Áíkiaʼpiiwa Áíʼnioʼki?

Áíʼnioʼki máátattáípaitapiiyoʼpa. Iʼnssíni niʼtóyi amá matápii áakitsskaoʼmaoʼkaawa. (John 11:11-14) Amá iʼníwa máátattáyoohtsimiwa, máátattáyaapiwa, máátattáíʼpoyiwa, ki máátattáíksimsstaawa. (Ecclesiastes 9:5, 10) Áístotsimiksi sáyiipitsáátsimoyihkaani áíssksinimáʼtstohkiyaawa amá matápii áíʼnisi iitáíksisstaʼpssiyaawa iitáítapooyaawa ííkaayiistapiʼniiksi otsítapíímoaawaiksi. Ámohka omáíʼtakssini máátanistssksínimaʼtstohkiiʼpa anní Naatóyssínaakssini.

Matápiiksi akáíʼniiksi máátáakohkottsspom­mooki­yaawa, ki máátáakóhkot­taaka­noki­yaawa. Itstsííʼpa matápii ohkanáátsiiksi iʼnííksi ki itáíkkitstoomoyiiyaawa amá iʼníwa, niitáómaiʼtakiyaawa otáakssapistotoahsaawa. Ámohka omáíʼtakssini Makáʼpatoʼsiwa otssáyiipitsíítsinikssini, Iihtsipáítapiiyoʼpa ámostsska máátáyaahsiʼtsima. Máátáakohkotts­sapisto­toawa amá iʼníwa máátáítsipaitapiiyaawa. Máátáakaisstsinaiʼsstonnoawa tsááhtaoʼ ááhkáítapaatsimoyihkaoʼsi amá iʼníwa. Niʼtsítapiwa Iihtsipáítapiiyoʼpa ánnayi áakáítapaatsimoyihkaoʼpa.​—Matthew 4:10.

Iʼnííksi áakssksípaitapiiyaawa. Jehovah íssoohtsika áaksiksikííniiwa iʼnííksi áakitssksípaitapiiwaʼsiyaawa annó ksááhkoyi áíʼsskanistaʼpiisi matsowáʼpiʼnssimaani. (John 5:28, 29; Acts 24:15) Iihtsipáítapiiyoʼpa áakohkottsiksikííniiwa iʼnííksi niʼtóyi kiistówa ikkamáaksiksikíínainiki amá áyoʼkaawa.​—Mark 5:22, 23, 41, 42.

Iikakáítapii matápii iitáómáíʼtakiyaawa áísaakipaitapiiyioʼsi áíʼnioʼki ámohka omáíʼtakssini ííhtoʼtstsiiwa Makáʼpatoʼsiwa otssáyiipitsíítsinikssiistsi. Makáʼpatoʼsiwa ki otokáʼpatoʼsiimiksi áwaattsiistotoyiiyaawa matápii ááhkanistáíksimsstaahsaawa amá iʼníwa otsáákiipaitapissi ki otsitáíhtakssaawa isttsíístomssini ki ipiwáʼpiiwa. Makáʼpatoʼsiwa máttohtawááttsiistotoyiiwa matápii ááhkáíkkitsaapssaawa ki paapáóʼkaani. Jehovah áíponiksoʼkowammiiwa áíssaakssitsípssatsiiksi akáíʼniiksi.​—Deuteronomy 18:10-12.