An ka tutigɛbagaya hakili jira
1 Masaya weleweledalaw bɛɛ bɛ se ka tutigɛbagaya hakili jira, ni u ye tutigɛbagaw ye walima ni u tɛ tutigɛbagaw ye. U bɛɛ b’a fɛ tiɲɛ na ka tugu Yesu ka ci fɔlen na, ka waajuli kɛ ani ka mɔgɔw kɛ kalandenw ye. (Mat. 28:19, 20; Kɛw. 18:5) U bɛ u mago don mɔgɔw la. U bɛ kaari fɛn caman kɔ walisa ka u ka cidenyabaara kɛ. (Mat. 9:36; Kɛw. 20:24) Fɛn o fɛn ka kan ka kɛ walisa ka mɔgɔw dɛmɛ u ka tiɲɛ dɔn, Jehowa ka baarakɛlaw labɛnnen don k’o kɛ. (1 Kɔr. 9:19-23) O hakili sugu bɛ mɔgɔ minnu na, o dɔ tun ye Filipe ye min bɛ wele ko kibaru duman fɔbaga. An ka a ka misali mafilɛ.
2 Ka waajuli kɛ ani ka mɔgɔw kɛ kalandenw ye: Baaraba caman tun bɛ Filipe bolo jɛkulu kɔnɔ, san kɛmɛ fɔlɔ la. (Kɛw. 6:1-6) Nka, a tun dɔnnen bɛ de iko kibaru duman waajulikɛla timinandi. (Kɛw. 8:40) Bi fana, ka maakɔrɔw ni cidenyabaara magannaw to u ka baaraw la, u bɛ se ka tutigɛbagaya hakili jira u kɛtɔ ka cidenyabaara ɲɛminɛ ni nisɔndiya ye. Ni o kɛra, hakili ɲuman min bɛ jɛkulu kɔnɔ, dɔ bɛ fara o kan kosɛbɛ dɛ!—Rom. 12:11.
3 Etiɛni salen kɔ fɛ, tɔɔrɔba dɔ cunna kalendenw kan min bonyara fo ka ɲagamiba don u ka ɲɛnamaya kɔnɔ. Nka, Filipe tagara a fɛ waajuli la. A kɛra baarakɛminɛnba ye walisa waajulibaara ka daminɛ Samarikaw cɛ ma. (Kɛw. 8:1, 4-6, 12, 14-17) An bɛ se ka a ka misali ladege an kɛtɔ ka kibaru duman fɔ mɔgɔw ye ni gɛlɛyaw bɛ an da la tuma min na, ani ni an bɛ waajuli kɛ k’a sɔrɔ an ma mɔgɔ bɔ mɔgɔ la.—Yuhana 4:9.
4 Filipe tun bɛ se kosɛbɛ mɔgɔw kalanni na Ala ka Kuma na. O bɛ ye Etiopi ka kuntigiba dɔ ka tuubili maana fɛ. (Kɛw. 8:26-38) Tutigɛbagaya hakili jiracogo wɛrɛ ye ka dɔ fara an seko kan walisa ka baara kɛ ni Bibulu ye ani ka ‘hakilijakabɔ kɛ Sɛbɛnniw kan.’ (Kɛw. 17:2, 3) An fana k’a ɲini ka kibaru duman fɔ, mɔgɔ bɛ se ka sɔrɔ yɔrɔ o yɔrɔ la, ani tuma o tuma na ni a bɛnnen don, iko Filipe y’a kɛ cogo min na.
5 Denbaya kɔnɔ ani jɛkulu kɔnɔ: Siga t’a la ko hakilila min tun bɛ Filipe la, ani Filipe kɛcogo ye nɔ ɲuman bila a denmusow la. (Kɛw. 21:9) O cogo kelen na fana, Kerecɛn minnu bɛ u ka ɲɛnamaya sinsin Masaya kunkankow kan, olu bɛ kɛ sababu ye ka dusu don u denw kɔnɔ walisa u ka o ɲɔgɔn kɛ. Hali ni bangebaga dɔ sɛgɛnnen don sibiri ni kari donw na, nka ni a bɛ teliya ka taa mɔgɔw waaju, a bɛ se ka nɔ ɲuman bila min bɛ mɛn a den dusukun na.—Nt. 22:6.
6 Filipe sɔnna Paul ni Luka ka jigin a bara. Kerecɛnya la, Paul ni Luka tun ye baarakɛlabaw ye minnu tun timinan ka di kosɛbɛ Jehowa ka baara la. (Kɛw. 21:8, 10) An bɛ se ka a jira cogo jumɛn na bi ko an bɛ an balima timinandiw waleɲumandɔn, ani ko an bɛ u kɔkɔrɔdon? Sogɔmada walima wulada minnu fɛ mɔgɔ caman tɛ bɔ cidenyabaara la, an bɛ se k’a ɲini tutigɛbagaw fɛ an ni olu ka baara kɛ ɲɔgɔn fɛ o waatiw la. (Fil. 2:4) An bɛ se fana k’u wele ka na an ka so walisa o ka kɛ sababu ye an ka dusu don ɲɔgɔn kɔnɔ. An bɛɛ ka an jija walisa ka tutigɛbagaya hakili jira, an mana kɛ cogo o cogo la.
[Study Questions]
1. Tutigɛbagaya hakili ye mun ye?
2. Filipe ye timinandiya min jira cidenyabaara la, maakɔrɔw ni u kankɔrɔsigiw bɛ se ka o ladege cogo di?
3. An bɛ se ka tutigɛbagaya hakili jira cogo di k’a sɔrɔ gɛlɛyaw bɛ an da la?
4. Filipe kɛra misali sugu jumɛn ye mɔgɔw kalanni la?
5. Kerecɛnw bɛ se ka mun kɛ walisa ka tutigɛbagaya baara dusu don u denw kɔnɔ?
6. An bɛ se ka an ka waleɲumandɔn jira an ka jɛkulu tutigɛbagaw la cogo jumɛnw na?