Máakomáánis­tawak­kaa­mai­niki Kitákkaama, Kitáakáí­sstsinaiʼ­sok­sisto­toawa, Kitáakitomáánis­tawak­kaa­motsii­mawa

Áwakkaamotsiiyssini ííhtoʼtstsiiwa áákomimmotsiiyssini. Áyiistapakáíssksinoainiki Jehovah, kitáaksíístapawaakomimmawa. Áyiistapáwaakomimmainiki Iihtsipáítapiiyoʼpa, kitáakiitsíítaʼpsstaa kitááhkanistaiʼtoahsi ki kitááhkitsinsssi Jesus Christ otáíssksinimáʼtsaiksi. (Matthew 28:19) Aʼyáítsinaʼpaissiniki Jehovah Otátohkáʼtohtaaniksi, kitáákitomaanistaiʼtaamawakkaamawa Iihtsipáítapiiyoʼpa. Tsá kitáaksikiihpa kitááhkitsitooʼsi?

Kitáakánistaiʼstamattsaawa Iihtsipáítapiiyoʼpa kitáwaakomimmahsi íkkamanistáíʼtsimmiiniki otokákihtsimaanistsi. “Ááhkáwaakomimmahsi Iihtsipáítapiiyoʼpa anistápanissina, áakanistaiʼtsiiʼpiaawa otokákihtsimaanistsi; ki máátáakaomsspikiʼtsiiʼpiaawa.”​—1 John 5:3.

Óóhkohtáísapoot kitáíssksinimaʼtsookooyi. Jesus ííhtsitsinikiwa ááhkanistáísapaatooʼsi áíssksinimáʼtsootsspi. Jesus áániiwa ámohka nínaawa iikókakiwa íítohkitaʼpistotsima ookóówani óóhkotoki, ki amá sóótokiaawattsaʼpssiwa íítohkitaʼpistotsima ookóówani spátsikóyi. Iitóʼtonooksiksístsikowa, anní náápioyisi íítohkitaʼpistotsiiʼpi óóhkotoki máátohkoikiiwa, ki anní náápioyisi íítohkitaʼpistotsiiʼpi spátsikóyi stámssikkohpiʼyiwa. Jesus áániiwa áyisstsiiwatoomiksi ki áísapaatoomiksi otssksínimáʼtstohkssiistsi áakiʼtománistsiiyaawa ánnahka okákiwa nínaawa íítohkitaʼpistotsima ookóówani óóhkotoki. Máttaaniiwa máátáyisstsiiwatoomiksi ki máátáísapaatoomiksi otssksínimáʼtstohkssiistsi áakiʼtománistsiiyaawa ánnahka sóótokiaawattsaʼpssiwa nínaawa íítohkitaʼpistotsima ookóówani spátsikóyi. Tsá kítsstaahpa kitááhkitotóísapitapiiyihpi?​—Matthew 7:24-27.

Ááhkoomohssini. Anistápanissina kitááhkohtátsimoyihkahsi kitááhkomaanistáísapaatooʼsi Jehovah otsitsííhtaanistsi. Kitáakomiiksistsitsinssi Jesus Christ otáíssksinimáʼtsaiksi, aʼyáísapaatoommiiniki Iihtsipáítapiiyoʼpa otsitsííhtaanistsi.​—Matthew 11:29.

Isttáʼpinakssini. “Kitáaksstámisttaʼpinokoo ki issíínit kitsípahtsaʼpssiistsi aʼyáínihkatsimatoommiiniki otsínihkaʼsimi.”​—Acts 22:16.

Stámssopoksistotsit kitááhkaʼpoʼtomoahsi Iihtsipáítapiiyoʼpa. “Aʼyááʼpoʼtakiiniki, mínanistáʼpoʼtakit kitáʼpoʼtomoahsi nínaawa, áístamssopokaʼpoʼtakit anní kitáʼpoʼtomoahsi Jehovah.”​—Colossians 3:23.