Tsá Niitánistsitsííhtatayaawa Iʼnííksi?

1. Tsá niitánistsiʼtáámitsinikitayaawa iʼnííksi?

Jesus otáíʼtoʼtoohsi Bethany iitoʼtssátstsiiwa Jerusalem, otákkaama Lazarus ákaayiistapiʼniyináyi niisóíksistsikoistsi. Jesus ohpokitapóomiiwa Lazarus osskániksi Martha ki Mary otsitáakihtsaahpi. Máátsiistapisamowa matápiiksi iitsítoʼtooyaawa. Ááhksiikohtsstónnatsiʼtaamiʼtakiyaawa Martha ki Mary, Jesus otáíʼtssksipáítapiiyáttsaahsi Lazarus?​—Okstóót John 11:21-24, 38-44.

Martha ákaayiistapotsistápiʼtsima niitánistsiʼtáámitsinikatahssaawa iʼnííksi. Issksiníma Jehovah otáakitapssksipáítapiiyáttsaahsaiksi iʼnííksi ksááhkoyi.​—Okstóót Job 14:14, 15.

2. Áíkiaʼpiiwa matápii áíʼnisi?

Matápii iihtáʼpistotoayaawa ksááhkoyi. (Genesis 2:7; 3:19) Máátsitssápstsiiʼpa mottáka koistóminnooni. Áíʼnioʼki máátattáíssk­skaʼ­takioʼpa, stámssopoksíʼnioʼpa. Áíʼnioʼki kóʼpinnooni ohkáttsitáíʼniwa, ki máátattsitáísskskaʼtakioʼpa. Lazurus máátohtsíʼpoyiwa otssaakiipáítapiiyssi otáíʼnssi, iʼnííksi máátattáísskskaʼtakiyaawa.​—Okstóót Psalm 146:4; Ecclesiastes 9:5, 6, 10.

Iihtsipáítapiiyoʼpa kítaoʼohtáwaakániiwa ákaiʼniiksi pakóyittsiyi? Naatóyssínaakssini iitssínaiiʼpa iʼnííksi máátattáísskskaʼtakiyaawa, stámiʼtóóhkainakowa iitáómaiʼtakiiksi ákaiʼniiksi otáístááhtoohssaawa ááhkitaohpakóyiʼsoyssaawa anistápiiwa sáyiipitsíssksinimaʼtstohkssini. Matápii niitáíksimsstaayaawa ámohka omáíʼtakssini otohtóʼtstsissi Iihtsipáítapiiyoʼpa, máátanistsiiwa. Iihtsipáítapiiyoʼpa ikímmapiiyipitsiwa máátáóhkottanistokáʼpiksimsstaawa.​—Okstóót Jeremiah 7:31.

Issáʼtsit áísaiksisttoohsini Áíkiaʼpiiwa Matápii Áíʼnisi?

3. Ákaiʼniiksi áaksstaoʼohkottssitsip­ssák­kiyaawa?

Iʼnííksi máátáóhkottsiʼpoyiyaawa ki máátáyoohtsimiyaawa. (Psalm 115:17) Noohkítstsiiʼpa makáʼpatoʼsiiksi, áyiimatsiiyaawa otanistáíʼpoyssaawa otáíʼssaakiipáítapiiyssaawa ákaiʼniiksi, iihtáwaattsíístotoyiiyaawa matápii ááhkánistsiksimsstaahssaawa otssaakiipáítapiiyssaawa iʼnííksi. (2 Peter 2:4) Jehovah káátohtssíímokiwa ááhkaissáaksitsipssatahssaawa ákaiʼniiksi.​—Okstóót Deuteronomy 18:10, 11.

4. Takáá áakssksipáítapii­yát­tsaawa?

Sstónnatakáítapiiksi ákaayáakihtsaayiiksi áakitapssksipáítapii­yát­tsaayaawa ksááhkoyi. Tókskammiksi iʼnííksi máátssksinoyiiksi Iihtsipáítapiiyoʼpa ki áístotsimiksi makáʼpiistsi áakohkattssksipáítapii­yát­tsaa­yaawa.​—Okstóót Luke 23:43; Acts 24:15.

Issksipáítapiiksi áakohtsíkamoʼtssksinimaʼ­tsaa­yaawa Iihtsipáítapiiyoʼpa ki áakohtssksinimáʼtstohkiyaawa otsitáómaiʼtakssaawa Jesus áakitaanistáíʼtoyiiyaawa. (Revelation 20:11-13) Ámoksska issksipáítapiiksi áaksstsinaaʼyáísokaʼpaissiyaawa áakitohkottomanistsitáípai­tapii­yaawa ksááhkoyi.​—Okstóót John 5:28, 29.

5. Tsá anistápitapiwa Jehovah otáóhkottssksipáítapii­yátt­saahsi matápii?

Iihtsipáítapiiyoʼpa issksksímiiwa ohkóyi ááhkohtsítsiʼnssi kiistónnoona ki ááhkitohkottssksipáítapiiyssaawa iʼnííksi. Issksipáítapiiyssini iihtsíístapssksiniiʼpa Jehovah otákomimmapiiyipitsiiyssi ki otsikímmapiiyipitsiiyssi. Áíʼssksipáítapiiyssaawa iʼnííksi, takáá kítsstaahpa kitááhkotóóminoahsi?​—Okstóót John 3:16; Romans 6:23.