Roma

11 Adi bage, nungkun aku: Tulak Dibata nge umatNa?+ Lang! Aku pe kalak Israel, keturunen Abraham, bas suku Benyamin nari. 2 Labo tulak Dibata umatNa, umat si tangtangna perdiatekenNa.+ La kin teh kena kai si kataken sada ayat kerna Elia? Ngadu ia man Dibata kerna Israel, 3 “O Jahwe,* enggo bunuh kalak e nabi-nabiNdu, enggo hancurken kalak e ingan nutung* persembahenNdu. Gundari aku nari ngenca tading, bunuh kalak e tena aku.”+ 4 Tapi kai nina Dibata man bana? “Lit denga umatKu si la sujud man Baal, lit 7.000 kalak nari.”+ 5 Gundari pe bage ka, lit denga sada kelompok si kitik,+ si enggo ipilih perban kiniulin Dibata si luar biasa. 6 Pilih Dibata kalak e labo perban perbahanen kalak e,+ tapi perban kiniulinNa si luar biasa.+ Adi pilihen Dibata e perban perbahanen kalak e, berarti pilihen Dibata e labo perban kiniulinNa si luar biasa.

7 Adi bage, uga nge ninta? Kai si arapken kalak Israel labo datna, tapi si ndatsa eme kalak si enggo ipilih.+ Si deban lanai erpenggejapen pusuhna.+ 8 Si e bali bagi lit tertulis, “Entabeh ban Dibata perpedem kalak e.+ Seh asa gundari mata kalak e lanai erpengidah, cupingna lanai erpemegi.”+ 9 Daud pe ngataken, “Mbera-mbera pesta si ban kalak e jadi siding man kalak e, jadi jerat, jadi batu si erban kalak tertuktuk, ras jadi hukumen. 10 Banlah matana gelap gelah la erpengidah, banlah ia mbengkong perban baban si mberat.”+

11 Emaka nungkun aku, “Tertuktuk nge kalak e janah ndabuh seh ngasa lanai banci tedis?” Lang! Tapi perban kesalahen kalak e, kalak bas bangsa si deban nari iselamatken guna erban kalak e cemburu.+ 12 Kesalahen kalak e jadi kebayaken man doni enda. Reh urakna jumlah kalak e erban bangsa-bangsa si deban reh bayakna.+ Emaka pasu-pasu reh buena adi lengkap jumlah kalak e!

13 Gundari ngerana aku man kena si asalna arah bangsa si deban nari. Aku kap rasul si isuruh ku bangsa-bangsa si deban,+ kuergai kel pelayanenku man Dibata.+ 14 Kuusahaken erban cian ate bangsaku gelah piga-piga bas kalak e nari banci iselamatken. 15 Adi tulak Dibata kalak e,+ enda ertina doni erdame ras Dibata. Adi aloken Dibata kalak e mulihi, e ertina kalak e ipegeluh mulihi arah si mate nari. 16 Bage ka pe, adi sebagin arah campuren tepung si ipersembahken ianggap hasil si pertama janah e badia, kerina campuren tepung e pe badia. Adi urat sada batang kayu e badia, kerina dahan-dahanna pe badia.

17 Piga-piga dahan batang saitun ipotong. Tapi kena dahan saitun liar, icangkokken ku dahan-dahan batang saitun si enggo ipotong ndai. Alu bage ikut kena ngenanami kai si mehuli arah urat batang saitun si enggo ipotong ndai. 18 Emaka ula kena sombong man dahan-dahan e. Adi sombong kena man dahan-dahan e,+ ingetlah labo kena si mere urat man, tapi urat nge si mere kena man. 19 Jenari ning kena, “Dahan-dahan ipotong gelah banci aku icangkokken.”+ 20 Payo! Kalak e ipotong+ perban la erkiniteken, tapi kena tetap lit perban erkiniteken.+ Ula kena sombong, tapi hati-hatilah. 21 Adi dahan si asli saja banci potong Dibata, apai ka kena. 22 Gundari perdiatekenlah kiniulin+ ras hukumen Dibata. Ihukum Dibata dahan-dahan si ndabuh,+ tapi mehuli Ia man kena, gelah tetap kena bas kiniulinNa. Adi lang, kena pe ipotong ka. 23 Tapi, adi erkiniteken kalak e, banci kalak e icangkokken mulihi,+ perban ngasup Dibata ngelakokenca. 24 Adi kena saja pe, si ipotong arah batang saitun liar banci icangkokken ku batang saitun si ipelihara, amin pe e la biasa ilakoken, dahan si asli pasti banci icangkokken mulihi ku batangna sendiri!

25 O turang senina, gelah ula akap kena diri kena pentar, ateku teh kena min rahasia si badia+ enda: Piga-piga kalak Israel tetap la erpenggejapen pusuhna seh ngasa jumlah kalak si ipepulung bas bangsa si deban nari enggo lengkap. 26 Alu bage kerina kalak Israel+ iselamatken. Enda sesuai ras ayat si ngataken, “Si nelamatken e rehna i Sion nari,+ banna Jakup ngadi ngelakoken kejahaten. 27 Enda kap perjanjinKu man kalak e+ sanga Kuampuni dosa-dosana.”+ 28 Tuhu, kalak e jadi musuh Dibata perban tulakna berita si meriah, janah e erguna man kena. Tapi perban janji Dibata man nini bulang kalak e, kalak e ipilih jadi kalak si ikelengi.+ 29 Sebap labo berubah ukur Dibata man kalak si enggo pilihNa bage pe labo berubah ukurNa kerna pemere si enggo berekenNa. 30 Mbarenda la kena patuh man Dibata,+ tapi gundari enggo dat kena perkuah ate+ perban kalak e la patuh.+ 31 Emaka, banci dat kena perkuah ate perban kalak e la patuh janah gundari kalak e pe banci ndatken perkuah ate. 32 Enggo pediat Dibata kerina kalak bagi tahanen perban la patuh kalak e man baNa.+ Alu bage, banci cidahkenNa perkuah ateNa man kalak e kerina.+

33 Seh kel luar biasana kebayaken Dibata, kepentarenNa, ras pemetehNa! La banci siangkai kerina penghakimenNa, la banci siangkai kerina dalan-dalanNa! 34 Lit tertulis, “Ise kin si ngasup ngangkai perukuren Jahwe,* ntah ise kin si ngasup ngajarken Ia?”+ 35 Ntah, “Ise kin si pernah mere man Dibata maka arus balasNa?”+ 36 Sebap kerinana lit perban Ia, arah Ia, janah guna Ia. Man baNa me kemulian seh rasa lalap. Amin.