ˈCɩɛcɩɛ-kïbhëa 13

Sɛɛ a ˈkä bhä -tiamö a lagɔgligbëa yɩbhlɩnɩ ˈnɩ?

Lagɔgligbïï ˈwuë ˈmö Lagɔ yɩbhä bhä nɩɩ, maa -bhlʋ bhä -a? (1)

ˈSaa ˈkä bhä ˈnglɩ ˈn lagɔgligbïï a -bɛ nʋ bhä nɩɩ, Klɩtɩɛ yɩ glɩnɩmö ˈnɩ? (2)

sɛɛ a ˈkä bhä -tiamö a Klɩtɩɛwaa yɩbhlɩnɩ ˈnɩ? (3-7)

1. -Tiamö a lagɔgligbëa -a -lɛ Klɩtɩɛ, a ˈyize ˈmö Zezwii gïla sɛ. Zaa, Lagɔzɩkpa -bhlʋ a ˈyize, a glɩnɩɛ Lagɔ Zoova a -na, ma kää a ˈkä -bhölɩ. (Zaah 4:23, 24; Ɛfɛɛzɩ a -nʋa 4:4, 5) Sɛˈɛ Biblë ˈcɩa nɩɩ, yioo wʋˈʋä ˈklʋ ˈghïli, -wʋ möä -mä Lagɔ ˈa ˈpɩwʋlelea ˈwʋʋ, nɩkpa -wa bhïluä, waˈaa -zu.—Matie 7:13, 14.

2. Sɛˈɛ Biblë gbää nɩɩ, Zezwii a tietiewa -kä ˈku ˈwë, ˈfʋ a ˈcɩawɛlɩɩ -nyɛ nʋnʋlii a -mii ˈnɩɛ Klɩtɩɛ sɛ -wʋ, yi a pɛɛpɛpɛɛpɛ -mä Klɩtɩɛwaa a -zɩkpa jijoˈwʋ plɛ. Nɩkpa -mumuë yiˈɛ -mä Zezwii a -nʋa glaˈmö plɛ wa kʋä ˈwlumö nyima, wa ˈkä ˈwa wɛlɩɩ -gänɩ, nzɩ wa ˈkä Zezwii a -nɩ -gömö panɩ. (Matie 7:15, 21-23; Tietiewaa a wɛlɩɩ 20:29, 30) Nza -a yɩɛ zɩɛ lagɔgligbïï a -bɛ yɩ laa yɩnyɩ Klɩtɩɛwa ˈylɩmö. Maa sɛɛ -a ˈkä bhä -tiamö a Klɩtɩɛwaa yɩbhlɩnɩ ˈnɩ?

3. -Lu a -mu kää dɛsɛ wa yɩbhlɩnɩɛ -tiamö a Klɩtɩɛwaa ˈmö, -mu -lɛ, -tiamö a -wawʋ wa kä jijo ˈwʋ. (Zaah 13:34, 35) Wa nʋä ˈcɩa nɩɩ, mʋa kää dɛsɛ mʋa ziɛ käbö gwlɩ -gömö a nɩkpa ˈwʋ. ˈLɩlɩlɩ a dɔˈwʋ, wa nʋäˈɛ käbönɩkpaa -wa -wʋä -mä bhlɩ -mimi -gömö a -gblɩgblɛ ˈcɩa. (Tietiewaa 10:34, 35) Nza ˈwa gwɩ möä tʋ. Sɛɛ daayuë -wʋä, -sɩbhä -tiamö a Klɩtɩɛwaa -wʋä.—1 Zaah 4:20, 21.

