Sɛɛ -n ˈkä ɔ Lagɔ a dɛ gbëaa yɩbhlɩnɩ ˈnɩ?

1, 2. Lagɔgligbï a dɔˈwʋ, ˈwʋpälɩkïbhëa -ma tula ɔ nɩɩ, -a kä -a ˈkä gbëawɛlɩ yɩbhlɩnɩ ˈnɩ?

SƐƐ -a ˈkä ɔ ˈzʋ nzɩ -a ˈkä Lagɔ yɩbhlɩnɩ ˈnɩ? Lagɔgligbï ˈwuë a ˈcɩawɛlɩɩ ˈmö -a ˈkä ɔ ˈmö vɩɛ -a? -Aa bhɛnɩ -a ˈkä yɩ ˈwuë ˈmö vɩɛ. -A yi aˈbhë bhɛnɩ -kë, sɛɛ -a ˈkä ɔ yɩ glaˈmö a -na -a ˈcɩa gbëaa yɩbhlɩnɩ ˈnɩ?

² ˈSaa wa sɛnɩɛ ˈmö Lagɔ a dɔˈwʋ ˈnɩɛ ˈwlʋnɩ zaa, -a nɩ tɛlɩ sɛ -a ˈkä gbëawɛlɩ yɩbhlɩnɩ, wɛlɩ a -mi nɩkpa ˈwuë -wanɩɛ ˈmö. Yɩɛ, ˈpɛlʋpäɲɔ -bhlʋ -ɲɛ pɩapɩaɲɔ ˈsɔ -wʋ lekwi a ˈbhʋɔnɔɔ a za kpɛnɩ dɔˈwʋ. ˈPɛlʋpäɲɔ lɛ nɩɩ, lekwii kä ˈmetile ta, pɩapɩaɲɔ lɛ nɩɩ ɛˈɛ ˈmetile ta ˈwʋ ghlɛ. Sɛɛ wa ˈkä ɔ -lɛ a wɛlɩɩ ˈla ˈwlu -dɩ ˈnɩ? ˈMɛtɩlɩ wa ˈkää ˈwʋ ˈlibhï wa ˈkä lekwii yɛka.

3. -Yɩ kä ɔ ˈŋlɩ ˈn wa yi ɔ Biblë ˈcɛlɩ ˈnɩ?

³ ˈMɛtɩlɩ a sɛ a -lu -bhölɩ bhä -wʋ -kaɲɩɛ kwänɩ nzɩ -a ˈkä lagɔgligbï ˈmö gbäzɩ -a? Nn -wʋ -bhölɩ, Biblë mɛɛ. Lagɔ yɩbhä nɩɩ, nɩkpa ˈwuë nɩ ˈcɩɛ gbëaa ɔ dɛ, nza ɔ ˈwälaa Biblë. Wa yɛ -bhlɛ Biblïa a miliyalie -bhɛ. Wa ˈcɛlɩnɛ gbɩ a 2.600 a sɛ ˈmö. Nɩkpa ˈwuë bhɛnɩ wa ˈkä ˈwa -dagwälɩgbɩ ˈmö, Lagɔ ˈa gbëawɛlɩɩ ˈmö zɛlɩ.

4. -Lii a -mii Biblë ˈcɩaɲɩ ɔ ˈnɩ?

⁴ Biblë -lɛ dɛsɛkälu a -mu Lagɔ ɲɩaɲɩɛ. Ɛ ˈnɩa -bhölɩ, ˈsaa ɛ ˈcɩaɲɩɛ zɩˈɛ, -a ˈnaa ˈki a -yi. -Wa -bhölɩnɩɛ -mä zlɩ ˈmö, Lagɔ ˈa dlɩpäsaa, sɛ ɔ -wʋä, ˈn ˈsaa ɔ ˈkää zɩkö ˈyli ˈwälanɩ a wɛlɩ, ˈmö ɛ ˈcɩaɲɩɛ. Bhlaˈmö, sɛɛ Lagɔ -su a-a nɩkpa, yɩ wɛlɩ ˈmö ɛ ˈcɩaɲɩˈɛ. Ɛ sʋlʋnɩɲɩˈɛ -lii -yɩ ˈkää zɩkö ˈyli ˈwlʋnɩ a wɛlɩ, ˈn sɛ -a ˈkää ˈzʋ -a ˈkä Lagɔ ˈa ˈpɩwʋlelea a ˈyio ghlɩ.

