíkamoʼtaʼpsssaawa. Máátokóʼsaiksaawa, ááwattsípahtsaʼpssiyaawa.”​—Deuteronomy 32:5.

³ Áakiitáísskaisskskaʼtakioʼpa, ómaniiwa Iihtsipáítapiiyoʼpa otáíʼsskaaniinapsskoahsi Adam ki Eve, Áʼpistotookiwa áánistsiiwaiksi ikkámiistapaatoosaawa otokákihtsimaanistsi otáakomatapómahkitapiwaʼssaawa ki áakonawáíʼniyaawa. (Genesis 2:17; 3:19) Iitsíístapaatoomiaawa Iihtsipáítapiiyoʼpa otokákihtsimaani, ki onawáómahkitapiwaʼsiyaawa ki onawáíʼniyaawa.

4. Máakssayikamoʼtaʼpssoʼpa, máakáísttsiistomioʼpa ki máakáíʼnioʼpa?

⁴ Otsííkiihpiaawa otsíístapokoʼsoaawayi ííhtsitsinikatayaawa Romans 5:12 iitssínaiiʼpa: “Iihtsíístapitstsiiʼpa ipahtsáʼpssini ki iʼnssíni ámohka niʼtókskamma nínaawa [Adam, ííhtomatápitstsiiwa matápii] otsípahtsaʼpssini, ki iʼnssíni íítohtsíístapohkanawaaniitstsiiwa nínaawa.” Kitotóómínninnoona ki kitotóómiksísstonnoona otáʼpiʼtsiʼsaawa Iihtsipáítapiiyoʼpa otokákihtsimaani, máátáítsitsikamoʼtsitapiyaawa ki iitáípahtsáʼpssiyaawa. Niitánistáyiikanootsiiyoʼpi, otsípahtsaʼpssoaawayi iitsíístapohkotsiiyaawa otsíístapokoʼsoaawayi. Káátohtssawáíkamoʼtaʼpssoʼpa otáíʼpokááyoʼsi ki iihtáísttsiistomioʼpa ki iihtáíʼnioʼpa.

5, 6. Áakiitáísskaisskskaʼtakioʼpa, nínaawa kítaoʼmáítsitooma niitáʼpikkinaaʼpiiwa ki niitáʼpssoksipaitapiiyssini?

⁵ Oʼtsítskanistsóyaawa kiipíppoisstoyiimiistsi otánistsísamitstsissaawa kanáómiaʼnistsitstsiistsi matápiókakihtsimaanistsi, ki matápii áísaakiókohkoyiyaawa. Matápii ánistsísamiitaʼpaissiyaawa nááomahksikiipíppoisstoyiimistsi annó ksááhkoyi, áakánistsiksimsstaoʼpa ááhkohkottsikáístotsiʼsaawa íkkinaaʼpiiwa, íkamoʼtaʼpiiwa, ki ááhkáísokaʼpaisssaawa ki ááhkáístotsiʼsaawa ikímmapiiyipitsissini, ááhkáíkimmotsiiyssaawa, ki ááhkáísapiʼtootsiiyssaawa.

⁶ Nóóhksskaapoʼkstsiiwa otánistáókakihtsimahpiaawa, máátomáíkakitstsiiʼpa matápiókakihtsimaani ááhkaakihtakssaawa niitáʼpikkinaaʼpiiwa ki niitáʼpssoksipaitapiiyssini. Áakiitssaʼtsiiʼpa íssksikíípippoisstoyiistsi, sstonnátakáítapii Jews ííksimiʼnitaiksi ki iikáttsstonnátakaitapii iihtsíʼnitaiksi awahkáóótsiiyssini. Ánnohk ííksstonnátakaitapii matápii áóksistotoaiksi, áíksimiʼnitaiksi, ki iihtáótoyóʼkiayaawa otssawáíksoʼkowammotsiiyssaawa ki otssawáíʼtomanistáókakihtsimahsaawa.

