Íssksinimaʼtstohkssini 3
Tsá Áakanistssksiniiʼpa Otsítstsissi Áʼpistotookiwa
1, 2. Tsá anistápiiwa okákiiʼpowahsini ííhtssksiniiʼpa otsítstsissi Áʼpistotookiwa?
NIʼTÓKSKAWA áakohtssksiniiʼpa íkkamítstsiiʼki Áʼpistotookiwa ámohka kíppsskskaʼtsit okákiiʼpowahsini: Áʼpistotsiiʼpi sstsínaiʼtstsiiʼpa áʼpistotsima. Áakitómsspikaʼpistotsiiʼpa áʼpistotsiiʼpi, áaksstsínaiʼtstsiiʼpa okákiwa áʼpistotsima.
2 Káákssaʼtsit kookóówani. Sstsínaiʼstsiiʼpa áʼpistotsimi iitáísooyoʼpistsi, sóópaʼtsiistsi, iitóhkitssínaakioʼpistsi, akssíístsi, iitáísapinnihtaoʼpistsi, síkohkoʼsiksi, kóʼsistsi, iihtáóoyoʼpistsi ki kookóónnoonistsi. Ámostsska máátomsspikaʼpistotsiiʼpiaawa. Ámostsska máátomsspikaʼpiiyaawa nóóhksstsínaiʼtstsiiʼpa áʼpistotsimiksi, kááksskskaʼtsit áaksstáíʼsstsinaiʼtstsiiʼpa iitáʼpokakiwa ááhkaʼpistotsiʼsi ómsspikaʼpistotakssiistsi?
Niitánistsipisátaʼpissi Kanáítaistsiistsi Sspóóhtsi ki Annó Ksááhkoyi
3, 4. Tsá niitánistohtssksinihpa otsítstsissi Iihtsipáítapiiyoʼpa áakiitáíssaʼtsiiʼpa kanáítaistsiistsi sspóóhtsi ki annó ksááhkoyi?
3 Sstsináíʼtstsiiʼpa áʼpistotsima iihtáíksistsikomioʼpi. Áakiitssaʼtsiiʼpa niitánistomsspikaʼpistotsiiʼpi sspóóhtsi, ksááhkoistsi kítaʼyáóhkananistáíksistoʼtakohpiʼyaawa naatóʼsiwa kanáíksistsikoyi? Kaakáttssaʼtsit iitsspiópaooʼpa kakatóʼsiiksi niitsímmiaawa 100 billion nitsínihkatooʼpa Makóyoohsokoyiyi, kítaaʼpistotsiiʼpiaawa? Áíʼkoʼkosi kítaoʼmaikaksspssaʼtsiiʼpa Makóyoohsokoyiyi? Kítaiʼpisatsiʼtsiiʼpa? Kaakáttsskskaʼtsít kanáítaistsiistsi sspóóhtsi ki annó ksááhkoyi, kanáómsspikaʼpistotsiiʼpiaawa niʼtóyi niitáʼpistotsiʼpi Makóyoohsokoyiyi! Ámostsska kakatóʼsiiksi, naatóʼsiwa, koʼkomíkiʼsomma ohkanáíksistoisokohpiʼyaawa niʼtóyi iihtáíksistsikomioʼpi.
4 Ikkámaʼpistotsiiʼki iihtáíksistsikomioʼpi, áaksstsínaiʼtstsiiʼpa áʼpistotsima ómsspikáʼpistotsiiʼpi ki ipisátaʼpistotsiiʼpi kanáítaistsiistsi sspóóhtsi ki annó ksááhkoyi. Naatóyssínaakssini ámmokiwa ‘ááhksspssaʼtsiʼsi sspóóhtsi,’ ki iitssopówahtsiʼsiwa: “Takáa áʼpistotóyiiwaiksaawa?” Iitoyíʼtsima: “Annáhka Niʼtókskamma [Iihtsipáítapiiyoʼpa] aomóípiyiiwaiksi iikákayimmiaawa ámoksska kakatóʼsiiksi ohkanáóksiiwaiksi, Ohkanáínihkatsiiwaiksi. Otsskáíʼsopoksskonátaʼpsssi, ki otsstonnátsskonátaʼpsssi, Máátsitstsiiʼpa ááhkitssainakoyssi ámoksska kakatóʼsiiksi.” (Isaiah 40:26) Iihtsítstsiiwa kanáítaistsiistsi sspóóhtsi ki annó ksááhkoyi ámohka áʼpistotsimistsi, máátáínoawa, áókakihtsimaawa, ki ííkitsskonátaʼpssiwa otánistokákssi—Iihtsipáítapiiyoʼpa.
