Nlitan Jean a nga yen

9 Éngele tane a nga loñe toñe jé. A me nga yen ôteté ô so’o yôp ô kpwa’a si, a be nga ve ôteté ôte édiba’a ya mbile wo* ke édok ébé. 2 A nga yoé mbile wo* ke édok ébé, a ôtita ô nga vame mbil ôte* aval ane ôtita ya mbe’e nduan, a nlô jôbô a nga bo dibi a mfebe, a zene ya ôtita ô mbe ô so’o mbil* été. 3 A bitanda’a bi nga kui ôtita été a yametane si, a bi nga bi avale ngule da, ane ngule bekata ôlete be bili e si. 4 Be nga jô be na be bo te bo bijebejeba ya si mbia jam, nge ndamane bilo’o bi bili nyule bilok, nge élé éziñ, ve na be ndamane bôte be nji bi ndeme Zambe e mvome mesu jap.

5 A be nga ve bitanda’a ngul, sa ke na bi wôé be, ve na be wô’ô ényane tañe ngon étan, a ényane jap é mbe ane ényane môt a wôk éyoñe kata ôlete a di’i nye. 6 Melu mete, bôte ba ye jeñ awu, ve ba ye bo te yene de a zen éziñ, ba ye kômbô wu, ve awu da ye tube be.

7 A bitanda’a bi mbe bi funane bikabela bi ne nkômesan asu mewosan; jôm éziñ é too ane becouronne be gôlôt é mbe é bete be minlô, mesu map me mbe ane mesu me môta binam, 8 ve ésile jap é mbe ane ji binga. A mesôñe map me mbe ane ma bengbwengbwem, 9 a be mbe be bili bibene ba jaé tôé bi too ane bibene ba jaé tôé bi ne a étyé. Éduñe ya mefabe map é mbe ane éduñe ya ékabela ja limiti bewagon ba ke bita. 10 be bili fe akot a minsoñ ane bekata ôlete, a akote dap été, ngule ya di’i bôte tañe ngon étan é ne. 11 Be bili njô bôt, éngele ya édok ébé. Nkobô Hébreu, éyôlé jé é ne Abadôn,* ve nkobô Grec, éyôlé jé é ne Apolyôn.*

12 Mbia jame wua a lôteya. Tame yen! Mbia be mame befe bebaé ba zu mvuse mame mete.

13 Éngele samane a nga loñe toñe jé. A me nga wô’ô tyiñe jia é so’o minla’a mi ne autel mi ne nkôman a gôlôt a mi ne ôsu be Zambe, 14 é mbe é jô’ô éngele samane a mbe a bili toñe na: “Tiine beéngele benyin, mbe bete be ne ntiñetane beta ôsôé Euphrate.” 15 A beéngele benyin, ba be mbe nkômesan asu awolo, môs, ngon a mbu, be nga tiibane na be wôé ngabe jia ya mengabe melale me bone be bôt.

16 Tañe ya minsamba mewosane mi bôte be bete bikabela é mbe bizu’u bibaé ya bizuk;* me nga wô’ô tañe jap. 17 A avale di nde me nga yene bikabela ñyenan, a bôte be mbe be too bie yôp: Be mbe be bili bibene ba jaé tôé bi too nyule nduan é ne évele, a blum ane hyacinthe, a soufre ane nyule mfôl, a minlô ya bikabela biap mi mbe ane minlô bengbwengbwem, a nduan a ôtita a soufre be mbe be so’o menyu map. 18 Éyoñe wo kabe bôte mengabe melal, ngabe jia ya été é nga wu a zene ya minju’u milale mi: Nduan a ôtita a soufre be nga kui menyu map. 19 Ngule ya bikabela é ne menyu map a menjeme map, amu menjeme map ma ke mane a minlô mi ne ane minlô benyo, a ba bo bôt abé a minlô mite.

20 Ve mebuka’a ya bôte be nji ke wu a zene ya minju’u mite me nji jô’é mimboone ba bo a mo map, ba ke ôsu a kañe mbia minsisim a bengulemelane be ne nkôman a gôlôt a argent a mvot a mekok a bilé, mbe bete be se ngule ya yene nge wô’ô nge wulu. 21 A be nji jô’é mewôé me bôte map nge mboone mame ya ngbwele wop, mboone mvite mame ya bisô’ô* wop nge wube wop.