-Yɩ ˈkää ˈŋlɩ ˈn -n bhɛnɩɛ -n ˈkä Biblë dlɩ ˈwʋ -kä

5. Wɛlɩ a -mɩɩ tula ɔ nɩɩ, Biblë -ɲɛ sɩasɩ ˈsɔ yɔwʋ yɩ mönɩɛ ˈnɩ?

⁵ -Lii a -bɛ kää ˈŋlɩ ˈn -a kɩɛ dlɩ ˈwʋ nɩɩ, Biblë -lɛ -tiamö Lagɔ ˈa wɛlɩɩ. Yɩ glaˈmö a -bhlʋ mʋä nɩɩ, Biblë -ɲɛ sɩasɩ ˈsɔ yɔwʋ yɩ mönɩɛ. Bhlaˈmö, nɩkpa -mumuë pä a-a dlɩ nɩɩ, dʋdʋkpäta -lu a glɩɛ -gömö. -Mä nɩkpa -kpɔ a ˈpɩɔ ˈyli mää ylʋʋ bhlinɩɛ a -nʋa -tɔnɩ a-a nɩɩ, tɩmɛ -bhlʋ mɛ -su a-a dʋdʋkpäta. Wa lɛ nɩɩ, ɛ ˈpäpänɩɛ ɛɲɩ dʋdʋkpäta yɔwʋ, ɛ glipï -yɩ -wʋä -mä ˈghäyɩ ˈwʋ -bhli 3.500 ˈn -mä zɛmö a -ni -bhliˈɛ 3.500. Maa ˈylʋbö a 3.500 dɛˈɛ ˈn Biblë a ˈcɛlɩɲɔ -bhlʋ yi a-a nɩɩ. Lagɔ “biza ɔ bizaa dʋdʋkpäta, aˈaa -lu ˈwʋ -glɛ.”—Job 26:7.

6. ˈLɩlɩlɩ a dɔˈwʋ, ˈsaa tula ɔ nɩɩ Biblë, Lagɔ ˈmö ɛ ˈbhöönɩɛ -tiasɛ ˈmö ˈnɩ?

⁶ ˈLɩlɩlɩ a dɔˈwʋ -yɩ tula nɩɩ Biblë, Lagɔ ˈmö ɛ ˈbhöönɩɛ -tiasɛ ˈmö miɛ nɩɩ, ɛ -kä -lii -yɩ ˈkää zɩkö ˈwʋ ˈplɩ a wɛlɩ ˈmö -sɛnɩ, sɛ ɛ gbää -sɩbhä yɩ ˈwlʋnɩɛ ˈyli. Lagɔ -ɲɛ nɩkpa wa gbää wa -yi ˈsaa ˈkää ˈyli ˈwlʋnɩ ˈsɔ ˈnɩɛ ˈwlʋnɩ. Lagɔ -yi ˈsaa ˈkää ˈzɩgblɛ ˈwʋ ˈplɩ, ɔ -yii ˈn ˈsaa ɔ -sɛnɩɛ ˈmö ˈyli yɩ ˈwlʋnɩɛ klɩpaa.

7. Wɛlɩ a -mii Biblë bhïla ɔ -yɩ ˈwlʋnɩ ɔ bhlaˈmö yli ˈnɩ?

⁷ ˈSaa Biblë nʋ a-a -yɩ yi ˈyli ˈwlʋnɩɛ, yɩ glaˈmö a -nɩ a -bɛ ˈwlʋnɩ a-a bhlaˈmö ˈyli. ˈYlʋbö a 700 tʋʋ -mä, ˈn Biblë yi a-a nɩɩ -glɔ wa laa Betelɛɛmö -mä wa ˈkäa Zezwii gwälɩnɩ, ˈn -sɩbhä yɩ ˈwlʋnɩɛ -tiasɛ ˈyli. (Mika 5:2; Matie 2:3-9) Wɛlɩ Biblë bhïla a-a Zezwii a dɛ, nʋ a-a nɩɩ, ˈdumöwʋyu -bhlʋ -ɔɔɔ ɲɩbhɛlʋ -yi, mɔɔ ˈkɔɔ gwälɩ. Yɩ yiˈɛ nɩɩ, lʋayi a ˈdwi kʋgbä ngbï [Mila a glʋ -bhlʋ kʋgbä] a za wa ˈkɔɔ plɩ. Yɩ ˈwuë ˈyli yɩ ˈwlʋnɩɛ. ˈLɩlɩlɩ a dɔˈwʋ, nɩkpɛ ˈnɩ a bhɛnɩ-ɔ ˈkä -sɩbhä a wɛlɩ ˈla -yi!—Isaïe 7:14; Zekaria 11:12, 13; Matie 1:22, 23; 27:3-5.

