“Ka gɛrɛ Ala la”, o b’an nafa!

1-2. (a) An ka kan ka mun de kɛ n’an b’a fɛ ka kɛ mɔgɔ dɔ teri sɛbɛ ye? (b) An bɛna mun de ye nin barokun kɔnɔ?

YALA i be ni teri sɔbɛ dɔ ye wa? I sera ka teriya don n’a ye cogo di? Siga t’a la ko i ye wagati kɛ n’a ye. O y’i dɛmɛ k’a lɔn gwɛlɛya minw b’a kan, ani fana k’a lɔn fɛɛn minw ka di a ye ani minw man di a ye. I y’a kɔrɔsi ko a be ni jogo ɲuman dɔw ye i b’a fɛ ka minw ladegi. O y’a to i teri koo diyara i ye.

² Ka teriya don ni mɔgɔ dɔ ye ani ka se k’o teriya mara, o tɛ ɲɛ jijalibaw kɔ ani o be wagati ta. O kelen lo fana n’an b’a fɛ ka teriya sɔbɛ kɛ ni Jehova Ala ye. Barokun nin na, an bena a ye cogo min na an be se k’an magwɛrɛ kosɔbɛ an ka Ala la ani nafa minw b’a la k’o kɛ. An k’a daminɛ k’a filɛ fɛɛn minw kama nafa b’a la k’an magwɛrɛ an teri sɔbɛ Jehova la.

3. Ni an bɛ gɛrɛ Jehova la, nafa min bɛ o la, mun na an ka kan ka miiri o la? Misali dɔ fɔ.

³ Siga t’a la, i sɔnnin b’a ma ko nafa b’a la k’i magwɛrɛ Jehova la. Nga nafa tigitigi min b’a la k’o kɛ, n’i miirila o la, o bena i jija i ka to k’i magwɛrɛ kosɔbɛ Jehova la (Zab. 63:7-9). Misali la, an b’a lɔn ko k’an janto an ka dumunifɛnw na, ka to ka spɔr kɛ, ka sinɔgɔ ka ɲɛ ani ka jii min caaman, o ka ɲi kosɔbɛ. K’a sɔrɔ mɔgɔ caaman tɛ miiri k’o koow kɛ koɲuman ani u t’u janto u ka kɛnɛyako la. Nga nafa minw b’a la ka kɛ ni delinanko ɲumanw ye kɛnɛyako ta fan fɛ, n’an be miiri o la tuma o tuma, o bena an jija kosɔbɛ an ka to n’o delinanko ɲumanw ye. O cogo kelen na, an b’a lɔn ko k’an magwɛrɛ Jehova la, o b’an nafa. Nga n’an be to ka miiri o nafaw la, o bena an dɛmɛ an ka to k’an magwɛrɛ kosɔbɛ an teri Jehova la.—Zab. 119:27-30.

4. Ka kɛɲɛ ni Zaburu 73:28 ye, miiriya jumɛnw de tun bɛ o Zaburu sɛbɛnbaga la?

⁴ Zaburuw 73:28 kalan. Zaburu 73nan sɛbɛbaga tun ye Levite dɔ lo ye ani a tun be dɔnkili la Jehova batoso kɔnɔ. A ye Jehova sago kɛ kantigiya la. N’a sɔrɔ a y’o kɛ saan caaman kɔnɔ. O bɛɛ n’a ta, a tun b’a fɛ k’a yɛrɛ hakili jigi ko “ka to . . . Ala fɛ,” o b’a nafa. A tun b’a fɛ mɔgɔ wɛrɛw fana k’a lɔn ko ka teriya kɛ ni Ala ye, o b’u nafa. K’an magwɛrɛ Jehova la, nafa jumanw lo be o la?