Otánistaʼpaisissi Ánnohk Ksistsikóyi

7. Tsá áakanistsitsinikatooʼpa otánistáípaitapiihpiaawa matápii ki otsitapíímoaawaiksi?

⁷ Sspáíitssaʼtsít, matápii otánistaʼpaisssaawa ánnohk ksistsikóyi. Áómotapitaistsiiʼpa sáómmitáʼpiiwa ki satáʼpiiwa. Stámiitapíkkamaaniitstsiiwa matápiiksi ááhkohtáísspimmohsaawa iihtáíʼksisstootsspi, okáʼpoʼtsisissini, saaámistsi ki makáʼpoʼksstsisttaaʼpistsi. Makáʼpisttsíístomssiistsi stámohkanáwaaniitstsiiyaawa. Mattokáʼpisttsíístomssini máánattsitstsiiwa AIDS akáíitaʼpáttakaitapiiyaawa matápii iihtáyissinayaawa. Ííksstonnátakaitapii matápii iihtáíʼniiksi otáíponiaakssaawa tsááhtaoʼ isttsíístomssini, ki anistápoohtsi náámonnatsitapii aakóótsaʼpssiiksi. Matápii áóksistotsimiaawa ki máátohtáíppomissitapiiyaawa ksááhkoyi. Matápii otsitapíímoaawaiksi otánistáípaitapiihpiaawa máátattssíppomaʼpiiwa ki máátattáíssksinimiaawa sokáʼpiistsi. Niitsííwa, ipáítapiiyssini ánnohk ksistsikóyi iihtóʼtstsiiwa Makáʼpatoʼsiwa otokákihtsimaani káátsitssinaiiʼpa ‘áókakihtsimatooma ksááhkoyi’. Makáʼpatoʼsiwa niitáókakihtsimatsiiwa matápii ááhkssawoʼtowaʼpsssaawa, ááhkssawáíkimmapiiyipitsiʼsaawa ki ááhkáísopoksistotsiʼsaawa sáómmitáʼpiiwa.​—2 Corinthians 4:4.

8. Máakssawohkottaniioʼpa matápii máátsiitaʼpákkioowa otánistaʼpaisssaawa?

⁸ Iihtsipáítapiiyoʼpa isskáakanistsiʼtoyiiwa matápii ááhkiitoʼtoohsaawa otsítomáísoksatooʼsaawa ísspssksínimaʼtstohkssini ki ááhkanistáwaakootsaʼpsssaawa. Matapii máátattaʼpistotsimiaawa aksipínnakssiistsi ki ápssiistsi áísstaanaʼpistotakiyaawa áíkkamsaikskaammiksi, ómahksínaamaiksi, áípottaiksi áípakksisstakiiksi, ki sstonnátaʼpiistsi áísskonákatooʼpistsi ómahksípakksisstakssiistsi, áaksstaoʼohkottaniioʼpa matápii otáíitaʼpokakssaawa? Áaksstaoʼohkottaniioʼpa matápii akááwakkioowa otáóhkottsitapoohsaawa sspóóhtsi nóóhkssawohkottsíkkinaʼpaiʼtomanistopiiyaawa annó ksááhkoyi? Áaksstaoʼohkottaniioʼpa matápii akááwakkioowa áakiitáíkoʼpommiaawa ááhkohtaʼpáísitokaʼpawaawahkahsaawa áíʼkoʼkósi, tsááhtaoʼ tókskaistsi ksistsikóístsi?

Niʼtóóhkainakowa Matápii Otánistaʼpaisssaawa

9, 10. (a) Áakiitáísskaisskskaʼtakioʼpa matápii otánistsísamiitaʼpaissspiaawa annó ksááhkoyi tsá anistápiiwa niʼtóóhkainakowa? (b) Iihtsipáítapiiyoʼpa máakssaysskoʼtsima ááwattsitsííhtaani?

⁹ Áakiitáísskaisskskaʼtakioʼpa matápii otánistsísamiitaʼpaissspiaawa annó ksááhkoyi, stáminakowa áakiitssawáísstakatoomiaawa Iihtsipáítapiiyoʼpa otokákihtsimaani, máátáóhkottaawattsiksikkaʼyiyaawa. Niʼtómanistsstakaanaʼpiiwa Iihtsipáítapiiyoʼpa otokákihtsimaani ááhkáóoyoʼsi, ááhkáísimioʼsi, ki ááhkáísiitamioʼsi. Stámiʼtóóhkainakowa: Niitáʼpistotookiwa ááhkáísstakatooʼsi Áʼpistotookiwa otssksinimáʼtstohkssiiistsi, niʼtómanistsiiwa otohpáʼpistotootsspi ááhkáísstakatooʼsi aoówahsini, aohkííwa, ki iihtáísiitamioʼpi.

¹⁰ Otáísskáakanistsiʼtsiʼsi makáʼpiiwa ááhkiitáístsissi, Iihtsipáítapiiyoʼpa stámohtáíʼstamattstohkiwa otsikímmataanaʼpissi ááhkohtáókaʼpissitapiioʼsi ááwattsitsííhtaani. Ki ááwattsitsííhtaani matsowáʼpomatskahtakssini ki Iihtsipáítapiiyoʼpa máátáaksskoʼtsima, ííkippáísskaakanistsiʼtoyiiwa matápii ááhkohtáókaʼpissitapissaawa ááhkitsiniʼsaawa otánistohtaokohkoyssaawa. Iihtsipáítapiiyoʼpa Otsíʼpowahsini ííkamoʼtaniiwa otánissi: “Máátsinaana nínaawa ááhkááwattaiksikkaʼyssi.” Máttsikamoʼtaniiwa otánissi: “Nínaawa áítapokakihtsimatsiiwa nínaawa ááhkiitáwaakanohssaawa.”​—Jeremiah 10:23; Ecclesiastes 8:9.

