Pɔɔlʋ ˈa -daayu a ˈyu ˈnɩ a-a ŋänɩ

-A nɩ ˈcɩɛ -lɛ ɲɛgbayu nɩ -ɔ kää ˈŋlɩ ˈn ˈɔ -da ˈa -daayu yiɛ ˈpʋ a dɛ. Zezwii ˈa tietieɲɔ Pɔɔlʋ mɔ -lɛ a-a ˈɔ -daa a -daayu mɔ. -Aaˈa ɲɛgbayu nɩ a ˈŋlɩ -yi, maa -a -yi ˈsaa ɔ nʋ ˈn -a nʋä nɩɩ, ɔˈɔ a-a ŋänɩ. -N yɩbhä bhä -n ˈkä ˈsaa ɔ nʋä yi -a?—

Pɔɔlʋ -wʋ a-a -mä Zeluzalɛɛmö -jie ˈmö. Zezwii a wɛlɩɩ ɔ bia nza wa ˈpɔɔ -jie ˈmö. Nɩkpa -mumuë -gblɩ a-a Pɔɔlʋ nza wa yɩbhä a-a wa ˈkɔ -lizoku ˈwlu nʋ. Wa lɛ naa: ‘-A nɩ ˈɲɛ ˈslʋja a ˈkämanɩɲɔ ˈdɩ, ˈɔ ˈslʋja nɩ kwä Pɔɔlʋ -mä -zijletuwaa ˈa ˈyila ˈklʋ. -A ˈkä ˈyio -kʋ nzɩ wa -ɲɔɔ -kä ˈplɩɛ yi, -a ˈkɔ köbhä nzɩ -a ˈkɔɔ ˈlɩbhää ɔ ˈkä ˈku!

Pɔɔlʋ a -daayu a ˈyu yiɛ wɛlɩ ˈla ˈnʋ. ˈSaa ɔ nʋ bhä ˈnɩ? -Mä ɔ ghlɩnɩɛ Pɔɔlʋ -jie ˈmö ˈn ɔ yɔ a-a wɛlɩ ˈla ˈɲɛ. Pɔɔlʋ ˈnwɩɛ cuu, ɔ lɛ -lizoku wa yɩbhä wa -kaa ˈwlu nʋ, mö -n ˈkɩ ˈslʋja a ˈkämanɩɲɔ ˈɲɛ. -Na dɔˈwʋ, yɩ ˈtɛɛnɩ ɔ Pɔɔlʋ a -daayu a ˈyu kɛˈmö ɔ ˈkä ˈslʋja a ˈkämanɩɲɔ ˈdɩ ˈɲɛ -a?— Nn, yɩ ˈtɛɛnɔ a-a kɛˈmö. Ɛˈɛ -bhö ɲɩasɛ, maa ˈslʋja a ˈkämanɩɲɔ ˈla, nɩkpɛ ˈkɔdɔ ɔ glɩnɩ a-a la. Maa Pɔɔlʋ a -daayu a ˈyu ˈnɩɛ ŋänɩ ˈn ɔ yi a-a ˈslʋja a ˈkämanɩɲɔ ˈdɩ ˈɲɛ.

ˈSlʋja a ˈkämanɩɲɔ -yi a-a sɛˈɛ ˈtɩɩ sɛ ɔ ˈkää zʋ. ˈSlʋja a 500 ˈmö ɔ ˈlibhïä ˈwʋ nzɩ wa ˈkä Pɔɔlʋ ˈwʋ -kʋ. ˈDɩ ɔ ˈɲuä nɩɩ, -lɛ a sabʋsɛ ˈla, wa nɩ kwämö Pɔɔlʋ -mä sezalee. Pɔɔlʋ yi bhä daˈa ŋli ˈpʋ -a?— Nn, nɩkpazoku ˈla ˈnɩ a-a bhɛnɩ wa ˈkɔ -lizoku ˈwlu nʋ! Wa ˈsaa wa yɩbhä a-a wa ˈkä nʋ ˈnɩɛ ˈwʋ plɩ.

ˈSaa -n ˈcɩɛ bhä wɛlɩɩ la a dɛ ˈnɩ?— Sɛ Pɔɔlʋ a -daayu a ˈyu ˈnɩ a-a ŋänɩ la -n bhɛnɩ -n ˈkä -sɩbhä zʋmö. -A -kä Zoova ˈa wɛlɩɩ bia dɔˈwʋ ˈwʋ, -aa -kä -a ˈkä ŋänɩ. -N -kä Zoova ˈa wɛlɩɩ bia dɔˈwʋ ˈwʋ, -n yi bhä nɩkpa a ŋanɔɔ ku ˈmö kä -a?— -N nɩ nɩpka a ŋanɔ ku ˈmö -kä, -n yi -mumuë puë.