“KA GƐRƐ ALA LA”, O BƐ NISƆNDIYA LASE AN MA

5. (a) Ka gɛrɛ Jehova la, mun na o bɛ nisɔndiya lase an ma? (b) Ka kɛɲɛ ni Ntalenw 2:6-16 ye, misali dɔw fɔ minnu b’a jira cogo min na Jehova ka hakilitigiya bɛ se k’i nafa ani k’i lakana?

⁵ N’an tora k’an magwɛrɛ Jehova la, an ninsɔn bena diya kosɔbɛ (Zab. 65:5). An b’o fɔ kuun caaman kosɔn. A fɔlɔ ye ko ladili nafaman minw be sɔrɔ Bibulu kɔnɔ, n’an b’u sira tagama, o b’an kɛ hakilitigiw ye. Koo minw be se ka nɔɔ jugu to an kan, o hakilitigiya b’a to an b’an yɔrɔ janya o la. O hakilitigiya b’an latanga fana kokolonkɛ ma (Talenw 2:6-16 kalan). O lo kama a fɔra Bibulu kɔnɔ ko: “Mɔgɔ min ye lɔnniya sɔrɔ, o tigi dagamunin lo. Mɔgɔ min ye hakilitigiya sɔrɔ, o dagamunin lo.”—Talenw 3:13.

6. Mun na Zaburu sɛbɛnbaga ka nisɔndiya yɛlɛmana ka kɛ dusukasi ye tuma dɔw la?

⁶ Jehova teriw fana dusu be kasi tuma dɔw la. Zaburu 73nan sɛbɛbaga dusu tun man di wagati dɔ la sabu a tun y’a daminɛ ka kɛ ni miiriya bɛnbaliw ye. A y’a daminɛ k’a miiri ko mɔgɔ juguw be hɛɛrɛ la hali k’a sɔrɔ u tɛ Ala ka sariyaw labato. O koo tun be Zaburu sɛbɛbaga dusu gwan. A yɛrɛ y’a daminɛ ka ɲɛbɔ o mɔgɔ juguw fɛ. A tun b’a miiri ko mɔgɔ farimanw ni yɛrɛboɲalaw lo ye nafolobatigiw ye tuma bɛɛ, ko u be bonya fɔɔ ka tulɔ ani ko sɛgɛn foyi yɛrɛ t’u kan. Nga, o tɛ tiɲɛn ye (Zab. 73:3-7, 12). Zaburu sɛbɛbaga hakili tun ɲagaminin lo kosɔbɛ fɔɔ wagati dɔ la, a tun b’a yɛrɛ ɲiningara ni tɔnɔ b’a la a ka to ka jijaliw kɛ Jehova batoli la. A y’a fɔ ni dusukasi ye ko: “Tiɲɛ na, ne ye n yɛrɛ sigɛn gwansan ka to tilenninya la, ka kɛ mɔgɔsɔbɛ ye.”—Zab. 73:13.

7. N’an dusu kasira, an bɛ se ka mun de kɛ? (Ja fana lajɛ ɲɛ fɔlɔ kan.)

⁷ Zaburu sɛbɛbaga m’a to dusukasi k’a fari faga. A ye dɔ kɛ dɔ ye. A “donna . . . Ala ka sigiyɔrɔ la” ani Jehova y’a dɛmɛ k’a miiricogo yɛlɛma o yɔrɔ la (Zab. 73:17-19). N’an dusu tiɲɛnin lo, an teri sɔbɛ Jehova b’o kala ma. An ka to k’a deli walisa a k’an ɲɛminɛ. A be tɛmɛ a ka Kuma ani kafo fɛ ka dɛmɛ min lase an ma, an ka sɔn o ma. O la, an mako be fanga min na walisa k’an ka dusukasi muɲu, an bena o sɔrɔ. Hali n’an be hamina kojugu, Jehova bena an dusu saalo ani k’an hakili sigi.—Zab. 94:19.a

ʻN’AN BƐ GƐRƐ ALA LA’, KUN BƐNA KƐ AN KA ƝƐNAMAYA LA ANI O BƐNA JIGIYA DI AN MA

8. Cogoya wɛrɛ jumɛnw de fɛ, ka gɛrɛ Ala la, o b’an nafa?

⁸ Nafa b’a la an k’an magwɛrɛ Ala la kuun fila wɛrɛw kosɔn. A fɔlɔ, o b’a to kuun be kɛ an ka ɲɛnamaya la. A filanan, o be jigiya sɔbɛ di an ma an ka siniɲasigi koo la (Zer. 29:11). An k’o nafa kelen kelen bɛɛ lajɛ.

