-Muë -gänɩɛ -aˈa ˈwlugïganɩzɩkpaa ˈyuku a ˈbɔgʋʋ wa ˈpää

‘A kä a ˈkä lagɔwɛlɩɩ a ˈcɩawa glɩnɩɩ.’ (Eb. 5:12) A ˈpää -kä dlɩ! Zoova, -ɔ glɩnɩɛ mäˈä ˈpɩwʋ a ˈcɩaɲɔ ˈkɔdɔ -ɔ zie ˈwʋ, yɩbhä nɩɩ, -a nɩ ˈcɩa nɩkpa ɔ -gömö a wɛlɩɩ! -A ˈkä Zoova a dɛ gbëawɛlɩɩ ˈcɩa -mä ˈligbë ˈmö, -mä lagɔzɩkpa ˈmö, ɛ -käˈɛ -mä lagɔwɛlɩbialibhoo ˈmö, yɩ glɩnɩ -jɔlʋ ˈn libhoo ˈkɔdʋʋ. Maa, sɛɛ -a ˈkä ɔ ˈzʋ -a ˈkä libho ˈla nʋ ˈnɩ?

Zezwii ˈa tietieɲɔ Pɔɔlʋ ˈa wɛlɩɩ ɔ ˈcɛlɩɛ Timotee ˈwʋ, yɩ zɛmösɛnaa -wʋ -mä: “Lagɔ ˈa wɛlɩɩ a ˈbɔgʋʋ, zɛlɩnuu nɩkpabhë a ˈyila ˈklʋ ˈmö, bhïla Lagɔ ˈa wɛlɩɩ, -sɛsɛnii nɩkpa dlɩ -gömö.” Pɔɔlʋ yiˈɛ nɩɩ: “-N -kä -sɩbhä ˈzʋʋ, -naˈbhë, -sɩbhä yi -na ˈpʋpʋɛ ˈmö -kä, ˈn -wa -pʋnɩmöä ˈyukwlii, -sɩbhä yiˈɛ wa ˈpʋpʋɛ ˈmö -kämö.” (1Ti 4:13, 16). Wɛlɩɩ a -mi kää nɩkpa a ˈpʋpʋɛ ˈmö, mö -n -suä. Zaa, -n ˈkä -naˈa ˈmözɛlɩsaa -ɲɛ -naˈa ˈcɩacɩasaa ˈsɔ sasɛ ˈyli köbha, teɲii yɩ kää dɛsɛ. Blosu ˈlɛ -kamö kwänɩ -n ˈkä -sɩbhä ˈzʋ, nza wa ˈcɛluä. -A nɩ yɩlɩɛ -ka -wʋ ˈmö a -lii -mimii yɔwʋ.

-Lɛ kpɩɩ ˈwuë ˈklʋ, Biblë a gbɛlʋ -wʋ -lɛ. Gbɛlʋ ˈla, wʋ -lɛ Biblë ˈmö a ˈpäpägba -a -glɛɛ ˈcɩɛcɩɛkïbhëa -n ˈkää yɔwʋ yɩlɩ ˈwʋ. Ɛ yiˈɛ ˈwʋpälɩwɛlɩɩ -yɩ -kamöä sɛɛ -n ˈkää ˈcɩɛcɩɛkïbhëa ˈmö a ˈdɩmözʋwɛlɩɩ -gänɩ, sʋlʋnɩ.

Zoova mɔ -lɛ “ˈcɩaɲɔɔ ˈkɔdɔɔ.” (Is 30:20) Miɛ abhlɩ, blosu ˈlɛ -yimö kwänɩ, -n ˈkä -naˈa ˈmözɛlɩsaa -ɲɛ -naˈa ˈcɩacɩasaa ˈsɔ nɛnɩmanɩ. Maa, tɩ dlʋ nɩɩ, tɩtɩ -n -suä, Zoova ˈmö yɩ ˈbhöönɩɛ ˈmö, ˈn mɔɔ wäzɩnɩɛ ɔɲɩ nɩkpa ˈwʋ. (Zaah 6:44) Yɩ za, bhibhe ˈkwädlɩ Lagɔ, ɔ -kamö ˈɔ ˈwugɔmʋʋ ˈɲɛ. Lagɔ ˈa wɛlɩɩ ˈmö -n nɩ ghlɛnɩ ˈmö, -n ˈkä nɩkpa lagɔwɛlɩɩ ˈɲɛ. Zoova ˈa ŋlɩɩ ˈmö -n nɩ ˈghlimanɩ. ˈTɛmanɩ ˈyli yɔwʋ, nzɩ -wa -pʋnɩmöä ˈyukwli ˈkä teɲii ɔ -wawʋʋ dlɩ zɛmö -kä.

Libhoo -n kää muä nɩɩ, -n ˈkä ˈtɩtɩɩ -yɩ kää teɲii dɛsɛ, nɩkpa ˈnɩɛ -bhlɛ ˈnʋʋ, -n ˈkʋaɲɩ ˈcɩa. -A kɩ dlɩ ˈwʋ nɩɩ, “ˈmötɛɛnɔɔ Lagɔ ɲɛɛ,” a za, -lii ˈwuë -n ˈkää nʋʋ, yi sasɛ ˈwʋ ˈplɩ.—1 Piɛ. 4:11.

-Na ˈbhɩa lagɔwɛlɩbiawaa -n -ɲɛ nʋnɩɛ libho ˈwʋ,

-Muë -gänɩɛ Zoova ˈa Bhlɩnɩwaa a ˈwlugïganɩzɩkpaa ˈyuku