ˈSɩbhäsɩbhäwaa -ɲɛ ˈwlugïganɩwaa ˈsɔ a glaˈmö -wʋwɛ, -jɔlʋ ˈkɔdʋä

Yizlaɛlɩ a lagɔligbëa ˈkää ˈsɩbhɔ yi a dɔˈwʋ, wa nʋ a-a libho teɲii ˈn wa yi a-a moni a -bɛ plɩ. ˈLɩlɩlɩ a dɔˈwʋ, Yizlaɛlɩ a -nʋa ˈwuë kumösusɛ wa nʋmö a-a libho ˈla. (1Chron. 29:2-9; 2Chron. 6:7, 8) ˈSɩbhäsɩbhʋ bhɩɛɛ zɛmö ˈwë, yizlaɛlɩ a -nʋa, -wa gïganɩ a-a lagɔligbëa ˈwluu, mɩɩ tulaa sɛ wa -wʋ a-a Lagɔ ˈa wɛlɩɩ a dɔˈwʋ. (2Rois 22:3-6; 2Chron. 28:24; 29:3) Zɩˈɛ, klɩtɩɛwa a -bɛ, ˈwa ˈtɛɲɩ ˈn ˈwa ˈmötɛɛnɔɔ ˈmö wa libhïä ˈwʋ ˈn wa ˈsɩbhää Lagɔ ˈa ˈKämanɔɔ a -bïdi -ɲɛ ˈwluyɩbhäyɩbhɩ ˈkädɩ a -bïdi ˈsɔ, wa gïganiɛ ˈwlu, ˈn wa zʋnɩˈɛ ˈyli yɩ ˈkä ˈwlɩlɩ -wʋ a za. -Mä -aˈa zɩkpa ˈmö -a -ɲɛ Zoova ˈsɔ -kä -sɩbhä libho nʋʋ, yɩ -lɛ -jɔlʋ ˈkɔdʋ, ˈn yɩ -lɛˈɛ Lagɔ a bʋbɔbʋbʋ a ke -mämaa -a kää teɲii dɛsɛ.—Ps. 127:1; Kl. 7:15.

-A BHƐNƖ -A ˈKÄ LIBHO NƲMÖ ˈN . . .

• 

  -A -kä -aa yɔwʋ a -lii ˈwlu gïganɩ sɛɛ ˈwluyɩbhäyɩbhɩɩ bhɩɛ ˈyize. ˈN -a nɩ bhɛnɩ -a ˈkä -mumuë kwänɩ -a ˈkä ˈkämanɔɔ a -budu ˈmö a libho nʋʋ, dɛɛ -a glɩɛsɛ, -a nɩ gïganɩ -lɛ ˈwlu ˈwë -a ˈkäˈa bhäla ˈwʋ -sɔ.

• 

  -A -kä Lagɔ a ˈKämanɔɔ a -budu ˈwlɩlɩ päla, ˈn -a ˈkʋʋ ˈwlugïganɩmö. Nɩkpa a -bɛ -kä ˈgämö libho nʋnɩ dɔˈwʋ -wʋʋ, ˈmäna ˈmö wa nʋnʋä ˈn wʋˈaa ˈmö ˈtɛɛ.​—lv-F 92-93 § 18.

• 

  -A -kä moni ˈwäla. ˈSaa -a ˈkää ˈɲɛɛ ˈnɩ -zu, ɛ yi ‘-fälɛgöya ˈsɔ’ aˈbhë -kë, ˈn yɩ -kä -mä -aˈa dlɩ zɛmö ˈbhöönɩ, yɩ nɛnɩ Zoova dlɩ yɔwʋ.—Mk. 12:41-44.

• 

  -A -kä ˈwʋ ŋlu -a ˈkä -bïdi -yɩɲɩ ˈmö wa nʋnɩɛ Lagɔ ˈa libhoo, ɛ -käˈɛ dɛ wa ˈyɩbhää ˈwlu a ˈsɩbhäsɩbhäwa ˈn -wa gïganiɛ ˈwlu a glaˈmö -wʋmö. ˈN -a nɩ ˈsɩbhä sɛ -yi aˈbhë -kë, -a bhɛnɩ -a ˈkä libho ˈla nʋmö.