Íssksinimaʼtstohkssini 9

Niitánistssksiniiʼpa Íítaʼpaissoʼsi “Sakóíksistsikoistsi”

1, 2. Tsá áakanistssksiniiʼpa ikkámikaitoʼtaoʼki sakóíksistsikoistsi?

TSÁ niitánistssksiniiʼpa ánnohk otsitsípaitapiiyoʼsi Iihtsipáítapiiyoʼpa Otokákihtsimaani otsitáákomatapókakihtsimatahsi matápiókakihtsimaani? Tsá níítssksiniiʼpa aakóʼtssataʼpissi Iihtsipáítapiiyoʼpa otsitáakssikáaattsstooʼsi makáʼpiiwa ki ókohkoyssini?

² Jesus Christ otáíssksinimaʼtsaiksi áísstaayaawa ááhkohkoissksiniʼsaawa ámostsska. Íísopowahtsiʼsatsiiyaawa “otáakanistsinakohsi” áíʼtsipoʼtoahsi ááhkokakihtsimatooʼsi Okákihtsimaani ki “otsitáakssikaʼpissi otánistaʼpaisissi ánnohk.” (Matthew 24:3) Jesus niitánistoyiʼtoyiiwaiksi otakákkomaʼpissi otánistaʼpaisissi ki otáíkiaʼpiihpi annó ksááhkoyi ámostsska áakohtáíʼstamattsaayaawa matápiiksi akáítoʼtoohsaawa “sakóíksistsikoistsi” ki “otsitáakssikaʼpissi,” otánistaʼpaisissi ánnohk. (Daniel 11:40; 2 Timothy 3:1) Kítaoʼmáíniiʼpiaawa ámostsska kanáómiaʼnistsiistsi otáakanistsinakohsi ánnohk íssksikíípippoisstoyiimistsi? Áa, akáíitaʼpakáíniiʼpiaawa!

Ómahkawahkáóótsiiyssiistsi Annó Kanáóʼtakssksaahkoyi

3, 4. Tsá níítomanaʼpiiwa Jesus otánistsíkaayissitsinikatooʼsi otáakanistaʼpaisissi awahkáóótsiiyssini ánnohk íssksikíípippoisstoyiimistsi?

³ Jesus iikááyissitsinikiwa “iyóóhkiitsitapii áakáóhkaamatsiiwa mattóóhkiitsitapii ki matápiókakihtsimaani áakáóhkaamatsiiwa mattóóhkiitsitapiókakihtsimaani.” (Matthew 24:7) Otánistoksaahsi 1914 kanáómiaʼnistóóhkiitsitapiiksi íítohkanáítsinssiyaawa awahkáóótsiiyssini ámohka awahkáóótsiiyssini iyóóhkiitsiiwa, niitánistóóhkiitsiiwa stámohkanáítsinssiyaawa iyóóhkiitsitapiiksi ki matápiókakihtsimaanistsi. Iihtáítsinikiiksi ísskoohtsika niitsínihkatoomiaawa Ómahkawahkáóótsiiyssini. Iitotóómanistawahkaootsiiyssini, matóómomahkawahkaootsiiyssini. Íítawahkáóótsiiksi ki matápiiksi iihtsíʼniiksi niitsímmiaawa 20,000,000, piiyóʼtsitskanistsimmiaawa iihtsíʼniiksi míístapsskoohtsika awahkáóótsiiyssiistsi.

⁴ Matóómomahkawahkaootsiiyssini ííhtsskskoiʼpa ááhkohtomatapaʼpissi sakóíksistsikoistsi. Jesus áániiwa ámohka ki stsíkiistsi otáakanistaʼpaisissi “áóʼohtáakomatapaʼpissi ipóínaohkoyssini.” (Matthew 24:8) Íkamoʼtaʼpiiwa otániihpi, oʼtsítskakáítapiyaawa iitsíʼniiksi anníhka Náátoʼkiómahkawahkaootsiiyssini, otawahkáóótsiiksi ki matápiiksi iitsíʼniiksi niitsímmiaawa 50,000,000. Íssksikíípippoisstoyiimistsi, akáóʼtsitskanistsimmiaawa 100,000,000 matápiiksi akáóhtaiʼniiksi awahkáóótsiiyssiistsi, niisóóʼtsitskanistsimmiaawa iihtsíʼniiksi awahkáóótsiiyssini áakiitsskokstakioʼpa 400 ísstoyiistsi! Stámiitapohtsskonátokakihtsimatooʼpa matápiókakihtsimaani!

