ISSKSINIMÁʼTSTOHKSSINI 8
Iihtsipáítapiiyoʼpa Máakáísskáakanistsiʼtsima Ááhkiitáístsissi Makáʼpiiwa ki Ókohkoyssini?
1. Tsá niitómatapaʼpiiwa makáʼpiiwa?
Iihtsipáítapiiyoʼpa ikippáísskáakanistsiʼtoyiiwa matápii ááhkaawattáókakihtsimatohsaawa, iihtsíístapaiʼstamáttstohkiiʼpa matápiokákihtsimaanistsi máátáóhkottsssikáaattsstoomiaawa ohtáókohkoyihpiaawa
Makáʼpiiwa iitómatapítstsiiwa ksááhkoyi Makáʼpatoʼsiwa ototóómssayssi. Makáʼpatoʼsiwa iitóómanistápssiwa ikámoʼtaʼpssiwa naatoyítapiwa, “noohkssayitsííyiipoyiwa ikámoʼtaʼpiiwa.” (John 8:44) Iitápitsííhtaawa matápii ááhkáítapaatsimoyihkaahsaawa ostóyi noohkssáyitsitooma, Iihtsipáítapiiyoʼpa niʼtsítapiwa áakáítapaatsimoyihkaoʼpa. Makáʼpatoʼsiwa iisáyisskahtoyiiwáyi matóómaakiiwa, Eve, ki iitssapohkínniiwáyi ááhkaanistsiʼtoahsáyi ostóyi ki ááhkitssawáttaanistaiʼtoahsi Iihtsipáítapiiyoʼpa. Adam iitsitápssiwa Eve máátohkattsítaanistsiʼtoyiiwa Iihtsipáítapiiyoʼpa. Adam otánistokákihtsimaahpi iihtsíístapitstsiiʼpa ókohkoyssini ki iʼnssíni.—Okstóót Genesis 3:1-6, 19.
Makáʼpatoʼsiwa otáánistahsi Eve ááhkssawáttaanistaiʼtoahsi Iihtsipáítapiiyoʼpa, iihtómatapáʼtstooma ááhkaʼpiʼtsiʼsi Iihtsipáítapiiyoʼpa otokákihtsimaani tsááhtaoʼ otánistsípoyssi otsísstohkanáísspipoyssi. Sstónnatakáítapiiksi ohkáttsitápssiyaawa Makáʼpatoʼsiwa ááhkohkáttaʼpiʼtsiʼsaawa Iihtsipáítapiiyoʼpa otokákihtsimaani. Makáʼpatoʼsiwa káátanistsítsinikatawa “áókakihtsimatooma ksááhkoyi.”—Okstóót John 14:30; 1 John 5:19.
2. Iihtsipáítapiiyoʼpa otáʼpistotakssiistsi áaksstáíʼtohkottohkaanioʼpa?
Iihtsipáítapiiyoʼpa iihkanáíkamoʼtáʼpistotsima otáʼpistotakssiistsi. Iihtsipáítapiiyoʼpa iihpáʼpistotoyiiwaiksi matápiiksi ki naatoyítapiiksi ááhkohkottáíkamoʼtaanistsiʼtoahsaawa Iihtsipáítapiiyoʼpa. (Deuteronomy 32:4, 5) Iihtsipáítapiiyoʼpa iihpáʼpistotookiwa ááhkaawattsítsiihtatooʼsi áaksikioʼpi, ikkamáakáístotsiiʼki sokáʼpiiwa tsááhtaoʼ makáʼpiiwa. Ááwattsitsííhtaani iihtáóhkottaiʼstamáttstohkioʼpa otáwaakomimmahsi Iihtsipáítapiiyoʼpa.—Okstóót James 1:13-15; 1 John 5:3.
3. Iihtsipáítapiiyoʼpa máakssaakiáísskáakanistsiʼtsima ááhkiitáístsissi ókohkoyssini?
Jehovah iikippáísskáakanistsiʼtsima ááhkiitáístsiiʼsi matápii áwaʼpiʼtsimiksi otokákihtsimaani. Máakáísskáakanistsiʼtsima? Iihtáísskáakanistsiʼtsima ááhkitohtaiʼstamáttstohkssi matápii otssawáóhkottaawattáókakihtsimatohsaawa. (Ecclesiastes 7:29; 8:9) Áakitáísskáísskskaʼtsiiʼpa 6,000 ísstoyiimistsi stámiʼtóóhkainakowa matápii máátáóhkottsssikáaattsstoomiaawa awahkáóótsiiyssini, sáómmitáʼpiiwa, iyóómokokákihtsimaani, tsááhtaoʼ isttsíístomssini.—Okstóót Jeremiah 10:23; Romans 9:17.
