Diinɛ lakika bɛ sɔrɔ cogo min na

N’i b’a fɛ ka kɛ Ala teri ye, a bɛ sɔn diinɛ min na, i ka kan k’o sira de taama. Yesu y’a fɔ ko “batobaga sɛbɛw” bɛna Ala bato ka kɛɲɛ ni “tiɲɛ” ye. (Yuhana 4:23, 24) Walasa ka Ala bato, sira tilennen kelenpe dɔrɔn de bɛ yen. (Efesekaw 4:4-6) Diinɛ lakika bɛ mɔgɔ lase ɲɛnamaya banbali ma, nkalon diinɛ bɛ mɔgɔ lase halakili ma.—Matiyu 7:13, 14.

I bɛ se ka diinɛ lakika dɔn n’i b’o sira taamabagaw jateminɛ. Ikomi Jehowa ka ɲi, minnu y’a batobaga sɛbɛw ye, u fana ka kan ka kɛ mɔgɔ ɲumanw ye. Iko lenburuba sun ɲuman bɛ den ɲumanw di cogo min na, o cogo kelen na fana diinɛ lakika bɛ wolo mɔgɔ ɲumanw na.—Matiyu 7:15-20.

Jehowa teriw bɛ bonyaba da Bibulu kan. U b’a dɔn ko Bibulu bɛ bɔ Ala yɔrɔ. U b’a to a kɔnɔkuma k’u bilasira u ka diɲɛnatigɛ kɔnɔ, k’u kunkow ɲɛnabɔ, k’u dɛmɛ ka Ala dɔn. (2 Timote 3:16) U bɛ min fɔ u ka wajuli la, u b’u jija k’o sirataama.

Jehowa teriw b’u ka kanuya jira ɲɔgɔn na. Yesu y’a ka kanuya jira mɔgɔw la tuma min na a y’u kalan walasa u ka Ala dɔn, ani tuma min na a ye banabagatɔw kɛnɛya. Mɔgɔ minnu bɛ diinɛ lakika sira taama, olu fana b’u ka kanuya jira mɔgɔ tɔw la. Iko Yesu ladegebagaw, u fana tɛ faantanw ni siya wɛrɛ mɔgɔw mafiyɛnya. Yesu y’a fɔ ko mɔgɔw bɛna a ka kalandenw dɔn kanuya fɛ, kanuya min bɛ u ni ɲɔgɔn cɛ.—Yuhana 13:35.

Ala teriw bɛ Ala tɔgɔ, Jehowa, bonya. Ni mɔgɔ dɔ b’i ban k’i tɔgɔ fɔ, yali o tigi bɛna kɛ i teri sɛbɛ ye wa? Ayi. Ni teri b’an bolo, an b’a tɔgɔ fɔ, ka fɛn ɲumanw fɔ a kan tɔw ye. O cogo kelen fana na, mɔgɔ minnu b’a fɛ ka kɛ Ala teriw ye, olu ka kan k’a tɔgɔ fɔ, k’a ka kuma fana fɔ tɔw ye. Jehowa b’a fɛ an k’o de kɛ.—Matiyu 6:9; Romɛkaw 10:13, 14.

Ala teriw bɛ mɔgɔw kalan Ala ka Masaya ko la iko Yesu y’a kɛ cogo min na. Ala ka Masaya ye sankolola gɔfɛrɛnaman de ye min bɛna alijinɛ sigi dugukolo kan. Ala teriw bɛ Ala ka Masaya kibaru duman in kuma fɔ tɔw ye.—Matiyu 24:14.

Jehowa Seerew b’a ɲini ka kɛ Ala teriw ye. U bɛ bonya da Bibulu kan, wa, kanuya bɛ u ni ɲɔgɔn cɛ. U bɛ Ala tɔgɔ fana fɔ, k’a bonya. U bɛ tɔw kalan Ala ka Masaya ko la. Jehowa Seerew de bɛ diinɛ lakika sira taama bi dugukolo kan.