ISSKSINIMÁʼTSTOHKSSINI 10
Tsá Kitáakanistohkóóniiʼpa Íkamoʼtáátsimoyihkaani
Ikkámsstáíniki kitááhkawakkaamahsi Iihtsipáítapiiyoʼpa, kitáaksstsínaiʼsapaatooʼpa áátsimoyihkaani Iihtsipáítapiiyoʼpa otáísokiʼtsihpi. Jesus áániiwa “áíkamoʼtáátsimoyihkaiksi” áakáísstsinaoʼohkanáísapaatoomiaawa “íkamoʼtaʼpiiwa”. (John 4:23, 24) Niʼtsítstsiiʼpa niitáwáátsimoyihkatahpi Iihtsipáítapiiyoʼpa. (Ephesians 4:4-6) Íkamoʼtáátsimoyihkaani itápohsokowaʼsiwa omáánistáípaitapiiyssini, ki sáyiipitsáátsimoyihkaani itápohsokowaʼsiwa áánooksiksistotakssini.—Matthew 7:13, 14.
Kitááhkohkottoniiʼpa íkamoʼtáátsimoyihkaani, káakssámmis áístotsimiksi íkamoʼtáátsimoyihkaani. Jehovah iikááhsitapiwa, ómiksska áíkamoʼtáátsimoyihkaiksi áaksstsínaoʼohkattayaahsitapiyaawa. Áakitssokssáísskihssoyiwa miistsííksi iikohtáítsiyisáísskiiyaawa míínistsi, niʼtóyi matápiyi áakitáíkamoʼtáátsimoyihkaayaawa iikohtátsowáʼpitapiyaawa.—Matthew 7:15-20.
Jehovah otákkaamiksi iikáíyiniʼyitsimiaawa Naatóyssínaakssini, íssksinímiaawa otohtóʼtstsíssi Iihtsipáítapiiyoʼpa. Ohtáyissitapiiyaawa Naatóyssínaakssini ááhkohtsitáíssksiniʼsaawa ááhkanistáípaitapiiyssaawa ki ááhkanistohkottaiʼtsiʼsaawa otáíiyikiʼtsiiʼpoaawayi ki ááhkanistohkottssksínoahsaawa Iihtsipáítapiiyoʼpa. (2 Timothy 3:16) Iikáíiyikaʼkimaayaawa ááhkáísapáatooʼsaawa otáánistáókakiaaniihpoaawayi.
Jehovah otákkaamiksi iikáwáákomimmotsiiyiyaawa. Jesus níítanistáákomimmiiwa matápii otohtáíssksínimaʼtsaahsaawa Iihtsipáítapiiyoʼpa ki otánistssokináápiaahsi áísttsiistomiiksi. Ánniksska áístotsimiksi íkamoʼtáátsimoyihkaani ohkattáwáákomimmiiyaawa matápii. Niʼtóyi Jesus, máátáínnissammiiyaawa ikímmataʼpssiksi tsááhtaoʼ mattóóhkiitsitapiiksi. Jesus áániiwa matápii áakohkottanistáónoyiiyaawa otáíssksinimaʼtsaiksi otanistáwáákomimmotsiiyssaawa.—John 13:35.
Áʼpistotookiwa otákkaamiksi iikáíyiniʼyitsimiaawa Iihtsipáítapiiyoʼpa Jehovah otsínihkaʼsimiwa. Ikkamítstsiiʼki matápii máátohtáísskaakohtsíssitapiiwa kitsínihkaʼsimi, kitoʼtssátákkaamaatsiksi? Saa! Íikohtáísoksiʼpoyoʼpiaawa kitakkááminnooniksi ki ohtáyissitapioʼpa otsínihkaʼsoaawayi. Ámoksska áísstaiksi ááhkawakkaamahsi Iihtsipáítapiiyoʼpa áakohtáíʼpoyiyaawa ki áaksstsinaoʼohtáyissitapiiyaawa otsínihkaʼsimiwa. Jehovah áísstakkiwa ááhkanistaʼpáíssoʼsi.—Matthew 6:9; Romans 10:13, 14.
Niʼtóyi Jesus, Iihtsipáítapiiyoʼpa otákkaamiksi ohkáttohtáíssksinimaʼtsiiyaawa matápii Iihtsipáítapiiyoʼpa Otokákihtsimaani. Iihtsipáítapiiyoʼpa Otokákihtsimaani ohtóʼtaawattáttstooʼpa sspóóhtsi áakohtaanátsistotsiiʼpa annó ksááhkoyi áakiitánistsinaattsiwa matsowáʼpiʼnssimaani. Iihtsipáítapiiyoʼpa otákkaamiksi iihtáíʼtaamítsinikiyaawa Iihtsipáítapiiyoʼpa Otokákihtsimaani.—Matthew 24:14.
Jehovah Otátohkaʼtohtaaniksi iikáíiyikaʼkimaayaawa ááhkomáánistawakkaamahsaawa Iihtsipáítapiiyoʼpa. Iikáíyiniʼyitsimiaawa Naatóyssínaakssini ki iikáwáákomimmotsiiyiyaawa. Ohtáyissitapiiyaawa ki iikáíyiniʼyitsimiaawa Iihtsipáítapiiyoʼpa otsínihkaʼsimi ki máttohtáíssksínimaʼtsiiyaawa matápii Iihtsipáítapiiyoʼpa Otokákihtsimaani. Jehovah Otátohkaʼtohtaaniksi áístotsimiaawa íkamoʼtáátsimoyihkaani ánnohk annó ksááhkoyi.