Ksááhkoyi Niʼtáyoohkíítaʼpistotsiiʼpa
5-7. Niitánistssaʼtsiʼpi ksááhkoyi tsá niitánistssksiniiʼpa otsítstsissi Áʼpistotookiwa?
5 Ísspssksinimaʼtsaiksi áakiitáókakisskskaʼtsimiaawa niitáʼpistotsiʼpi ksááhkoyi, stámohtsíístapssksinimiaawa niʼtáyoohkíítaʼpistotsiiʼpa ááhkiitáóhkottsitayaopissaawa matápii. Ksááhkoyi máátsiitaʼpípiiyistsiiwa ki máátsiitaʼpiitoʼtssatstsiiwa naatóʼsiwa, ááhkitohtáísopoyaʼpaanaʼkimaoʼsi ki ááhkitohtáísopoyaʼpiksistohsoyoʼsi. Kanáísstoyííwa ksááhkoyi iitáísopokoʼtakohpiʼwa naatóʼsiwa, íísopoyaʼpipaahksiststooʼpa ááhkitáyiipomioʼsi ki ááhkitáísstoyiimioʼsi. Kanáínaatsippoyi niisíkopotoyi oʼtakóóhsiistsi niitánistoʼtakohpiʼwa ksááhkoyi iihtáísskiinaattsiwa ki iihtáíksistsikomioʼpa. Íísopoyáʼpohtooʼpa iihtáísiitamioʼpi ááhkitohtssawaakanotsiiyoʼsi naatóʼsiwa otánistsiksistoʼssspi ki ááhkitáóhkottssiitamioʼsi. Máttsitstsiiwa aohkííwa ki ksááhkoyi ááhkitáóhkottsiʼnssimaoʼsi.
6 Ámostsska otohkanáísopoyaʼpitstsiiʼsaawa ki otáípoʼtaʼpoʼtakssaawa stámiitohkottsítstsiiwa ipáítapiiyssini. Kítaiʼksksowaaʼnistaʼpiiyaawa ámostsska? Science News iitssínaiiʼpa: “Ámostsska stámiitapssopoyaʼpohtooʼpiaawa, máátsiksísstoyiʼtanistsitstsiiyaawa.” Saa, áaksstsínaiʼtstsiiʼpa ááhkáʼpistotsiʼsi ámostsska, Áʼpistotookiwa.
7 Ikkámitssapiiniki matsowáʼpiaapioyisi ki ááhkaakaohsi aoówahsini, ki itstsííʼpa iihtáíksistohsoyoʼpi ki iihtáísstoopaooʼpi, ki máttsipsstapinniiʼpa aohkííwa, tsá kitáakanistsiksimsstaahpa? Kítaiʼksisstoyiʼtsitstsiiyaawa? Saa, áaksstsínaiʼtstsiiʼpa okákiwa matápii ááhkaʼpistotsiʼsi. Ksááhkoyi oʼtsítskomsspikaʼpistotsiiʼpa sstsínaiʼtstsiiʼpa ááhkaʼpistotsiʼsi ááhkiitohkottsitsipaitapissaawa iitaʼpáítapiiksi, náápioyiistsi máátanistómsspikaʼpistotsiiʼpiaawa.
