2 Timotius
3 Ingetlah, bas wari-wari pendungi+ reh pagi masa si sulit janah bahaya. 2 Sebap manusia pagi engkelengi dirina saja, mata duiten, tual, meganjang rukur, tukang hina, la patuh man orang tua, la meteh ngata bujur, la setia, 3 la lit kekelengenna, la nggit arih-arih, tukang pitnah, la kuasaina dirina, kasar, la tena ngena si mehuli, 4 penghianat, keras kepala, sombong, lanai diatena Dibata tapi kesenangenna saja si daramina, 5 tempa-tempa sembahna Dibata tapi la dalankenna kai nina Dibata.+ Kalak si bage, ula deheri. 6 Piga-piga arah kalak e nari masuk ku rumah-rumah alu cara si licik janah pengaruhina diberu-diberu si lemah, si mbue dosana, ras si ikuasai erbage sura-sura. 7 Diberu-diberu e lalap erlajar tapi la pernah datna pemeteh si tepat kerna kebenaren.
8 Bagi Jannes ras Jambres si nentang Musa, bage ka me kalak e terus nentang kebenaren. Tuhu-tuhu enggo ceda perukuren kalak e. Tulak Dibata kalak e perban la nggeluh menurut kiniteken. 9 Tapi, kai pe lanai banci lakoken kalak e, sebap jelas idah kerina kalak maka kalak e motu, bagi si terjadi man dua kalak ndai.+ 10 Tapi kam, enggo tuhu-tuhu ikutkenndu kai si kuajarken, si kudalanken,+ tujunku, kinitekenku, kesabarenku, kekelengenku, ras kesetianku. 11 Janah tehndu maka aku isiksa ras dat kiniseran i Antiokia,+ Ikoni,+ ras i Listera.+ Tetap aku setia* sanga ngadapi siksan e, janah selamatken Tuan* aku arah si e kerina.+ 12 Situhuna, kerina kalak si atena nggeluh sesuai ras peraten Dibata bas persadan ras Kristus Jesus isiksa ka nge pagi.+ 13 Tapi kalak jahat ras penipu reh dekahna reh jahatna, tipuna kalak janah ia pe kena tipu.+
14 Tapi kam, teruslah ikuti kerina si enggo pelajarindu, si enggo tekindu kenca lit si erban kam tek,+ perban tehndu ise si ngajarkenca bandu 15 janah mulai kin kam lahir+ enggo tandaindu Kitap si Badia+ si banci erban kam pentar janah iselamatken alu kiniteken man Kristus Jesus.+ 16 Kerina isi Kitap si Badia rehna arah Dibata nari+ janah erguna bas ngajar,+ ncidahken kesalahen, pekena kerinana, janah ilatihna kita guna ngelakoken kai si benar,+ 17 gelah budak Dibata tuhu-tuhu ngasup janah ilengkapi guna ngelakoken kerina perbahanen si mehuli.