9. N’an bɛ gɛrɛ Jehova la, cogo jumɛn na kun bɛna kɛ an ka ɲɛnamaya la?

⁹ K’an magwɛrɛ Jehova la, o b’a to kuun be kɛ an ka ɲɛnamaya la. Bi, mɔgɔ minw lanin t’a la ko Ala be yen, olu caaman b’a miiri ko kuun tɛ ɲɛnamaya la ani ko loon dɔ, adamadenw sii bena tunu pewu. Nga an ye Bibulu sɛgɛsɛgɛ minkɛ, an lara a la kosɔbɛ ko Ala “be yen, ani ko a b’a yɔrɔ ɲinibagaw wasa.” (Eburuw 11:6). Kabi sisan yɛrɛ, an ninsɔn ka di sabu an danna kuun min kama, an b’o lo kɛra: An be an sankolola Faa Jehova batora.—Deter. 10:12, 13.

10. Mɔgɔ minnu bɛ u jigi da Jehova kan, Zaburu 37:29 bɛ mun de fɔ u ka siniɲɛsigi ko la?

¹⁰ Mɔgɔ caaman tɛ ni jigiya sɔbɛ ye siniɲasigi koo la. U ka jigiya dan ye ka baara kɛ, ka furu, ka deenw sɔrɔ ani ka wari mara min bena u dɛmɛ n’u nana kɔrɔ. U tɛ miiri Ala koo la. Nga an minw be Jehova bato, an b’an jigi la Jehova lo kan (Zab. 25:3-5; 1 Tim. 6:17). An lanin lo Jehova Ala la, ale min y’an teri ye. A ye layidu ta ko a bena koo minw kɛ an ye, an lanin b’a la fana ko a bena o dafa. Alijɛnɛ kɔnɔ, an bena se ka Jehova bato fɔɔ abada!—Zaburuw 37:29 kalan.

11. N’an bɛ gɛrɛ Ala la, an bɛ nafa jumɛnw de sɔrɔ o la ani o bɛ mun de kɛ ale la?

¹¹ N’an b’an magwɛrɛ Ala la, o b’an nafa cogo caaman wɛrɛw la. Misali la, Jehova ye layidu ta ko a bena an ka jurumuw yafa n’an sɔnna ka nimisa ani k’an magwɛrɛ ale la (Ezayi 1:18). O b’a to an t’an yɛrɛ jalaki tugun an ka jurumu tɛmɛninw kosɔn (Zab. 32:1-5). Ka fara o kan, an ninsɔn ka di ka Jehova dusu diya (Talenw 23:15). Tiɲɛn na, n’an ye Ala teri sɔbɛw ye, an be duga caaman wɛrɛw sɔrɔ o la. O la, an be se ka to k’an magwɛrɛ Ala la cogo di?

AN BƐ SE KA TA’A FƐ “KA GƐRƐ ALA LA” COGO MIN NA

12. I ye mun de kɛ ka se ka gɛrɛ Ala la?

¹² N’i ye kerecɛn batizenin ye, o kɔrɔ ko i ye koo caaman kɛ ka ban walisa k’i magwɛrɛ Jehova la. I ye tiɲɛn lɔn Jehova Ala ni Yezu Krista koo la. I nimisara i ka jurumu tɛmɛninw na, i limaniyara kosɔbɛ Ala la ani i banbara ka tugu a ka sariyaw kɔ. Nga walisa k’an magwɛrɛ kosɔbɛ Ala la, an man ɲi k’o koow kɛli dabila.—Kɔlɔs. 2:6.

