CƐ̃́Ɛ́-ÐƐ̀ 6

Ðɛ Vɔ̀sì Ðò Ɓá Dyíɛ Jè Kɔ̃in-Zaìn-Zaìn Wáɖáá

Jɔ̃́ɔ́ 10:33-36

SṸÌN-XWÍNÍÍN: Ɓɔ́ vɔ̀sì ɖò wuɖuún zàà pu ɓɛ́ m̀ ké fɔ̀nɔ̀-hwòɖò kà kò ɖò gbo mu. Nyuɛ ɓɛ́ nyɔ ɓè m̀ wùɖùà gboɛɛ ké kà vɔ̀sì m̀ zàà wuɖuún wɛ̃ kè fɔ̀nɔ̀-hwòɖò m̀ nìà tɛ̀mɛ̀ìn nyɛ nyu gbo muɛ̀n nyɛɛ dyé wáɖáá.

Ɔ NYU-KÀ:

Taɓa wuɖu jɛ́ɛ́ ɓè jìì. M̀ ɖà vɔ̀sì ɖò wuɖuún zàà hwɔ ní, taɓa wuɖu ɓè ɓɛ́ wa ɓá fɔ̀nɔ̀-hwòɖò jɛ́ɛ́ɔ̀ dyiɛɛ jìì. M̀ ɓɛ́ìn náa nyuɛ dyììn ɖé wuɖu ɓèa kɔ̃in-kpa-kpa mú, mɔɔ dyììn ɖé dyi-diè-ɖɛ̀ ɖò ɓɛ́ ɔ muɛ nyuùn ɓɛ́ nyɔ ɓèɔ̀ ké wuɖu jɛ́ɛ́ɔ̀ dyéɛ ɓɛ́ìn nyɛɛ dyi-diè-diè mú.

Ɔ jù ké m̀ dyi wuɖu kò-kò ɓè kũ̀à mú nyùìn ɓɛ́ m̀ ké fɔ̀nɔ̀-hwòɖò nìà ɖé vɔ̀sìɔ̀ múɛɛ kɔ̃in kpa ní, nyuɛ ɓɛ́ nyɔ ɓèɔ̀ ké kà Baɓoɔ mìɔùn nììn wuɖuɔ̀ kè fɔ̀nɔ̀-hwòɖòɔ̀ nyu gbo muɛ̀n nyɛɛ dyéɛ ɓɛ́ìn wáɖáá.
Nɛ́ìn fɔ̀nɔ̀-hwòɖòɔ̀ jìì kɔ̃. Ɔ jù ké m̀ dyi xwíníín kɔ̃̀ jè m̀ zàà vɔ̀sìɔ̀ wuɖuún wɛ̃ɛ da zà wáɖáá ní, nìí, zaìn kà wuɖu jɛ́ɛ́ ɓè nìà ɖé vɔ̀sìɔ̀ múɛɛ nyu xwíníín nìà wɛ dyí ɓá kɛɛ jè kɔ̃in.

Kà nì muà vɔ̀sìɔ̀ kɔ̃in zaìn nyɛɛ, nì Baɓoɔ mɛ kaà ɓó dyí kánáá pu. Ɔ náa nyu-nyu kpá nyɔ ɓèɔ̀ gbo, ɓɛ́ wa ké kà nì wuɖu ɓèɔ̀ nyu vɔ̀sì m̀ zàà wuɖuún kàùn wɛ̃ dyí ɓáa kɛɛ dyé.
Nyuɛ ɓɛ́ nì ɖɛ-kɔ̃in-zaìn-zaìnɔ̀ ké se múin wɔ̃́uń kàmà. Ɓɔ́ ɖɛ ɓè seà fɔ̀nɔ̀-hwòɖò jɛ́ɛ́ɔ̀ dyí ɓá kɛɛ kɔ̃in wùɖùɛ̀n mìɔ. Ðɛ jĩ̀-kà nì mu cɛ̃ìn ɓɛ́ nyɔ ɓèɔ̀ ké fɔ̀nɔ̀-hwòɖò jɛ́ɛ́ɔ̀ múin wɔ̃́ kɛɛ mɛ ɓá ɖɛ wa dyuò dyí kĩ́ín ɓá ɖɛ m̀ nìà jè cɛ̃iń nyɛ jè dyíɛɛ dyí.