Perbahanen Rasul-Rasul

2 Bas Perayan Pentakosta,+ kerina murid-murid pulung bas sada ingan. 2 Sanga kalak e kundul, rempet terbegi sora arah langit bagi sora angin si meter janah sora e ndemi rumah e.+ 3 Jenari lit idah kalak e tempa-tempa bagi dilah api janah merap ncinepi kalak e sada-sadai. 4 Kerina kalak e dem alu kesah si badia+ janah mulai ngerana alu erbage-bage bahasa menurut kai si bereken kesah e.+

5 Sanga si e, kalak Jahudi si tutus nembah Dibata si rehna arah erbage bangsa sangana i Jerusalem.+ 6 Emaka sanga terbegi sora e, pulung kalak e kerina janah mamang atena perban begina murid-murid ngerana bas bahasa kalak e sekalak-sekalak. 7 Takjup kel kalak e, nina, “La kin kerina si ngerana enda kalak Galilea?+ 8 Engkai maka sibegi kalak e ngerana bas bahasata sekalak-sekalak? 9 Kita me kalak Partia, Media,+ Elam,+ penduduk Mesopotami, Judea, Kapadokia, Pontus, Propinsi Asia,+ 10 Perigia, Pampilia, Mesir, daerah Libia si deher Kireni, kalak pertandang i Roma nari, kalak Jahudi, kalak si ngikutken agama Jahudi,+ 11 kalak Kreta, ras kalak Arab. Tapi sibegi kalak e ngerana bas bahasata sekalak-sekalak kerna perbahanen Dibata si luar biasa.” 12 Kerina kalak e takjup janah kemamangen, nina sada ras si debanna, “Kai ertina kerina enda?” 13 Tapi lit ka si nokohisa, nina, “Mabuk kap kalak e.”

14 Tapi tedis Petrus ras 11 rasul,+ megang ia ngerana man kalak e, “O kalak Judea ras kerina penduduk Jerusalem, begiken kataku enda. 15 Situhuna, kalak enda labo mabuk bagi pengakap kena, sebap gundari jam siwah erpagi-pagi* denga. 16 Tapi enda me si pernah kataken Nabi Joel, 17 ‘Nina Dibata, “Bas wari-wari pendungi Kucurcurken pagi kesah si badiaKu man erbage jelma. Ernubuat pagi anak-anak kena si dilaki ras si diberu, kalak si nguda denga i tengah-tengah kena ngidah pengenehenen* pagi, janah kalak si metua dat nipi.+ 18 Man budak-budakKu si dilaki ras si diberu pe Kucurcurken pagi kesah si badiaKu bas masa e janah kalak e pe ernubuat pagi.+ 19 Kuban pagi kai si luar biasa i langit ras tanda-tanda i doni eme dareh ras api bage pe asap si mekapal. 20 Gelap pagi matawari, bulan megara bagi dareh. Kenca si e reh pagi wari Jahwe* si mbelin ras mulia. 21 Ise pe si erlebuh man gelar Jahwe,* iselamatken pagi.”’+

22 “O kalak Israel, begikenlah kata-kata enda: Jesus kalak Nasaret eme utusen Dibata. Enda teridah arah perbahanenna si dem alu kuasa, mukjizat, ras tanda-tanda si cidahken Dibata arah ia i tengah-tengah kena,+ bagi si enggo teh kena. 23 Enggo serahken kena ia ku tan kalak perdosa guna ipakuken bas tiang* janah ibunuh.+ Kerna si e, enggo tentuken Dibata janah tehNa ope lenga terjadi.+ 24 Tapi pekeke Dibata ia+ alu mulahisa arah kuasa* kematen nari, sebap la mungkin ia tetap bas kuasa kematen e.+ 25 Nina Daud kerna ia, ‘Jahwe* tetap kutatap i lebe-lebeku, tetap aku paguh perban lit Ia i sebelah kananku. 26 Emaka meriah ukurku janah babahku ersurak dem keriahen. Kegeluhenku dem alu pengarapen. 27 Sebap labo pagi tadingkenNdu aku bas Kuburen,* labo pagi pediatNdu daging kalak si setia man baNdu macik bas kuburen.+ 28 TuduhkenNdu man bangku dalan kegeluhen janah meriah kel banNdu ukurku i lebe-lebeNdu.’+

29 “O turang senina, pediatlah aku ngerana alu terus terang man kena kerna nini bulangta Daud. Ia enggo mate janah ikuburken,+ kuburenna lit denga asa gundari. 30 Ia sekalak nabi janah tehna maka Dibata enggo ersumpah man bana guna erban salah sada keturunenna kundul pagi bas tahtana.+ 31 Idahna kai si nandangi terjadi janah ceritakenna kerna kekeken Kristus, Kristus la itadingken bas Kuburen* janah dagingna pe la macik.+ 32 Pekeke Dibata me Jesus e, janah kami kerina jadi saksi kerna si e.+ 33 Enggo iangkat ia ku sebelah kanan Dibata+ janah alokenna kesah si badia bagi si enggo janjiken Bapak,+ emaka curcurkenna ka ku kami bagi si enggo idah kena ras begi kena. 34 Daud labo nangkih ku surga, tapi ia si ngatakenca, ‘Nina Jahwe* man Tuanku, “Kundullah i sebelah kananKu 35 seh ngasa Kutamaken musuh-musuhndu i teruh nahendu.”’+ 36 Emaka, kerina min kalak Israel tek maka Jesus si bunuh kena bas tiang*+ enggo iban Dibata ia jadi Tuan+ ras Kristus.”

37 Kenca megi si e, sedak akap kalak e perban sedihna, emaka ning kalak e man Petrus ras rasul-rasul si debanna, “O turang senina, kai dage si arus lakoken kami?” 38 Ngaloi Petrus, “Ertobatlah+ janah kerina kena arus iperidiken+ bas gelar Jesus Kristus gelah dosa-dosa kena iampuni.+ Alu bage, aloken kena pagi pemere eme kesah si badia. 39 Janji enda+ labo ngenca man kena ras anak kena, tapi man kerina kalak bas ingan si ndauh pe, eme kerina kalak si lebuh Jahwe* Dibatata.”+ 40 Melala denga si kataken Petrus man kalak e guna mere kesaksin si terbagesen. Iahkenna ka kalak e nina, “Selamatkenlah diri kena arah kalak si jahat enda nari.”+ 41 Emaka iperidiken me kalak si ngaloken katana e.+ Bas wari e lit kira-kira 3.000 kalak si tambah jadi murid-murid.+ 42 Terus kalak e erlajar arah rasul-rasul nari, ercakap-cakap, man ras-ras,+ bage pe ertoto.+

43 Melala mukjizat ras tanda-tanda si ban rasul-rasul+ si erban kerina kalak mehamat man Dibata. 44 Kerina kalak si enggo tek e pulung janah kai si lit bas ia pakena ras-ras. 45 Dayaken kalak e erta-ertana+ janah hasilna ibagiken man kerina kalak, menurut keperlun tiap kalak.+ 46 Alu ersada ukur, tiap wari kalak e pulung i rumah pertoton, ras-ras man i rumah turang senina, erbagi pangan alu meriah ukur ras arah ukurna nari, 47 pujina Dibata, janah kerina kalak erngena ate man kalak e. Tiap wari tambahi Jahwe* jumlah kalak e alu nambahi jumlah kalak si iselamatken.+