Stsíkiistsi Áakohtóniiʼpa Sakóíksistsikoistsi

5-7. Tsá anistápiiwa máttsstsikiistsi áakohtssksiniiʼpa otsitáípaitapiiyoʼsi sakóíksistsikoistsi?

⁵ Jesus iitsínohtooma stsíkiistsi áakohtóniiʼpa sakóíksistsikoistsi: “Áakáísskaaʼpohpiʼyiwa ksááhkoyi, áakáómotapitaistsiiʼpa isttsíístomssini ki áakáónnatohsiiwa aoówahsini.” (Luke 21:11) Ámostsska iitsínohtooʼpiaawa otáakanistaʼpaisissi áakohtsítoʼtomatapokstakioʼpa 1914, akáíitaʼpakaitapii iihtáísttsohkoyiiksi ámostsska iihtáípahkohkoyoʼpistsi.

⁶ Akáíitaʼpohtakaiʼniwa matápii otáípsstsikattsstonnataʼpohpiʼyssi ksááhkoyi. Otáíʼksistaʼpissi Matóómomahkawahkaootsiiyssini iitsítstsiiwa ámohka Sspáyiiksistoʼsiisttsiistomssini iihtsíʼniwa matapii 20,000,000 ki tókskammiksi níítsiksímsstaayaawa oʼtsítskanistsimmiaawa 30,000,000 otohtsíʼnssaawa. Ámohka máánattsitstsiiwa makáʼpisttsíístomssini akáíitaʼpattakaitapii iihtsíʼniiksi ki áaksíístapawaakaitapii iihtáíʼniiksi. Kanáísstoyiiwa iikáísstonnatakaitapii matápii iihtáíʼniiksi mósskitsipahpísttsiistomssini, aaníítohkatsisttsiistomssini, ki stsíkiistsi kanáómiaʼnistsisttsiistomssiistsi. Stsíkiiksi iihtáíkkinaiʼniyaawa otáíponiaakssaawa. Ámohka ikááyissitsinikssini iitssínaiiʼpa ‘otsitáakohkitopatooʼsaawa Apocalypse,’ iitómatapohkitopiiyaawa 1914, niitánistoniiʼpa ámohka ikááyissitsinikssini otáakitáístsiiʼsi awahkáóótsiiyssiistsi, otáakonnatohsissi aoówahsini, ki kanáómiaʼnistsisttsiistomssiistsi, ámostsska áakohtakáíʼniyaawa matápiiksi.​—Revelation 6:3-8.

⁷ Jesus mattsíkaayissaniiwa otáakomotapitaistsiiʼsi kanáómiaʼnistssksááhkoistsi sáómmitáʼpiiwa. Áániiwa: “Otsskáóʼmatapaakaohsi sáómmitáʼpiiwa matápii máátáakattawaakomimmotsiiyaawa.”​—Matthew 24:12.

8. Tsá níítomanaʼpiiwa ámohka ikááyissitsinikssini íítohkooniiʼpi 2 Timothy niitánistsskskoiʼpi 3?

⁸ Naatóyssínaakssini máttsitsspáítsikaayissitsinikiwa otáaksstonnátokaʼpissi ánnohk annó ksááhkoyi: “Sakóíksistsikoistsi ííyikoyi áakitstsiiwa annó. Nínaawa áakáwaawattawaakomimmotsimohsiyaawa, áakáwaakomiʼtsimiaawa iihtáóhpommaoʼpi, áakáísstsaakatohsiyaawa, áakáísspihkaʼsiyaawa, áakohtáwaakanakiyaawa otsíʼpowahsoaayi, máátáakanistaiʼtoyiiyaawa ónnoaawaiksi ki oksísstoaawaiksi, máátáakainiiyiʼtakiyaawa, máátáakaisstakaanaʼpssiyaawa, máátáakaikimmotsiiyiyaawa, máátáakaisapistototsiiyiyaawa, áakáókanistsiiyaawa matápii, máátáakayiitsiihtaayaawa, áakáísstonnatsskaʼsiyaawa, máátáakawaakomiʼtsimiaawa sokáʼpiiwa, áakáísimimmotsiiyiyaawa, áakááwattaʼpaissiyaawa, áakohtáíkohpattsoyiiyaawa otáísspihkaʼssaawa, máátáakawaakomimmiiyaawa Iihtsipáítapiiyoʼpa áaksstáánawaakomiʼtsimiaawa ááhkáíʼtaamaʼpsssaawa, áíkippaaʼnistsskaʼsiyaawa otáíksoʼkowammahsaawa Iihtsipáítapiiyoʼpa nóóhkohtáwáʼpimmiiyaawa otánistaʼpaisssaawa. . . Makáʼpinnaiksi ki iyóómokitapiiksi áaksikáyiistapáókaʼpssiyaawa.” (2 Timothy 3:1-13) Ámostsska akáóhkananistaʼsiyaawa, akáóhkanainiiʼpiaawa.