8. Tsá anistápiiwa máttsitstsiiʼpa ksááhkoyi, iihtsíístapáíʼstamattsootsspa Áʼpistotookiwa otáwaakomimmokissi?
8 Káákattsskskaʼtsit ámostsska iihtáíʼtaamaʼpssoʼpi. Iikákaoyaawa kanáómiaʼnistsitstsiistsi áítsiiyimoistsi ki aanátsinááttsiistsi pisátssaisskiistsi. Máttsitstsiiʼpa áyaahsiistsi kanáómiaʼnistsaoówahsiistsi. Máttsitstsiiʼpa atsówaʼsskoistsi, miistákistsi, ómahksíkimiistsi, ki stsíkiistsi matsowáʼpaʼpistotaksiistsi. Kítaʼwaanátsinaattsiwa ááʼyaaksísttahkapisi naatóʼsiwa? Kítaʼwaanátsimmayaawa áakiitáíssammayaawa pokómitáíkoaiksi, pokohpóósiksi, ki pókimiiksi itáíksowáʼpaomaahkaiksi áakiitáíʼkowaniyaawa? Iikákaoyaawa áʼpistotsiʼpistsi annó ksááhkoyi ááhkohtáíʼtaamssoʼsi, nóóhkssawanistápiiyaawa ááhkohtáípaitapiiyoʼsi. Stáminakowa áákomimmapiiyipitsiwa áʼpistotsima ksááhkoyi, iihtáʼpistotsiiʼpa matápii ááhkiitáíʼtaamipaitapissaawa.
9. Takáá áʼpistotsima ksááhkoyi, ki máakaʼpistotsima?
9 Stamiʼtóóhkainakowa ááhkssapiʼtsiʼsi otsítstsissi Ohkókkiwa ámostsska, niʼtóyi ámohka iitsínssináákiwa Naatóyssínaakssini iihtsíʼpoyiwa Iihtsipáítapiiyoʼpa Jehovah: “Kiistówa kitáʼpistotsiiʼpa sspóóhtsi ki ksááhkoyi.” Tsá iihtáʼpistotsima? Niitánistoyiʼtsima ámohka sopówahtsiʼssini niitánistsítsinikatahpi Iihtsipáítapiiyoʼpa “Iiksímsstatooma ksááhkoyi ki Áʼpistotsima, íísopoyáʼpaʼpistotsima, máátsiksisstoyiʼtaʼpistotsima, nóóhkohtáʼpistotsima ááhkiitsitapisskowaʼsissi.”—Isaiah 37:16; 45:18.
Ohpokípisataʼpistotakssini Niitsínihkatooʼpa Cell
10, 11. Máaksskáíʼpisataʼpiiwa ámohka niitsínihkatooʼpi cell?
10 Tsá áakánistsitsinikatayaawa áípaitapiiksi, kítaaʼpistotoayaawa? Kááksskskaʼtsít ohpokípisataʼpistotakssini cell. Ámohka otssináákssini Evolution: A Theory in Crisis, ísspssksinimaʼtsaawa Michael Denton áániiwa: “Ámostsska niitsínaattsiyaawa anní máátomsspikáʼpiiyaawa áʼpistotakssini, bacterial cells, iikómsspikaʼpiiyaawa niitánistáʼpistotsiiʼpiaawa. Ímaksstonnátohpokissaawa ámostsska bacterial cells, . . . saakiáítaʼpómsspikaʼpistotsiiʼpiaawa . . . máátsitstsiiʼpa matápiáʼpistotakssini áístoohkima niitánistómsspikaʼpistotsiiʼpiaawa.”
11 Iihtsíʼpoyiwa ámohka genetic code iitsípsststsiistsi cells: “Máátsitstsiiʼpa matápiáʼpistotakssiistsi áístoohkima niitánistohkottohkanáóhkanstooʼsi niitáakanistsipaitapissi nínaawa ámohka niitsínihkatooʼpa DNA, ííksstonnátssaahkohtssiwa. . . . Máátsikakáístoohkima matápiáʼpistotakssiistsi áakiitsitoʼtsipoʼtsiiʼpa niitánistomsspikaʼpistotsiiʼpi ámohka niitsínihkatooʼpi DNA.”
12. Ámohka ísspssksinimaʼtsaawa tsá áániiwa óhtoʼtstsiihpi ámohka cell?
12 Denton iitsspáítaaniiwa: “Otsstonnátomsspikaʼpissi ámohka cell máátohkottsiksisstoyiʼtsitstsiiwa.” Áaksstsínaiʼtstsiiʼpa iiksímsstatooma ki áʼpistotsima.
Iiksipisátaʼpiiwa Kóʼpinnooni
13, 14. Kóʼpinnooni máakoʼtsítsksipisataʼpiiwa ámohka cell?
