ˈSaa -lɛ ɔ ˈtɩtɩ a -tɩtɩɩ ˈnɩ?

1. ˈSaa -lɛ ɔ Lagɔ ˈa ˈtɩtɩ a -tɩtɩɩ ˈnɩ?

Lagɔ yɩbhä nɩɩ mäˈä dʋdʋ ˈwʋ a nɩkpaa ˈwuë nɩ -bhölɩnɩ ˈmäna ˈmö. Ɔ -bhɛ dʋdʋkpäta -ɲɛ a ˈwʋ a -lii ˈwuë ˈsɔ. Ɛˈɛ -bhö ɲɩasɛ, maa nɩkpa ɔ -waa nza-a. Ɔ yiaˈa -pa ˈbhlɩ -gömö a nɩkpa ˈwuë -li a -lii ˈɲɛ. Ɔ yi -lii ˈwuë -yɩ yɔlɔa nɩkpa ˈyli bhɩa.—-A zɛlɩ Jérémie 29:11 ˈmö.

ˈPɩwʋ a ˈkämanɔ -bhlʋ aˈbhë ˈnɩɛ -bhlɛ tɛkäsɛ yɔwʋ kälɩkälɛ, gu -ɲɛ ˈkwie ˈsɔ ˈyli bhɩa. Maa ˈtɩtɩ a -tɩtɩɩ -bhölɩ. Lagɔ yiaˈa -pa ˈpɩwʋ a ˈkämanɔ ˈyli -sɛ, ɔ ˈkä -lɛ ɔɲɩgäsɛ a -nʋ ˈzʋ. ˈTɛɲɩ ˈla ˈmö, -wa ˈkää -bhölɩ, yi ˈtɩɩglɩglɛ ghlɩ. Wa yi ˈmö nɛnɩ ˈyize.—-A zɛlɩ Isaïe 25:8 ˈn Isaïe 33:24 -ɲɛ Daniel 2:44 ˈsɔ ˈmö.

2. -Yɩɲɩ za -a ˈkä ɔ ˈwʋ ˈpäpanɩ -a ˈkä ˈtɩtɩ a -tɩtɩɩ bia ˈnɩ?

Lagɔ ˈmaa ˈkä nɩkpazokuu ˈyli bhɩa ˈwë, ˈn ˈzwɩzize ˈkää bhɩɛ. (Sophonie 2:3) -Zlɩmɛ -li ˈla ˈkä ɔ ˈyli ˈwlʋnɩ ˈnɩ? -Lizokuu ˈwuë -yɩ ghlɩɲɩɛ zɩˈɛ, Lagɔ ˈa wɛlɩɩ -kaɲɩ a-a -pa yɩ ˈdɩ ˈɲɛ ˈwë. -Lizokuu ˈwuë -yɩ plɩɛ mäˈä dʋdʋ ˈwʋ, mii tulanɩɲɩɛ ˈylimö nɩɩ, ˈtɛɲɩ Lagɔ ˈkää nɩkpazokuu ˈyli bhɩa yɛ ghlɛ ˈwë.—-A zɛlɩ 2 Timotee 3:1-5 ˈmö.

3. ˈSaa -a kä ɔ -a ˈkä nʋ ˈnɩ?

-A kä -a ˈkä Lagɔ yɩbhlɩnɩ -mä ˈɔ wɛlɩɩ wa laa Biblë ˈmö. Sɛɛ dɩba -wa ˈɔ yuëa ˈn ɔ celuë ˈbɔgʋ ˈwʋ, -sɩbhä ma-a. Mɛɛ ˈcɩaɲɩɛ sɛ -a ˈkää zɩˈɛ sasɛ -aˈa zɩkpaa -su, ˈn -a ˈkä bhäla ˈkwädlɩnɩ mäˈä dʋdʋ ˈwʋ -bhölɩnɩ. Miɛ abhlɩ daˈa, -a -kä Biblë ˈcɩɛ dɔˈwʋ -wʋ, yɩ ˈnaa ˈkä -mumuë dlɩ yɔwʋ nɛnɩ. Maa -li a -lii Lagɔ gbää ɔ -kaɲɩ zɩkö ˈɲɛ a za, -a nɩ tɩ -mumuë ˈyi ˈtatinɩ wa -kaɲɩ swɩ yɔwʋ ˈkuanɩ.—-A zɛlɩ Proverbes 29:25 -ɲɛ ˈKlʋkälɩwɛlɩɩ 14:6, 7 ˈsɔ ˈmö.