13. Ko saba jumɛnw de bɛna an dɛmɛ an ka ta’a fɛ ka gɛrɛ Jehova la?

¹³ Mun lo bena an dɛmɛ an ka to k’an magwɛrɛ Jehova la kosɔbɛ? 1) An ka ɲi ka to ka Bibulu kalan ani ka sɛgɛsɛgɛri kɛ a kan. An ka laɲinita tɛ ka kunnafoni damanin sɔrɔ Ala koo la dɔrɔn. Nga, an k’a ɲini k’a lɔn Ala sagonata ye min ye an koo la. Ani, sariyakolo minw be sɔrɔ a ka Kuma kɔnɔ, an ka ɲi ka tagama ka kɛɲɛ n’o ye (Efɛz. 5:15-17). 2) An ka ɲi k’an ka limaniya barika bonya. An be se k’o kɛ cogo di? Jehova b’a yira cogo caaman minw na ko a b’an kanu, an ka to ka miiri o la. 3) Fɛɛn minw ka gwo Jehova ye, o fɛɛnw ka ɲi ka gwoya an fana ye ani mɔgɔ minw b’o fɛɛnw kɛ, an man ɲi ka teriya kɛ n’u ye.—Zab. 1:1; 101:3.

14. Ka kɛɲɛ ni 1 Kɔrɛntekaw 10:31 ye, an bɛ se ka ko jumɛnw de kɛ don o don walisa k’an ko diya Jehova ye? (Jaw fana lajɛ.)

¹⁴ Vɛrise nin kalan: 1 Korɛntikaw 10:31. Koo minw ka di Jehova ye, a kɔrɔtanin lo kosɔbɛ an ka to k’o lo kɛ. Ka waajuli kɛ ani ka taga lajɛnw na, o tɛ dan o dɔrɔn ma. An be min kɛ loon o loon, an ka ɲi ka banba o ka diya Jehova ye. Misali la, n’an ye mɔgɔ hɔɔrɔnw ye koo bɛɛ la ani min b’an fɛ, n’an b’o tilan ni tɔɔw ye, an be Jehova dusu diya (2 Kor. 8:21; 9:7). Niin ye Jehova ka nilifɛn ye ani a b’a fɛ an k’o jati fɛɛn kɔrɔtaninba ye. An b’an magwɛrɛ an niin Dibaga la, n’an be ni delinanko ɲumanw ye dumuni ni minni koo ta fan fɛ, ani n’an b’an janto an ka kɛnɛyako la cogo wɛrɛw la. An be koo o koo kɛ walisa ka Jehova dusu diya, hali n’an b’o jati koo denninw ye, o bena a to an koo be gwɛlɛya a ma.—Luka 16:10.

15. Jehova b’a fɛ an ka tɔw minɛ cogo di?

¹⁵ Jehova be koo ɲuman kɛ mɔgɔ tilenninw ni mɔgɔ tilenbaliw ye (Mat. 5:45). A b’a fɛ an fana ka tɔɔw minɛ o cogo la. Misali la, an man ɲi ka “mɔgɔ si tɔgɔ cɛn,” wala “ka kɛlɛ kɛ.” Nga an ka ɲi “ka muɲu bɛɛ kɔrɔ tuma bɛɛ.” (Titi 3:2). O la, mɔgɔ minw lanin tɛ Jehova la, an t’a jati ko an ka fisa n’u ye (2 Tim. 2:23-25). An b’an magwɛrɛ Jehova la kosɔbɛ n’an be tɔɔw minɛ ni ɲumanya ye ani n’an b’u bonya tuma bɛɛ.