13 Ámohka ísspssksinimaʼtsaawa áániiwa: “Iikómsspikaʼpiiwa niʼtókskayi cell nóóhkssawánistomsspikaʼpistotsiiʼpa áípaitapiiksi óʼpoaawayi. Iiksstonnátaakaoyaawa ámostsska nerve cells iitsípsststsiistsi matápioʼpi. Kóʼpinnooni iitstsííwa ámostsska nerve cells niʼtóyi anní ipóʼtsisttapinniiʼpa aʼsipííksi. Matápióʼpi . . . stámiitápsstonnataakaoyaawa ámostsska ipóʼtsisttapinniiʼpistsi.”
14 Denton iitsspáítaaniiwa: “Ímaksikakohtsiʼnaksissitapiioʼsi ipóʼtsisttapinniʼpi iitsípsststsiistsi kóʼpinnooni saakióʼtsitskssokáʼpiiyaawa iihtáíʼpoyoʼpistsi annó ksááhkoyi.” Íítssopówahtsiʼsiwa: “Áaksstaoʼohkottsiksisstoyiʼtaʼpistotsiiʼpiaawa ámostsska ipóʼtsisttapinniiʼpistsi nerve cells?” Saa, sstsínaiʼtstsiiʼpa ikímmapiiyipitsiwa ááhksiksímsstatooʼsi ki ááhkaʼpistotsiʼsi kóʼpinnooni, Áʼpistotookiwa.
15. Stsíkiiksi tsá niitáítsinikatoomiaawa óʼpi?
15 Ísstohkanáísokaʼpssiwa iihtáíkkamssinaakioʼpi máátsikakáístoohkima niitánistáísokaʼpoʼtakihpi matápióʼpi. Ámohka Morton Hunt áísinaakiwa áániiwa: “Kitsíksimsstaaninnooni iitsípsstayinniiʼpi kóʼpinnooni oʼtsítsksstonnátaakaowa máánitstsiistsi ómahkohtáíkkamssinaakioʼpi.” Ámohka Áísokinakiwa Robert J. White áyiistsinitakiwa óʼpi stámiiksístaaniiwa: “Nitsstsínaiʼsapiʼtsiiʼpa otsítstsissi Niitáʼpokakiwa ááhksiksimsstatooʼsi ki ááhkaʼpistotsiʼsi niitáʼpoʼtakssi kitsíksimsstaaninnooni ki kóʼpinnooni—iiksííyikowa nínaawa ááhkotsistapiʼtsiʼsi. . . . Stámohtomaiʼtaki otsítstsissi Okakíítapiwa ááhkomatápaʼtstooʼsi ámostsska.” Ámohka áaksstsínaoʼohkattsikimmapiiyipitsiwa.
Niitánistáípisataʼpoʼtakihpi Aáápani
16-18. (a) Tsá niitóóhkiitsiiwa niitánistáwaawattoohpi aáápani? (b) Tsá anistápiiwa iihtsíístapssksiniiʼpa ámohka?
16 Káákattsskskaʼtsít niitánistáípisataʼpoʼtakihpi aáápani, áwaaniitsikoyiistooma sokáʼpiistsi ki iihtáísiitamioʼpi ki áíitsskaamatooma isttsíístomssiistsi. Niitánistáípisataʼpoʼtakihpi aáápani ámostsska máóhksinaattsiistsi cells, íítsitsinikatooʼpiaawa ámohka sináákssini ABC’S of the Human Body iitssínaiiʼpa: “Iitáʼpohpokiiwa aáápani iitstsííʼpa 250 million máóhksinaattsiistsi cells . . . Koistóminnooni ááhkamáʼpitstsiiʼpa 25 trillion máóhksinaattsiistsi cells, ikkámaaniitohtooʼki áakohkottsitáániitohtooʼpiaawa niisóí iitáwaʼkomootsiiyoʼpi. . . . Ámostsska máóhksinaattsiistsi cells áwaahtsowáʼpistotsiiʼpiaawa kanáókstakioʼki, niitsóyaawa 3 million áwaahtsowohtooʼpistsi.”