Máttsstsikiyi Iihtáókohkoyoʼpa

9. Ííkiaʼpiiwa sspóóhtsi otómatapaʼpissi sakóíksistsikoistsi annó ksááhkoyi?

⁹ Iitómatapaʼpiiwa íssksikíípippoisstoyiimistsi ámohka máttsskaaʼkaoyi iihtáókohkoyoʼpi. Iitómatapaʼpiiwa sakóíksistsikoistsi 1914, ánnikaaki kanáítapii iitsítsspiipoʼtoawa iitáʼpiʼsskaanaʼpiiwa. Ánnikaaki ámohka ikááyissitsinikssini íítohkooniiʼpi ístsistsaiʼsinaakssini anní Naatóyssínaakssini iitssínaiiʼpa: “Iitsítstsiiʼpa awahkáóótsiiyssini sspóóhtsi: Michael [Christ iihtóʼtokakihtsimaawa sspóóhtsi] ki otáátoyítapiimiksi iitawahkáóótsiimiiyaawa annáhka sstonnátaʼpssiwa ómahkáámsskiiwa [Makáʼpatoʼsiwa], ki ámohka sstonnátaʼpssiwa ómahkáámsskiiwa ki otokáʼpatoʼsiimiksi [ánniksska makáʼpatoʼsiiksi] awahkáóótsiimiiwaiksi nóóhkssawomoʼtsaakiyaawa, ki máátattsitohkóópiiyaawa sspóóhtsi. Ámohka sstonnátaʼpssiwa ómahkáámsskiiwa íítohtsínnipiksoʼpa, ánnahka matóómipiksííksiinaawa, ánnahka niitsínihkatawa Makáʼpatoʼsiwa sáyiipitsiitapiwa ki Kaahtomáána, ánnahkaoʼka áípahtsiipiyiiwa iitayáópiiksi kanáóʼtakssksaahkoyi; ámohka iitápinnáápiksistawa ksááhkoyi, ki ámoksska otokáʼpatoʼsiimiksi ííhpokinnáápiksistayaawa.”​—Revelation 12:7-9.

10, 11. Tsá niitánistohtsíssinayaawa matápii Makáʼpatoʼsiwa ki otokáʼpatoʼsiimiksi otáíʼtapinnaapiksistahsaawa ksááhkoyi?

¹⁰ Tsá niitánistohtsíssinayaawa matápii? Mattsítsspáítssinaiiʼpa ámohka ikááyissitsinikssini: “Áaksskaaʼpiiwa ksááhkoyi ki ómahksíkimiyi, tská Makáʼpatoʼsiwa akáítapiksisapoowa, ííksstonnátokiʼtakiwa, íssksinima otssawattáaksisamiitaʼpaisssi.” Áa, Makáʼpatoʼsiwa íssksinima otokákihtsimaani áakáakssikaʼpissi, stámohtsíístapaiiyikaʼkimaawa ááhkáwaattsiistotoahsi matápii ááhkitssawattáíksoʼkowammahsaawa Iihtsipáítapiiyoʼpa otsítsaomáwaanooksiksistotoahpi ki otsítsaomáwaanooksiksistotsiʼpi otokákihtsimaani. (Revelation 12:12; 20:1-3) Ótohtokáʼpissitapiissaawa otááwattsitsííhtaanoaawa ámoksska makáʼpatoʼsiiksi stámohtsíítaʼpokaʼpatoʼsiyaawa! Stámiitaʼpohtokaʼpiiwa annó ksááhkoyi otáókakihtsimahsaawa, iitsíítaʼpomatapokaʼpiiwa 1914!

¹¹ Káátaniiwa Jesus otáóʼohtsíkaayissitsinikssi ánnohk: “Otáakitstsissi otáíniiʼpoaawayi ohtáísskiʼtstaahpiaawa ki áakohtoʼtáísstonnatsaapiyaawa sspóóhtsi.”​—Luke 21:11.

