Alijinɛ ka surun dɛ!

Kojugu minnu bɛ ka kɛ sisan dugukolo kan, olu b’a jira ko Alijinɛ ka surun. Bibulu y’a jira k’an bɛna waati juguw dɔn sanni Alijinɛ ka sigi. An bɛ o waati yɛrɛ de la sisan. Bibulu y’a jira fana ko ko dɔw ka kan ka kɛ. O dɔw filɛ nin ye:

Kɛlɛbaw. “Siya dɔ na wuli siya dɔ wɛrɛ kama.” (Matiyu 24:7) O kiraya kuma timɛna. Kabini san 1914 na, kɛlɛba fila kɛra diɲɛ kɔnɔ. Kɛlɛ caman wɛrɛw fana kɛra. Mɔgɔ miliyɔn caman sara o kɛlɛw la.

Banaw bɛna jɛnsɛn yɔrɔ bɛɛ la. ‘Fan ni fan, fiɲɛbanaw na kɛ.’ (Luka 21:11, Layidu Kura) Yali o kuma timɛna wa? Ɔwɔ. Kansɛri, dusukundimi, sɔgɔsɔgɔninjɛ, sumaya, SIDA ni bana wɛrɛw ye mɔgɔ miliyɔn caman faga.

Dumuni dɛsɛ. Dugukolo yɔrɔ bɛɛ la, mɔgɔw bɛ yen minnu tɛ dumuni bɛrɛ sɔrɔ k’a kɛ. Kɔngɔ bɛ mɔgɔ miliyɔn caman faga san o san. O ye taamasiyɛn wɛrɛ ye min b’a jira ko Alijinɛ bɛna sigi sɔɔni. Bibulu b’a fɔ ko: “Kɔngɔbaw na kɛ.”—Marka 13:8.

Dugukolo yɛrɛyɛrɛw. “Dugukolo yɛrɛyɛrɛw na kɛ yɔrɔ caman na.” (Matiyu 24:7) O fana timɛna an ka waati la. Kabini san 1914 na, mɔgɔ minnu sara dugukolo yɛrɛyɛrɛw la, u ka ca ni mɔgɔ miliyɔn kelen ye.

Mɔgɔ juguw. Mɔgɔw na kɛ “nafolo negetɔw ye,” u na kɛ “u yɛrɛw fɛ.” U bɛ “ɲɛnajɛw fɛ ka tɛmɛ Ala kan.” Denmisɛnninw na kɛ “bangebagaw kanbilabagaw” ye. (2 Timote 3:1-5) Yali i ma sɔn a ma ko mɔgɔ caman bɛ ten sisan wa? Bonya si t’u la ka ɲɛsin Ala ma, wa, mɔgɔ minnu b’a ɲini ka Ala dɔn, u bɛ kɛlɛ lase o tigiw ma.

Kojugu. “Juguya na caya.” (Matiyu 24:12) A ka c’a la i bɛ sɔn a ma ko kojugu barika ka bon kosɛbɛ sisan ni san damadɔ tɛmɛnenw ta ye. Mɔgɔw bɛ yɔrɔ o yɔrɔ la, u bɛ se ka sonyɛ, ka nanbara, walima ka jogin.

O fɛnw bɛɛ b’a jira ko Ala ka Masaya ka surun. Bibulu b’a fɔ ko: “Aw fana mana o kow kɛtɔ ye, aw k’a dɔn ko Ala ka masaya surunyara.” (Luka 21:31) Ala ka Masaya ye mun ye? O ye Ala ka sankolola gɔfɛrɛnaman ye min bɛna Alijinɛ sigi dugukolo kan. Ala ka Masaya bɛna sigi hadamadenw ka gɔfɛrɛnamanw nɔ na.—Daniɛl 2:44.