17 Niitánistáípisataʼpoʼtakihpi aáápani máttsitstsiiʼpa ksíkksinaattsiistsi cells, iikáttomsspikaʼpistotsiiʼpiaawa, ámohka sináákssini iihtsíʼpoyoʼpi áániiwa: “Niitsítstsiiʼpa máóhksinaattsiwa cell, ksíkksinaattsiistsi cells kanáómiaʼnistsiiyaawa ááhksitáóhkottsiitsskaamatooʼsaawa kanáómiaʼnistsiistsi iihtáyissiniiʼpi koistóminnoonistsi. Ámohka tókskaayi áwaanooksíksistotsimiaawa máátaitáʼpoʼtakiiksi cells. Stsíkiistsi aʼpáístotakiyaawa antibodies iihtáíitsskaamatoomiaawa viruses, áíksikkaʼpistotsimiaawa makáʼpiistsi iitáípsststsiistsi koistóminnooni tsááhtaoʼ oowátoomiaawa bacteria.”
18 Stámiitáʼpipisataʼpiiwa ki ííksspiiwa niitáwaawattoohpi kitsaáápaniiminnooni! Áaksstsínaiʼtstsiiʼpa niitáʼpokakiwa ki ikímmapiiyipitsiwa Áʼpistotookiwa ááhkánistsipoʼtoohtooʼsi ki ááhkanistsskskaʼtsiʼsi niitánistaʼpistotsiiʼpi koistóminnooni.
Stsíkiistsi Pisátaʼpiistsi
19. Tsá niitóóhkiitsiiyaawa moápsspi ki matápiáʼpistotakssiistsi?
19 Máttsitstsiiʼpa stsíkiistsi pisátaʼpiistsi, matapíístomssini. Iihtáísinaakioʼpi máátohkottsitotóísapaʼpistotoawa niitánistómsspikaʼpistotoahpi moápsspi. Ámohka Áísspssammiiksi Kakatóʼsiiksi Robert Jastrow áániiwa: “Moápsspi ááhkamáʼpaʼpistotoawa; máátsitstsiiʼpa aʼpáístotakiiksi iihtáípissapioʼpi ááhkánistssokaʼpistotakssaawa.” Ki sináákiaʼtsisi Popular Photography iitsínikiwa: “Matápii oápsspoaawaiksi oʼtsítskssokaʼpistotoayaawa áísaiksisttoohsiistsi. Moápsspi ohkanáísoksinima otáíssaʼtsiʼpi, iihtáísinaakioʼpi áaksstsínaaʼpaahkioʼtoawa ááhkitohkottssokssinaakioʼsi . . . Iihtáísinaakioʼpi máátsiʼtomanistsiiwa moápsspi. Matápii oápsspoaawayi oʼtsítskssokaʼpistotoayaawa matápiáʼpistotakssiistsi, iihtáíkkamssinaakioʼpi tsááhtaoʼ iihtáísinaakio.”
20. Tsá anistápiiwa matapíístomssini, kitáípisatsiʼtsiiʼpa?
20 Káákattsskskaʼtsit niitómsspikaʼpistotsiiʼpi koistóminnooni, niitáʼpistotootsspi ohkanáísokaʼpoʼtakiyaawa máátáíkakssksiniiʼpa niitánistáípoʼtaʼpoʼtakihpiaawa. Kááksskskaʼtsit kanáómiaʼnistsiistsi óówatooʼpi ki áísimatooʼpi áítapihtsisttaʼpa kóókoaninnoonistsi ki koistóminnoonistsi iitáítapohtssáwaʼpistotsimaistsi ááhkohtsitáíksskamioʼsi. Káákssaakitssapaʼsoyinnakit kanáómiaʼnistsiistsi kitsitáísapaahkiitaahpi kitsínakaʼsiimiiksi kimáátáakohtsipiiyomaahkaahpa! Iiksípisataʼpiiwa áakitsípokaawaʼsiwa aanátaʼpssiwa issitsímaana—áyiikanoyiiwa ónni ki oksísstsi—iitáípokaawaʼsiwa ikáksípiihkssaatoʼsissi. Ki tsá kitánistsíksimsstatawa amá pookááwa ááhkssksiniʼsi ááhkánistaiʼpoyssi ímakómsspikaʼpissi iʼpówahsini?
21. Áakitsskskaʼtsiiʼpa niitánistsípisataʼpistotsiiʼpi koistóminnooni, tsá áwaaniiyaawa áísskskaʼtakiiksi matápii?
