ˈCɩa gbëawɛlɩɩ

-A -kä sɛpötablɩ a cʋʋ ˈmö plɛɛ, -Aˈa klɩtɩɛ zɩkpaa -ɲɛ -aˈa lagɔwɛlɩɩ bia libho ˈsɔ ˈWluyɩbhäyɩbhʋʋ a ˈbɔgʋ ˈmö, kïbhëa lilelea -a nʋä “ˈCɩa gbëawɛlɩɩ,” -a ˈkää ˈmö ghlɛnɩ nzɩ -a ˈkä lagɔwɛlɩɩ ˈɲɛ, ˈmö wa ˈkäa -mä zʋ. -A -kä lagɔwɛlɩɩ bia dɔˈwʋ -wʋ a ˈsaa -a ˈkää sɛ tɛlɩ mɩɛ nɩɩ, -a ˈkä nɩkpa Biblë ˈmö a gbëawɛlɩɩ ˈcɩa. Zaa, -a -kä -sɩbhä zʋä yi, nimïyɩbhäkïbhë -ɲɛ Biblë ˈmö ˈa gbɛlʋʋ ˈsɔ ˈmö -a ˈkää ˈmö ghlɛnɩ.

ˈN -a -kä ˈylɩmö nɩɩ, -aˈa wɛlɩ -a bhïla nɛnʋa dlɩ yɔwʋ, -a bhɛnɩ -a ˈkʋa lagɔbɔgʋ yɔwʋ tɩ. A bhɛnɩˈɛ -a ˈkʋa jw.org ˈklʋ a video -bhlʋ ˈylimö tulanɩ. -Lɛ a dɔˈwʋ -a ˈkuë ˈwʋ ˈsɔ ˈylɩmöä mö nzɩ -a ˈkäˈɛ ˈkïbhë -mämaa yɔwʋ yɩlɩ. -A nɩ tɩ ˈylɩ a -bɛ ˈyi ˈtatinɩ yɩ ˈkä plɩ ˈwë nzɩ -a ˈkä nɩkpa -a ˈɲɛ a-a lagɔwɛlɩɩ ˈylɩmöä mö. -A -kä lagɔwɛlɩɩ ˈɲɛɛ yi a sɛ wa gbää -a nɩ ˈzʋa -sɩkaa ˈn -sukuyuëa a libho, bɔgʋʋ wa laa ˈSaa Biblë bhɛnɩ bhä ɛ -kaɲɩ ˈcɩa ˈnɩ? a dɛsɛkäkibhï ˈmö, -mä yɩ ˈbhöönɩɛ. -Mä bɔgʋʋ ˈla ˈmö a dɛɛ wa zʋä dɛsɛkäkibhï, -a yi -lɛ nimïyɩbhäkïbhï -ɲɛ Biblë ˈa gbɛlɩɩ -mimii ˈsɔ ghlɩnɩ, -yɩ -kaɲɩɛ kwänɩ nzɩ -a ˈkä nɩkpa ˈwʋ ˈsɔ ˈylɩmöä mö ɛ -käˈɛ -a ˈkʋa Biblë ˈcɩa a za glɩnɩ.

ˈYio -wʋ möä -mä Lagɔ ˈa ˈpɩwʋlelea ˈwʋ, wʋ -bhli -bhlʋ -kpöö. (Mt 7:13, 14) Zaa -a -kä nɩkpa lagɔwɛlɩɩ ˈɲɛ dɔˈwʋ -wʋ, Biblë ˈa gbɛlɩɩ -a ˈkää ˈmö zɛlɩ nzɩ yɩ ˈkä ˈwa dila kɛ zɩ, ˈmö -a nɩ zɛlɩ ˈmö. (1Ti 2:4) Sɛ -a bhɛnɩɛ -a ˈkä Biblë ˈa gbɛlɩɩ a -bɛ ˈmö ghlɛnɩ nzɩ -a ˈkä lagɔwɛlɩɩ ˈɲɛ, yɩ yi ˈŋlɩ -kä -aˈa slɛlɛ ˈkä ˈyukusɛ ˈmö ˈn ‘-aˈa libho ˈnaa –kaɲɩ ˈklʋ ˈmö ˈkpëakpëanɩ.’ -A -kä -sɩbhä ˈzʋ, yɩ -yiɲɩ teɲii ˈmäna dlɩ zɛmö zʋ ˈn Biblë a ˈcɩacɩa dɔˈwʋ -a yi nɩkpa a -bɛ ghlɩ, -a yi ˈyukusɛ mö ˈyize.—2Ti 2:15.