Noohkssawáánistsiiwa Iihtsipáítapiiyoʼpa otokákihtsimaani, matápii áakitaanistáíʼtsimiaawa otokákihtsimaani áakohtáísoksipaitapiiyaawa. (Isaiah 48:17, 18) Máátáttsisamowa Iihtsipáítapiiyoʼpa áakitsssikáattsstooma matápiokákihtsimaanistsi. Matápii áítapssiiksi Iihtsipáítapiiyoʼpa otokákihtsimaani áakitayáópiiyaawa ksááhkoyi.—Isaiah 11:9.—Okstóót Daniel 2:44.
Issáʼtsit áísaiksisttoohsini Iihtsipáítapiiyoʼpa Máakáísskáakanistsiʼtsima Ááhkiitáístsissi Ókohkoyssini?
4. Tsá anistápiiwa áakohkottsíkioʼpa Iihtsipáítapiiyoʼpa otssaakiáípoyísskihtsiʼsi otánistaʼpaisissi ánnohk?
Makáʼpatoʼsiwa áwaaniiwa máátsitstsiiʼpa iihtáʼpoʼtomoyiiwa Jehovah niitáʼpáákommotsiiyssini. Kitáaksstaiʼstamáttstohkiiʼpa otáísayssi? Kitáakohkottaiʼstamáttstohkiiʼpa! Iihtsipáítapiiyoʼpa otáípoyísskihtsiʼsi otánistaʼpaisissi ánnohk áakohkottohtaiʼstamáttstohkioʼpa ikkamáítapssoʼki Iihtsipáítapiiyoʼpa otokákihtsimaani tsááhtaoʼ matápiokákihtsimaani. Niitáípaitapiiyoʼpi áakohtaiʼstamáttstohkioʼpa takáá áítapssoʼpa.—Okstóót Job 1:8-12; Proverbs 27:11.
5. Tsá áakánistohkottohsííhkatawa Iihtsipáítapiiyoʼpa ááhkáókakihtsimakkissi?
Niitáípaitapiiyoʼpa iihtáíssksiniiʼpa ikkamáísstatahki Iihtsipáítapiiyoʼpa ááhkáókakihtsimakkissi
Áakohkottohsííhkatawa Iihtsipáítapiiyoʼpa ááhkáókakihtsimakkissi ikkamáʼpaisskiiʼki ki ikkamáístotsiiʼki ikamoʼtáátsimoyihkaani niitánistsitssínaiiʼpi Iihtsipáítapiiyoʼpa otsiʼpówahsini, Naatóyssínaakssini. (John 4:23) Áakohkottssawáítapssoʼpa Makáʼpatoʼsiwa ááhkáókakihtsimakkissi ikkamáyiimatahki Jesus, niʼtóyi máátaakáítsinssoʼpa matápiokákihtsimaanistsi ki awahkáóótsiiyssini.—Okstóót John 17:14.
Makáʼpatoʼsiwa iihtáyissitapiiwa makáʼpiiwa ki iihtáwaakánotsspi. Áakitáóhsáaatooʼpiaawa ámostsska, tókskammiksi kitákkaaminnooniksi ki kíksoʼkowamminnooniksi ááhkamaʼpáíkkahsitapimmokiyaawa tsááhtaoʼ ááhkamaʼpáóhkaamakkiyaawa. (1 Peter 4:3, 4) Áaksikioʼpa. Áaksstaʼyáíksoʼkowammayaawa matápiiksi áwaakomimmiiksi Iihtsipáítapiiyoʼpa? Áaksstaaʼnistáíʼtsiiʼpiaawa otokákiokakihtsimaanistsi ki okákihtsimaanistsi iihtóʼtstsiistsi otákomimmapiiyipitsiiyssini? Ikkamáánistaiʼtoahki ááhkohtaiʼstamáttstohkioʼpa Makáʼpatoʼsiwa otáísayssi otáánissi matápii otáakáwaʼpimmahsaawa Iihtsipáítapiiyoʼpa áakitáíiyikiʼtakiyaawa.—Okstóót 1 Corinthians 6:9, 10; 15:33.
Iihtsipáítapiiyoʼpa otáwaakomimmahsi matápii iihtssksíniiʼpa otáaksssikaʼpissi makáʼpiiwa ki ókohkoyssini. Ámoksska iitáómaiʼtakiiksi ámostsska áakomanistsitáíʼtaamipaitapiiyaawa ksááhkoyi.—Okstóót John 3:16.