21 Áa, áístamiitapiniiyiʼtsiiʼpa niitánistsípisataʼpistotsiiʼpi matapíístomssini. Máátsitstsiiʼpa ísspssksinimaʼtsaawa ááhkohkottsitotoisapaʼpistotakssi. Ámostsska áaksstáóʼohkottsiksisstoyiʼtaʼpistotsiiʼpiaawa? Saa. Áakiitáísskskaʼtsiiʼpa niitánistsípisataʼpistotsiiʼpi matapíístomssini, áísskskaʼtakiiksi matápii áakáániiyaawa niʼtóyi ámohka psalmist: “Kitáakáísstsáákato [Iihtsipáítapiiyoʼpa] tská nitáíniiyiʼtsiiʼpa kitánistssokaʼpistotookihpi. Kitáʼpistotakssiistsi ohkanáísokaʼpiiyaawa.”—Psalm 139:14.
Ísstohkanáísspssiwa Aʼpáístotakiwa
22, 23. (a) Máaksstsínaiʼsapiʼtsiiʼpa otsítstsissi Áʼpistotookiwa? (b) Naatóyssínaakssini tsá niitánistohtsíkamoʼtsitsinikatawa Iihtsipáítapiiyoʼpa?
22 Naatóyssínaakssini iitssínaiiʼpa: “Kanáyaapioyisi ítstsiiʼpa áʼpistotsima, ohkanáíssksiniiʼpa; Iihtsipáítapiiyoʼpa nóóhkohkanaʼpáístotsima ohkániitáístsiistsi.” (Hebrews 3:4, The Jerusalem Bible) Tská náápioyisi máátomsspikáʼpiiwa, nóóhksstsínaiʼtstsiiʼpa áʼpistotsima, niʼtóyi áaksstsínaiʼtstsiiʼpa áʼpistotsima ómsspikáʼpistotsiiʼpi kanáítaistsiistsi sspóóhtsi ki annó ksááhkoyi ki kanáyoohkíítsipaitapiiksi annó ksááhkoyi. Ki tská áísapiʼtsiiʼpa otsítstsissi matápii aʼpáístotakiiksi áípottaiksi, áísaiksisttoiksi, ki iihtáíkkamssinaakioʼpistsi, áaksstáóʼohkottssapiʼtsiiʼpa otsítstsissi ámohka Tókskamma ótohkotahsi matápii óʼpi ááhkitáóhkottaʼpistotakssaawa ámostsska?
23 Naatóyssínaakssini niitsínihkatsiiwa “niitáíkamoʼtaʼpssiwa Iihtsipáítapiiyoʼpa Jehovah, . . . Áʼpistotookiwa áʼpistotsima sspóóhtsi ki ámohka Niʼtóóhkaoʼka Ísstohkanáísspipoyiwa íítohkanáwaaniitohtooma; ámohka Niʼtóóhkaoʼka ohkanáínsstawohtooma ksááhkoyi ki ánnistsi áísaisskiistsi, ámohka Niʼtóóhkaoʼka ííhkotsiiwa siitámssini matápii.” (Isaiah 42:5) Naatóyssínaakssini íkamoʼtsáánistooma: “Kiistówaanakaoʼka kitsíítsitooʼpa, Jehovah, Iihtsipáítapiiyoʼpa, kitááhkáísstsaakakkoohsi ki kitááhkáyiniʼyimmokoohsi ki kitááhkoʼtsiiʼsi isskonátaʼpiiwa, tská kitohkanááʼpaistotsiiʼpiaawa ohkaniitáístsiistsi, ki tská kitsitsííhtatooʼpiaawa ki íítsitstsiiyaawa ki kitsitáʼpistotsiiʼpiaawa.”—Revelation 4:11.
24. Tsá áakánistssksiniiʼpa otsítstsissi Iihtsipáítapiiyoʼpa?
24 Áa, áakohkottssksiniiʼpa otsítstsissi Iihtsipáítapiiyoʼpa káákssaʼtsiiʼki otáʼpistotsiiʼpi. “[Iihtsipáítapiiyoʼpa] otánistápitapiihpi áakohkottohtoʼtomatapiniiʼpa otáʼpistotoahsi matápii, tská iihtáótsistapimmawa [Iihtsipáítapiiyoʼpa] otáʼpistotakssiistsi.”—Romans 1:20.