4. Sɛ wa yɩbhlɩnɩˈɛ -tiamö a lagɔgligbëa miɛ nɩɩ, wʋ ˈmö a -nʋa Biblë ˈmö a wɛlɩ ˈmö wa zʋä tenyii ˈklʋkpamö. Biblë ˈmö wa libhïä Lagɔ ˈa wɛlɩɩ ˈmö ˈwʋ, ˈn wa ˈtɛɛnɩɛ ɛ ˈmö a wɛlɩ dlɩ. (Zaah 17:17; 2 Timotee 3:16, 17) Wa dɔˈwʋ, Lagɔ ˈa wɛlɩɩ mii ˈkä dɛsɛ mii ziɛ nɩkpa ˈa päpägböö -nyɛ wa dlɩpäsaa ˈsɔ wʋ. (Matie 15:1-3, 7-9) Sɛɛ Biblë gbää -sɩbhä wa zʋä -mä wa ˈkwädlɩ a -bhölɩbhölɩsa ˈmö. ˈWa ˈnyɛ nɩkpa lagɔwɛlɩɩ ˈwë, nzɩ wa ˈkɩˈɛ waˈbhï -gömö panɩ.—Tiitɩ 1:15, 16.

5. Lagɔ ˈa nglɩɩ ˈmö -tiamö a lagɔgligbëa ˈmö a -nʋa kää wa ˈkä ˈghlimanɩ. (Matie 6:9) Lagɔ ˈa nglɩɩ yɩ -lɛ Zoova, ˈmö Zezwii sʋlʋnɩɛ nɩkpa -mumuë. -Sɩbhä -tiamö a Klɩtɩɛwaa kää wa ˈkä ˈzʋmö. (Zaah 17:6, 26; Ghlɔɔmö a -nʋa 10:13, 14) Dɛ a glɩɛ, nɩkpa a -mʋä sʋlʋnɩ bhä Lagɔ ˈa nglɩɩ nɩkpa -mumuë ˈnɩ?

6. Lagɔ ˈa ˈKämanɔɔ ˈa wɛlɩɩ, ˈmö -tiamö a Klɩtɩɛwaa kää wa ˈkä bia. -Sɩbhä Zezwii ˈzʋmö a-a. Ɔ bhïla ˈkwädlɩ Lagɔ ˈa ˈKämanɔɔ ˈa wɛlɩɩ. (Lwiikö 8:1) Sɛˈɛ Zezwii ˈnyɛɛ ˈɔ ˈwʋ-bhlinɩwaa ˈdɩ nɩɩ, wa nɩ bia Lagɔ ˈa ˈtɩtɩ a -tɩtɩɩ -mä bhlɩɩ a këtiea ˈwuë -gömö. (Matie 24:14; 28:19, 20) -Tiamö a Klɩtɩɛwaa kɩɩ dlɩ ˈwʋ nɩɩ, Lagɔ ˈa Kämanɔɔ a ˈyize -kpöö, mʋ ˈkää mäˈä dʋdʋ ˈwʋ -tiamö a ˈtɩɩglɩnɔ -nyɛ -pälɛpälɛ a glɩglɛ ˈsɔ -lɛmö.—Psaume 146:3-5.

7. Zezwii a -nʋa ˈnɩɛ -kä wa ˈkä mäˈä ˈpɩwʋ a ˈyize a nɩkpazoku glaˈmö -wʋ. (Zaah 17:16) Waˈa -mä ˈpɩwʋ a politikö a wɛlɩ ˈmö -wʋ. Za waˈa mäˈä ˈpɩwʋ a kpɛnɩ kpɛnɛ ˈmö -wʋ. Nʋnʋsɛzokwëa, dlɩpäsɛzokwëa -nyɛ mäˈä ˈpɩwʋ a -lizoku ˈwuë ˈsɔ, wa ˈnɩɛ kɛ zɩ. (Zaakö 1:27; 4:4) -Lii ˈwuë -a yɩɛ dɛˈɛ ˈylɩmö yɩnyɩ ˈmö wa yɩbhlɩnɩɛ -tiamö a lagɔbʋbɔwa, a bhɛnɩ bhä a ˈkä lagɔzɩkpa anyɩ ˈmö a -nʋa nɛmöä -sɩbhä yɩbhlɩnɩ -a?

[ˈFoto yɔwʋ ˈa wɛlɩkïbhëa, kpʋ 26, 27]

-Tiamö a Klɩtɩɛwaa -wawʋ wa kä jijoˈwʋ, Biblë ˈmö a wɛlɩ ˈmö wa zʋä ˈklʋkpamö, ˈn wa bia Lagɔ ˈa ˈkämanɔɔ a wɛlɩɩ.