Stámitskít Sáyiipitsáátsimoyihkaani!

Makáʼpatoʼsiwa ki otokáʼpatoʼsiimiksi kimáátáísstakkiaawa kitááhkaanistaiʼtoahsi Iihtsipáítapiiyoʼpa. Tsá níítanistohkottaʼsoksskoyiiyaawa matápii ki ááhkitáyiistapaatahsaawa Iihtsipáítapiiyoʼpa? Iihtáyissitapiiyaawa sáyiipitsáátsimoyihkaani. (2 Corinthians 11:13-15) Áátsimoyihkaani áakitohtssawáíkamoʼtssksinimaʼtstohkiyaawa Naatóyssínaakssini ánnayi ánistaʼpiiwa sáyiipitsáátsimoyihkaani. Sáyiipitsáátsimoyihkaani náámitssoksinaattsiwa, máátohtohkoikioʼpa, ííkohtáwaʼsoksskootsspa.

Jehovah ííksikamoʼtaʼpssiwa, ííkáíkaiʼtsima sáyiipitsáátsimoyihkaani. Jesus otáíʼtaʼpaisssi annó ksááhkoyi, itstsííʼpa anníksiskáyi níítsiksimsstaayaawa otáátsimoyihkaanoaawayi otssokáʼpissi ki nóóhkattsitáíssaaksiʼnitsiiyaawa Jesus. Áwaaniiyaawa: “Niʼtókskamma Nínninnaana, Iihtsipáítapiiyoʼpa.” Jesus kátaiʼsapiʼtoyiiwaiksaawa? Saa! Stámsskitsstsaawaanistsiiwaiksi: “Kínnoaawawa Makáʼpatoʼsiwa.” (John 8:41, 44) Ánnohka ksístsikóyi iikakáítapiyaawa matápii niitáíksimsstaayaawa otáíkamoʼtawáátsimoyihkatahsaawa Iihtsipáítapiiyoʼpa, nóóhkssáwaanistsiiwa, stámsstáánanistaiʼtoyiiyaawa Makáʼpatoʼsiwa ki otokáʼpatoʼsiimiksi!​—1 Corinthians 10:20.

Amá miistsísa akáókaʼpihtsimiwa ohtssáísskiiʼpi óyʼssatooʼpistsi áakohkattáókaʼpiiyaawa, niʼtóyi sáyiipitsáátsimoyihkaani ohtáyíístapitstsiiʼpi makáʼpitapii. Otáókaʼpihkaʼssaawa makáʼpitapii stámohtohtóíʼtsiiwa makáʼpiiwa annó ksááhkoyi. Itstsííʼpa áómoʼtaʼpáóhkiimiksi tsááhtaoʼ áómoʼtaʼpáyoomiksi ki áíitsskaiksi, áíkamoʼsiiksi, áókohkoyiiksi, iksimíʼnikkssini ki áʼpawaatápiksistakiiksi. Iikákayimmiaawa áwaatsimoyihkaiksi ámoksska áókaʼpihkaʼsiiksi, otáátsimoyihkaanoaawayi máátóóhkohtsiistapoohkiitaʼpssiyaawa áísaakiaistotsimiaawa makáʼpiiwa. Máátáakohkottawakkaamiiyaawa Áʼpistotookiwa, áaksstsinaiʼssikáaattsstoomiaawa otokáʼpitapissoaawayi áakamitohkottawakkaamiiyaawa Iihtsipáítapiiyoʼpa.​—Matthew 7:17, 18.

Sáyiipitsáátsimoyihkaani áíssksinimaʼtsiiyaawa matápii ááhkáítapaatsimoyihkaahsaawa otáwaatoyiʼtsiiʼpoaawayi. Iihtsipáítapiiyoʼpa áániiwa ááhkssawáítapaatsimoyihkaoʼsi matápii otáwaatoyiʼtsiiʼpoaawayi tókskaistsi anistáʼpiiyaawa iyáaksiksaakssiiksi tsááhtaoʼ atapíímiksi. Íímaniiwa, kitááhksstaayaahsiʼtsiiʼpa amá matápii kimáátáakonawaisitsípssakka ááhksstamskitsstaanaisitsípssatsiiwa kítssínaokooyi? Kitááhksstaoʼohkottaaniihpa kitoʼtssátákkaamahsi ámohka anistápitapii? Saa. Niʼtóyi Jehovah áísstakkiwa ostóyi ááhkáísitsipssatahsi, máátáísstakkiwa ááhkáísitsipssatahsi iyáaksiksaakssiiksi, atapíímiksi tsááhtaoʼ isínaakssini, máátsitapiiyaawa.​—Exodus 20:4, 5.

Sáyiipitsáátsimoyihkaani áíssksinimáʼtstohkiwa otssáwohkóíkissi ááhkáíʼnikkioʼsi áíʼtstsiiʼki awahkáóótsiiyssini. Jesus áániiwa Iihtsipáítapiiyoʼpa otákkaamiksi otáakawáá­komim­mot­siiys­saawa. Ikkámawáákomimmahki matápii máátáakaiʼnitayaawa. (John 13:35) Máátssokáʼpiiwa ááhkáíʼnikkioʼsi ímaksskáóʼkaʼpitapissi amá matápii. Jesus sstsínaiʼsíímiiwaiksi otáíssksinimaʼtsaiksi ááhkssayíítsskaamahsaiksi ómiksska ototóyinniiksi Jesus.​—Matthew 26:51, 52.

Sáyiipitsáátsimoyihkaani áíssksinimaʼtstohkiyaawa makáʼpitapii otáístaahtoohsaawa otsitáakohpakóyihpiaawa. Pahtsáʼpssini itápohsokówaʼsiwa iʼnssíni anní niitánistssksinimáʼtstohkiiʼpa anní Naatóyssínaakssini. (Romans 6:23) Iihtsipáítapiiyoʼpa Jehovah iikáákomimmapiiyipitsiwa, tsá áakanistohkottáwaakaniiwa matápii? Áóʼtstsiisi Matsowáʼpiʼnssimaani, Jehovah áakssapiʼtsima niʼtókskayi áatsimoyihkaani. (Revelation 15:4) Kánaomiaʼnistáátsimoyihkaanistsi iihtóʼtstsiistsi Makáʼpatoʼsiwa otssáyiskahtakssiistsi máátáakattsitaistsiiyaawa.