25, 26. Áakitssawaoʼohtáísoksissitapiioʼpa áʼpistotsiʼpi áaksstaoʼohkottsiistapaakohkiiʼpa otssáyitstsiiʼki áʼpistotsimi?
25 Áakitssawaoʼohtáísoksissitapiioʼpa áʼpistotsiʼpi máátánistapanissina otssáyitstsiiʼkiáʼpistotsimi. Áípottaawa áakohkottohtsíssitapiioʼpa íkkinaaʼpiiwa, áakánoohkattohkottokaʼpissitapiioʼpa, ááhkohtáínniipakksisstakioʼsi. Ááhkohtáyissitapissaawa ááhkohtáíʼnikkssaawa máátánistapanissina otssáyitstsiiʼki áʼpistotsimi.
26 Niʼtóyi, matápii áakiitáókaʼpssiyaawa máátánistapanissina otssáyitstsiiʼki Áʼpistotookiwa, otssáyitstsiiʼki Iihtsipáítapiiyoʼpa. Naatóyssínaakssini íkamoʼtáániiwa: “Kimáátáíppomsskskaʼtakihpoaawa! Áaksstaoʼohkottsiʼtomanistsipoʼtoayaawa amá áʼpistotakiwa kóʼsiksi ki iihtáʼpistotsiʼpi kóʼsiksi paʼksíkahkoyi? Áʼpistotsiiʼpi áaksstaoʼohkottanistsiiwa otáʼpistotooka: ‘Nimáátaʼpistotooka’? Ki ámohka áʼpistotoawa áaksstaoʼohkottanistsiiwa otáʼpistotooka: ‘Máátáótsistapiʼtakiwa’?”—Isaiah 29:16.
27. Máakoʼtsítsikiʼtsiiʼpa Iihtsipáítapiiyoʼpa ááhkoyiʼtsiʼsi iihtáísopówahtsiʼsoʼpi ókohkoyssini?
27 Áʼpistotookiwa ííhtssksinimaʼtsookiwa otokákssi otánistsípisatomsspikaʼpistotsiiʼpi otáʼpistotakssiistsi. Ííhtssksinimaʼtsookiwa otáíkimmokissi otánistaʼpistotsiʼsi ksááhkoyi ááhkiitáóhkottsitayaopaooʼsi, ki otánistssokaʼpistotsiiʼpi koistóminnooni ki kitsíksimstááninnooni, ki ááhkiitáíʼtaamiʼtsiʼsi kanáómiaʼnistssokaʼpiistsi otáʼpistotakssiistsi. Otsstonnátokakssi ki otánistsikímmapiiyipitsissi áakohkottóyiʼtsima ámostsska sopówahtsiʼsiistsi: Iihtsipáítapiiyoʼpa máakáísskaakanistsiʼtsima ááhkitáístsissi ókohkoyssini? Áaksikiiwa ááhkitsikamoʼtohtooʼsi?
[Isínaawa íítohkooniiʼpa sináákssini 5]
Ikímmapiiyipitsiwa Iihtsipaitapiiyoʼpa ííksstonnátsso- káʼpistotsima ksááhkoyi, ááhkiitáóhkottssiitamioʼsi ki ááhkitáóhkottsitayaopaooʼsi
[Isínaawa íítohkooniiʼpa sináákssini 6]
Ksááhkoyi iihpáʼpistotsiiʼpi áákomimmotsiiyssini ááhkiitáísopokiʼtaamipaitapiiyoʼsi
[Isínaawa íítohkooniiʼpa sináákssini 7]
‘Oʼtsítskaakaowa ipóʼtsisttapinniʼpi iitsípsstayinniiʼpi niʼtókskayi óʼpi ohtáíʼpoyoʼpistsi annó ksááhkoyi.’—Ísspssksinimaʼtsaawa
[Isínaawa íítohkooniiʼpa sináákssini 8]
“Moápsspi ááhkamáʼpaʼpistotoawa máátsitstsiiʼpa aʼpáístotakiiksi iihtáípissapioʼpi ááhkánistssokaʼpistotakssaawa.”—Áísspssammiiksi Kakatoʼsiiksi