Kalate baa Paul a nga tili Bethessalonicien

3 Nde a bobejañ, kelané ôsu a ye’elan asu dangan, asu na mejô me Yéhôva* me ke ôsu a miaseban avôl avôl, a na me nyoñe duma avale da bobane be mia, 2 a na bi nyiiban be mbia be bôt, a be bôte ba kômbô bo bia abé, amu mbunan ô nji bo jôme bôte bese. 3 Ve Tate a yeme ba’ale élat, a ye ve bia ngule nyul a kamane bia be mbia môt. 4 Nde fe, amu bi ne beyé’é be Tate, bi too ndi na mia ba’ale mebendé mangan, a na mia ye ke ôsu a ba’ale me. 5 Tate a kele’e ôsu a ye’ele minleme mienan asu na, mi nye’e Zambe ngumba ngumba, a bo mbane ya jibi minjuk asu Krist.

6 A bobejañ, ma ve mia abendé jôé Tate Yésus Krist na mi sa’ale mojañ ase a nji wulu avale da yian, nyu a nji tôñe miñye’elane bi nga ve mia. 7 Amu miabebiene mia kôme yem avale mia yiane vu bia, amu éyoñe bi mbe a mia, bi nji nyiñ aval é ne te yian, 8 nge di éza bidi zezé. Ve bi nga saé, alu ba môse na bi bo teke beté môt éziñe ya be mia mbe’e ô ne mbia tañ bitul. 9 Sa ke amu bi nji be ngule ya jôé mia, ve amu bi mbe bi kômbô’ô ve mia mbamba éve’ela ya tôñ. 10 Mia kôme yeme na éyoñe bi mbe a mia, bi nga ju’u ve mia abendé di: “Nge môt éziñ a nji kômbô saé, a nji yiane di.” 11 Amu bi nga wô’ô na, bôte béziñe ya nsamba wônane ba wulu aval é nji yian, be nji kômbô bo ésaé éziñ, ve ba ke ba futi menyu éza mam. 12 E jôé Tate Yésus Krist, ma ve bôte bete melebe ma a abendé di na be saé a mo map asu na be di bidi bebiene ba te jeñ.

13 A bobejañ, kelané ôsu a bo mvaé teke tek. 14 Ve nge môt éziñ a bene tôñe melebe bia ve mia a zene ya kalate nyi, taba’ané ntyel a môt ate,* te mia ke ôsu a yeñ a nye asu na a wôk ôson. 15 Ve te mia yene nye ane nsiñe wônan, kelané ôsu a ve nye mebendé amu a ne monyañe wônan.

16 Tate ya mvo’é émien a kele’e ôsu a ve mia mvo’é mimfa’a mise. Tate a bo’ok a mia bese.

17 Mebatane mame ma, ma Paul, ma tili a wo wome mamien; nne ma sane bekalate bame bese nalé.

18 Beta mvame Tate Yésus Krist a tabe’e be mia bese.