Tsá Áakánistohkottsiʼtaam­aʼpaissi­yaawa Kitsita­píím­iksi?

1. Máakohtáíʼtaamaʼpaissiyaawa ááhkaatowáʼpistotoahsaawa matápii áísstaiksi ááhkáóhpokaopiimotsiiyssaawa?

Iʼtáámitsinikssiistsi iihtóʼtstsiiyaawa Jehovah, iʼtáámitapiiwa Iihtsipáítapiiyoʼpa, áísstatsiiwa iikóʼsiiksi ááhkáíʼtaamaʼpaissaawa. (1 Timothy 1:11) Omatapáʼtstooma ááhkáwaatowaʼpistotoahsaawa matápii. Áaksstsinaiʼsináákiaʼtskahtoomiaawa matápii áakitaatowáʼpistotoayaawa, iihtáísoksistawátsiiyaawa ókoʼsoaawayi. Iitáómaiʼtakiiksi Jesus Christ áakóóhkaanistaiʼtsimiaawa okákihtsimaani ááhkáísinaakiaʼtskahtooʼsi amá matápii áakitáakaatowaʼpistotoawa.​—Okstóót Luke 2:1, 4, 5.

Iihtsipáítapiiyoʼpa tsá niitáíssammiiwa áátowaʼpistotoaiksi? Jehovah áísstatsiiwaiksi nínaawa ki aakííwa ááhkomanistáóhpokaopiimotsiiyssaawa, ááhkssawáípsstsiksistotootsiiyssaawa. (Hebrews 13:4) Iikáíkaiʼtsima áakitawayákiitóoyaawa áátowaʼpistotoaiksi. (Malachi 2:16) Noohkáísskáakanistsiʼtoyiiwa Iitáómaiʼtakiiksi Jesus Christ ááhkáwayákiitoohsaawa ikkamítstsiiʼki ipsstsíkaʼpssiwa ki áakohkottáttsistaaʼtowaʼpistotoayaawa.​—Okstóót Matthew 19:3-6, 9.

2. Iyóomiiksi ki ohkíímiiksi tsá áakanistáístotootsiiyiyaawa?

Jehovah iihpáʼpistotoyiiwa nínaawa ki aakííwa áátowaʼpistotoaiksi ááhkaipoʼtáísspommoo­tsiiys­saawa. (Genesis 2:18) Ohkíímiiksi áakáínaawaʼsatsiiyaawa otsitapíímoaawayi ki áakáíiyikaʼkimaayaawa ááhkáóhkoʼtsimaahsaawa ki áakohtáíssksinimaʼtsiiwaiksi Iihtsipáítapiiyoʼpa. Áakáótoomipoʼtsima otánistáwaakomimmahsi otohkíímaani. Ohkíímiiksi ki iyóomiiksi áakáwaakomimmotsiiyiyaawa ki áakáíniʼyimmotsiiyiyaawa. Tská ohkíímiiksi ki iyóomiiksi ohkáttáípahtsaʼpssiyaawa, áaksstsinaiʼssksinímiaawa ááhkanistáíssaakiʼtsiʼsaawa otsípahtsaʼpssoaawayi áakitohtáíʼtaamipaitapiiyaawa.​—Okstóót Ephesians 4:31, 32; 5:22-25, 33; 1 Peter 3:7.

3. Kitáaksstaoʼoht­áwayákiitoh­poaawa ikkámssawáísokaopiinoainiki?

Ikkámssawáíppomiksoʼkowammainiki kitohkíímaani tsááhtaoʼ kóomi kitáakohkottohtáísapistotootsiiyihpoaawa áákomimmotsiiyssini. (1 Corinthians 13:4, 5) Iihtsipáítapiiyoʼpa Otsiʼpówahsini máátsitssínaiiʼpa matápii ááhkáwayákiitoohsaawa áakitáísayippomiksoʼkowammotsiiyiyaawa.​—Okstóót 1 Corinthians 7:10-13.

4. Pookáíksi, tsá anistápiiwa Iihtsipáítapiiyoʼpa kitáísstakka kitááhkanistáʼpaisspi?

Jehovah kitáísstakka kitááhkáíʼtaamaʼpaissi. Aʼsitápiiksi, kitáóhkokka isstohkanáísokaʼpiiwa okakiiʼpówahsini kitááhkitssksiniʼsi kitááhkanistáísoksipaitapiiyssi. Kitáísstakka kitááhkohtokákssoaawayi kínnoaawa ki kiksísstoaawa otokakísskskaʼtakssoaawayi ki otánistsipáítapiiyssoaawayi. (Colossians 3:20) Jehovah kimáttáísstakka kitááhkáístotsiʼsi iʼtáámaʼpssini iihtóʼtstsiiwa aʼyááʼpoʼtoomoainiki Áʼpistotookiwa ki Ohkóyi.​—Okstóót Ecclesiastes 11:9–12:1; Matthew 19:13-15; 21:15, 16.

5. Iikóʼsiiksi, kókoʼsoaawayi tsá áakanistohkóónimiaawa iʼtáámaʼpssini?

Kitáaksstamáíiyikaʼ­poʼtakih­poaawa kitááhkáóhkoʼtoo­moah­saawa kókoʼsiksi aoówahsini, ááhkáóhkoopissaawa, ki ááhkáóhkoistotoohsaawa. (1 Timothy 5:8) Kókoʼsiksi áakohtáíʼtaamaʼpssiyaawa ikkámohtáíssksinimaʼtsainiki ááhkanistáwaakomim­mah­saawa ki ááhkohtóʼtokakssaawa Iihtsipáítapiiyoʼpa. (Ephesians 6:4) Kitánistáwaakomimmahsi Iihtsipáítapiiyoʼpa áakohtsíssiniiʼpa kókoʼsiksi ósskitsipahpoaawayi. Kitáakitohtoʼtáíssksinimaʼt­saa­yaawa kókoʼsiksi Iihtsipáítapiiyoʼpa Otsiʼpówahsini, iihtáísoksipáítapiiyaawa.​—Okstóót Deuteronomy 6:4-7; Proverbs 22:6.

Pookáíksi iihtáíiyikaʼkimaayaawa áakitayááhkomimmayaawa ki áakitáíniiyiʼtsiiʼpiaawa otáʼpoʼtakssoaawayi. Áaksstsinaʼyáísiimayaawa ki áaksstsinaʼyáókakiaanistayaawa. Áakitáísopoyáʼpssksinimaʼtsaayaawa máátaakáístotsimiaawa makáʼpiiwa ki áakitomanistáíʼtaamaʼpssiyaawa. (Proverbs 22:15) Máátaakánoohkohpáíssiimayaawa iníkkaʼpiiwa tsááhtaoʼ ááhkáínikksistotoahsaawa.​—Okstóót Colossians 3:21.

Jehovah Otátohkáʼtohtaaniksi áísinaimiaawa sináákssiistsi, iihtáísspommoayaawa okóʼsiiksi ki pookáíksi. Ámostsska sináákssiistsi iihtóʼtssínaiiʼpiaawa Naatóyssínaakssini.​—Okstóót Psalm 19:7, 11.