Tsá Anistápiiwa Iʼtáámitsinikssiistsi?

1. Tsá anistápiiwa Iihtsipáítapiiyoʼpa otsítsinikssiistsi?

Iihtsipáítapiiyoʼpa áísstatsiiwa matápii ááhkitáíʼtaami­paitapiiys­saawa annó ksááhkoyi. Otáwaakomimmahsi matápii iihtáʼpistotsima ksááhkoyi ki ohkaniitáístsiistsi. Máátáttsisamowa áakáakohtooma annó ksááhkoyi ááhkitsitáóhkottsiʼtaami­paitapiiys­saawa matápii. Áakohtsípoʼtoyiiwaiksi matápii otohtáókohkoyihpiaawa.​—Okstóót Jeremiah 29:11.

Matápiokákihtsimaanistsi máátomaikákohkottsssikáaat­sstoo­miaawa satáʼpiiwa, isttsíístomssini, tsááhtaoʼ iʼnssíni. Noohkítstsiiʼpa iʼtáámitsinikssiistsi. Máátáttsisamowa Iihtsipáítapiiyoʼpa áakanistápipoʼtsima matápiokákihtsimaanistsi ki áakitsstaanitáakohtooma otokákihtsimaani. Ánnikaaki otáókakihtsimataiksi áakáíʼtaamiʼtsimiaawa ááhkssawáísttsiistomssaawa ki otáakanistsíkkinaaʼpissi.​—Okstóót Isaiah 25:8; 33:24; Daniel 2:44.

2. Máakonaʼpiiwa ááhkohkóíssksiniʼsi ámostsska iʼtáámitsinikssiistsi?

Iihtáókohkoyoʼpi áakitamítsssikaʼpiiwa Iihtsipáítapiiyoʼpa áóʼohtsiksikkáʼpistotsiʼsi makáʼpitapii annó ksááhkoyi. (Zephaniah 2:3) Tsá anistsíísi ámohka áakiitánistsiiwa? Iihtsipáítapiiyoʼpa Otsiʼpówahsini iihtsíkayissitsinikatooʼpa otáakanistáókohkoyssaawa matápii ánnohk. Otánistaʼpaisissi ánnohk iihtsíístapssksiniiʼpa áakoʼtssátaʼpiiwa Iihtsipáítapiiyoʼpa otsitáakomatapókakihtsimahsi.​—Okstóót 2 Timothy 3:1-5.

3. Tsá anistápiiwa áaksikioʼpa?

Áaksstámohtssksinimaʼtsootsspa Iihtsipáítapiiyoʼpa niitánistsítsinikitahpi Otsiʼpówahsini, Naatóyssínaakssini. Áákomimmapiiyipitsiwa Iihtsipáítapiiyoʼpa, otsiʼpówahsini iisínaimokiwa. Naatóyssínaakssini iihtáwaiʼstamáttsootsspa ááhkanistáísoksipaitapiiyoʼsi ánnohk ki áakanistáóhkottomanistáípaitapiiyoʼsi íssoohtsika annó ksááhkoyi. Niitsííwa, áakitstsiiʼpa máátáakáyaahsiʼtsima kitááhkáísspommookoohsi kitááhkáótsistapiʼtsiʼsi Naatóyssínaakssini. Noohkssawomáímmohsit omanistáókakisskskaʼtsit Naatóyssínaakssini, áakiʼtáámaʼpiiwa íssoohtsika.​—Okstóót Proverbs 29:25; Revelation 14:6, 7.