11. Kítaoʼmáíkakitstsiiʼpa matápiókakihtsimaani ááhkssikáaattsstooʼsi matápii ááhkokohkoyssaawa?

¹¹ Iihtsipáítapiiyoʼpa otsskáakanistsiʼtsiʼsi matápiókakihtsimaani ááhkiitáístsissi nááómahksikiipíppoisstoyiimistsi, stámohtsiʼtóóhkainakowa nínaawa máátáóhkottssikaaattsstooma matápii ááhkokohkoyssaawa. Nínaawa máátomáíkakohkottssikaaattsstooma ókohkoyssini. Ámohka tókskamma Isttsíípihkiniinaawa Solomon ííhtsitápiwa Israel, iikókakiwa, iikákootsaʼpssiwa, ki iiksskonátaʼpssiwa, máátohkottsikamoʼtohtooma matápii ááhkohtokohkoyssaawa matápiókakihtsimaani. (Ecclesiastes 4:1-3) Niʼtóyi, ánnohk ksistsikóyi ísskonataʼpssiiksi áókakihtsimaiksi, ímaksstonnátsspssksinimaʼtsaahsaawa, máátáóhkottssikaaattsstoomiaawa matápii ááhkokohkoyssaawa. Áakiitáísskaisskskaʼtakioʼpa matápii áakiitáwattaʼpaissiyaawa áakiitssawáísstakatoomiaawa Iihtsipáítapiiyoʼpa otokákihtsimaani máátáyiistapssokaʼpiiwa stámsskitáyiistapokaʼpiiwa.

Iihtsipáítapiiyoʼpa Otánistsíkaayisssaʼtsiʼsi Íssoohtsika

12-14. Tsá niitánistohtsíístapssokaʼpiiwa Iihtsipáítapiiyoʼpa otsskáakanistsiʼtsiʼsi ókohkoyssini?

¹² Iihtsipáítapiiyoʼpa otsskáakanistsiʼtsiʼsi ááhkáókohkoyoʼsi stámiitáʼpohtaakanotsspa. Iináóʼksikaayisssaʼtsima íssoohtsika, íssksinima otáakssokaʼpissi íssoohtsika. Iihtsipáítapiiyoʼpa otánistsíkaayisssaʼtsiʼsi íssoohtsika áakohtáyiistapaissokaʼpaissiyaawa kanáítapiiksi, máátáakonawaissikaʼpiiwa ááhkohtáísokaʼpaisssaawa.

¹³ Ikkámitstsiiʼki íssoohtsika ááhkssopówahtsiʼsatooʼsi Iihtsipáítapiiyoʼpa otánistáókakihtsimahsi, áaksikakssaʼtsiiʼpa matápii otánistohtáókaʼpissitapissi otááwattsitsííhtaani ki otánistáókaʼpokakihtsimahsi. Íssoohtsika máátáakohkottaakohkiiʼpa ki máátáakohkottssopowahtsiʼsatooʼpa Iihtsipáítapiiyoʼpa otánistáókakihtsimahpi, áaksikakssaʼtsiiʼpa áwaʼpimmiiksi Áʼpistotookiwa otánistáókakihtsimahpiaawa.

¹⁴ Jehovah otsskáakanistsiʼtsiʼsi makáʼpiiwa ki ááhkáókohkoyoʼsi iihtsíístapssopokssksiniiʼpa máátáakohkottaawattaokakihtsimatohsoʼpa ki máátáakohkottaawattaisokaʼpaissoʼpa. Stáminakowa matápii tsááhtaoʼ naatoyítapiiksi otááwattsitsííhtaanoaawayi máátáakohkottohtsiistapaisokaʼpaissoʼpa. Íkamoʼtokakihtsimaawa Iihtsipáítapiiyoʼpa ááhkssáóppisskoahsi áwaʼpimmiiksi ostóyi. “Makáʼpitapiiksi áakáánooksiksistotoyiiwaiksi.”​—Psalm 145:20; Romans 3:4.

[Isínaawa íítohkooniiʼpa sináákssini 15]

Kitotóómínninnoona ki kitotóómiksísstonnoona otáíʼsstaahsaawa ááhkááwattokakihtsimatohssaawa, ááhkssawáísstakatahsaawa Iihtsipáítaipiiyoʼpa, íítomatapómahkitapiwaʼsiyaawa ki onawáíʼniyaawa

[Isínaiksi íítohkooniiʼpa sináákssini 16]

Ííkohtáókohkoyiyaawa matápii áakiitááwattáókakihtsimatohsiyaawa áakiitáísaipoʼtoyiiyaawa Iihtsipáítapiiyoʼpa

[Iihtóʼtssínaiiʼpi]

U.S. Coast Guard sináákssini