Áakoʼtssátaʼpiiwa Otsitáakssikaʼpissi Matápiókakihtsimaani ki Makáʼpatoʼsókakihtsimaani

12. Otsítsaomáwaanooksiksistotsiʼsi otánistaʼpaisissi ánnohk tsá niʼtókskaawa áakánistsiiwa iikááyissítsinikssini?

¹² Tsá niitsóyaawa máátomaanistaʼsiwa Naatóyssínaakiikaayissitsinikssiistsi Iihtsipáítapiiyoʼpa otsítsaomáwaanooksiksistotsiʼsi otánistaʼpaisissi ánnohk? Iitáʼponnatohsiiyaawa! Ámohka tókskaayi íítohkooniiʼpa 1 Thessalonians 5:3, iitssínaiiʼpa: “Áíʼsaakióhtaiʼpoyisaawa íkkinaaʼpiiwa ki íkamotaahpihkaani, áaksskitsíkkamoʼtaanooksiksistotoayaawa.”(The New English Bible) Stámohtsínakowa “áíʼsaakióhtaiʼpoyisaawa” áakitssikaʼpiiwa otánistaʼpaisissi ánnohk. Máátáínimiaawa ki máátáyiinapiʼtakiyaawa matápii otáakáánooksiksistotoahsaawa, stámsskáísstaanoʼtsitsikiʼtsimiaawa otáakanistááwattsitsipoʼtsiʼsaawa íkkinaaʼpiiwa ki íkamotaahpihkaani.

13, 14. Jesus tsá niitánistsikaayissítsinikatooma ámohka iitáʼpáʼsokaʼpiiwa, ki tsá áakanistssikaʼpiiwa?

¹³ Makáʼpatoʼsiwa otánistáókakihtsimatooʼsi annó ksááhkoyi áakáakssikaʼpiiwa. Áakitssikaʼpiiwa áíiʼtaʼpáʼsokaʼpissi annó Jesus áániiwa: “Kiánnikaaki áakiitsítstsiiʼpa ísskáíʼpoinaohkoyssini máátomáíkakanistsipoinaohkoyiwa matápii annó, saa, máátáakattonawaanistaʼpiiwa.”​—Matthew 24:21.

¹⁴ Iitáʼpsspiiwatooʼki “ísskáíʼpoinaohkoyssini” áakiitsítstsiiwa Iihtsipáítapiiyoʼpa otáwahkáóótsiiyssini niitsínihkatooʼpa Armageddon. Akááyissítsinikiwa Daniel iihtsíʼpoyiwa ámohka otááʼnissi Iihtsipáítapiiyoʼpa “otsitáakssáóppisskoahsi ki otsitáakssikáaattsstooʼsi ámostsska okákihtsimaanistsi.” Ámohka anistápanissini áakohkanáíssikaʼpiiyaawa matapiókakihtsimaanistsi ánniksska máátáísstakatsiiksi Iihtsipáítapiiyoʼpa. Sspóóhtsi áakohtoʼtáókakihtsimatsiiwa otánistaʼpaisssaawa kanáítapii annó ksááhkoyi. Daniel ikááyissániiwa, okákihtsimaani “máátáakattonawaohkotawa matápii.”​—Daniel 2:44; Revelation 16:14-16.

15. Áaksikííhtsiiʼpa Makáʼpatoʼsiwa ki otokáʼpatoʼsiimiksi otokákihtsimaanoaawa?

¹⁵ Ánnikaaki Makáʼpatoʼsiwa ki otokáʼpatoʼsiimiksi máátáakattohkottokakihtsimaayaawa. Ámoksska makáʼpatoʼsiiksi aʼpímmiiksi Iihtsipáítapiiyoʼpa áakanistaʼpípoʼtoayaawa “ááhkitssawáítaipahtsiipiahsaawa kanáítapiiksi.” (Revelation 12:9; 20:1-3) Okákihtsimatayaawa ááhksiʼnssaawa ki áyoohkimaayaawa otsitáakáánooksiksistotoahpiaawa. Áakiitohtssokímmohsiyaawa matápii áóʼohtsípoʼtoahsaawa makáʼpatoʼsókakihtsimaani!

Takáá Áaksikamotaawa? Takáá Máátáaksikamotaawa?

16-18. Takáá áakohtsíkamotsiipiayaawa áíʼssikaʼpissi otánistaʼpaisissi ánnohk, ki takáá máátáakohtsikamotsiipiaayaawa?