8. Wɛlɩɩ Biblë gbää -yɩ ˈkä ˈyli ˈwlʋnɩ a glaˈmö a -ni -mii -wʋ ɔ zɩˈɛ ˈyli ˈwlʋnɩ dɔˈwʋ ˈn ˈsaa yɩ tula ɔ ˈnɩ?

⁸ Zɩkö a wɛlɩ Biblë bhïla a-a, yɩ -bɛ -wʋ zɩˈɛ ˈyli ˈwlʋnɩ dɔˈwʋ. Miɛ dɛˈɛ:

• “Bhlɩ -mɛmɛɛ -ɲɛ bhlɩ -mɛmɛɛ ˈsɔ yia tʋ gwɩ. ˈKämanɩɲɔ -mɔmɔɔ a -nʋä -ɲɛ ˈkämanɩɲɔ -mɔmɔɔ a -nʋa ˈsɔ wa yiaˈɛ tʋ gwɩ. ˈBhlɩ a -bɛ -gömö a dʋdʋʋ yia tɩtlɛnɩ, ŋɔmʋgupegupe yia -mä yi, gwi ˈkädɩ yia nɩkpa ˈlɩbhä.”—Lwiikö 21:10, 11.

• “ˈƝiɲlolii yi nɩkpa ˈwlu ˈmänanɩ teɲii.”—Matie 24:12.

• “ˈPɩwʋ -kä ˈyli bhɩɛ yi a ˈtɛɲɩ ˈmö [...] nɩkpaa, waɲɩ a ˈyize a gbʋʋ mʋʋ ˈkʋää plɛnɩ, moni a tʋʋ mʋʋ ˈkʋää ˈwlumö -sunɩ [...] waˈaa wa ˈkä wa -lowluwa ˈklʋkpämö zʋ, [...] ˈklɛkäwa, -glakäwa ˈmö wa ˈkää glɩnɩ. ˈSaa glɩnɩɛ -li a -lii, wa ˈnaa ˈkɩ -wa, [...] waˈaa wa ˈkä nɩkpɛ a wɛlɩ wɛlɩ la, mäˈä ˈpɩwʋ a ˈbhlibhïle, ˈmö wa ˈkää ˈwä dila ˈwuë yowʋ ˈɲɛ, wa ˈkä Lagɔ ˈa wɛlɩɩ kplɩ sɛ tlinɩ.”—2 Timotee 3:1-5.

-N ˈni ɔ ˈwʋ yɩlɩ nɩɩ, wɛlɩ ˈlɛ ˈwuë -wʋ zɩˈɛ ˈyli ˈwlʋnɩ dɔˈwʋ -a? Biblë ˈmö a wɛlɩɩ -yɩ ˈkää zɩkö ˈyli ˈwlʋnɩ, mii tula nɩɩ Biblë ˈnɩ -bhö ˈfʋ a ˈbɔgʋʋ. Ɛ ˈmö a wɛlɩɩ, Lagɔ ˈmö yɩ ˈbhöönɩɛ ˈmö!—2 Timotee 3:16.

Biblë ˈmö a wɛlɩɩ, ˈmö wa zigbanii bhä -a?

9, 10. -Yɩ tula ɔ nɩɩ Lagɔ ˈnɩɛ -zɩ nɩkpɛ ˈyi ˈtatinɩ ɔ ˈkä Biblë ˈmö a wɛlɩɩ ˈmö zigbanɩ ˈnɩ?

⁹ Pää -ka dlɩ. -Nmö -lɛ libhonʋwa a ˈbhidɩba zaa, gböö wa kää wa ˈkä -gänɩ a ˈbɔgʋ ˈmö n ˈcɛlɩɛ. -Naˈa -gblɩɲɔ -kä ˈsaa -n ˈcɛlɩ a-a ˈmö zigbanɩ, sɛɛ -n ˈkä ɔ zʋ ˈnɩ? -N ˈnaa ˈkɩ ɔ ˈwlu gïganɩ -a? Sa -bhlʋ -kpɔ ˈla, -sɩbhä Lagɔ ˈnɩɛ -zɩ nɩkpɛ ˈyi ˈtatinɩ ɔ ˈkä ˈɔ wɛlɩɩ ˈmö zigbanɩ.

¹⁰ -Mumuë yɛla a-a -lii ˈmö wa ˈkä Lagɔ ˈa wɛlɩɩ ˈmö zigbanɩ. Maa yɩˈɩɛ ˈwʋ ˈplʋ. Zɩˈɛ a Biblïa, -a -kä yɩ ˈmö a wɛlɩɩ bhlaˈmö a -nii yɔwʋ kwänɩ, -a -yɩ sɛ nɩɩ -bhlʋ yɩ glɩnɩɛ. Mii tula nɩɩ sɛɛ ˈylʋbö plɩɛ, Biblë ˈnɩɛ ˈmö zigbonɩ.