AN BƐ SE KA TA’A FƐ “KA GƐRƐ ALA LA” HALI N’AN YE FILIMAKOW KƐ

16. Waati dɔ la, Zaburu 73nan sɛbɛnbaga y’a daminɛ ka miiri ko jumɛnw na?

¹⁶ Nga n’i y’a daminɛ k’a miiri ko i man kan ni Jehova ka kanuya ye do? I ko an y’a ye cogo min na, Zaburu 73nan sɛbɛbaga tun be n’o miiriya ɲɔgɔn ye. A y’a fɔ ko: “A tora dɔɔni dɔrɔn, ne seenw tun bena porokoto. A tora dɔɔni dɔrɔn, ne tun bena talon.” (Zab. 73:2). A sɔnna a ma ko ale “nii tun degunnin lo,” ko a “tun te foyi faamu” ani ko ale “tun kɛra i ko begɛn” Jehova ɲɛɛ kɔrɔ (Zab. 73:21, 22). Yala a y’a fɔ a yɛrɛ ye ko nafa t’ale la tugun a ka miiriya juguw kosɔn ani ko a man kan ni Jehova ka kanuya ye wa?

17. Hali ni Zaburu sɛbɛnbaga tun dusukasilen don kojugu, a ye mun de kɛ? (b) An bɛ se ka kalan jumɛn de sɔrɔ ka bɔ a ka kow la? (Jaw fana lajɛ.)

¹⁷ Hali ni Zaburu sɛbɛbaga y’a miiri ko Jehova banna ale la, a ma kɛ n’o miiriya ye wagatijan kɔnɔ. A be komi tuma min na a dusu tun kasinin lo kojugu, a sɔnna a ma ko ale mako b’a la k’a magwɛrɛ kosɔbɛ Ala la. A ka kuma nunu b’o lo yira: “O bɛɛ n’a ta, ne tora ni ele [Jehova] ye kudayi, i ye ne bolo minɛ. E be ne mara ka kɛɲɛ n’i ka kolatigɛnin ye, o kɔ, i ben’a kɛ ne be don i ka nɔɔrɔ yɔrɔ la.” (Zab. 73:23, 24). N’an fana fari fagara wala n’an dusu kasinin lo, an k’an magwɛrɛ Jehova la k’a deli walisa a k’an barika bonya (Zab. 73:26; 94:18). Hali n’an ye jurumuba kɛ, an be se ka kɔsegi Jehova ma ani an ka la a la ko a “be yafa.” (Zab. 86:5). O la, n’an dusu kasinin lo kojugu, o wagati yɛrɛ lo la an ka ɲi k’an magwɛrɛ Ala la kosɔbɛ.—Zab. 103:13, 14.

ʻAN GƐRƐLEN KA TO ALA LA’ FO BADAA

18. Mun na an gɛrɛlen bɛ se ka to Jehova la fɔ badaa?

¹⁸ An be se ka to k’an magwɛrɛ kosɔbɛ Jehova la fɔɔ abada ani dɔ bena to ka fara an ka lɔnniya kan a koo la tuma bɛɛ. Bibulu b’a fɔ ko Jehova ka hakilitigiya, a ka lɔnniya ani a ka kokɛtaw “ka bon ka tɛmɛ adamaden hakiri dan kan.”—Ɔrɔm. 11:33, Biblu Ala ta Kuma.

19. Zaburu 73nan bɛ an hakili sigi mun de la?

¹⁹ Zaburuw 79:13 b’a fɔ ko: “An kɔni, an minw y’i ka jama ye, an minw y’i ka sagakulu ye, an bena i tanu kudayi. An bena i tanu saan o saan waati nataw la.” N’i tora k’i magwɛrɛ Ala la, Ele fana be se ka la a la ko i bena duga banbaliw sɔrɔ. O la, i hakili siginin be se k’a fɔ ko: “[Ala] lo be fanga di ne ma, ale lo ye ne niyɔrɔ ye tuma bɛɛ.”—Zab. 73:26.