¹⁶ Iihtsipáítapiiyoʼpa okákihtsimatooʼsi annó ksááhkoyi, takáá áaksikamotaawa? Takáá máátáaksikamotaawa? Naatóyssínaakssini áíʼstamattstohkiwa ánniksska áítapssiiksi Iihtsipáítapiiyoʼpa otokákihtsimaani áakáísskskammayaawa ki áaksikamotaayaawa. Ánniksska máátaitapssiiksi Iihtsipáítapiiyoʼpa otokákihtsimaani máátáakaisskskammayaawa ki áakanóóhkohpokaanooksiksistotoayaawa Makáʼpatoʼsiwa ki otáókakihtsimatooʼpi.

¹⁷ Proverbs 2:21, 22 iitssínaiiʼpa: “Ámoksska íkamoʼtsitapiiksi [ánniksska áísapiʼtsimiksi Iihtsipáítapiiyoʼpa otokákihtsimaani] áakiitáyaopiiyaawa annó ksááhkoyi, ki ánniksska máátohkaaniaʼsiyaawa áakomáánistsitaʼpaissiyaawa. Ánniksska makáʼpitapiiksi [ánniksska máátaitapssiiksi Iihtsipáítapiiyoʼpa otokákihtsimaani], áakohtsíkahksinoʼtoayaawa annó ksááhkoyi, ki máátsstakaanaʼpssiiksi áakohtsíkahksinoʼtoayaawa.”

¹⁸ Psalm 37:10, 11 máttsitssinaiiʼpa: “Máátaitsisamowa, makáʼpitapiiksi máátáakattsitsitaʼpaissiyaawa . . . Íkkinaaʼpitapiiksi áakánoohksinaanatoomiaawa ksááhkoyi, ki áaksstamiitáʼpiʼtaamiʼtsimiaawa otsstonnátsikkinaaʼpissi.” Naatóyssínaakssini 29 máttsitsspaitssinaiiʼpa: “Íkamoʼtsitapiiksi áaksináánatoomiaawa ksááhkoyi, ki áakomáánistsitaipaitapiiyaawa.”

19. Tsá anistápiiwa okakííʼpowahsini áakóóhkohtsissinotsspa?

¹⁹ Áaksstámohtsissinotsspa ámohka okakííʼpowahsini íítohkooniiʼpa Psalm 37:34, iitssínaiiʼpa: “Áísstakatsis Jehovah ki aanistáiʼtsit otáániihpi, ki kitáakohtsitsiniʼstotooka kitááhkoʼtsiʼsi ksááhkoyi. Makáʼpitapiiksi áóʼohtsikahksinoʼtoahsaawa, kitáaksiniiʼpa.” Naatóyssínaakssiistsi 37 ki 38 iitssínaiiʼpa: “Áíssammis ámohka máátohkaaniaʼsiwa ki kaakáíssammis ámohka íkamoʼtsitapiwa, ámohka nínaawa áaksíkkinaaʼpiiwa otsípaitapiiyssini. Áípahtsaʼpssiiksi áakánoohkaanooksiksistotoayaawa; makáʼpitapiiksi otsípaitapissoaawayi áaksíkahksiniiʼpiaawa.”

20. Máakohkottaniioʼpa otáóksistsiʼtsiʼsi kitsipáítapiiyssinnooni ánnohk?

²⁰ Ííkohtáwaapiiwaaniiʼtakioʼpa, áa, ííkohtáóksisstssiiʼtakioʼpa áíʼssksiniiʼki Iihtsipáítapiiyoʼpa otsíítaʼpohtáíkissi kiistónnoona ki máátáítsisamowa otsitáakohkanáíssikaaattsstooʼsi makáʼpiiwa ki ókohkoyssini! Ííkohtáóksisstssiiʼtakioʼpa áíʼssksiniiʼki otáakohkanáánistaʼsisaawa ámostsska sokáʼpiistsi ikááyissitsinikssiistsi, áakoʼtssátaʼpiiwa otsitáakanistsisaawa!

[Isínaawa íítohkooniiʼpa sináákssini 20]

Anní Naatóyssínaakssini ikááyissítsinikatooma “otáakanistsinakohsi” sakóíksistsikoistsi ki otáakánistaʼpaisissi ánnikaaki

[Isínaawa íítohkooniiʼpa sináákssini 22]

Máátáakaitsisamowa áóʼtstsissi Armageddon, ánniksska máátaitapssiiksi Iihtsipáítapiiyoʼpa otokákihtsimaani áakohtsíkahksinoʼtoayaawa ksááhkoyi. Ánniksska áítapssiiksi Iihtsipáítapiiyoʼpa otokákihtsimaani áakiitapíkamotsii piaayaawa anníhka maanííkamoʼtssksááhkoyi