Wa ˈcɛlɩ a-a Zezwii a dɛ

-N ylɩ bhä nɩkpa -wa -wʋä -lɛ foto ˈklʋ ˈwʋ -a?— Matie mɔ, Maakö, Lwiikö, Zaah, Piɛlɩ, Zaakö, Zwiidɩ ˈn Pɔɔlʋ. Nɩkpa nɩ ˈwuë, Zezwii ˈa ˈtɛɲɩ ˈmö a nɩkpa a-a ˈn wa yi a-a Zezwii a dɛ ˈcɛlɩ. -A nɩ ˈcɩɛ wa dɛ.

Wa glaˈmö a -mumuë ta, Zezwii ˈa tietiewaa wa glɩnɩ a-a ˈn wa -ɲɛ Zezwii ˈsɔ yi a-a lagɔwɛlɩ bia. -N -yi bhä nɩkpa la ta -kpɔ -a?— Matie mɔ, Zaah ˈn Piɛlɩ muëë. Zezwii ˈa tietiewaa Matie -ɲɛ Zaah ˈsɔ, mʋa -yi a-a Zezwii sasɛ, ˈn wa yi a-a -bhlʋbhlʋ Zezwii a -gömö a wɛlɩ ˈbɔgwɩɩ ˈmö ˈcɛlɩ. Zezwii ˈa tietieɲɔ Zaah mɔ ˈcɛlɩ a-a ˈbɔgʋ wa laa ˈklʋkälɩwɛlɩɩ, ˈn ɔ yiˈɛ ˈbɔgwɩɩ -mimii ˈcɛlɩ ˈmö wa laa Zaah ˈa tɛkäbɔgʋʋ, Zaah ˈa ˈsɔnabɔgʋʋ -ɲɛ Zaah ˈa tanabɔgʋʋ ˈsɔ. Zezwii ˈa tietieɲɔ Piɛlɩ ˈcɛlɩ a-a ɔbhlɩ ˈbɔgwɩɩ ˈsɔ -yɩ -wʋä -mä Biblë ˈmö. Bɔgwɩɩ ˈla miɛ Piɛlɩ ˈa tɛkäbɔgʋʋ -ɲɛ Piɛlɩ ˈa ˈsɔnabɔgʋʋ ˈsɔ. -Mä Piɛlɩ ˈa ˈsɔnabɔgʋʋ ˈmö, -mä ɔ ˈcɛlɩ a-a ˈtɛɲɩ -ɛɲɩ ˈmö Zoova ˈa wɛlɩɩ ˈbhöönɩ a-a -mä zlɩ ˈmö ˈn yɩ yi a-a Zezwii a dɛ nʋ nɩɩ: ‘Na yowli -bhʋlʋ -kpɔ n -waa mɔɔ dɛˈɛ, ˈmö n -sɛɛ -lɛ.’

Nɩkpa -muëˈla wa -wʋä -lɛ foto ˈklʋä, wa ˈcɛlɩmöˈɛ wabhlɩ Zezwii a -gömö a wɛlɩɩ. Wa glaˈmö a -nɔɔ -bhʋlʋ a ˈŋlɩɛ Maakö. Ɔ -wʋ a-a -lɛ ˈn wa yi a-a Zezwii köbhä zaa ɔ yɩ -lii ˈwuë -yɩ plɩ a-a ˈwʋ ˈylɩmö. -Mɔmɔ a ˈŋlɩɛ Lwiikö. -Dʋtaayi ɔ glɩnɩ a-a, Zezwii ˈkuä ˈwë ˈn ɔ yi a-a klɩtɩɛ ˈzʋ.

-Muëˈla ˈsɔ -kpɔ -wa ˈcɛlɩmöä Biblë ˈmö ˈa ˈbɔgwɩɩ -n ˈylɩɛ ˈlɛ foto ˈklʋ ˈwʋ, Zezwii ˈa -daayuë ˈtikïyiee. -N -yi bhä ˈwa ˈŋlɩ -a?— Wa ˈŋlɩɛ Zaakö ˈn Zwiidɩ. Tɛtɛɛdɔˈwʋ wa a-a Zezwii dlɩ ˈwʋ -kä. Wa tɔnɩ a-a wabhlɩ nɩɩ ˈwlumö -wɔ a-a ɲimo dɔˈwʋ ˈla. Bhäla, wa yi a-a Zezwii dlɩ ˈtɛɛnɩ ˈn wa yi a-a klɩtɩɛ ˈzʋ.

ˈGbëbhlenɩnɔ -mɔˈla -ɔ ˈcɛlɩmöä Biblë ˈmö ˈa ˈbɔgwɩɩ -n ylɩɛ -lɛ foto ˈklʋ ˈwʋ, ɔ ˈŋlɩɛ Pɔɔlʋ. Dɛ ɔɔˈa -bhlɛ klɩtɩɛ ˈzʋ, ɔ ŋlɩ a-a Sɔɔlʋ. Ɔˈɔɔˈa klɩtɩɛwa -wa ˈlɩlɩlɩ ˈn ɔ ɲu a-a mlɩ. -N -yi bhä ˈsaa kä ˈŋlɩ ˈn Pɔɔlʋ yɩbhä a-a ɔ ˈkä klɩtɩɛ ˈzʋ -a?— ˈYlɩ -bhlʋ ˈmö Pɔɔlʋ -wʋ a-a lowlu ˈmö mö dɔˈwʋ, ɔ nɛmö a-a -lɛ yio ˈwʋ ˈn ɔ yi a-a wäzɩ wɛlɩɩ ˈnʋ, -yɩ ˈbhöönɩ -mä ghäyɩ ˈwʋ. Zezwii mɔ a-a! Ɔ yi a-a Pɔɔlʋ nimï ˈyɩbhä nɩɩ: ‘ Sɛ yɩ -wʋ bhä ˈmö ˈn -n -gblɩ bhä ˈna -nʋa ˈnɩ?’ Yɩ ˈplɩɛ saˈa ˈwë ˈn Pɔɔlʋ yi a-a ˈmö zigbonɩ ˈn ɔ yiɛ Klɩtɩɛ ˈzʋ. Pɔɔlʋ ˈcɛlɩ a-a Biblë ˈmö a ˈbɔgwɩ 14, tɛɛnɩ Ghlɔɔmö a -nʋa a ˈbɔgʋʋ ˈwʋ -këë -n ˈkä -mä Ebleewaa a ˈbɔgʋʋ ˈwʋ ghlɛ.

-A zɛlɩ Biblë ˈmö zila ˈwuë ˈmö, ɛˈɛ -bhö ɔ mɩ?— Sɛɛ -a zɛlɩɛ Biblë ˈmö, -sɩbhä -a ˈcɩɛ -lii a -bɛ Zezwii a dɛ. -N yɩbhä bhä -n ˈkä -lii -mimii Zezwii a dɛ ˈcɩɛ -a?—